Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Rài kis la dô gùng lòt mhar roh, ò gơs cau lơi rgơi pleh klàs bơh bơta tơm cah ìs jê-sồt bơta chơt dê. Bulah behơ̆, tom mbur bơta klam jơngo bơta chơt dê, gơnap-gơnoar Kis Wơl Bơtau Krist dê neh hòi dờng dô bơta đơs chò bơh bơta bơt bơtao wơl, ceng wơl bol he in jơnau ho bơh dô rài kis gam sùm sùm ò gơs tŭ lơi tơm gơl. Tom gơnap-gơnoar Kis Wơl pha lin, bơta koñ gơboh mơ gơn kơnòm Yàng ai neh tơnroh bơta klam jơngo bơta chơt dê, ceng tùs jơi kòn mơnus in cat bơta kis sùm sùm.

Ngai do, ngai 31/03/2024, Bơta Hòi Dan Kờp ngai dan jà jơh ală cau iat kơlôi sơnưng Jơnau Yàng dê kơnòm di bơta dong kơl Matthew Loomis dê gan tơnggume: GƠNAP GƠNOAR KIS WƠL BƠTAU KRIST DÊ

“Mơ ya bol he la làng bol hơđang trồ, bơh hơ̆ bol he kơp gơn Yàng Dong-klàs la Yàng Jesu Krist. Kơnràñ rơp lơh să jan ò kwơ bol he dê gơlik gơs be să-jan gơklŏ Kơnràñ dê, jat be gơnap gơnoar Kơnrañ gơs nàng lơh jơh ală phan dòn duh Kơnràñ.” (Philip 3:20-21)

Tom dơngoh añ jê tom tŭ 10 sơnam, Ngai Yàng Kis Wơl la dô ngai ò gơs tŭ lơi rgơi huĭ. Añ nggui mơ ơm momọ̆ tom cơnòng hiu pơjum, plai nùs tă mhar bal mơ bơta hòn-chò ò git lơh. Tom tŭ bơta pơjum mor pơndùt, cau gơnoar bơto sơntom hòi jà jơh tơl nă cau dòn dòp Yàng. Añ neh rcang sir cơnđoà lòt dờng màng tom rài kis añ jê: cơnđoà lòt hơđap mơ yal tơlik bơta dòn he dê di đap jơh ală cau. Bơta do tom toh ngan di di ngai Yàng Kis Wơl, ngai chò-hop Yàng Jesu kis wơl.

Bơta yal tơlik bơta dòn di đap Hiu Jum Goh ngan neh geh gơchôl bơh Jơnau Yàng tom Mathiơ 10:32:
“Behơ̆ gen, cau lơi yal tơlik añ di đap cau, gen añ kung rơp yal tơlik khai dê đap Bèp añ ơm hơđang trồ sơl.”

Añ geh bơtê ală jơnau do bơh di cau pơgru duh rngòt tom ơdŭ Klơng Ngai Rlô. Sền wơl ngai Yàng Kis Wơl hơ̆, añ đal git lah gar sơntil Jơnau Yàng neh geh sih tom hwềng nùs añ, mơ sơntòm gơhon bơh di ală bơta bơtê kwơ màng hơ̆. Hơ̆ la ală bơta bơtê neh bơt bơtao añ ngai do.

Añ cơnđoà hơđang, nggui tom cơnòng dơ̆ sơnròp mơ pò bơr mơ cau gơnoar bơto lah añ koñ yal tơlik Yàng Jesu la Yàng Dong-klàs rài kis añ. Tom tŭ jơh kờp nă cau neh jong-ro Yàng sir, bol he dô nùs bal ñă ntào, sền mpôl jơnum.

Ò git loh gơs nđò nă cau gơs mat tơm hiu pơjum ngai hơ̆- digơlan la rhiang gar mat sền đah mơ bol he. Mơ ya tom cau hơ̆, gơs dô muh mat mơ dơngoh añ sùm kah: me lŏ bơto Klơng Ngai Rlô añ jê.

Tom tŭ cau gơnoar bơto yal tơnggit bơta chò-hòp lah añ neh dòn dòp Yang, añ rgơi gŏ melŏ nggui hơ cơnòng ngai ngai mơ ñŏ dô bă chò-hòp. Me lŏ la cau gơs lơngai rlau jơh tom ơdŭ hơ̆, bìng bơta hòn-chò tom tŭ sền gŏ dul tom ală “cau kòn” he dê yal tơlik bơta dòn.

Mơ ya bơta lơh añ in pal sền nê-nê̆ hơ̆ la me lŏ sền gơlơh ò di be cau pơgru Klơng Ngai Rlô pran kơldang, bìng bơta pràn mơ añ neh git. Tom Ngai Yàng Kis Wơl nam hơ̆, me lŏ neh nggui hơđang rơndeh mơ ndau sŏ ò di la sŏ tòm. Khai ò rgơi lòt rê tai tài bơh bơta kòp jê kơnjơ̆ bơh kơting neh tus di tŭ ò rgoĭ sơm bơi tai.

Ngai Yàng Kis Wơl nam hơ̆ kung la dơ̆ lồi dùt khai tus tơm hiu jum. Khai neh săng rai tơnơ̆ mơ dồ poh hơ̆.
Hơ̆ la dơ̆ sơnròp tom rài kis añ sền gŏ bơta lơbơn lơñọ ngan rài kis dê-să jan bol he ming la ing lơm.
Añ git ưnngai tài bơh Jơnau Yàng ho mơ bol he lah bơta chơt ò di la dơh wơl lồi dùt; Kơnràñ ho ai bol he in bơta kis gam sùm sùm kơnòm di Yàng Dong-klàs Jesu Krist. Gơnap-gơnoar bơta Kis Wơl Kơnràñ dê neh pò mpông bơta gơn kơnom jơh jơi kòn mơnus in.

