Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab.

Hnub no yog hnub kawg ntawm lub xyoo (âm lịch), yog hnub uas peb tos txais xyoo tshiab, muab lub xyoo laus xaus cia thiab txais tos ib lub xyoo tshiab nrog tej uas tshiab. Tej zaug koj yuav tsis khoom npaj ntau yam tseg txais tos xyoo tshiab, tiamsis txhob hnov qab siv ib mentsis sijhawm los saib xyoo dhau los seb Vajtswv tau ua dab tsi nyob rau hauv koj lub neej. 

Hnub no, yog hnub 31/01/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Sarah Limardo dhau ntawm Zaj kawm TIG SAIB IB XYOO DHAU LOS

Txawm yog peb tsis ua ncaj los Nws tseem ua ncaj, rau qhov Nws tsis rov dag Nws ib zaug li (2 Timautes 2:13)

Nyob rau lub sijhawm no, saib qhov twg nyob rau ntawm tsab fuab cua Facebook puav leej pom lawv tham txog ib xyoo dhau los. Muaj ib txhia neeg ua Vajtswv tsaug txog ib xyoo dhau los. Tshuav lwm tus los kuj ua tsaug vim ib xyoo tsis zoo dhau los kuj xaus lawm. Muaj tej lub homphiaj tau ua tiav lossis twb hnov qab lawm, muaj kev zoo siab nrog kev mob siab tib si, tsev neeg txhab ntxiv tiamsis kuj muaj tus mus deb, muaj tej kev ntshaw dhau los muaj tseeb tiamsis kuj muaj tej lub siab puas ntsoog. 

Tshuav koj ne ib xyoo dhau los ho zoo li cas? 

Kuv tus kheej mas nyob rau xyoo dhau los muaj qee hli zoo kawg nkaus li. Kuv tsis nco meej meej tias nyob rau hauv kuv lub neej, lub caij twg yog lub caij zoo kawg nkaus zoo ib yam li thaum qhib xyoo tshiab li xyoo no. Vajtswv tau hliv Nws txoj koob hmoov rau hauv kuv lub neej los ntawm Vajtswv lub siab dav.  

Tiamsis nyob rau lub sijhawm puv npo ntawd tej kev npau taws kuj voob nkaus los zoo ib yam li tag kev cia siab thaum uas kuv raug mob thiab nyiaj tsev tshuaj ntau kawg nkaus li, thiab ntau yam ntxiv ua rau kuv tej nyiaj txiag khaws cia twb siv yuav luag tas. 

Tiamsis Vajtswv yog tus ua raws li Nws tej lus cog tseg. Thiab Nws yeej yuav ua li ntawd. Vajtswv hais tias: 

“Kuv yog Alafas thiab Aumenkas, kuv yog lub hauvpaus thiab yog lub ntsis.” (Tshwmsim 22:13). 

Nyob rau ntawm tej uas kuv tau ntsib nyob rau xyoo no, Vajtswv twb npaj rau kuv tag nrho lawm. 

Nws yeej ib txwm muaj nyob los lawm, pab wb ib niam txiv npaj txhij ntsib tej teeb meem thaum uas wb tsis paub yuav ua li cas. Nws coj tej phooj ywg los, nws pub nyiaj txiag thiab pub muaj kev txawj ntse nrog kev ntseeg ncaj rau lub sijhawm uas wb cheem tsum. 

Nws tshwm ntsej muag nyob nruab nrab ntawm tej teeb meem, coj kev thiab nplig wb siab. Thaum wb taij thov, Vajtswv teb los ntawm txoj kev kaj siab nrog rau tej lus cog tseg zoo kawg nkaus. 

Thiab Nws kuj nyob tom tw kawg, ntuas kuv txog txoj kev uas txhua yam los koom ua ke ntawd muaj nqis rau kuv thiab ua rau Vajtswv tau koob meej. Vajtswv ntxiv rau wb tej lus tim khawv, ua rau wb dhau los zoo dua. 

Ib yam li tej lus hauv Vajluskub tau hais txog: 

“Txawm yog peb tsis ua ncaj los Nws tseem ua ncaj, rau qhov Nws tsis rov dag Nws ib zaug li” (2 Timautes 2:13). 

Kuv yeej leeg paub txog tej koob hmoov uas Vajtswv txhais tes tau ua nyob rau hauv kuv lub neej nyob rau ib xyoo dhau los, txawm yog muaj ntau zaug kuv hnov muaj kev ntseeg tsis txaus. Kuv tseem hluas thiab yeej tseem siv zog nrhiav ib thaj chaw sawv rau yus lub neej. Thiab nyob rau hauv tej kev sim siab uas kuv tau ntsib ntawd, Vajtswv yeej nthuav qhia rau peb pom tias Nws yog tus ua raws li Nws tej lus cog tseg. 

Kuv cia siab tias xyoo tshiab no, kuv yuav ntsia pom tej haujlwm uas Vajtswv ua kom kuv txoj kev ntseeg loj hlob, thiab kuv yuav ntsia pom ntau dua txog Vajtswv yog tus zoo kawg nkaus raws li Nws txoj kev zoo tshaj. 

Txawm yog yuav muaj teeb meem li cas los kuv ib xyoo dhau los pib nrog Vajtswv thiab xaus nrog Vajtswv. Kuv paub Vajtswv txiaj ntsig txog tej kev sim siab thiab tej khoom plig tau muaj nrog tej uas kuv xav tsis thoob thiab. Kuv zoo siab heev vim xyoo tshiab kuj yuav pib thiab xaus los ntawm txoj kev zoo, ncaj ncees thiab Nws txoj kev hlub. 

Txawm yog yuav muaj dab tsi tshwm sim los Vajtswv yeej tseem tsis tau hloov. Nws tib leeg xwb yog tus uas kuv ntseeg siab tau, thiab pheeb rau thiab kuv yuav tsis nrhiav lwm yam ntxiv dhau ntawm Nws.

Thov caw nrog kuv peb thov Vajtswv ua ke:  Ua Vajtswv Koj tsaug rau Koj yog tus ua li Koj tej lus cog tseg thiab raws li Koj txoj kev ua siab ntev rau kuv lub neej ib xyoo dhau los. Tig rov mus saib tej koob hmoov uas Koj tau foom rau kuv, kuv tsuas paub fij lo lus qhuas Koj thiab cog lus tias ib xyoo tshiab tuaj kuv yuav ruaj siab thiab tag siab ua lub neej kom haum Koj siab thiab tawg paj txi txiv rau Koj. Kuv thov hauv Tswv Yexus Khetos lub npe. Amees.

Cov kwv tij txhua tus, hnub no, cia li siv ib me ntsis sijhawm los saib ib xyoo dhau los. Saib thiab xav seb Vajtswv tau ua haujlwm rau koj lub neej zoo li cas? Ib xyoo dhau los koj tau saj txoj kev nyob hauv Vajtswv zoo li cas thiab yuav pab rau kom koj nkag mus rau ib xyoo tshiab no nrog tus cwjpwm zoo li cas?

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.