Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Gơs tŭ lơi bol he kơlôi tus lah tòm kơnhwàl bol he ơm gơs ală phan poan jơng jàñ bơsak sơl? Bol he rơp lơh bơta lơi nàng gàr is să he, hìu nhă, mơ jơh phan ròng he dê taih? Mơ dilah gơs ală phan poan jơng jàñ bơsak ò rgơi gŏ mơ mat jòi gùng lơh iơh rài kis đah hwềng he dê gen bol he rơp lơh bơta lơi taih?

Ngai do, ngai 23/10/2021, bơta Hòi Dan Kòp Ngai dan jà ồng mò oh mi bơtê bal jơnau Yàng dê, kơnòm dê bơta dong kòl mò Diane Marhins dê bơh tơnggume BƠTA PƠHÌN BƠH PHAN POAN JƠNG JÀÑ BƠSAK

Cau kơñau mìng tus nàng kơñau, hàl mơ tơnroh (Jang 10:10a)

So rhau òs tơlik mat tòm gùng añ lòt. Ồng mò oh mi bañ wă tìs, añ ò di la kis digùl kơnhwàl gơs dô êt nă cau tòm kơnhwàl dềt Montana dê, tiah gơs tiơng pơnro la oă mơnơm jòng jơnhoa mơ ală brê mơnơm gơs chi dờng. Ò, añ kis digùl ƀòn dờng Phoenix, hơ̆ la ƀòn dờng dờng màng mơ dờng rlau jơh kơnhwàl Arizona dê, dùl tòm ală ƀòn dờng gơs oă cau rlau jơh lơgar Mỹ dê. Bơta kòñ đơs tềng do la tiah añ ơm rềp mơ nhàr dô bă tiah cau sền gàr phan poan jơng tòm brê. Tềng hơ̆ ò geh dơrñang dờng lơi nàng cang kìng, mình gơs dô nơm mpàn tơnggit lah “Bañ Tus Rềp” gen tàng ală phan poan jơng tòm brê sùm lòt gan gùng be la ală cau kis tòm ƀòn dờng. Bàr pe sơnam lài, kòn meo mơ añ kòñ gơboh neh kòl dô nơm phan poan jơng sa poac, tòm tŭ kòn meo hơ̆ ơm dê ƀlàng hơđap hìu añ mơ bơh hơ̆ añ ò tŭ lơi sền gŏ gơ tai.

Bơta gơlik gơs loh làng do ai ală cau kis tòm ƀòn dờng bol he dê sền gŏ lah he sùm kis tòm ală bơta sơbơng roh, rlau jơh la gơ wèt mơ ală phan ròng mơ bol he kòñ gơboh. Kòp tŭ lơi, ală kòn so rhau, kòn iar ềt tiơng pơrhê, sềm kŭ dờng gơs ngke kung rgơi kup ală kòn meo, kòn so kòñ gơboh bol he dê.

Bơta đơs bal la ală phan poan jơng do òm òm ting mòc mơ jòi tŭ lơmpah nàng kup sa phan ròng bol hi dê. Behơ̆ tàng, ală phan ròng bol he dê ò tŭ lơi rgơi geh kis tòm bơta lơngap lơngai wil tơl.

Bơta do kung ndrờm be bol he sùm kòl pơyơng bic tòm bơta gơlơh be lơngap lơngai mơya hŭi tồr la gùtdar he tŭ lơi kung gơs lơm ală bơta sơbơng roh pơhìn. Ală bơta pơhìn hơ̆ geh ràng tơlik gan dê oă pơnah pha is. Hơ̆ digơlan la ò ru mơ lơh bol he ò ơn nùs tồr sền rmê tus hìu nhă; bơta rngòt rngơt kơryan bol he ò khin lơh bơta lơi pa, ham kòñ phan mơna lơh bol he in ò rgơi sền gŏ bơta đah hwềng, ham kòñ rềs àr bơrnàn lơh roh bơta chò hòp tòm hìu nhă, bơta pơnhừ să lơh bol he sùm gŏ he dờng màng rlau mơ cau ndai, mơ bơta moat jrùng lơh bol he in roh bơta gơn kơnòm bal mơ bơta hòn chò tòm rài kis.