Jơnau Yàng tom Jang 11:25-26 pondom pơndiang bol he:
“Yàng Jesu đơs lah: “Añ la bơta kis wơl mơ bơta kis; cau lơi dòn añ gen rơp kis, bulah neh chơt rau. Ai cau lơi kis mơ dòn añ gen ò gơs tŭ lơi chơt ò. Ai dòn bơta hơ̆ sơl?”

Ngai do la Ngai Yàng Kis Wơl-ngai kwơ màng nang kah wơl bơta kis wơl Bơtau Krist dê bơh bơta chơt, kung la bơta hon-chò tom jơnau ho lah Kơnràñ rơp ai bơta kis gam sùm sùm cau lơi in dòn dòp Kơnràñ lơh gơs Yàng Dong-klàs rài kis he dê.

Tom bơta hòn-chò dờng ngai Yàng Kis Wơl, nùs añ bìng bơta lơngap-lơngai tom tŭ kơlôi sơnưng bơh jơnau ho Kis Wơl Yàng dê. Jơh ală hwềng-soan duh rngòt Yàng-kung be me lŏ Klơng Ngai Rlô añ jê- rơp gơs dô ngai geh bơt bơtao wơl tom dô nơm să-jan pa, bìng bơta kis ò gam tai jê-sồt moat-jrùng hala kòp-jê, ò gam tai bơta lơi rgơi lơh bol he in pal gơpừ!
“Mơ ya bol he la làng bol hơđang trồ, bơh hơ̆ bol he kơp gơn Yàng Dong-klàs la Yàng Jesu Krist. Kơnràñ rơp lơh să jan ò kwơ bol he dê gơlik gơs be să-jan gơklŏ Kơnràñ dê, jat be gơnap gơnoar Kơnrañ gơs nàng lơh jơh ală phan dòn duh Kơnràñ.” (Philip 3:20-21)

Tom kơnhai kah Yàng Kis Wơl do, añ bìng nùs git ưnngai tài bơh Yàng neh ceng tus añ in dô nă cau tề lam jơh nùs be melŏ. Khai neh bơto bol he in git gơtha kwơ màng Ngai Yàng Kis Wơl. Khai neh ngui ală bơta nđàc he dê nàng bơto sồr Jơnau Yàng mơ ală jơnau ho bơh gơnap-gơnoar Bơta Kis Wơl dô bă jrô ndơp, gơđat tùs nùs ñhơm bol he dê-ală oh dềt bă lĭa.

Bơh bơta do, añ dan pơyoa jơnau tùs ală cau pơgru Klơng Ngai Rlô: ring lơngai tĕ, bơh bơta bòl-glar ală oh mi dî la ală viên gạch kwơ màng bơt bơtao dồ pah rài ngai tơnơ̆ kơ̆ cê sùm sùm.

Añ kơp gơn tùs ngai đơs jơnau ưnngai tus melŏ bơto Klơng Ngai Rlô añ jê bơh krơh duh rngòt-sơmpol ồs pơnđang sol bol he dê tom gùng lòt bơta dòn.

Mơ dờng mang rlau jơh tai, añ git ưnngai bơh gơnap-gơnoar Bơta Kis Wơl Yàng Dong Klàs Jesu dê rơp pò tŭ lơmpah nàng bol he in geh tìp wơl mơ duh khoai Kơnràñ bal, sùm sùm ò git lồi.

Dan jà bol he dô nùs bal tòm bơta hòi dan:
Kòn dan jòng-ro Bơtau Krist Kis Wơl, la Bơtau neh pha lin gơnoar bơta chơt mơ kis wơl nang ai bol kòn in bơta kis gam sùm sùm. Ưnngai Yàng tài bơh jơnau ho bơt bơtao wơl mơ bơta gơn kơnòm kơ̆ cê mơ Kơnràñ sùm ai bol kòn in kờp cơnđoà hơđang rài kis. Bol kòn dan jòng-ro sơnđan Yàng Dong-klàs Kis Wơl bơh ngai do jơl tus sùm sùm. Kòn jơh nùs hòi dan tom sơnđan Yàng Jesu Krist, A-men.

Ơ jơh ală ông mò, oh mi koñ gơboh, Yàng Dong-klàs Jesu neh kis wơl pha lin nang ceng tùs bol he in jơnau ho nên-cê bơh bơta kis gam sùm sùm. Jơnau ho hơ̆ la bơta pondom pơndiang dờng mang ală hwềng-soan gam joi jat bơta ring-lơngai digul ală bơta lơnggơh lơngơr tom dunnia do. Dô ngai lơi hơ̆ tom tŭ Yàng rê wơl, jơh kờp nă bol he rơp geh bơt bơtao wơl mơ kis pha lin tom bơta ang gơklŏ Kơnràñ dê. Ngai do, dồ nùs jòng-ro Yàng tĕ, mơ ơn rbô rhiang jơnau ưnngai Kơnràñ tài bơh bơta gơn kơnom dờng ơnang gam sùm sùm mơ Kơnràñ neh ai bol he in.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.