Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Koj lub neej puas tau muaj dua ib zaug ntsib dhau ib lub kwj ha tob tob uas koj xav tias yuav tsis muaj dua ib zaum twg yuav rov qab ntsia pom qhov kaj dua ib zaug ntxiv li lawm? Txawm yog txoj kev mob no yuav loj, yuav muaj kev tu siab ntau, los nyob rau ntawm Vajtswv, tsis muaj ib yam dabtsi uas yuav ua tsis tau. Thiab leej twg ntseeg Vajtswv, muab nws lub neej fij rau Vajtswv ua tus coj kev, ces lub sijhawm rov qab ua dua lub neej nyob kiag ntawm nws xub ntiag. 

Hnub no, yog hnub 29/01/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Terry Meeuwsen  dhau ntawm Zaj kawm SIJHAWM ROV QAB UA DUA LUB NEEJ

Nej tau tuavhauv ua phem rau kuv lawm tiag, tiamsis Vajtswv tau muab qhov phem ntawm hloov ua qhov zoo, ua li ntawd thiaj cawm tau coob leej txojsia, ib yam li nej pom hnub no ntag (Chivkeeb 50:20)

Kuv pib ua haujlwm nyob rau hauv kev xa xov xwm ntawm Milwaukee rau xyoo 1978. Txawm yog yeej ib txwm tsis tau sib tham nyob rau saum xov xwm los thaum nyuam qhuav pib ua haujlwm xwb, kuv hnov cuag li nyob hauv tsev. Qhov uas tau tib neeg txhua tus coob coob paub txog ua rau kuv muaj sijhawm ntau los tham txog kuv txoj kev ntseeg. Tiamsis cuag li leej twg twb paub tias kuv yog ib tug ntseeg Vajtswv yog li khwv heev rau kuv thaum uas kuv yuav tham rau sawv daws paub txog kuv twb tau sib nrauj. Caij ntuj no xyoo ntawd, txhua zaug uas kuv tas sijhawm ua haujlwm, kuv rov qab twj ywm los rau hauv lub tsev ntsiag to txias zias ntawd. Hnov qaug zog zis thiab nyuaj siab ntsuav, kuv nce mus pw rau saum txaj nrog lub mom tseem ntoo rawv saum taub haub, tsho sov yeej tsis tau hle, khau los yeej tseem rau rawv ntawm ko taw, kuv pw txog kaj ntug. 

Kuv tsis paub tias daim duab pos huab nti ntawm tej kev nyuaj siab thiab khoob lug no twb pib yaws mus thaum twg. Tiamsis kuv nco mas lub caij ntuj tshiab xyoo ntawd, kuv hnia tau tus ntxhiab qab zib ntawm tej av tom qab uas cov daus khov rau saum pem teb pib yaj zuj zus. “Nyob tim tej ntug nroog paj ntoos tawg ntsa iab. Tamsim no yog lub caij hu nkauj lawm ntag; hnov nquab quaj zom zaws hauv tej teb tuaj.” Ib yam li tau hais txog nyob rau hauv Xalumoos Tej Nkauj 2:12. Kuv txhais ruam mus ntxiv. Kuv tsis muaj siab yuav sib tham thiab kuj tsis muaj siab yuav muaj dua ib txoj kev hlub tshiab. Txawm yog kuv nyiam menyuam los kuv yuav tau txais yuav ib qhov tseeb tias yus tsis muaj menyuam nyob rau thawj zaug sib yuav ntawd. Kuv twb muaj 30 xyoo lawm, thiab qhov uas yuav rov qab yuav txiv thiab muaj dua ib lub cuab yig yog ib yam uas nyob deb heev thiab yuav tsis yooj yim tshwm sim li. Tiamsis Vajtswv muaj dua lwm lub homphiaj tseg rau kuv. 

Kuv ntsib Andy Friedrich nyob hauv ib pluas mov zoo siab txog ib tug phooj ywg tau so haujlwm thaum laus lawm. Ntau xyoo dhau los Andy kuj nrauj nws poj niam, thiab tom qab dhau ntau txoj kev ntxhov siab thiab tshawb nrhiav, muaj ib tug phooj ywg tau coj nws los cuag Tswv Yexus. Thaum ntawd Andy tsis paub ntau txog Vajluskub, lossis kuj tsis tau mus pehawm Vajtswv lossis koom rau ib pawg kawm Vajluskub twg. Thaum pib wb sib ntsib thiab sib tham txog Vajtswv. Raws li lub sijhawm, kuv lam teb lus yuav nrog nws ntsib ua ke ib zaug, tiamsis hauv lub siab yeej tseem tshuav ib yam dab tsi ntshai nyho. 

