Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Tơm tŭ kong alah, bol he òs sên gŏ gơlơh be jơh trồ tiah neh rlơm lề di đap mat he. Bol he rọh bơta don di să tơm he mơ kơlôi lah he ò rgơi lơh. Mơ ya ò di behơ̆, kong alah ò di la pơndùt, mơ la sơntòm. Kong alah la tŭ lơm-pah Yàng ai nang bol he sền wơl he, bơtê git ală bơta git lam kwơ mang mơ têh dờng tơm bơta don. Kong alah la cơnđoà sơnròp tò bol he ntoàt tùs công nha.

Ngai do, ngai 18/02/2024, Bơta Hòi Dan Kờp Ngai dan jà jơh cau iat kơlôi sơnưng bal Jơnau Yàng kơnòm di bơta dọ̆ng kơl Martha Noebel dê lòt găn tơnggume MƠ NÀNG TUS BƠTA PHA LIN.

“Ngan ală bơta lơh glaì tơmàl tơm tŭ do lơh be bòl glar, ò di chò-hòp ò; mơ ya tơnơ̆ wơl gơlik ală plai song-ring lơngap-lơngai ală cau in neh kong bơtê behơ̆.” (Hebrơ 12:11)

Cau lơi kung gơs oă dơ̆ pal kong alah tơm rài kis, kung be ală cau jak chai rlau jơh. Cau lơi kung rơp tus di tŭ lơh tìs. Mơ ya dờng mang hơ̆ la bol he sac rwah ntao di đap ală bơta tìs he dê mbe lơi?

Cau lơh jơnau pơnrĕ Alexander Pope neh đơs: “Tìs glaì la bơta bassil, toh glài la bơta mang ryŭ”. Hơ̆ la dô jơnau tơngkah jrô-ndơp ngan.

Tơm tŭ gơ-kol cau ndai lơh jê-sồt, bol he pal cang toh glaì bol khai in. Tơm tŭ să tơm tìs glaì, bol he pal cang toh glaì să tơm he in. Bol he pal cang lòt gan bơta tìs he dê mơ bơtê git bơh bơta kong alah. Dilah gơs nùs nhơm ò niam, bol he rơp ming bơtơl gơplơ̆ nùs. Mơ ya dilah ntao bal mơ nùs nhơm niam, ală bơta kong alah hơ̆ rơp gơlik gơs bơta bơtê kwơ mang bol he in.

Tơm sră “Bơtê Bơh Bơta Kong Alah”, cau cih JohN Maxwell neh ai git prăm sơnoa rnoàs pal kah:
Oh mi rơp dòp geh wơl bơta bơtê.
Ò gơs bơta kong alah- ming gơs bơta bơtê.
Bơta bơtê rơp geh tơngkah wơl sum jơl tus di tŭ oh mi dòp git.
Bơta bơtê rơp sơlo kal-kê dilah oh mi ò git wă ală bơtê buôn soh
Oh mi ngan dòp geh bơta bơtê tơm tŭ broă lơh oh mi dê tơm gơl.

Băñ bassil hala rngòt rngơt tơm tŭ lơh tìs. Bơta kong alah la dô pơnah ò rgơi sĭau rài kis dê. Kờp bơta tìs la dô bơta bơtê nang bol he sơlo ngai sơlo ntoat tơngguh. Yàng koñ bol he têh dờng rlau tơnơ̆ mơ ală dơ̆ kong alah.

