Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Oh mi git lam sơl bơta hòn-chò wil tơl tơm Yàng, hala gam kư̆ gi-ga mơ ală bơta kal kê să tơm dê? Kung bè ală cau gơlơh bè pran kơldang ngan kung gớs tũ pal gơplơ̆ nùs, gơplơ̆ pơpừ. Jơl tus di tŭ roh gơprah di đap mat Yàng, tŭ hơ song bol he dòp git bơta hòn-chò mơ rai kis bềng liu ngan tơm Kơnràñ.

Ngai do, ngai 04/02/2024, Bơta Hòi Dan Kờp Ngai dăn jà jơh ală cau iat kơlôi sơnưng Jơnau Yàng dê kơnòm dê bơta dŏng kơl Martha Noebel dê găn tơnggume KIS HON CHÒ TƠNƠ̆ MƠ ALĂ BƠTA JÊ SỒT.

“Dan Bơtau ai bơta gơn-kơnòm la Yàng Tom Trồ lơh oh mi in gơs bềng-liu ală bơta hòn-chò mơ lơngap-lơngai tom bơta dòn, tồ oh in kơnòm dê gơnap-gơnoar Yàng Hwềng Goh dê mơ geh bơta gơn-kơnòm dô bă tơngkah-tơngkañ.” (Rôma 15:13)

Tom dồ dơ̆ ne, añ kơno cau Gơnoar Bơto James Robinson yal bơh rai kis ông dê. Ông đơs bơh ală nam kơnhai bol-glar tơm lai or, tai bơh mè bèp deh ông dê la ală cau ò duh rngòt. Bol khai neh lơh tŭ gam kơnom ông dê gơlik gơs brah ting. Mơ ya ưnngai Yàng, tơnơ̆ hơ̆ ông neh geh dồ nă ur klau cau don dòp rong mơ tề lăm ông jat Yàng.

Ông pơnjat yal lah tơm tŭ mut tơm gơnoảr broă cau Gơnoar Bơto, rai kis ông dê bềng-liu bơta gơhao-gơjrañ, dơrcul mơ bơta ham koñ poăc să. Jơl tus di tŭ nùs ñhơm ông dê pal bơcah lề-lac ngan di đap Yàng, song ông sơntom joi geh bơta lơngai ngan mơ hiu nhă mơ gơnoar broă he dê.

Añ ñrơt-nrơl ngan tơm tŭ kơno ông yal bơh ală bơta dọ. Ham koñ poăc să? Dồ nă cau Gơnoar Bơto niam ngan neh gơkol pơn-ji bơh bơta ham koñ poăc să, rlau mơ hơ̆ kung neh gơs bơta kơlôi sơnưng pơndùt is bơta kis he dê? Mbe rgơi gơlik ală bơta behơ̆? Gen añ kơlôi tùs ală cau lòt bơtọ yal tiang pơn-ro ndai kung neh gơkol ală kai kơrmơ̆i drom bal behơ̆ cau sò-tơm dê. Añ dòp git lah ò gơs buôn-soh tom tŭ sum la di-gul bơta sền tơ-mềt mpôl cau oă dê. Bơta kong kơn-jơ̆ tom tŭ bơtọ yal di đap oă cau, bơta rơndap gùng lòt oă, ò gơs tŭ lơi pơdơh, jơh ală bơta hơ̆ la gơlòng dơng ngan cau duh broă Yàng in.

Tơnơ̆ hơ̆, añ sơntom lùp is bơta lơi neh ceng wơl ông in bơta hòn-chò kis. Bơta lơbơn lơñô kòn mơnus dê mơ nùs ñhơm poăc să neh kơryan ông git lam bơta khat-gơboh wil tơl tom Bơtau Krist. Bañ wơng tis, ông la dồ nă cau duh rngòt Yàng. ông la dĭ gơna Yàng dê duh broă dồ bă ngac ngar. Mơ ya ông kung pal ntao di đap ală bơta kal kê mơ ming gơs Yàng lơm rgơi dŏng kơl. Ông neh pha lin tơm tŭ pin pơndềt să he tò dòp geh wil tơl bơta koñ gơboh mơ nùs nđàc sơngit mơ Yàng ai ông in.

Ò gơs cau lơi koñ gơdùh tơm bơta rung-rài dơng, mơ ya dilah ò don kơnom Yàng, bol he buôn ngan gơplơ̆. Bol he pal kah loh lang he la ñcau. Bol he ming la kòn mơnus lơbơn-lơñô, gen tang pal sum sơm-bat kơ̆ Bơtau sum yò-đo bol he.

Mơ lồi dùt, loi tĕ Jơnau Yàng tom Rôma 15:13 pơndom pơndiang bol he lah:
“Dan Bơtau ai bơta gơn-kơnòm la Yàng Tom Trồ lơh oh mi in gơs bềng-liu ală bơta hòn-chò mơ lơngap-lơngai tom bơta dòn, tồ oh in kơnòm dê gơnap-gơnoar Yàng Hwềng Goh dê mơ geh bơta gơn-kơnòm dồ bă tơngkah-tơngkañ”

Dan jà bol he dô nùs bal tòm bơta hòi dan:
Ơ Yàng, gơs tŭ rai kis gi-ga tian gơs lơh kon in roh bơta hòn-chò ngan, hĭu lah Bơtau sum sền gar mơ rong siam kòn. Kòn dan ơn rai kis lề-làc kòn dê Yang in, ai kon in geh git lam bơta lơngai ngan tơm Kơnràñ. Kòn jơh nùs hòi dan tơm sơnđan Yang Jesu Krist, A-men.

Ơ jơh ală ông mò, oh mi koñ gơboh, oh mi neh git lam sơl bơta hòn-chò bềng-liu tom Yàng, hala gam kư̆ wi-wơ digùl ală bơta is să tơm he dê? Dan bol he don duh Yàng mơ nùs lề-làc nang dòp geh bơta lơngap-lơngai wil tơl tơm Kơnràñ. Dan rai kis bol he gơlik gơs krơh pơnđang sol wơl rùp să Bơtau Krist mơ bơta koñ gơboh dơng ơnang Kơnràñ dê. Kơp koñ lah bol he sum prap kơ̆ tơnggu nang lơh sir gùng pơrlong he dê, mơ sum sơm-bat mpang tê koñ gơboh Bơtau Dong Klàs bol he.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.