Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Cau dòn Krist bol he kơp kòñ gơlik gơs ndrơm be Yàng rlau tai, mơya gơs dơ̆ bol he ò lơi tŭ jơ Kơnràñ in mơ kư pơnđơl pràn is nàng joi sèng hơ. Bol he hŭi lah nàng gơs bơta tơmgơl tòm nùs mơ rai kis, bol he pal cang đềt mêr mơ Kơnràñ mơ joi lùp nùs kòñ Kơnràñ hơđang rai kis bol he.

Ngai do, ngai 20/02/2024, Bơta Hòi Dan Kơp Ngai dan jà ală ồng mò oh mi bơtê bal Jơnau Yàng konòm dê bơta dong kơl mò Belinda Elliot dê bơh tơnggumê ƠN TŬ TƠNGAI YÀNG IN

“Tus tĕ rềp mơ Yàng Tom Trồ gen Kơnràñ rơp tus rềp mơ oh mi. Ơ ală cau glài, rào tĕ tê he; ơ ală cau gơs bàr đah nùs, lơh tĕ sàng goh nùs he.” (Jakơ 4:8)

Añ lăng sŏ añ dê mơ nhơm jong. Añ neh lơi gơ jong ir mơ tŭ do sŏ añ lăng gơ lì ngăn. Añ pơnđơl pràn bơ dê gơ nang lòt lơh broă. Do la dô bơta lơh lòt iơh añ dê. Añ ơs gơn jŏ ir nang lòt koh sŏ mơ sŏ añ sơlơ ngai sơlơ gơlì sơlung sơlăng. Añ ò kòñ lơh behơ̆. Ming la añ ò ơn tŭ jơ nàng tus tiah koh sŏ.
Añ kung ò wơng ñchi bơh tai añ ò lfot tus tiah koh sŏ sùm rlau. Dơ nơm sŏ pa liah niam nền cê rơp niam ngan. Tơnơ̆ mơ dơ̆ koh sŏ lai, añ neh chò hòp ngăn mơ sŏ pa koh ntiar mơ gơ ơm niam añ dê.

Mơya tŭ do, gơtha pe kơnhai ngkơi, añ ntao diđap krơh mơ sŏ gơlơh gơlì sơlung sơlăng, lùp is ñchi bơh tai să tơm ò lơi dô ềt tŭ jơ tus tiah lơh sŏ. Añ ò rgơi lơh bơta lơi mơ sŏ jong ir do . Gơ sơntơm rò jruh, kră kơldang mơ tĕ công. Bulah pơnđơl pràn mbe lơi, añ kung ò rgơi lơh gơ in ơm niam jat nùs kòñ añ dê.
Tŭ añ kơlôi bơh bơta hơ̆ diđap krơh kơp àng drim, Yàng tơngkah añ bơh dô nơm krơh ndrơm tòm rài kis đah hwềng. Añ gơlơh be Yàng lơbơn niam tơnkah añ lah añ kung gam lơh ndrơm behơ̆ gơwet mơ Kơnràñ.

Añ lùp is: Sŏ rò jruh sơlung sơlăng añ dê gen gơring lơi tus hơ broă lòt jat Bơtau Krist?
Hơ̆ la tŭ Yàng lơbơn niam tơngkah añ bơh ală bơta añ neh hòi dan mơ Kơnràñ tòm nđờ poh neh sơlet rlau.
“Dilah kòn kòñ sơlơ ngai sơlơ ndrơm be Añ rlau, kòn pal lơi oă tŭ jơ rlau tai Añ in.”
Hơ̆ là bơta song. Tòm nđờ poh rlau, añ ming git yoam tòm tŭ hòi dan ala bơh ơn tŭ jơ ngan mơ Yàng.

“Ơ Yàng, ñchi bơh tai kòn ò rgơi lơh ndrơm be cau ur jak chai tòm sră Jơnau Pơnđik 31?”

“Ơ Yàng, ñchi bơh tai kòn ò ơt ơl rlau?”

“Ơ Yàng, ñchi bơh tai kòn ò kòñ cau be Yàng neh kòñ?”

“Ai plai Yàng Hwềng Goh tòm sră Galati gen mbe lơi taih? Ñchi bơh tai kòn ò rgơi ngui ală nùs nhơm hơ̆ tòm rài kis kơp ngai taih?”

Añ neh ơn ală sèng lùp behơ̆ tòm kơp poh neh rlau, mơya ò hềt tŭ lơi ơn ngan tŭ jơ nàng iat kơnọ sèng hơ Yàng dê. Tŭ do Kơnràñ gam ràng tơlik sèng hơ dô bă loh làng.