Yàng Jesu đơs lah: “Cau kơñau mìng tus nàng kơñau, hàl mơ tơnroh” (Jang 10:10a)

Kung be ală kòn so rhau jàñ bơsak hala kòn iar ềt ma blac lơi, ală cau blơ̆ kơñau mơ bol he neh đơs hơđang ne kung sơbơng roh ngan git nđò. Gơ tus tòm rài kis bol he dê mơ bol he ò rgơi sền gŏ tus dê tŭ ală bơta pơhìn sơbơng roh sơntòm tơlik mat. Behơ̆ gen, pal ngac ngar nàng crang sir tòmdră wơl ò tŭ lơi la ò kwơ. Sră Goh bơto lah, “Mơya dòp soh tĕ Yàng Jesu Krist, bañ rcang đah poac să nàng lơh jat bơta hàm kòñ is gơ dê.”(Rôma 13:14).

Gơ wèt mơ ală cau kòñ gơboh phan ròng mơ git kơrhia, bol khai lơh bơtơl ală pơng gàr gùtdar hìu nàng kơryan phan iơh. Gơs ală bơta bol he kung rgơi lơh nàng tòmdră mơ bơta iơh, nàng kơryan cau sòtơm brồ lơh he. Pal sùm sền sơwì tĕ rài kis he dê kơnòm dê ală sèng lùp be tơnơ̆ do:

• Añ gam ơn tŭ tơngai ală bơta dờng màng rlau jơh in hala ò?
• Añ lơh jat bơta rngòt rngơt hala lơh jat bơta dòn?
• Bơta lơi la bơta añ kòñ gơboh mơ ò kòñ sang lòi taih?
• Bơta kòñ gơboh mơ kơp kòñ añ jê tòmtoh sơl hala ò?
• Añ đal git Yàng rlau tai tòm rài kis kòp ngai añ dê hala ò?
• Lơh mbe lơi nàng añ jòi bàn bơta hòn chò mơ bơta gơn kơnòm digùl ală bơta gơlòng bol glar taih?

Hơ̆ la ală sèng lùp mơnàng mơ bol he rgơi ngui nàng sền sơwì is să tòm he dê kòp ngai be la dô nơm dơrñang sền gàr nus nhơm mơ hwềng nùs bol he dê. Mơya bol he rgơi bơtơl tai ală sèng lùp ndai. Pal kah tĕ la kơrhia ò lòi ồs sa gen tŭ lơi kung niam rlau mơ ồs neh sa gen sồng tơnchơt ồs. Pal ngac ngar sền gàr is să tòm he, ò di lòi cau sòtơm brồ lơh sir gen sồng sơm wơl tiah sồt rmàñ.

Dan jà bol he dô nùs bal tòm bơta hòi dan: Khoai Yàng, dan ai kòn in git lơh jat krơh Yàng Jesu dê mơ ngac ngar tòm dră wơl mơ ală bơta ơnniai tòm tŭ gơ tus mơ kòn. Dan dong kòn rgơi phalin rlau mơ ală kai gơrmơ̆i cà ràk dê kòp ngai. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, bơta lơi sòtơm pơhìn rài kis lơngap lơngai bol he he dê taih? Lòi tĕ êt tŭ tơngai nàng sền sơwì wơl să tòm he gan dê ală sèng lùp hơđang ne, nàng sền sơwì bol he rcang tòmdră niam mbe lơi gơ wèt mơ bơta iơh. Dilah sền gŏ bơta rcang he dê  ò hềt tòmtoh, tòm ngai do mo, pal ngac ngar bơtao wơl dô nơm dơrñang nàng sền gàr rài kis he dê lài mơtŭ cau sòtơm gơs tŭ lơmpah brồ lơh.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.