Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Thaum uas ua poob ib qhov khoom muaj nqis, tsis yog muaj nqis vim yog tau nyiaj ntaub xwb, tiamsis tseem muaj kev hlub nyob rau hauv thiab ces ntseeg tias los ntawm txhua txoj kev, koj yuav nrhiav kev kom txhiv tau rov qab los. Vajluskub qhia paub tias Vajtswv saib peb txhua tus muaj nqis, qhov pov thawj yog Tswv Yexus tau los thiab siv kiag Nws txoj sia los txhiv peb txhua tus rov qab rau Vaj Leej Txiv. 

Hnub no, yog hnub 30/01/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kathy Thomas dhau ntawm Zaj kawm LUB NPLHAIB TAU TXHIV ROV LOS

Vim Yexus Khetos tuag txhiv peb lub txim, Vajtswv thiaj zam txim rau peb. Vajtswv txoj kev hlub loj kawg li. (Efexaus 1:7)

“Zoo siab rau koj hnub yug thiab zoo siab rau koj hnub sib qhaib!”

Tus neeg ua haujlwm ntawd tej lus hais tsimnyog yuav ua rau muaj kev zoo siab luag ntxhi. Tiamsis kuv ho saib ntsoov rau tus txiv neej ntawd thiab ua xyem xyav. Tom qab ib lub sijhawm ntsiag to tos ntev, kuv hais tsis tsheej lus, “awj, as, ua koj tsaug tiamsis nws yeej tseem tsis tau thov kom tau yuav kuv”. 

Tus neeg ua haujlwm ntawd txoj kev txaj muag tshwm meej heev rau saum nws lub ntsej muag thaum nws thov kev zam txim vim tau ua kom txhua yam nthuav tawm tas lawm. Nyob rau ib lub sijhawm dhau mus sai heev li ntawd, kuv hnov tus txiv neej no tseem hnov txaus hlub dua kuv tus kheej lawm thiab. Kuv tus hlub, nws muaj ntsis ntshai, tsis txais tau txoj kev khuv xim twg li, vim nws nyob nyob cia li luag nrov nrov rau kuv los ntawm lub rooj tid tuaj. 

Tsis yog kuv tsis paub ua ntej tias hmo no tseem ceeb. Vim ntawd yog kuv ua kev nco txog hnub yug thaum muaj 18 xyoo. Thiab kuv txiv tau muab nws lub tsheb uas nws suav tias muaj nqis tshaj nrog nws cov ntawv rho nyiaj thiab nws cov ntawv uas yog qhua zoo hauv lub tsev noj mov ntawd rau kuv kom tab pov tau tias wb yuav muaj ib hmos tseem ceeb heev. 

Tag nrho txhua yam tshwm ntawd tau hais meej meej txog ob lo lus “SIB QHAIB”

Wb tau siv tag nrho hmo ntawd los sib tham luag ntxhi ua ke, sib ntxhi, thiab tuav tes, thiab siv zog ua rau kom tsis hnov txaj muag thaum uas wb ob leeg thiaj yog ob tug qhua hauv tsev noj mov xwb. Tomqab ntawd wb tawm mus ncig nraum zoov saib hli. Lub hli loj heev vim tab tom yog lub caij uas txog lub sijhawm hli ntseg tau voob tas tej hnub qub thiab ci thoob plaws lub pas dej iav. Tej huab cua thaum lub caij yim hli ntawd sov so tshuab tuaj rau hauv kuv cov plaub hau, ib yam li tej noog tab tom seev cev rau saum nplaim dej. Ntawm no yog tej uas peb pheej pom nyob rau ntawm tej movies sib hlub. 

Tiamsis cuag li tus nraug vauv nws txaj muag dhau heev lawm. 

Tsis paub tias kuv tus hlub nws tau hnov qab lub cim lawm yog li tus pab haujlwm hauv tsev noj mov nws thiaj ua mus ntxiv raws li tej uas tau npaj tseg foom koob hmoov rau wb txoj kev sib qhaib thaum uas yeej tseem tsis tau tshwm sim. Yog tias ntawm no yog tab tom ua movies xwb ces, kuv yuav hais tias cia li muab TXIAV  thiab yuam kom rov qab ua dua. Tiamsis ntawm no ua tsis tau li ntawd, yog li wb cia li suav tias cia li dhau mus thiab sawv mus nres rau nraum zoov saib hli ua ke, thaj chaw uas kuv tus hluas nraug siv tag nrho nws lub peev xwm los hais tawm lo lus thov yuav kuv, nrog rau nws qhov khoom muaj nqis tau khaws cia – ntawd yog nws niam pog lub nplhaib sib yuav. 

Ntawd tsis yog lub sijhawm uas tus raug vauv hnav cev ris tsho ci ntsa iab uas kuv ib txwm xav txog nyob rau hauv kuv lub taubhau thaum tseem yog ib tug menyuam ntxhais. Tiamsis kuv muab txoj kev tag kev cia siab ntawd rau ib cag thiab tso cai rau kuv tus raug vauv muaj sijhawm los txhiv nws qhov yuam kev. Thiab kuv teb hais tias, “kuv thooj yim”. 

Kuv tseem tso cai rau tus ua haujlwm ntawd txhiv nws qhov kev txhaum los ntawm qhov uas yuam nws ua haujlwm pab nqa lub ncuav sib yuav nyob rau ntawm wb rooj tshoob. Thaum kawg yawg kuj hais lo lus foom koob hmoov yog chaw lawm. 