Bơta añ cang la bơta tơmgơl mơ ming dô nă Kơnràñ rgơi cèng ceng wơl.

Yàng tơngkah añ lah, ming tŭ añ git kơnòm dê Kơnràñ, añ rgơi gơs ală nùs nhơm ndrơm be Bơtau Krist. Mơya ala tòm hơ̆, añ gam pơnđơl pràn bơtê is să tơm he – bơta do ming lăm tus alah lơm.

Sră Goh sơñio bol he in gùng dà nàng kis dô rài kis Cau dòn Krist phalin:

“Añ la tòm ño, bol mê la ntê. Cau lơi ơm sùm tòm Añ mơ Añ ơm sùm tòm khai gen gơlik oă ngan plai, bơh ơm bơdìh Añ, gen bol mê ò rgơi lơh bơta lơi ò.” (Jang 15:5)

Ndrơm be broă lơh sŏ cang bol he pal ơn tŭ jơ tus tìp cau koh sŏ, broă lơh pa nùs nhơm cang bol he pal ơn tŭ jơ mơ Bèp Hơđang Jong. Añ ming rgơi sơlơ ngai sơlơ ndrơm be Bơtau Krist rlau ming tòm tŭ añ ơn tŭ jơ nang iat kơnọ mơ bơtê Jơnau Kơnràñ.

Hơ̆ là ală tŭ Kơnràñ tiar mòn nùs nhơm mơ nùs kòñ añ dê jat nùs Kơnràñ.
Behơ̆ gen añ rơndap dô bơta tip mat tòm bơta lơh lòt kơp ngai he dê. Ò di la dô bơta tip mat lơh sŏ, mơya la dô bơta tip mat nàng tus diđap mat Yàng mơ jà Kơnràñ tơmgơl añ gơlik gơs kòn mơ mơ Kơnràñ kơp kòñ añ gơlik gơs.

Ai ồng mò oh mi gen mbe lơi taih? Gùng lòt jat Yàng đah hwềng ồng mò oh mi dê gơs siơ̆u bơta phalin hala ò? Behơ̆ gen nền cê lah ồng mò oh mi càng ơn tai tŭ jơ Yàng in – Bơtau dong ồng mò oh mi phalin nùs nhơm tòi glài he dê.

Ơn tĕ tŭ jơ nàng tus mơ Yàng ngai do mơ. Kơnràñ rơp ò tŭ lơi roh jơnau hơ tìp mat mơ kòn kòñ gơboh Kơnràñ dê. Tai bơh Jơnau Yàng gar nền mơ bol he lah:
“Tus tĕ rềp mơ Yàng Tom Trồ gen Kơnràñ rơp tus rềp mơ oh mi. Ơ ală cau glài, rào tĕ tê he; ơ ală cau gơs bàr đah nùs, lơh tĕ sàng goh nùs he.” (Jakơ 4:8)

Dan jà bol he dô nùs bal tòm bơta hòi dan:
Ơ Yàng, gơs dơ̆ kòn ming lòt jat ală bơta kòn kòñ lơh mơ ò ơn tŭ jơ joi git nùs kòñ Kơnràñ dê hơđang rài kis kòn. Dan Yàng dong kòn ơn is tŭ jơ nàng ơn nùs joi git sèng hơ Kơnràñ dê mơ lơh jat nùs kòñ Kơnràñ dê. Dan Yàng tiar mòn nùs nhơm nàng kòn bơtao tơngguh ală nùs nhơm ndrơm be Bơtau Christ. Kòn ai sơnđan Yàng Jesus Krist hòi dan mơ Yàng Bèp, Amen.

Ơ ală ồng mò oh mi kòñ gơboh, digùl broă lơh oă ir, ồng mò oh mi gơs ơn is tŭ jơ dơng mang nang tip mat Yàng hala ò? Ngai do mơ, tơnơ̆ mơ tŭ jơ hòi dan do, ơn tai tĕ tŭ jơ tus hhơ Yàng, mơ tòm ală ngai rơp tus, rơndap tĕ kơp ngai dô bơta tip mat, nang tus di jơng Kơnràñ mơ dơp lềng tŭ jơ gơtơmklac dềt mềr mơ Kơnràñ. Jà tĕ Yàng mùt tòm nùs mơ tơmgơl, tiar mòn ồng mò oh mi gơlik gơs ndrơm be Bơtau Krist rlau tai.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.