Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

He òs ơn ală tơnggume lơi tom năm pa? He gơs kơp kỡn geh dềt mềr mơ gơbọh gơbài gơwèt mơ Yang rlau sơl? Gung dà năm pa rơp cèng tus ală tŭ lơmpah pa nàng bơt bơtào dô bơta tom klac dềt mềr mơ Yang, nàng he rcang sir cơnòa jat bơta tề lăm Kơnrẵn kòp tŭ, kòp jơ, kòp bă tiah.

Ngai do, ngai 07/02/2024 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Kathy Schultz dê bơh tơnggume NAM PA, SƠNTÒM LƠH BROĂ PA

“Ơ Yàng Jehôwa, dan đơs tĕ bơh cau duh broă Kơnràñ dê ơm iat.” (‭‭I Samuel‬ ‭3:9‬)

Năm pa ò di mìng là tŭ nàng kah wơl ală kirsơnre yau or mơ ơn ală tơnggume pa, mơya găm la tŭ dờng mang nàng bŏl he ơm sền sơwì wơl is să tom he. Kŭng behơ̆, do kŭng la tŭ nàng sền wơl bơta tom klac digul he gơwèt mơ Yang.

Bŏl he gơs tơhir kơp kỡn geh Yang sòl pơnđăng hơđap gùng dà he sơl? Bŏl he rơp chò nùs nàng Kơnrẵn cèng tus ală bơta sơlèt git pa lơm sơl? Bŏl he gơs kơp gơn tềl krơi mơ bơta sơmbòi Kơnrẵn di sơl? Bŏl he gơs họi dăn Kơnrẵn ai gơnoăr ală bơta gơlòng bŏl glăr pa gơlik tus nàng lòng tiar bŏl he sơl? Hala bŏl he găm sơlo gơlik gơs jọng să mơ hưh nùs jat nùs is he di?

Bŏl he păl tomklac dềt mềr mơ Yang Tom Trồ găm kis sum sum, nàng kòp dơ̆ Kơnrẵn hòi jà, bŏl he gơs măt rcang sir tom tŭ Yang ơm rềp mơ mhar hơ: “Ơ Yàng Jehôwa, dan đơs tĕ bơh cau duh broă Kơnràñ dê ơm iat.” (‭‭I Samuel‬ ‭3:9‬)

Nđợ năm lài or, Bèp ăñ kòl đột quỵ mơ păl bic tom hiu sơnơm. Măng hơ̆ ăñ păl ơm wơl hiu sơnơm nang sền gar ồng. Mơ ăñ lơh krơi ngăn tŭ ồng hòi dăn òm tŭ găm bic.

Oă dơ̆ ồng hòi lùp Yang : “ Ơ Yang, Kơnrẵn kỡn kọn lơh bơta lơi Kơnrẵn ĭn?”
Ăñ kơlôi: “Ơ Bèp, bèp pa đột quỵ ơ. Ò di tus di tŭ bèp păl càng rlô bŏl dô it sơl ơ?” mơya ò; ồng kư̆ hòi dăn ò dơh: “Yang kỡn kọn lơh bơta lơi Kơnrẵn ĭn?”

Kơp kỡn ơm tom nùs ală cau koñ gơbọh di la geh kơno jơnau Yang hòi jà mơ cơnòa lòt jat bơta ti lăm Kơnrẵn di.

Jơnau Yàng tom Sră Goh Sôphôni 3:9 đơs jơnau gơnoăr hwơr bơh Bơtau Mêsia lah: “Tòm tŭ hơ̆, Añ rơp tòmgơl jơnau đơs ală làng bol in, gơlik gơs jơnau đơs sàng goh, tồ jơh ală bol khai rơp hòi dan di sơnđan Yàng Jehôwa, mơ dô bă bal duh broă Kơnràñ.”

Ală jơnau do neh gơlik gơs di ngăn tom tŭ Sa Kah Yang. Bŏl he rơp doi nùs dô bă băl duh khoai mơ duh broă Yang. Bŏl he gơs Yang Hwềng Goh, Bơtau bềng lìu hơđăng bŏl he bơh gơnap gơnoăr mơ bơta gơs măt Kơnrẵn di. Mơ Yang Tom Trồ rơp chò hòp tŭ gŏ kọn ur kọn klau Kơnrẵn dô nùs tomklac băl!

Jơnau Yàng tom Sôphôni 3: 17 chồl pơndòm bŏl he ngăn:
“Jehôwa Yàng Tom Trồ ai dê ơm digùl ai; Kơnràñ la cau ling jak ai bơta pha lin. Kơnràñ rơp hòn chò bơh ai mơ bơta chò hòp, Kơnràñ rơp lơh pa wơl ai in, tòm bơta kòñ gơboh Kơnràñ dê; Mơ Kơnràñ rơp bơh ai, mơ hòn chò driau dờng.”

Hơđăng cơnòa gùng lòt bềng bơta gơn kơnòm năm pa kơp kỡn bŏl he rơp sum ơn tơnggume sơnrờp la jòi jat mơ dòp git Yang, kŭng be bơt bơtào bơta tom klac mơ Yang sơlo kơ̆ wền rlau kòp ngai. Nàng kòp tŭ lơi Yang đơs, bŏl he rơp sum rcang sir cơnòa jat jơnau hòi jà Kơnrẵn di.

Dan jà bol he dô nùs bal tòm bơta hòi dan:
Lài mơ năm pa mor tus, dăn Yang ai pà bŏl kọn ĭn nùs nhờm rcang sir lài ală tŭ lơmpah băl mơ bơta gơlòng bŏl glăr Kơnrẵn cèng tus. Lài ngăn, dăn Yang ai pà bŏl kọn in hwềng nùs kơp kỡn nàng gơtòm klac dềt mềr mơ Kơnrẵn rlau tai, nàng bŏl kọn ĭn sum iat kơno jơnau hòi jà Kơnrẵn di mơ rcang nùs dòn bơr jat nùs kỡn Yang. Kọn jơh nùs hòi dăn, Kon ai sơnđăn Yang Jesus Krist, Amen.

Ơ ală ồng mò oh mi kỡn gơboh, kơp kỡn bŏl he rơp ơn tŭ jơ nàng bơtào bơta gơtòm klac dềt mềr mơ Yang tom năm pa do. Bŏl he rơp lơh òs mòng sơntòm ngai pa bơh jơnau hòi dăn sŏng ngăn, jòi kai nàng bơtào tơngguh tom Jơnau Yàng, bơtào bơta dòn kơ̆ ci, mơ kơp kỡn jòi git nùs kỡn Yang tom rài kis he. Họi dăn Yang ai lơngai mơ tề lăm cơnòa lòt he di mơ ăñ ji hơđăng gùng dà jat Yang tom năm pa do mơ oă năm pơnjat tơnơ̆ tai.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.