Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Tej zaug nyob rau hauv lub neej, twb muaj ntau zaug peb tau hnov, ntau zaug tseem pom kiag tej nyuag kev sib khib uas ib tug ua rau ib tug nyob hauv tej tsev ua haujlwm, tej lub pab pawg, lossis nyob kiag hauv Pawg Ntseeg vim yog lub siab qia dub. Zaj kawm hnub no ceeb toom peb txhua tus yuav tau khiav kom deb tej haujlwm zoo li no.

Hnub no, yog hnub 28/09/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Chris Palmer dhau ntawm zaj kawm LUB SIAB QIA DUB

Nej tsis txhob ua ib yam dabtsi kom zoo rau nej lossis kom neeg qhuas nej xwb; tiamsis nej yuavtsum txo hwjchim thiab ib tug tsis txhob khav hais tias ib tug zoo dua ib tug. (Filipis 2:3).

Nyob rau ntawm kuv tus kheej kev xam pom, kuv pom cov neeg ua haujlwm hauv nomtswv lawv yeej muaj lub siab tsis ncaj. Ib qhov pivtwv uas kuv xav hais txog yog xyoo xaiv tsa thawj coj tebchaws nyob rau Mekas xyoo 1800. John Adams thiab Thomas Jefferson yog ob tug phooj ywg koom los mus ua ke sib tw zaum rau lub rooj ua tus tswj tebchaws. Thiab zaug xaiv thawj nom tswv kav tebchaws no tau dhau los mus ua zaug xaiv phem tshaj plaws nyob rau txhua tiam.

Ob phab sib tawm tsam, ua ke nrog tej lus qias neeg. Thomas Jefferson hais tias Adams yog ib tug neeg “coj tus cwj pwm qias neeg heev, pw ua ke nrog txiv neej thiab poj niam tib si, tsis muaj zog thiab tsis khov kho li ib tug txiv neej, nws kuj ho tsis yog mos muag ib yam li tus pojniam thiab.”

Tshuav Adams phab tau rov teb hais tias Jefferson yog ib tug neeg “saib tsis taus lwm tus, ib tug neeg poob qis, nws niam yog ib nrab roj tshav ntawm cov neeg tawv liab, tshuav nws txiv mas yog tus menyuam tsuam txoov ntawm cov neeg tawv dawb thiab tawv dub”.

Hais cov lus kawg ntawm txoj kev sib txeeb, Jefferson ntiav ib tug neeg hais dag txog Adams, tus neeg no hais tias Adams muaj lub siab xav ntaus lub tebchaws Fakis (pháp). Cov lus dag no cuag li muaj hwjchim. Coob tug neeg Mekas tau ntseeg cov lus dag no thiab Jefferson yog tus neeg yeej zaug ntawd thiab tau nom ua. Adams nyuaj siab thiab chim heev txog qib uas tsis tshwm ntsej muag nyob rau hnub uas Jefferson los txais nom. Nkawd ob tug yeej ib txwm yog phooj ywg zoo txawm cia tsis sib tham ua ke tau 12 xyoos txij li qhov xwm txheej hnub ntawd.

Los ntawm tej kev sib cais zoo li no, thaum kawg nkawd rov qab txuas tau txoj kev phooj ywg dua. Xyoo 1812, Adams sau ntawv foom hmoov xyoo tshiab rau Jefferson. Jefferson teb tuaj, thiab rov nco txog tej lub sijhawm zoo uas nkawd tau muaj ua ke thaum tseem yog phooj ywg zoo. Nyob rau 14 xyoo tom qab, nkawd yeej tseem ua phooj ywg zoo ua ke thiab tau sau ntawv sib nug txog 158 tsab ntawv.

Hmoov tsis raug, ob tug yog phooj ywg no thiab kuj yog ob tug yeeb ncuab tau tuag nyob rau tib hnub ua ke. Hnub 4 hli 7 xyoo 1826, ua koob tsheej nco txog 50 xyoo tebchaws muaj yeej tau txais kev ywj pheej uas tagrho ob tug tau koom tes sau tau. Ob tug tau koom ntsib dhau txhua yam, tagnrho tej kev iab siab txog kev sib faib thaum uas nyias xav txog nyias tus kheej tau tsim muaj. Qhov uas tsis zoo yog nkawd tau zam tsis dhau.