Txawm yog Andy twb npaj txhij yuav muaj dua ib txoj kev hlub tshiab los kuv yeej tseem ntshai – yog li yam nws yuav tau ua yooj yim yog tos. Los ntawm txoj kev ua siab mos siab muag, siab zoo thiab ib txoj kev ua siab ntev tos txaus xav ntawd, Andy tau rhuav tshem txhua lub phab ntsa thaiv uas kuv tau tsim muaj. Andy ncaj ncees rau Vajtswv, yog ib tug neeg txaus ntseeg siab, muaj txoj kev sib cog lus ua ke rau Vajtswv thiab rau kuv. Wb thiaj rov qab sib yuav tom qab ib xyoo ntau pib sib tham. 

Vajtswv tau siv Andy ntau txoj kev los kho kom kuv tej qhov txhab qub zoo. Nws coj dua ib lub hauv paus pib dua tshiab los rau wb ob leeg, muaj sijhawm rov qab ua dua lub neej muaj kev cia siab rau lub neej tom hauv ntej. Thiab thaum no kuv twb yog ib leej niam – tsis yog ib tug, ob tug xwb tiamsis yog xya tus menyuam, ib tug twg yog ib qhov khoom plig muaj nqis, zoo tshaj plaws uas Vajtswv tau pub. Ntseeg tias Vajtswv tau pub rau kuv ntau tshaj dua li tej uas kuv cia siab thiab taij thov. 

Ib nyob rau hauv tej xwm txheej hauv Vajluskub uas kuv nyiam tshaj plaws yog zaj xwm txheej txog Yauxej tus kheej nyob rau hauv Chivkeeb. Raug cov tijlaug muab muag mus ua qhev, coj mus txog rau ib lub tebchaws deb tsis paub dua, raug luag liam txim thiab raug muab coj mus kaw rau hauv tsev rau txim, tsis muaj ib txoj kev cia siab twg tias yuav rov qab tau ntsib tsev neeg, Yauxej nyob rau hauv ib lub caijnyoog cia li tsaus ntuj tshaj plaws hauv lub neej. Txawm li los, Vajluskub yeej hais tias, “Vajtswv yeej nrog nraim yawg nyob”. 

Vajtswv tso cai rau tej kev sim siab los kom tus yamntxwv zoo nyob rau hauv Yauxej loj hlob tuaj. Yauxej poob ntau xyoo los tos thiab muaj kev txomnyem ua ntej uas ntsia pom Vajtswv lub homphiaj. Vajtswv siv Yauxej cawm tebchaws Iziv, tej tebchaws ib ncig thiab nws tsev neeg. Tej kev npaj thiab Vajtswv lub homphiaj loj dua thiab zoo tshaj ntau peb tib neeg li. 

Rov qab saib nws lub neej, Yauxej hais tias, 

“Nej tau tuavhauv ua phem rau kuv lawm tiag, tiamsis Vajtswv tau muab qhov phem ntawm hloov ua qhov zoo, ua li ntawd thiaj cawm tau coob leej txojsia, ib yam li nej pom hnub no ntag” (Chivkeeb 50:20). 

Qhov tseeb no kuj rov qab tau hais txog dua ib zaug ntxiv nyob rau hauv tsab ntawv Loos hauv phau Vajluskub tshiab. 

“Peb paub hais tias peb cov uas hlub Vajtswv, txawm yog peb tau zoo thiab txomnyem los Vajtswv yuav ua kom tej ntawd muaj nqis rau peb cov uas Vajtswv pom zoo hu los raws li Vajtswv npaj tseg lawm” (Loos 8:28). 

Ua Vajtswv tsaug vim Koj yeej tseem pub rau kuv rov qab muaj sijhawm ua dua lub neej, thiab pub rau tag nrho txhua tus uas muaj lub siab ntseeg rau Koj.

Thov caw nrog kuv peb thov Vajtswv ua ke: Ua Vajtswv Koj tsaug txog tej ntsiab lus Koj yuav rov qab ua kom muaj sia dua tau nthuav tawm nyob rau hauv Koj txojlus. Ua Vajtswv Koj tsaug vim Koj lub homphiaj loj dua thiab zoo dua tej uas kuv yuav xav tau. Thov pab rau kom kuv coj ncaj nyob rau tej lub sijhawm muaj kev sim siab. Thov pab kho kom kuv lub neej mus raws li Koj lub siab nyiam. Thiab thov kom Vajtswv tus ntsujplig muaj sia ua rau kom kuv tshiab txhua hnub. Kuv thov hauv Tswv Yexus Khetos lub npe. Amees.

 Cov kwv tij txhua tus, yog tias koj tab tom hnov tsaus ntuj nti vim qhov tsaus ntuj ntawm tej xwm yuam kev tab tom voob nkaus puas ncig, cia li khiav mus cuag Vajtswv thiab ntseeg Nws. Yog tias koj tau Vajtwv ceeb toom txog tej kev txhaum tau ua yuam kev nyob rau lub neej yav dhau los, cia li lees txim. Cia li txais lub zog tshiab ntawm Vajtswv thiab mus ntxiv thiab txais yuav lub neej tom ntej ci ntsa iab  uas Vajtswv tseg rau tus uas muab nws lub neej fij rau Vajtswv ua tus coj kev.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.