Hebrơ 12 rang tơlik loh lah Yàng rơp lơh glaì ală cau mơ Kơnràñ koñ. Jơnau Yàng bơto bol he băñ gơplơ̆ nùs, tai bơh Kơnràñ kung koñ gơboh bol he tơm tŭ bol he kong alah:
“Ơ kòn, băñ sền òsơp dê bơta lơh glaì tơmàl Yàng dê, mơ băñ gơplơ̆ nùs tơm tŭ Kơnràñ lah pơrhơng; Bơh Kơnràñ lơh glaì tơmàl dê cau lơi Kơnràñ kờñ gơboh, cau lơi Kơnràñ dòp la kòn gen ai gai ai mòng”. (Hebrơ 12:5-6)

Yàng hòi bol he la kòn klau mơ kòn ur Kơnràñ dê. Kơnràñ kòñ gơboh bol he mơ ò kòñ bol he kư̆ pơnjat tìs tai. Yàng kung tơngkah bol he bơh bơta dòn tơm tŭ geh yò tơngguh tus dô kơnă têh dờng pa-dồ bơta sền jòng pa tơm Kơnràñ:
“Ngan ală bơta lơh glaì tơmàl tơm tŭ do lơh be bòl glar, ò di chò-hòp ò; mơ ya tơnơ̆ wơl gơlik ală plai song-ring lơngap-lơngai ală cau in neh kong bơtê behơ̆.” (Hebrơ 12:11)

Bol he rgơi sền bơta kong alah la ală lŭ nang bơ̆t bơtao “dơrnhăng công nha”. Kờp tŭ dòp geh bơta bơtê bơh bơta tìs he dê, bol he neh ơn dồ nơm lŭ hơđang dơrnhăng hơ̆. Bol he gam lơh cơng lah bol he ò tŭ lơi bơdơh pơnđơl pran mơ ò tŭ lơi kong alah. Công nha rơp gơrê mơ bol he dilah bol he ò ai bơta kong alah lơh he in rùc wơl.

Bol he gơs gơnoar sàc rwah nùs nhơm he dê. Bulah kong alah hala công nha, Jơnau Yàng hòi bol he la ală cau geh pha lin:
“Cau lơi geh pha lin rlau, gen añ rơp lơh khai in gơlik gơs dô nơm jrong tom hiu duh khoai Yàng Tom Trồ añ jê, mơ khai ò gơs tŭ lơi lik bơh tềng hơ̆ tai. Añ rơp cih hơđang khai sơnđan Yàng Tom Trồ añ jê, sơnđan bòn dờng Yàng Tom Trồ añ jê, la Jerusalem pa hơđang trồ bơh Yàng Tom Trồ añ jê mơ mù, bal mơ sơnđan pa añ jê.” (Yal Tơlik 3:12)

Dan Yàng añ lòng tiar bol he gơlik gơs ală jrong kơ̆ cê hiu duh khoai Kơnràñ in, mơ gơs kwơ broă hiu Kơnràñ dê.

Dan jà bol he dô nùs bal tòm bơta hòi dan:
Dan Yàng ai kòn in bơta lơngap-lơngai tơm tŭ kon pal ntao di đap ală bơta kong alah tơm rài kis. Dan dong kơl kòn đal git lah hơ̆ la ală bơta bơtê Yàng ai nang kòn in sơlo pran kơldang têh dờng. Kòn kơ̆ nùs don lah ală bơta kong alah la cơnđoà sơnròp nang kòn ntoat tus rềp rlau tai mơ công nha mơ Kơnràñ neh ai kòn in. Kòn jơh nus hòi dan tơm sơnđan Yàng Jesu krist, A-men.

Ơ jơh ală ông mò, oh mi kòñ gơboh, kong alah la ală cơnđoà sơnròp lăm tùs hơ tiah pha lin mơ Yàng ai oh mi in. Băñ rngòt hala gơplơ̆ nùs tơm tŭ lơh tìs. Dòp tĕ bơta kong alah mơ nùs nhơm git ưnngai, don lah Yàng sum ơm bal mơ oh mi mơ Kơnràñ dong oh mi têh dơng rlau kờp tŭ gơpừ. Ntao tĕ pơnjat mơ ò tŭ lơi săng loi. Oh mi rơp gŏ lah bơta kong alah ò di la pơndùt, mơ la sơntòm dồ nơm gùng lòt niam rlau jơh tơm tŭ gơs Yàng tề lăm.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.