Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Puas tau muaj ib zaug twg koj mus txog rau thaj chaw noj mov uas koj ib txwm nyiam noj kaj siab lug vim yuav tau saj tej zaub mov qab qab uas koj nyiam noj, tiamsis thaum kawg koj tag kev cia siab vim yam koj txais tau puav leej txawv tej uas yav tas los? Thaum uas koj ntsib dhau li ntawd yuav tsis xav rov qab mus rau ntawm lub tsev noj mov ntawd. Yog tias muab kev mus noj mov thiab kev mus pehawm coj los sib piv koj puas pom tias ob qhov no nws zoo sib thooj?

Hnub no, yog hnub 29/10/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Dan Betzer dhau ntawm zaj kawm NQOS TSI TAUS

Yog li ntawd, nej ib tug yuav tsum txhawb ib tug zog, thiab ib tug pab ib tug, ib yam li niaj hnub no nej ua (1 Thexalaunikes 5:11)

Tsis ntev los no, wb ib niam txiv tau rov mus noj mov hauv lub tsev muag zaub mov nyob rau lub nroog uas wb tau nyob yav dhau llos. Kuv nco kuv nyiam lub tsev noj mov no heev thaum lub sijhawm ua neej nyob hauv: cov ua haujlwm zoo, tej zaub qab, thiab thaj chaw noj zoo kawg nkaus.

Wb tos kom rov tau noj ib pluag zoo li no dua ib zaug ntxiv. Cov ua haujlwm lawv yeej tseem ua zoo tiamsis tej zaub mov noj yog yam ua rau ntseeg tsis tau kiag li. Kuv hu ib daim tav, kuv nco tias daim tav thaum ub mas luaj ib xib taws. Tiamsis yam uas kuv txais tau tamsim no yog ib yam dabtsi txawv ua rau kuv xav tsis thoob.

Kuv xav mas ntshe ntawd yog ib daim khaubhlab lawv muab coj mus tsaws kom muag muag tas muab ib cov kua coj los ywg rau saud tsis paub meej tias yog cov kua dab tsi. Nyob rau hauv tag nrho daim tav uas lub tsev muag khoom nqa los, tsis muaj ib tus tav twg puv nqaij li.

Thaum kuv nug tus neeg ua haujlwm txog tej no, nws plhu liab ploog thiab hais “Peb lub tsev twb raug muab muag rau ib lub tuamtxhab ua haujlwm loj lawm thiab peb tsuas ua raws li tej uas lawv qhia tseg xwb”.

Kuv nco thaum uas nyuam qhuav nkag los rau hauv tsev, cuag li tsis muaj dab tsi, tsis pom ib tug neeg nyob qhov twg li, tiamsis nyob rau yav tas los yog tias yuav mus rau hauv lub tsev noj mov no, yuav tau nres tos.

Yog tias lub tuamtxhab ntawd xav tias cov qhua yuav tuaj noj rau hauv lawv lub tsev ntxiv vim lawv tsuas xav yooj yim tias yav dhau los nws twb yog ib lub tsev noj haus muaj koob npe lawm, ces kuv ntseeg tias lawv twb kawm tau ib zaj kawm meej meej lawm. Txhua tus lawv yuav mus rau ntawm thaj chaw uas lawv tau txais yam zoo thiab noj qab ncauj tsis yog lub koob npe yav dhau los.

Tamsim kuv kuj pom tias ntawm no kuj yog zaj kawm tseg rau Pawg Ntseeg. Niaj hnub nimno, muaj ntau lub Pawg Ntseeg kuj tsis muaj neeg, yav dhau los cov Pawg Ntseeg ntawd yog tej Pawg Ntseeg huamvam! Puas yog cov thawjcoj lawv tsuas tshua txog lub koob npe, meej mom, ntau zaug tseem yog tej yam zoo yav dhau tsi nco txog qhov tseeb ntawm Pawg Ntseeg.

Thaum tej rooj tog nyob rau hauv tuamtsev tsis muaj neeg zaum, lawv nroo txog txoj kev coj noj coj ua tamsim no, tias cov ntseeg khiav caum khoom ntiajteb, tso sab ntsujplig tseg. Qhov tseeb tiag ntawm tej teeb meem no yog lawv noj tsis tau tej zaub mov muab rau rau saum rooj tseg rau lawv noj. Tsuas yooj yim li no xwb.

Kuv ntseeg tias cov tib neeg niajhnub nimno lawv yeej tseem tshaib nqhis Vajtswv. Qhov teeb meem yog ntau lub Pawg Ntseeg lawv tsuas tsom ntsoov rau sab nraud xwb, ua li cas kom Pawg Ntseeg zoo, tej kev cai pehawm zoo, tej suab nkauj mloog kom zoo, muab tso rau sawv daws saib kom zoo, dua li uas tsom ntsoov rau cov tib neeg uas twb tau Vajtswv txoj kev hlub chwv txog.

Yuav tau saib xyuas cov tswv cuab hauv Pawg Ntseeg, cia li thov Vaj Ntsujplig ua tus coj kev kom Vajtswv txojlus tau nthuav qhia thiab puv npo koob hmoov kom ua rau txhua tus puavleej txais tau Vajtswv txojlus li tsimnyog tau txais. Cia txoj kev hlub tseeb thiab kev ua haujlwm tag siab los sib pab nyob rau hauv Yexus Khetos lub cev.

Yog li ntawd, nej ib tug yuav tsum txhawb ib tug zog, thiab ib tug pab ib tug, ib yam li niaj hnub no nej ua (1 Thexalaunikes 5:11)

“Nej tsis txhob xav txog nej xwb, tiamsis nej yuav tsum xav txog lwm tus thiab” (Filipis 2:4)

Thov caw nrog kuv peb thov Vajtswv ua ke: Tus Tswv Thov Koj Tus Ntsuj plig puv npo koob hmoov rau saum txhua lub Pawg Ntseeg, kom dhau ntawd cov ntseeg txais tau Koj txoj lus puv npo lub hwj chim, saj tau txoj kev hlub hauv tsev neeg ntseeg, thiab koom ua ke nrog Pawg Ntseeg. Kuv thov hauv Tswv Yexus Khetos lub npe. Amees.

Cov kwv tij ntxiv rau qhov uas tsis txaus siab rau Pawg Ntseeg, vim koj hnov tias tej kev cheem tsum ntawm sab ntsuj plig tseem tsis tau txaus, cia li thov Vajtswv pab rau Pawg Ntseeg, rau cov thawj coj tau Vajtswv txoj koob hmoov, kom lawv siv zog koom tes rau kev ua hauj lwm, txhawb lwm tus txoj kev ntseeg, txhawb zog rau cov ntseeg qaug zog rov los rau hauv Vajtswv lub tsev.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.