Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Txhua txhua hnub uas tseem muaj sia ua neej nyob, tau kawm, tau ua haujlwm, tau ntsib dhau ntau yam, tau txais tag nrho txhua yam puav leej yog tej koob hmoov Vajtswv pub, tiamsis peb tib neeg feem ntau pheej hnov qab Vajtswv. Txawm yog li ntawd los ua Vajtswv tsaug thaum uas peb tib neeg pheej hnov qab los Vajtswv txojlus ntuas kom peb yuav tau nco ntsoov thiab paub ua Vajtswv tsaug txhua hnub. 

Hnub no, yog hnub 29/03/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Debbie Skinner dhau ntawm Zaj kawm CIA LI UA VAJTSWV TSAUG

Cia li ua tus Tswv tsaug, rau qhov nws yog tus muaj lub siab zoo, thiab nws txojkev hlub nyob mus ibtxhis. (Ntawv Nkauj 118:1). 

Ib txoj haujlwm nyob rau hauv tej haujlwm txhua hnub uas kuv tus ntxhais ua pab tsev neeg yog ntxuav tej tais diav. Hmoov tsis zoo, kuv zoo li coob tug tub ntxhais muaj haujlwm ntau, ntau zaug nws hnov qab ua haujlwm lossis cia lwm yam los cuam tshuam xws li, hu xov tooj, saib tivi los tav kom nws ua tsis tiav nws tes haujlwm. Thiab thaum zoo li ntawd kuv yog tus yuav tau ceeb toom rau kom kuv tus ntxhais nco thiab nws txhob hnov qab nws tes haujlwm. Tsis ntev los no, muaj ib zaug thaum tau kuv hais, kuv tus ntxhais thiaj teb, “Yog koj tsis hais kuv yeej paub mas”. Kuv tus ntxhais dhau los paub nws lub luag haujlwm nyob rau hauv tsev, tiamsis kuj muaj ntau zaug tej ntim tais diav txawb ua tej pawg tsis tau ntxuav thiab kuv tseem yuav tau “maj mam hais” kom nws nco. 

Dhau ntawm tej uas kuv tus kheej tau ntsib dhau, kuv pom tias peb txhua tus puavleej cheem tsum kom muaj ib tug twg hais peb. Los ntawm txoj kev ua siab ntev Vajtswv tau muab ntau txoj kev cob qhia, ntau zaj kawm tso rau hauv Vajluskub cia coj kev rau peb lub neej. Vajtswv yog Leej Txiv Saum ntuj ceebtsheej zoo kawg nkaus, puv npo kev hlub, yog li Nws thiaj siv Nws tej lus pub rau peb uas yog Nws cov menyuam zoo li tej lus maj mam hais cheem tsum heev. Vajtswv hais mus hais los thoob plaws Vajluskub pab kom peb nco qee yam uas peb pheej hnov qab. 

Kuv yeej tseem tsis tau nrhiav pom cov lus ntuas txog yuav tau “ntxuav tais diav” nyob rau hauv Vajluskub kom kuv thiaj yuav muaj cuab kav qhia rau kuv tus ntxhais, tiamsis muaj ib lo lus tau hais mus hais los kwv yees li 20 zaug nyob rau hauv Vajluskub ua rau kuv ceev faj txog ntawd yog. Cia li ua Vajtswv tsaug. 

Muaj ib hnub, kuv ua tib zoo los xav txog vim li cas Vajtswv ho kom peb yuav tau ua tsaug? Vim li cas Vajtswv ho ceeb toom kom peb yuav tau nco Nws txiaj ntsig? Thaum uas kuv xam txog kev ntxuav tais diav ntim ntawm tsev neeg kuv pom txog qhov teeb meem: vim yog peb pheej hnov qab!

Nyob hauv zaj xwm txheej Tswv Yexus kho mob rau 10 tus neeg mob ruas tau sau nyob hauv Lukas 17:11-19, peb pom cov tib neeg no lawv tau mus cuag, taij thov Tswv Yexus pab lawv, tiamsis tom qab lawv tau kho zoo tsuas muaj ib tug thiaj tig rov qab los ua Nws tsaug xwb. Tswv Yexus thiaj nug tias: “Kaum leej twb zoo huv tibsi lawm; cuaj leeg dua twg tas lawm?” Hnov chim siab tshaj plaws thaum uas Tswv Yexus txais tau kaum lo lus taij thov kev pab, tiamsis tsuas muaj ib tug rov qab los hais lus “ua tsaug” dhau ntawm “Tsa suab hlo qhuas Vajtswv”. Kuj zoo ib yam li tug mob ruas tsis nco txiaj ntsig ntawd, tag nrho peb txhua tus kuj yooj yim hnov qab kev ua Vajtswv tsaug. 

Vajtswv yog tus zoo kawg nkaus thiab niaj hnub pub rau peb tej uas peb cheem tsum hauv lub neej. Nws pub rau peb tej kev cheem tsum ntawm sab nqaij tawv xws li, mov noj, ris tsho hnav, vaj tsev nyob. Nws pub txoj kev sib hlub rau peb dhau ntawm kev sib raug zoo hauv tsev neeg, phooj ywg. Vajtswv kho zoo tej kev tu siab, muab tej kev tsis sib raug zoo uas pob puas tas rov qab kho kom zoo. 

Tiamsis nyob rau hauv Ntawv Nkauj 118, Vajntxwv Daviv qhia paub txog ib feem tseem ceeb dua  kom paub tias vim li cas Vajtswv ho yog tus tsimnyog rau peb txoj kev ua tsaug. Ntawd yog vim “Nws txoj kev ua siab ntev nyob mus ib txhis”. 

Lo lus no hais mus hais los 40 zaug nyob hauv Vajluskub thiab nthuav tawm lub ntsiab lus tob heev. Vajtswv kev ua siab ntev, yog ib txoj kev hlub nyob mus li, nws tsis hloov pauv txawm yog tus neeg txais yuav coj tus cwjpwm zoo li cas. Vajtswv txoj kev ua siab ntev yeej ruaj khov, muaj zog txawm yog nyob kiag rau ntawm tej kev txomnyem. Vajtswv kev ua siab ntev yuav nyiaj qees mus dhau tej kev sim siab thiab tsis muab tso tseg ib zaug. Vajtswv kev ua siab ntev yog ib qhov pov thawj nthuav tawm txoj kev tau muab zais cia uas Vajtswv tseg rau peb. Tseeb tiag, puas tseem yuav muaj yam dab tsi zoo tshaj, tsim nyog tshaj dua Vajtswv kev ua siab ntev kom peb yuav hais lus ua tsaug rau lossis tsis muaj?

Thov caw nrog kuv peb thov Vajtswv ua ke: Kuv ua Vajtswv tsaug vim Koj yog tus zoo, Koj kev ua siab ntev nyob mus ib txhis. Thov kom txhua hnub nyob rau hauv kuv lub neej yuav tsis hnov qab Koj txiaj ntsig, thiab ua lub neej nthuav tawm tus yam ntxwv ua tsaug dhau ntawm kev ua haujlwm pub rau Koj. Kuv thov hauv Tswv Yexus Khetos lub npe. Amees.

Cov kwv tij, tej hnub dhau los tsis paub koj puas hnov qab ua Vajtswv tsaug lossis tsis hnov? Cia siab tias dhau ntawm zaj kawm no, koj yuav xav txog txhua txoj koob hmoov uas Vajtswv tau ua rau hauv koj lub neej thiab hais lus ua Nws tsaug, tamsim no thiab txhua txhua feeb nyob rau hauv lub neej.