Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Digơlăn cau lơi tòm bol he kung neh gơs gơlơh dơrcul tòm tŭ ntao diđap ală sơnah pleh rài kis dê. Bol he ò git sac rwah gùng lơi, ò loh bơta lơh nền he dê rơp cèng he lòt ri tiah lơi. Mơya Yàng là Bơtau git loh ală gùng, mơ Kơnràñ rơp tì lăm bol he tus tiah rlô bol ring lơngai tŭ bol he git dòn kơnòm dê Kơnràñ.

Ngai do, ngai 13/0202024, Bơta Hòi Dan Kơp Ngai dan jà ală ồng mò oh mi bơtê bal Jơnau Yàng kơnòm dê bơta dong kơl mò Candy Arrington dê bơh tơnggumê SƠNAH PE GÙNG

“Yàng Jehôwa đơs be do: “Ntào tĕ hơđang ală sơnah gùng, mơ sền; mơ lùp bơh ală gùng rài yau, Ntềng đah gùng niam ơm gen lòt tĕ tòm hơ̆, mơ jòi bàn bơta rlô bòl hwềng soàn bol mê in. Mơya bol khai đơs lah: ‘Bol hi rơp ò lòt tòm gùng hơ̆.” (Jeremi 6:16)

Oă sơnăm bơh dô, ur klau añ neh gơs dô bơta lòt gùng dipal kah ngăn tus hơ Scotland. Bol he roh mà kơnhai nàng lơh bơta rơndap – blơi vé rơndeh par, tiah ơm mơ gùng lòt. Bol he par tus Anh, hao rơndeh ồs tus Edinburgh, jôm rơndeh mơ bơtê hao rơndeh lòt gùng jat boh lằm bọn lơgar tềng do dê. Bol he ntoat làm tiah hơđang mơ sền rmê ală tơrlung dà, hiu dơng mơ lŭ, ală tiah rài yau mơ ală bơta găm wơl ală gùng yau dê. Bol he geh kơnọ yal yau bơh rài yau bơh ală bơta tờm lơh, ală bơta tơmpit ai ală hiu bơtau rài yau dê.

Añ neh rơdap lai ơnih bic jat gùng lòt, lơh liah wơl bơta lòt gùng nàng broă hao rơndeh ò kalkê ir. Mơya tus dê pôt pơlao đah mattơngai mùt, bol he roh oă tŭ jơ rlau mơ rơndap tap seng. Bol he pal hao ơhò mơya bơta lòt gùng ò drơm be bol khai yal hơđang mạng. Bol he pal ơm gơn ơhò pơnjat tòm oă tŭ jơ.
Tŭ neh hao ơhò rau, bol he tìp dô nơm gùng dềt tiar bŏ. Bol he cơnđoà lot jat tòm ală srê, ală yồ, ờs pal hao rềp di gah gùng nàng ală rơndeh ndai in lòt lai hơđap, bơh gùng dềt ir. Gơs tŭ, añ mor ñim. Gơlơh be bol he neh lòt tis tòm bơta roh gơn kơnòm. Añ sôr bau klau ri wơl tềl mơya khai kư đơs lah bol he neh lòt ngai ir, ò rgơi wơl tai. Bơtoah ngăn bol he joi geh dô nơm ơnih điện thoại bal dê, mơ hòi tơn tus ơnih bic bol he neh rơndap lai. Nggờc nggơr ngăn tòm tŭ bol khai lơh nền lah bol he neh lòt di gùng, bulah gam pal hao rơndeh oă tŭ jơ tai nàng tus ơnih rờ. Lơngai nùs ngăn bơh git lah bol he neh lòt di gùng, mơ dô ơnih ơm rlô lơngap lơngai găm ơm gơn bol he tŭ lòt tus.

Trồ mhô tus, mơ lồi dut kung gơs dô bơta àng tus bơh ngai. Tŭ bol he tus, sơ ỏi mơ lơgah, cau tơm ơpah hiu bic neh wă rò bol he dô bă sơmah sơmai. Bulah bol he ri bic mơ kơndul ji gloh mơya ngan ò gơs bơta lơi niam rlau la geh rlô tòm tŭ do.

