Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Oh mi òs yoam Yàng bơh jơh ală bơta kăl-kê mơ gơlòng tơm rài kis hala ò? Gơs tŭ bol he sền oă ir di să tơm he, mơ gơhao nùs gơwèt mơ kờp bơta lơi lơh he in kơnjơ̆ nùs. Bol he huĭ lah dunnia do ò di ming să tom he, mơ ya jơh ală bơta gơ rê mơ Yàng mơ bơh tê Kơnràñ crơng gơs. Bol he pal bơtê git mbe nang ưnngai mơ jòng-ro Yàng oă rlau mơ yoam-pơrhiat.

Ngai do, ngai 17/02/2024, Bơta Hòi Dăn Kờp Ngai dăn jà jơh ală cau iat kơlôi sơnưng bal Jơnau Yàng dê kơnòm di bơta dọ̆ng kơl Sharon Jaynes dê gan tơnggume PƠT WƠL HALA JÒNG RƠ?

“Kơnràñ ơn di bơr ăñ dô bơta đơs-chò pa, hơ̆ la bơta jòng-ro Yàng Tom Trồ bol hi dê.” (Đơs Crih 40:3)

“Dan bi ơm mo mọ̆ mơ lòi ăñ in geh ơm lơngai di ò!” Ăñ ai gơnoar sôr sôr sềm gam nrau: “Mê lơh nggôr nggàc tŭ jơ ăñ hòi dan mơ Yàng!”

Bơta hơ̆ la tơm tŭ ăñ nggui di tiah mŭm hiu nang sơntòm tŭ jơ hòi dan ang drim, gen gơs dồ nơm kòn sềm dềt bơh di bài bơkao mơ gơ neh ơm ting hơ̆ nang lơh rsòn, gen rơ̆p hơđang dồ nơm chi di đap mat ăñ mơ nrau dồ bă gơhao gơjrañ ngan. Ò rgơi kong jai tai, ăñ pal lah pơrhơng kòn sềm hơ̆.

“Do ơ bi”- ăñ đơs- “ñcau neh tăm bài bơkao hơ̆ tò bi in rgơi lơh rsòn taih? Hơ̆ la ăñ! Ñcau neh yông mơ ơn pơnđôm bơkao in? Hơ̆ kung la ăñ! Mơ ñcau tùh dà bơkao in kờp ngai taih? Mơ hơ̆ kung la ăñ! Gen tang băñ lik ting do nang yoam-pơrhiat tơm tŭ he nggui do mơ dòp geh jơh ală bơta bơh tê he neh tùc tăm. Bơh sơnròp jơh ală bơta neh la ăñ jê mơ ăñ niam nùs nang ai bi in kis ting hơ̆. Mơ bi pal git ưnngai bơh bơta hơ̆. Rlau mơ hơ̆, bi neh lơh gơlik gơs dồ bơta sơlông-sơlang ngan!”

Sềm kư̆ pơnjat nrau dờng tai mơ ăñ, mơ nisơna tŭ hơ̆ ăñ dòp git lah ală jơnau yoam pơrhiat gơhao gơjrañ gơ dê gơlơh mòng ngan. Bơh hơ̆ drom be jơnau yoam pơrhiat ăñ jê. Ăñ òs yoam pơrhiat ò git nđò tơm tŭ ală broă gơlik gơs ò di nùs kòñ, hala tơm tŭ gơs bơta lơi hơ̆ lơh roh bơta ring- ngềt ăñ jê.

Ăñ ăñ ăñ- ăñ sum sền he la dờng mang rlau jơh tơm plai ù.
Gen Yàng lơbơn niam bư tơm nùs nhơm ăñ. Ñcau neh crơng gơs plai ù do bơh sơnròp? Ñcau neh tăm mơ tùh ală bơta kòn neh dòp geh do? Plai ù do mơ jơh ală bơta gơs mat ting do gơrê mơ Ăñ. Ăñ ming niam nùs ai gơnoar kòn gơs mat ting do. Mơ rlau mơ hơ̆, gơs tŭ kòn kung neh lơh gơlik gơs sơlông-sơlang ngan. Behơ̆, băñ yoam pơrhiat gơhao gơjrañ tai, mơ sơntòm tĕ pò bơr jòng-ro ală seng đơs chò mơ Ăñ neh ơn tơm nùs kòn.

Hơ̆ la tŭ tơngai ò gơs ring lơngai, mơ ya jơnau Yàng dê neh rang tơlik tơm nùs ăñ dồ bă loh lang mơ gơs bơta kis bing-liu rlau jơh. Tŭ jơ kư̆ yoam pơrhiat bơh jơh ală bơta ăñ ò niam nùs, gen Yàng tơngkah ăñ pal sền wơl jơh ală bơta lơngai mơ Yàng ai ăñ in. kơnòm bơh hơ̆ ăñ geh bơtê bơta pơndềt să, hừh nùs mơ jòng-ro Kơnràñ sum sum.

“Kơnràñ ơn di bơr ăñ dô bơta đơs-chò pa, hơ̆ la bơta jòng-ro Yàng Tom Trồ bol hi dê. Oă cau rơp gŏ bơta hơ̆ mơ rngòt, gen dòn kơnòm di Yàng Jehôwa” (Đơs Crih 40:3)

Dan jà bol he dô nùs bal tòm bơta hòi dan:
Khoai Yàng, kòn ming la dồ nă cau ơm ơpah geh Yàng kòñ gơboh ai gơnoar kis hơđang plai ù hang mơnĕ mơ Yàng neh crơng gơs. Dăn bơto kòn mbe kis sum pơndềt să mơ git ưnngai bơh ală bơta Yàng neh ai kòn in. Bơh dilah yoam pơrhiat sum mơ Yàng bơh ală bơta ò dờng mang, gen dăn ai kòn in nùs nhơm sum jòng-ro Yàng la Bơtau Crơng Gơs kòn dê. Kòn jơh nùs hòi dăn tơm sơnđan Yàng Jesu Krist, A-men.

Ơ jơh ală ồng mò, oh mi kòñ gơboh, yoam pơrhiat ming lơh oh mi in sơlơ moat jrùng, roh gơn kơnòm mơ ò hừh nùs mơ rài kis do. Gen tang, dilah yoam pơrhiat, gen jòng-ro Yàng tĕ mơ git ưnngai tai bơh ală bơta niam rlau jơh Kơnràñ neh ai oh mi in. oh mi rơp sền gŏ rài kis oh mi di bìng-liu hòn-chò, ring lơngai mơ lơngap-lơngai. Oh mi rơp gŏ he gơs rbô rhiang tơnggu nang kòñ gơboh mơ duh rngòt Yàng. sơntòm tĕ bơh ngai do, pơndùt yoam pơrhiat mơ jòng-ro Yàng tĕ.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.