Nyob rau txhua xyoo dhau los, “ wb lub sijhawm uas nyob ua ke sib hlub mus ib txhis” tsis yog tias thaum twg twb zoo li nyob rau hauv tej zaj xwm txheej tau tham. Lo lus cog tseg “thaum uas muaj thiab thaum pluag, thaum muaj mob kuj zoo li thaum tau zoo” tsis yooj yim ua ib yam li wb tau xav. Tiamsis thaum ntsib dhau txhua yam, wb tau nrhiav pom kev cia siab thaum uas ib leeg tseg rau ib leeg muaj sijhawm los txhiv tej uas tau ua yuam kev. 

Peb Leej Txiv tus nyob saum ntuj Nws tau muab yam uas muaj nqis tshaj plaws yog Tswv Yexus, Nws tib leeg tub pub rau peb, cawm peb – muaj ib lub sijhawm los lees txim. Yog peb muab peb txoj kev npaj ntawm tus kheej tso tseg thiab hais tias “thooj yim” rau Vajtswv, ces peb pom tias peb tab tom los koom rau Vajtswv zaj xwm txheej kev hlub loj tshaj plaws tau muab sau cia. Tsis yog tias thaum twg twb yuav “sib hlub mus tas ib txhis”, tiamsis nws tsimnyog rau txhua lub hws nrog, txhua teev kua muag thiab txhua teev ntshav uas peb tau ua luam rau ntawd. Twb yog Tswv Yexus nqis peev los ntawm Nws cov ntshav, Nws lub hws, thiab Nws lub kua muag kom caum txoj kev sib raug zoo nrog peb. 

“Vim Yexus Khetos tuag txhiv peb lub txim, Vajtswv thiaj zam txim rau peb. Vajtswv txoj kev hlub loj kawg li.” (Efexaus 1:7). 

Yog tias Vajtswv twb pub rau peb muaj sijhawm tau txais kev cawmdim ces vim li cas peb ho tsis cia kom ib leeg muaj sijhawm los ua zoo rau ib leeg li ntawd thiab? 

Wb ib niam txiv tau ntsib dhau tej txomnyem tshaj plaws los ntawm wb tes haujlwm khwv noj khwv haus. Kwv yees li ib xyoos dhau los, tej zaug wb yuav mag raug sib nug txog ib qhov nuj nqis nyob rau hauv kev ua lag luam. Wb tau txiav txim siab mob siab tshaj plaws yog muab lub nplhaib uas kuv tus txiv tau muab rau kuv ntawd nyob rau thaum hmo lub yim hli xyoo ntawd muag los them nuj nqis. Tus neeg yuav lub nplhaib kuj yog ib tug ntseeg Vajtswv thiab tau npaj khaws cia kom tom qab ntawd wb muaj cuab kav mus txhiv tau wb lub nplhaib rov qab los. Tiamsis lub caij ntuj kub xyoo tas los, thaum wb ntsib qhov teeb meem ntshe yuav mag lawv tuaj muab wb lub tsev, wb pom tias ntshe yuav siv zog tsis tau ntxiv lawm thiab yuav tau mag muag lub nplhaib. 

Kuj yog lub caij ntuj kub xyoo ntawd, wb tus ntxhais ntsib ib tug tub hluas ntseeg Vajtswv npe hu ua Shane. Nkawd txawm cia li dhau los ua phooj ywg zoo. Kuv ntsib nws rau hmo tas los thaum uas nkawd tau tsav tsheb deb heev kwv yees li tsheej txhiab kilomet kev los koom tes suam npe kawm ib lub tsev kawm Vajluskub. Ib thiv tom qab, tus tub hluas no hu xov tooj rau kuv thiab thov cai kom tau sib tham ua ke nrog wb tus ntxhais. 

Thaum uas tej menyuam lawv tham txog lawv tej kev ntshaw thiab tej kev cia siab thaum zaum haus café ua ke, Shane paub txog qhov xwm txheej uas wb lub nplhaib tau poob zoo li cas. Tom qab ntawd, tus tub hluas no hu xov tooj rau wb thov kom wb tso cai rau nws tau txhiv lub nplhaib ntawd rov los thiab xav muab pub rau wb tus ntxhais thaum nws thov yuav wb tus ntxhais. 

Thiab tsis ntev los no, nyob rau hmo uas muaj hnub qub puv ntuj, nyob rau saum ruv tsev lub hli cig kaj nrig, Shane tau txhos caug thiab muab lub nplhaib ntawd coj rau wb tus ntxhais thiab thov qhaib nws. 

“Kuv thooj yim” – ntawd yog lo lus teb uas tus tub hluas no txais tau. 

Thov caw nrog kuv peb thov Vajtswv ua ke: Tswv Yexus, kuv ua Koj tsaug vim Koj txoj kev hlub loj uas Koj tau siv Koj cov ntshav thiab kua muag los coj caw kuv los cuag Koj, kuv tej kev txhaum twb tau txhiv lawm thiab kuv lub neej tau hloov pauv dua tshiab. Thov pab kom kuv yuav tsis muaj hnub hnov qab Koj txoj kev cawm dim thiab kuv yuav qhia Koj txoj kev hlub ntawd mus rau coob tug. Kuv thov hauv Tswv Yexus Khetos lub npe. Amees.

Cov kwv tij txhua tus, kev cawmdim yog qhov khoom plig tsis muaj nqi uas Tswv Yexus tau siv Nws cov ntshav los pub rau peb, yog li koj tab tom ua neej nrog txoj kev cawmdim ntawd zoo li cas? Txoj kev nrog tus Tswv mus tsis yog tias thaum twg twb yuav yooj yim tiamsis Vajtswv txoj kev hlub thiab Nws txoj koob hmoov yeej muaj nplua mias tseg rau tus uas nrhiav Nws. Yog li kav tsij txiav txim siab caum lub neej kom ua haum Vajtswv siab thiab nthuav qhia Nws txoj kev hlub ntawd rau tej neeg ib ncig.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.