Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Jòng rơ Yàng tòm tŭ ală broă gơlik ring niam gơlơh be la bơta tòm toh ngan. Mơya tŭ rài kis bol he dê gơlơh be bơcah lề, tìp bơta roh gơcoh, jê sồt, gen bol he rơp jòng rơ Yàng sơl hala ò?

Ngai do, ngai 27/01/2022, bơta Hòi Dan Kòp Ngai dan jà ồng mò oh mi bơtê bal Jơnau Yàng dê kơnòm dê bơta dong kòl mò Elaine Creasman dê bơh tơnggume JÒNG RƠ YÀNG BULAH TÌP BƠTA JÊ SỒT MOAT JRÙNG

Añ rơp jòng ro Yàng Jehôwa sùm sùm, bơta jòng ro Kơnràñ rơp ơm sùm di bơr añ. (Đơs Crih 34:1)

Jơnau Yàng tề lam bol he pal jòng rơ Yàng sùm sùm, bulah bơta gơlik gơs gùtdar gơlơh mbe lơi. Rlau jơh, dilah bol he rgơi jòng ro Yàng digùl ală bơta kal ke, gen dòn nền lah Yàng rơp niam nùs mơ rài kis bol he dê rơp geh tòmgơl.

Bơtau Davit neh ràng tơlik nùs nhơm ồng dê lah: “Añ rơp jòng ro Yàng Jehôwa sùm sùm, bơta jòng ro Kơnràñ rơp ơm sùm di bơr añ.” (Đơs Crih 34:1)

Gùng lòt jat Yàng añ jê neh tìp bơta gơlòng bol glar dờng ngan. Añ sùm “jòng rơ Yàng Jêhôwa” tòm tŭ rài kis añ jê ring lơngai. 

Mơya tòm tŭ hwềng soàn ò rgơi sền gŏ Yàng ai lơngai mơ mìng gŏ Yàng tă tơlik ală bơta lơngai, be la tŭ tìp bơta kal ke hala bơta sơrlồng sơrlàng gơlik gơs - gen añ kung ò kờñ đơs chò jòng rơ Yàng. 

Añ lơh nền rài kis añ in tòm tŭ tìp bơta sơrlồng sơrlàng lah: añ rơp jòng rơ Yàng tŭ ală bơta gơlik gơs ring niam, mơ tŭ Yàng ai wơl bơta lơngai añ in.

Ngan gơ dê la Yàng ò tŭ lơi dơh wơl tòm bơta ai lơngai añ in. Kòp ngai mơ kòp tŭ tòm dô ngai, Yàng sùm tuh bềng bơta nđàc Yàng dê tòm rài kis añ. Yàng dong añ lòt gan ală bơta kal ke - dilah añ rcang sir dòp bơta dong kòl hơ̆. Btaơ kờñ gơboh Yàng dê ai añ in ò tŭ lơi tòmgơl bulah ală bơta gùtdar tòm gơl.

Ală jơnau jòng ro digơlan rơp jơh tŭ añ sơntòm yoam Yàng, tuh glài Yàng in bơh ală bơta iơh, bơta sơrbơng rơh gơlik gơs tòm rài kis añ jê. Ngan gơ dê la Yàng Tom Trồ la Bơtau sàng goh sùm mơ song ring jơh rài kis añ. Bulah añ gơs bơta kơlôi sơnơng bơh Yàng dô bă ò tòm toh gen Yàng bơta kơlôi sơnơng Yàng dê bơh añ ò tŭ lơi tòm gơl. Ală bơta gơlik gơs ò di di la Yàng lơh glài tơmàl di añ mơya Yàng gơs bơta rơndap niam jat nùs kờñ niam rlau jơh Yàng dê. 

Ngai 28/02/2012, hìu nhă bol hi tìp bơta kal ke tŭ oh klau añ tơnchơt is să. Tŭ hơ̆, gơs dô pơnah tòm rài kis añ ò kờñ jòng rơ Yàng tai. Lơh mbe lơi nàng añ rgơi jòng rơ Yàng tòm tŭ Yàng ò kơryan nàng dong tă bơta kis oh añ jê taih? Mơya ală bơta kơlôi sơnơng hơ̆ mìng gơs tòm dô êt tŭ tàibơh añ lơh nên rơp pơnjat jòng rơ Yàng bulah nùs nhơm añ jê gơlơh mbe lơi. 

