Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Dròm be dô nam gơs kơnhai phàng, kơnhai prang,kơnhai nhạch .mơ kơnhai mrềt, rài kis bol he hơđang tiah do kung la dô khà ală tŭ lơh nền. Kòp tŭ lơh nền gơs gơtha mơ tơnggu gơ dê, bulah chò hòp hala moat jrùng, bulah lơngap lơngai hala càl rbut, Yàng git loh bơta pal cang ồng mò oh mi dê, Kơnràñ rơp rơn dap tap sèng mơ tề lam ồng mò oh mi lòt gan kòp sơnam kơnhai tòm rài kis.

Ngai do, ngai 08/02/2024,Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Lori D’Augostine bơh tơnggume: ALĂ BROĂ GƠS TŬ TƠ NGAI

‘Bơh bơta lơi kung gơs kơnhai sơnam; mơ gơs dô tŭ lơh nền ală broă ơm tòm tiah trồ. ‘ (Cau Bơto 3:1)

Ồng mò oh mi gơboh gơ bài kơnhai lơi rlau jơh taih? Añ sùm gơboh gơ bài kơnhai phàng. Ò gơs bơta lơi ring niam rlau tŭ geh chò nùs tòm kơnhai phàng tơnơ̆ mơ oă kơnhai noat mrềt, moat jrùng. Tiah trồ ring niam, trồ tiah niam gơlơh chò hòp ò git nđò, tus dê tŭ gơ kong phà bơh… dô nơm miu.
Miu tòm bồ kơnhai phàng ơ? Gơ hào gơ jràñ ngan tŭ chò nùs mattơngai kơnhai phàng dê gen nisơna dô nơm miu dờng gơ dùh tiah?

Gen tàng añ nisơna đal git añ neh ò gơ dan gơboh tiah trồ tŭ kơnhai miu tai. Añ pơnđơl tòm dră mơ kơnhai noat mrềt mơ kalke hơ̆. Añ kòñ tŭ lơi kung chò hòp chò hòn tòm mattơngai kơnhai phàng niam .
Ngan gơ dê lah rài kis kung kalke be kơnhai miu. Tian gơs dô êt bă tiah , kơnhai prang tus kơnhai miu mìng la dô êt ngai gòi, ò chài rgơi git lài tŭ lơi miu rơp tus. Bơta do gơlơh be ò hoan dê mơya ò dê la ò gơs gơtha ò.

Tŭ jơ tòm gơl os gơlơh kalke nàng wờng mơ jòng ngan, mơya hơ̆ la tŭ jơ di pal nàng ntào dờng tòm bơta dòn. Jat Jơnau Yàng, bơta dòn gơs gơtha la dòn kơnòm dê ală bơta mơ bol he ò rgơi bàn gŏ. Kư̆ ram nùs, dô kơnhai phàng pa rơp kơp gơn ồng mò oh mi. Yàng sùm kơ̆ wền mơ ală gơnoar broă os mòng mơ Kơnràñ neh lơh gơs, kung be dòn song mơ rài kis bol he dê. Bulah bol he ơm ntềng lơi, kơnhai phàng kung rơp tus. Hơ̆ la gùng dà trồ tiah dê.

Tŭ dô năm til wơl, digơlan ồng mò oh mi kơlôi sơ nơng bơh broă lơh pa, bơta tòm klac pa hala dô bơta kơp kòñ pa. Kơnhai phàng os cèng tus bol he in bơta ji gloh tơr hìr bơh ală bơta pa. Yàng git lah bol he kơp kòñ geh gơ tòm sò wơl mơ Kơnràñ rơp ai pà bol he in ală cơn đòa pa jat tŭ kơnhai lơh nền.
Jơnau Yàng tòm Cau Bơto 3:1 tơngkah bol he lah:
‘Bơh bơta lơi kung gơs kơnhai sơnam; mơ gơs dô tŭ lơh nền ală broă ơm tòm tiah trồ. ‘

Sèng Sră Goh os mòng do lơh nền lah bol he rơp lòt gan ală tŭ kơnhai lơh nin hơđang tiah do. Ală tŭ kơnhai hơ̆ ò dê mìng la poan kơnhai sơ nam mơ tơl ală tŭ lơh nên tơnơ̆ tơn: ‘Gơs tŭ deh, mơ gơs tŭ chơt; gơs tŭ tam, gơs tŭ dus phan neh tam; Gơs tŭ tơnchơt, mơ gơs tŭ sơmbòi; gơs tŭ phà tơrlah, mơ gơs tŭ bơt bơtào; Gơs tŭ ñìm, mơ gơs tŭ ñŏ; gơs tŭ rac ròc, mơ gơs tŭ tòmya; Gơs tŭ sơrbì lŭ, mơ gơs tŭ tơrgòm lŭ wơl; gơs tŭ kơnđơt kơnđu, mơ gơs tŭ sang lòi; Gơs tŭ jòi bàn, mơ gơs tŭ roh; Gơs tŭ prap gàr mơ gơs tŭ sang sơrbì; Gơs tŭ crè, mơ gơs tŭ jing wơl; gơs tŭ ơm mŏ mŏ, gơs tŭ đơs; Gơs tŭ kòñ gơboh, mơ gơs tŭ gơjrañ; gơs tŭ kơlìn gơtoă, mơ gơs tŭ ring lơngai. ‘