Ntas tiang liang lơh bol he guh bơh bic tòm drim ngai tơnơ̆. Lơmo gam sa ñhơt diđap hiu. Sir sa drim, bol he hao rơndeh mơ pơnjat gùng lòt tus lồi pồt bơlao, kung là lồi đah mattơngai mùt Scotland dê. Diđap mat bol he la rup crih crai tơlêr dàlêng dơng dê, pha is mơ jơh ală bơta bol he neh sền gŏ. Bơta do lơh ală bol glar kalkê ngai or dê gơlik gơs dipal wiltơl.

Jơh tơl nă bol he la ală cau lòt gùng hơđang gùng rài kis, mơ cau lơi kung pal ai bơta sac rwah tòm tŭ tìp sơnah pe gùng. Gơs dơ̆, bol he mùt tòm gùng lòt bềng bol glar, mơ pal lùp is să tơm lah pal pơnjat lòt hala ơm bơdơh. Gơs dơ̆, bol he mùt tòm gùng niam, mơya gơlơh be neh tis gùng. Mơya ndrơm be Jơnau Yàng tòm Jeremi 6:16, Kơnràñ hòi jà bol he joi bơta tề lam Kơnràñ dê nàng cơnđoà lòt tòm gùng song ring mơ joi geh tiah rlô bal hwềng soan he in.

Rài kis ờs ceng bol he tus hơ ală sơnah bềng bơta dơrcul. Bañ rngòt mơ pal joi jat tĕ bơta tề lăm bơh ală cau git loh gùng. Dan tĕ mơ Yàng ai bol he in bơta jak chai, găn dê bơta hòi dan mơ kơlôi sơnưng Jơnau Kơnràñ, gen sac rwah gùng lòt niam rlau jơh jat bơta tề lam Yàng Hwềng Goh dê. Tŭ geh Yàng tề lam, bol he ò gam pơnđơl să tơm nàng ai bơta lơh nền jat bơta pràn mơ jơnau đơs să tòm dê. Lơngai nùs ngăn tòm tŭ git lah Yàng gam tề lam bol he hơđăng rài kis gùng lòt jong hơđap, be Kơnràñ gam tề lam kòn lang Kơnràñ dê găn dê ală pah rai mơ jơl tus ngai do:
“Jehôwa Yàng Tom Trồ bol mê dê, la Bơtau neh lòt lài di đap bol mê tòm gùng lòt bol mê dê, trồ mang tòm jrong ồs mơ trồ ngai tòm dô puk mhwal, nàng jòi bol mê in ală tiah nàng bơtào sàl ơm, mơ sơnio bol mê in gùng bol mê pal lòt.” (Yal wơl Bơta Boh Lam 1:32b-33)

Dan jà bol he dô nùs bal tòm bơta hòi dan:
Ơ Yàng, gơs tŭ kòn dơrcul mơ rngòt tòm tŭ ntao diđap sơnah pe gùng rài kis. Kòn ò git he ri wơl hala cơnđoà pơnjat, hala he gơs lòt tis gùng hala ò. Dan Yàng ai kòn in bơta jak chai mơ nùs dòn kơnòm nàng cơnđoà lòt jat bơta tề lăm Kơnràñ dê. Dan Yàng tề lam kòn mơ lòt bal mơ kòn, lăm kòn tus hơ tiah ring lơngai lồi dut gùng dê. Kòn ai sơnđan Yàng Jesus Krist hòi dan mơ Yàng Bèp, Amen.

Ơ ală ồng mò oh mi kòñ gơboh, ồng mò oh mi gam ntao diđap ală sơnah gùng lơi tòm rài kis? Sơmbat tĕ ti Yàng, lơi Kơnràñ tề lăm ồng mò oh mi cơnđoà lòt tòm gùng mơ Kơnràñ neh sac ồng mò oh mi in. Neh cơnđoà lòt mơ Yàng, ồng mò oh mi rơp ò tŭ lơi lòt tis gùng. Kah sùm tĕ jơnau song dô nàng geh gơs bơta lơngai hơđang jơh gùng lòt hơđap.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.