Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

“Añ gơs dô bơta kơp kờñ” la jơnau đơs tiơng pơnro rlau jơh Cau gơnoar bơto Martin Luther King dê nàng lah pơrhơng bơh nùs nhơm cah is sền ò sơp dê ală cau gơs gơltau jù mơ hòi jà jơh tơl nă cau gơ wèt tĕ băl mơ gơp dô bă song ring. Ồng mò oh mi gơ wèt mơ cau ndai dròm băl hala gam gơs bơta cah is taih? Tòm Hìu Jum Goh gen mbe lơi taih?

Ngai do, ngai 15/12/2021, Bơta Hòi Dan Kòp Ngai dăn jà ông mò oh mi  btơê băl Jơnau Yàng dê kơnòm dê bơta dong kòl ồng Daniel Neal Matthews dê bơh tơnggume DÔ BƠTA KƠP KỜÑ BAL

Tềng do ò tai gơs cau Grek, cau Juda, cau siat gơltau hala cau ò siat gơltau, cau ò git jơnau, cau Sithe, cau dĭ gơna hala cau khat gơboh, mơya Bơtau Krist la jơh ală bơta mơ tòm jơh ală bơta. (Galati 3:28)

Dô nă cau mò jòng sơnam sền tòm hìu mơ rơnggô bồ. Càl wal bong neh lơh tơrlah tơrlềng ƀòn dờng mò dê mơ nên cê ngăn hơ̆ la dô bơta moat jrùng dờng ngăn. Mò mơp dơl tơm tŭ go 14 nă cau dong kờl mhăr gơs măt nàng dong mò bơtào wơl dô nơm hìu pa, pơnniam wơl rơng hìu mơ ală mpồng dềt. Bol khai lơh broă dô bă sơrbac sơrbang ngăn. Mơya bơta mò ai lơh krơi rlau jơh la dà gơl tau bol khai dê.

 Moat jrum ngăn ò git lơh! tơm tŭ cau tìp bơta sơbơng roh gen sồng rgơi sền ngài rlau dà gơl tau mơ bơta păl càng cau ndai dê. Di đap Yàng, jơh tơl nă ring băl.

“Phong trào dân quyền” tòm ală năm 50 mơ 60 ơn nùs kơlôi oă tòm bơta cah is gơwèt mơ ală cau Mĩ tus bơh bòn tòm Châu Phi tòm lơgar Mỹ, bơh hơ̆ lăm tus  hơ broă tă sang dô êt bơta boh lăm mơ bơta gơlik gơs ò song ring. Cau gơnoar bơto Martin Luther King Jr la dô nă cau at bồ gơs bơta gơ tòp oă rlau jơh tòm broă do. Ông neh ngui bơta chài rgơi tòm jơnau đơs pràn kơldang he dê nàng đơs loh làng ală bơta ò song ring ală cau gơltau jù dê. Moat jrung ngăn, Martin Luther King neh kong cau tơnchơt tòm ngai 4 kơnhai 4 năm 1968. Năm 1983, bơta jơnum dờng ală cau ala mat dà lơgar tòm lơgar Mỹ ơn ngai dơ̆ 2 poh dơ̆ 3 kơnhai 1 la ngai nàng kah tus Cau gơnoar bơto Martin Luther King.

Dùl tòm ală bơta gơlik gơs păl kah rlau jơh tòm gơnoar broă Martin Luther King dê la jơnau đơs ồng dê tòm ngai 28 kơnhai 8 năm 1963 di đap dô mpồl oă cau tòm ƀòn dờng Washingtơn, DC. Cau gơnoar bơto Martin Luther King neh đơs “añ gơs dô bơta kơp kòñ lah dô ngai lơi hơ̆ dà lơgar do rơp ñă ntào mơ kis jat jơnau gơtha  ngan tòm ‘jơnau đơs neh ho pơgon tòm ngai khat gơboh’dà lơgar dê lah ‘bol hi đơs nền cê dô jơnau song gơs ngan lah kòp nă kòn mơnus gơs mat tòm dunnia la ring bal lơm”

Gơlơh be nùs kơlôi lơh nền là dô bơta lơbơn rlau jơh tòm nùs nhơm kòn mơnus, mơ ală jơi bơtian mơ ală mồl cau. Jơh tơl nă bol he gơs lơm nùs kơlôi gơwèt mơ cau ndai jat be bơta sền gŏ đah bơdìh rlau la sền gŏ bơta kas màng tòm dơlam bol khai dê la dô nă cau Yàng neh crơng gơs. Dilah ò di bơh dà gơltau gen bol he kung rgơi cah is sền ò sơp gan dê bơta passơm hala bơtê bơ srăm, rùp să, phan soh, bơta lơh lòt hala sap đơs.