Tòm tŭ añ prap să añ tòm Jơnau Yàng - rlau jơh la tòm sră Đơs Crih - añ neh geh tơngkah lah Yàng Tom Trồ di pal mơ ală jơnau jòng ro añ jê. Añ jòng rơ Yàng tŭ añ kah wơl jơh ală bơta Yàng neh lơh añ in. Añ jòng rơ Yàng tŭ añ kah wơl Kờnràñ neh dong kòl añ mbe lơi tŭ añ sền gŏ he lơbơn lơño mơ ò rgơi pơnjat tai - tòm tŭ tìp bơta kal ke hala tŭ tìp bơta sơrbơng rơh. Ngan, añ añ sùm jòng rơ Yàng. 

Añ ò di mìng jòng rơ Yàng Tom Trồ bơh bơta dòn song Yàng dê tòm ală ngai neh rlau, tòm ală bơta bòl glar tŭ do añ jê, mơya añ pal jòng jơ Yàng bơh Yàng sùm dòn song. Añ chò hòp ngan bơh ală bơta Yàng rơp pơnjat cèng tus rài kis añ in, rlau jơh la digùl ală bơta bòl glar jê  sồt gen Yàng gam lơh ală bơta gơlik gơs ring niam. Añ git làm lah hơ̆ kung la ală bơta Yàng neh lơh tòm tŭ tìp bơta gơlòng gơlik gơs tòm rài kis añ jê. 

Añ gam lòt gan sơndiang bơta jê sồt moat jrùng dê. Kờp dơ̆ mòr tus kirsơnre ngai deh oh klau añ jê gen añ kah wơl ală kirsơnre moat jrùng. Dơ̆ dơ̆ añ sền gŏ gơs dô êt tìs glài mơ gơhào gơ jrañ. Añ sền gŏ tìs glài bơh añ ò rgơi lơg bơta lơi nàng pơndòm mơ dong kòl oh añ jê. Añ gơhào gơ jrañ di đap ală jơnau dơ ñŏ dơnhial cà ràk dê tŭ khai neh geh pha tòm bơta sơrbơng roh do mo hìu nhă añ jê tìp. 

Mơya tŭ sền wơl ală broă jat gùng Yàng Tom Trồ dê, añ gŏ Yàng cèng wơl bơta phan lin tòm bơta sơrbơng roh do. Ală nùs nhơm neh geh hwài rềp Yàng rlau mơ rềp bal mơ gơp rlau. Añ ò tŭ lơi sền gŏ rềp mơ Yàng rlau be tŭ do.

Nùs nhơm añ kah wơl ală jơnau đơs bơtau Davit dê tòm sră Đơs Crih 43:5 lah:

“Ơ hwềng soàn añ, ñchi bơh tài mê gơplơ̆ nùs mơ ñchi bơh tài ò suk ơm taih? Gơn kơnòm tĕ di Yàng Tom Trồ, bơh añ rơp jòng ro Kơnràñ tai, la Bơtau dong kòl añ mơ la Yàng Tom Trồ añ.”

Dan jà bol he dô nùs bal tòm bơta hòi dan: Ưnngai Yàng bơh Kơnràñ gam dòn song sùm gơ wèt mơ kòn tòm rài kis do, bulah bơta gùtdar gơlơh mbe lơi. Dan Yàng bơtơl bơta pràn kòn in, dong kòl kòn kơ̆ nùs nàng đơs mơ hwềng nùs kòn dê lah pal sùm jòng ro Yàng. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kờñ gơboh, tòm ală ngai kơnhai neh rlau, bol he neh git làm Yàng don song mơ he mbe lơi taih? Bol he tìp ală bơta jê sồt, moat jrùng, roh gơ coh lơi hala ò taih? Bol he rgơi đơs mơ hwềng nùs he be bơtau Davit lah “añ rơp jòng ro Kơnràñ tai, la Bơtau dong kòl añ mơ la Yàng Tom Trồ añ.”

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.