Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai

Gan dê Sră Goh, Yàng neh lơh nền ală bơta nàng sền gàr mơ kơryan bol he mut tòm bơta sơrbơng rơh. Dilah bol he lơh nền ơm ngài tơwòr tê Kơnràñ mơ ò dòn bơr Yàng, gen gùtdar  bol he rơp la càlrbut, mơ mpồl so rhau jàñ bơsak ơm kơp gơn. Ai dilah dòn bơr ơm tòm pơng gàr, bol he rơp geh kis rĭng lơngai tòm ƀlang nhơt tơlir mơ rlô bòl tòm tơwòr tê kòñ gơboh Yàng dê.

Ngai do, ngai 02/09/2022, Bơta Hòi Dan Kòp Ngai dan jà ồng mò oh mi bơtê bal Jơnau Yàng dê kơnòm dê bơta dong kòl ồng Andy Hollified dê bơh tơnggume  ĐAH NE PƠNG GÀR

“Ală cau duh khoai ală yàng rùp ràk ò kwơ, sang lòi bơta dòn song song ngan bol khai dê.” (Jôna 2:9)

Tòm mpôl kòn be añ jê, gơs dô nơm kòn be sơnđăn la Bella. Bella sùm tơ̆ trồm hơđơm kpơng gàr nàng dô lik đah bơdìh pơng gàr. Mơya tŭ kơno jơnau đơs añ jê, gơ mhăr rê wơl tòm dơlam pơng gàr bè òhềt gơs broă lơi gơlik gơs - bè gơ ò hềt lòt rlau tiah lơh nền.

Bella lơh behơ̆ bè gơ la cau tòm ƀlàng nhơt do dê - bè dô nơm kon so đào rlau la dô nơm con be. Gơ sùm chò hòp tòm tŭ gŭ añ, ntoat tus tŭ añ hòi mơ lòt jat añ làm ƀlàng nhơt. Tian gơs gơ gĕ ală kòn be ndai dilah kòn be ndai tus rềp.

Mơya Bella ò git lah broă gơ dô lik đah bơdìh pơng gàr neh lơh krơh iơh ală kòn be ndai in. Mìng dô êt tŭ tơnơ̆, jơh mpồl be đòm jat gơ lik lòt đah bơdìh pơng gàr nàng sa nhơt. Gơ ơm rềp pơng gàr mơ rê mù wơl tòm tŭ gŏ añ tus. Bol gơ ò đal git pơngàr hơ̆ geh mòn nàng sền gàr gơ, kung be lơh nền tiah ring lơngai bol gơ in. Añ kòñ bol gơ ơm mŏ mŏ tòm dơlam, mơ kung kòñ kơryan ală phan poan jơng jàñ bơsak đah bơdìh. Pơng gàr lòs mơ pơng gàr điện  digơlan la tơl nàng kơryan ală phan poan jơng jãn bơsak.

Añ đal git kòn be mơ kòn mơnus gơs ală bơta dròm băl. Jơh bàr jơi do kơldang bồ ngăn, gơs bơta pơnđơl pràn mơ lơh nền lơh ală bơta lơi gơ kòñ bulah gơs bơta sơrbơng roh hala cồng nha ò niam.

Gan dê Sră Goh, Yàng ơn bơta lơh nền ò di la bơh Kơnràñ sềt pơniă. Kơnràñ sùm git bơta lơi ơm kơp đah bơdìh pơnggàr. Bơdìh tiah Kơnràñ lơh nền, boh he rơp kong ală bơta brồ lơh cau sòtơm dê. Tòm dơlam pơnggàr hơ̆, bol he geh kis ring lơngai mơ lơngap lơngai, tàibơh Yàng neh kơryan cau sòtơm. Tŭ bol he dòn bơr Yàng, Kơnràñ rơp ò lòi dô bơta lơi lơh iơh rgơi mut tòm dơlam pơnggàr. Tŭ ò bài ơm mŏ mŏ tòm pơnggàr , gen bol he rơp kong bơta rung rài tus jơh rai kis he dê.