Tòm sră pơyoa ală cau dòn Hìu Jum Goh sơnròp in, Jakơ neh ràng tơlik dô bơta pơnyơu nàng sền gŏ bơta dờng màng tòm broă ò geh ring bal. Tòm Sră Goh Jakơ 2:1-13, Jakơ pơnyơu bơh bàr nă cau lòt pơjum băl, dô nă cau soh phan hàng mơnĕ, dô nă cau soh phan sèt. Cau gơs đah bơdìh hàng mơnĕ geh dòp tiah nggui niam, cau r-bah lơ-òi gen ñă hala nggui hơđơm ù. Jakơ lùp “behơ̆ ò di la oh mi gơs bơta cah is, ai nùs iơh mơ cahrña ò ơ?” (sèng 4). Jakơ ràng tơlik bơta cah rña Yàng dê gơ wèt mơ bơta cah rña ò song ring tòm sèng 9 be do: “Mơya dilah oh mi sền òsơp di cau lơi, gen tìs glài”.

Kòp nă cau lơi đơs să tòm he ò gơs nùs kơlôi cah is ền ò sơp di cau ndai hơ̆ la cau pơrlồm is să tòm he. Jơh tơl nă bol he gơs lơm nùs nhơm gơ wèt mơ tơl nă cau jat nùs kơlôi is tòm tŭ tìp dơ̆ sơnròp. Tòm tŭ kòñ tus rềp, tòm klac mơ cau do rlau mơ cau ne jat be bơta he sền gŏ diđap mat la nùs nhơm kòn mơnus bol he dê. Mơya bơta hơ̆ ò rgơi la cơng tàng  nàng bol he in gơwèt niam mơ cau do mơ gơwèt ò niam mơ cau ne.

Ală bơta lơh lòt be hơ̆ ò tòm toh mơ bơta dòn cau dòn Yàng. Yàng Tơm Trồ kờñ bol he păl pơn đơl pràn gơwèt mơ tơl nă cau bơh nùs nhơm sền dờng màng, ki ngàm mơ kờñ nđàc. Bañ lơh lòt jat bơta sền gŏ bơh nùs is, bol he kah lah ală cau he tìp la cau mơ Yàng Tơm Trồ neh crơng gơs  mơ kung la ală cau mơ să tòm Yàng Jesu neh chơt ala. Dilah Yàng Tơm Trồ neh kờñ gơboh mơ ền màng ryŭ bol khai behơ̆, gen bol he la ncau mơ sền dờng màng cau do rlau mơ cau ne taih?

Tòm Galati 3:28, bol he sền gŏ dô nơm rùp sơnnio niam rlau jơh bơh bơta gơ wèt niam di gùl ală cau dòn tòm nùs kờñ lơh nền Yàng Tơm Trồ dê:

“Tềng do ò tai gơs cau Grek, cau Juda, cau siat gơltau hala cau ò siat gơltau, cau ò git jơnau, cau Sithe, cau dĭ gơna hala cau khat gơboh, mơya Bơtau Krist la jơh ală bơta mơ tòm jơh ală bơta.”

 “La dùl tòm Bơtau Krist” – hơ̆ la bơta kơp kờñ mơ jơh tơl nă bol he pal gơs.

Dan jà bol he dô nùs bal tòm bơta hòi dan: Ưnngai Yàng bơh Kơnràñ neh kờñ gơboh jơi kòn mơnus mơ chơt ala jơh tơl nă in. Dăn dong bol kòn ò cah is sền dờng màng di cau do mơ sền ò sơp di cau ne, mơya gơwèt băl mơ gơp bơh bơta kờñ gơboh, sền dờng màng mơ ki ngàm kòp nă cau tus mơ kòn. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kờñ gơboh, lùp is tĕ să tòm he lah: Añ pơnđơl pràn  nàng ò gơwèt mơ cau ndai jat be bơta sền gŏ đah bơdìh mơ nùs kơlôi is dơ̆ sơnròp hala ò? Dilah ò, nchi bơh tai ò lơh nền kơnòm di Yàng nàng lơh jat bơta hơ̆ ngai do mo taih? Gơs cau lơi mơ ồng mò oh mi kơlôi lah he păl dăn să bơh neh gơwèt ò song bơh bơta kơlôi is he dê hala ò?

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.