Ồng mò oh mi gŏ bol he ơm tòm tŭ lơi tiah? Digơlan ồng mò oh mi ơm digùl oă tŭ pa is tòm dô dơ̆ tơn. Digơlan ồng mò oh mi gơ kòl dê tŭ ne jŏ jòng ir mơ kơp kòñ cơn đòa mut tòm cơnđòa pa. Bulah ồng mò oh mi ơm tòm tiah lơi kư̆ git ưn ngài.

Jơnau Yàng tòm Cau Bơto cèng tus bol he in bơta kơp gơn:
‘Bơh Kơnràñ neh lơh gơs jơh ală bơta tòm toh di tŭ gơ dê. Mơ bơh hơ̆ Kơnràñ neh ơn bơta jak chài tòm tŭ neh rlau mơ tŭ rơp tus tòm dơngoh kòn mơnus; bulah behơ̆, bol khai ò rgơi jòi bàn ală broă Yàng Tom Trồ neh lơh bơh sơnròp jơl tus lồi dut. Behơ̆, añ git lah ò gơs bơta lơi niam rlau kòn mơnus in la chò hòp mơ hòn chò jơl jơh rài kis bol khai dê. ‘

Salômôn neh ai bol he in git bơh gơtha ngan rài kis hơđang tiah do. Bulah tŭ kơnhai lơi kung gơs tơnggu gơ dê, mơ añ dòn lah ồng mò oh mi rgơi chò hòp chò hòn tòm ală bơta gơlik gơs gùt dar. Ồng mò oh mi đal git lah tòm 28 tŭ mơ Salômôn tơngkah tus, gơs ală tŭ klam jơ ngo be lah tŭ chơt roh, tŭ tơn chơt, tŭ ñim rac,tŭ sang sơrbì, tŭ phà tơrlah, tŭ gơ jrañ, tŭ kơrlin gơ toă sơl? Ală tŭ bol glar hơ̆ gơs gơtha lơi taih?
Bơta gơtha la tài bơh pơnjat kơnhai noat mrềt la kơnhai phàng. Tòm rài kis, gơs ală pơnah pal cang tơn chơt wil tơl nàng bol he gt làm bơta kis wil tơl jat nùs Yàng. Bơta kis mơ bơta chơt ò tòm cah bal mơ dô bă bal. Kơmbuh bơta chơt cèng tus bơta gơn kơnòm bơta kis pa. Dròm be dô bơta:

Bơh bơta chơt tus bơta kis, bol he gơs bơta tòm gơl pa.
Ring niam ngan, Yàng la Bơtau crơng gơs ală phan, Kơnràñ git ală tŭ lơh nền lơi tòm klac bal la ring niam rlau jơh bol he in.( tŭ crè, mơ gơs tŭ jing wơl; tŭ kòñ gơboh, mơ tŭ gơjrañ; tŭ ñìm, mơ tŭ ñŏ)
‘Mơ ne, kơnhai mrềt neh rlau, mìu neh jơh rlau rau; Ală bơkào gơlì tòm ù; tŭ đơs chò neh tus rềp, mơ sap sềm ntòp hui neh kơno làm tòm ƀòn lơgar; ‘(Đơs Chò 2:11-12)

Dan jà bol he dô nùs bal tòm bơta hòi dan:
Khoai Yàng, dan Kơnràñ ai pà kòn in bơta lơngap lơ ngai mơ bơta chò hòp tòm kòp tŭ tòm rài kis dê. Kòn dòn kơnòm dê bơta rơn dap tap sèng dờng màng Yàng dê, ală broă gơlik gơs rơp gơs gơtha mơ gơs tơnggu gơ dê. Dan tề lam kòn gan dê ală tŭ jơ kalke, nàng kòn dòp rò bơta àng mơ bơta gơn kơnòm kơnhai phàng pa dê. Kòn rơp kơ̆ wền kơp gơn ală bơta pa crơi is mơ Yàng neh rcang lài kòn in. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, bulah ồng mò oh mi gŏ să tòm ơm tòm tŭ lơh nền lơi, kư̆ dòn kơnòm dê bơta rơn dap tap sèng dờng màng Yàng dê, chò hòp chò hòn ală ngai hơđang tiah do. Kah tĕ lah, tơnơ̆ mơ kơ hai noat mrềt, kơnhai phàng ring niam rơp tus. Hơ̆ la jơnau ho pơgon Yàng ai bol he in, kung dròm be trồ tiah sùm gơ lơh lòt. Rcang sir dòp rò kơnhai phàng pa gơwèt mơ bơta kơp gơn mơ bơta chò hòp!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.