Nàng geh bơtê bơta bơtê do, ông Jôna pal lòt gan dô nơm càlrbut dờng, mơ kong sơrbì bơh ơhò, tơnơ̆ hơ̆ gơs dô nơm ka dờng sa loan mơ ồng păl ơm tòm klung ka pe ngai pe mang. Jôna păl kong jơh ală bơta jê sồt hơ̆ gen sồng gơjràñ sang glài. Tŭ Yàng dong tă ông Jôna bơh klung ka, ồng ò găm dô pleh gơnoar broă ồng dê tai. Ồng tus hơ Ninibe mơ bơto yăl - digơlan do la bơta kah rơngal mơ gơjrañ sang glài pal kah kơlôi rlau jơh. Bơta pal đơs tus la nùs nhơm ông Jôna dê sràt bơtang mơ gơhào gơjràñ ngan, ông đơs tàibơh Ninibe gen tàng ồng jê sồt. Ồng kơlôi lah tàibơh sătòm ồng neh kong, gen tàng bol khai kung behơ̆ behơ̆ sơl. Gan dê ală bơta bơtê kal ke rlau jơh, Yàng Tòm Trồ neh bơto Jôna in bơh nùs niam lơnhơn Kơnràñ dê - nùs niam lơnhơn ò tŭ lơi roh dilah bol he git gơjràñ sang glài.

Ông Jôna ò tŭ lơi chò hòp dòp rò cồng nha kong bòl glar he dê. Ồng bơto dô bơta bơto, mơ rlau 120.000 nă cau neh gơjràñ sang glài. Nùs sràt bơtang neh lơh Jôna in roh bơta kòñ gơboh mơ bơta ki ngàm cau ndai dê, bulah ồng neh dòn bơr Yàng. Nđàc sơngit ngan git nđò tŭ Jôna neh lơh sir gơnoar broă dờng hơ̆ rau, mơya ò tŭ lơi chò hòp dòp rò công nha tòm jơh tŭ Yàng Tòm Trồ ngui ồng nàng cèng ƀòn Ninibe tus mơ bơta gơjrẵn sang glài.

Bol he gam ơm gơn nàng dô lik bơh bơta sền gàr Yàng dê hala ò taih? Bol he rcang sir phi bơta lơngai bơta dòn bơr dê nàng lòt lềng đah bơdìh pơnggàr sền gàr hala ò taih? Bol he rơp gŏ ală bơta tòm gơl dô bă pha is ngan dilah hìu nhă bol he dê tìs nrah bè làng bol Ninibe. Bol he rgơi rcang sir dòn bơr Yàng, nàng dong hìu nhă he dê git gơjràñ sang glài tòm ngai rơp tus sơl? Yàng rơp ò sồr ồng Jôna tus mơ bol khai, mơya Kơnràñ rgơi sồr añ mơ ồng mò oh mi.

Dan jà bol he dô nùs bal tòm bơta hòi dan:

Khoai Yàng, oă dơ̆ kòn ò dòn bơr, kơldang nùs kòñ lòt gùng is mơ ò bài lòt gùng Yàng dê, sồng gen dùh tòm bơta sơbơng roh. Ưnngài Yàng tài bơh neh oă dơ̆ Kơnràñ dong tă kòn mơ lăm kòn rê wơl dô bă ring lơngai. Dăn Yàng dong kòn dòp bơta lơi la bơta di pal lơh, mơ kis dòn bơr Yàng kòp tŭ kòp jơ. Kòn hòi dan, tòm sơnđăn Yàng Jesus Krist. Amen.

Ơ ală ồng mò oh mi kòñ gơboh, ồng mò oh mi găm lòt lềng đah bơdìh kpơnggàr sền gàr Yàng dê hala ò? Rê wơl tĕ tòm bơta kòñ gơboh Yàng dê, nàng hòn chò dòp geh bơta lơngai bơta dòn bơr dê. Kung be gan dê rài kis he dê, oă cau ndai rơp gơjrañ sang glài mơ rê wơl hơ Yàng.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.