Nyob hauv Filipis 2:3, Vajtswv Txojlus ceeb toom peb txog kev sib faib pib los ntawm peb tus kheej lub siab qia dub thiab ntuas kom peb yuav tau zam tej ntawd. Nyob ntawm no, Paulus tab tom sau ntawv xa rau Pawg Ntseeg Filipis, qhov chaw uas cov ntseeg muaj qee tus tab tom sib txeeb (Saib Filipis 1:15-18). Paulus muaj cov lus ntuas zoo txog tej kev sib txeeb no. Yawg hais “Txhob ua ib yam dab tsi twg vim yog lub siab hlob, lossis lub koob npe yuav puas mus…”

Lo lus “Lub siab qia dub” nyob hauv lus Kilis yog eritheia. Nws muaj ntsiab tias “sib tawm tsam”, “sib ceg” thiab “sib khib”. Tus tub txawg neeg Kilis Aristotle tau siv lo lus eritheia nyob rau hauv nws phau ntawv hais txog kev tswj teb chaws thaum tham txog txhua tus uas yuav los sib txeeb zaum rau lub rooj ua tus nom loj tswj teb chaws lawv siv txoj kev tsis ncaj ncees. Txhais tau tias kom lawv ua tiav lawv lub homphiaj, lawv yuav siv txhua txoj kev phem yuav los ua rau tus tav lawv kev.

Ntawm no Paulus tab tom hais rau peb tias tej no tsis yog tsuas tab tom tshwm sim nyob rau hauv kev tswj hwm tebchaws xwb. Tiamsis tseem tshwm sim nyob rau hauv Pawg Ntseeg thiab. Cov ntseeg sib khib heev kom nce tau mus zaum rau ntawm tej thaj chaw siab ua thawj coj, kom dhau los muaj koob npe, tau coob leej ntau tug tuaj nws tog. Paulus ceeb toom kom lawv yuav tsum nres tamsim.

Yooj yim yog nyob rau hauv Vajtswv Pawg Ntseeg tsis muaj chaw rau txoj kev sib khib no vim nws yuav ua rau muaj teeb meem thiab sib faib. Yexus Khetos lub cev tsis pub kom faib cais (1 Kauleethaus 1:10, 13). Hloov qhov uas nqua hu rau yus tus kheej, peb ib leeg yuav tau ua haujlwm pab rau ib leeg raws li tus qauv uas Tswv Yexus tau ua pub rau peb.

Koj puas tau muaj zaum twg tau ua ib yam dabtsi vim koj txoj kev qia dub ntawm tus kheej lawm tau, kom thaum kawg ua rau ib tug kwv tij nkauj muam twg nyob rau hauv Yexus Khetos lub npe yuav tau them ib tug nqi uas kim heev lawm tau? Tej zaug koj yuav tsis hais tej lus phem ntxo luag, rhuav ntsej rhuav muag, tiamsis tej zaug koj ho tau hais tsis zoo txog luag lub koob npe kom koj tau suab npe zoo rau tus kheej. Txawm yog koj tab tom caum ib yam twg los qhov ntawd yuav tsis tsimnyog tseg rau koj los sib khib, ua rau muaj txoj kev sib faib cais nyob rau hauv Vajtswv haiv neeg.

Yog koj tab tom nrog lwm tus sib txeeb, ua li cas koj ho tsis sim lwm txoj kev tshiab? Hloov qhov uas koj siv zog txo luag lwm tus nqis, vim li cas koj ho tsis ua haujlwm pab lawv? Thaum ntawd tagnrho peb txhua tus puavleej yuav tau txais yam zoo thiab Vajtswv teg haujlwm yuav tawg paj txi txiv.

Thov caw nrog kuv peb thov Vajtswv ua ke: Tus Tswv, thov kom txhua yam kuv ua yuav tsis pib los ntawm lub niag siab qia dub tiamsis yuav ua haujlwm los ntawm txoj kev hlub li Koj tau hlub, kom Pawg ntseeg koom ib lub siab thiab Koj tes haujlwm loj hlob. Kuv thov hauv Yexus Khetos lub npe. Amees.

Cov kwv tij txhua tus, yog koj tab tom muaj ib lub siab lossis tab tom siv zog ua phem rau ib tug kwv tij nkauj muam twg nyob hauv Pawg Ntseeg, ntseeg tias dhau ntawm zaj kawm hnub no, koj yuav tau Vajtswv ntuas, ceeb toom, thiab nres kiag txoj haujlwm ntawd. Thov Vajtswv pab ua rau kom koj muaj lub siab tshiab thiab Nws txoj kev hlub tshiab.