Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Bol he os mờng prap lòi mơ ơn prap lơh kwơ jên priă, phan mơna he dê tềng lơi tiah? Digơlan lah tòm đam jar, chứng khoán hala tòm sre bri taih? Mơya bol he git sơl, jơh ală phan hơ̆ rgơi roh thit tòm dô êt phuk. Mìng gơs dô bă tiah bol he prap lòi phan mơna mơ ò tŭ lơi rngòt roh hala gơ hùc bơta kwơ màng gơ dê. Hơ̆ la tòm đam jar Hơđang Trồ Yàng bol he dê, tiah hơ̆ rơp cèng tus “cồng nha” oă rlau mơ bàr dơ̆ bal mơ bơta lơngap lơngai jơl sùm sùm.

Ngai do, ngai 15/02/2024, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Cathy Irvin bơh tơnggume: TUH ALĂ BROĂ TÒM LƠGAR HƠĐANG TRỒ

‘ …Lòng tĕ Añ tòm bơta do,” Yàng Jehôwa Gơnap Gơnoar Dờng Làm Jơh đơs behơ̆. “Mơ sền dilah Añ ò pò ală mpồng dềt hơđang trồ bol mê in, mơ tuh bơta lơngai lơngò oă ngan bol mê in, tian gơs ò tang tiah prap tai! ‘ (Malaci 3:10)

Sră Goh cih lah ală phan poan jơng hơđang bồ mơnơm gơrê hơ Yàng (Đơs Crih 50:10). Ồng mò oh mi rgơi kơ lôi sơ nơng git nđò jên priă gơlik gơs bơh ală phan poan jơng hơ̆ sơl? Digơlan bol he rơp gơs tơl jền priă nàng kis tơngkah tơngkan mơ sa loan jơh rài.

Tŭ bol he pơyoa jền priă tòm tiah prap, jền priă rơp gơlik cồng nha jat tŭ jơ. Broă ơn prap tòm “Đam jar Hơđang Trồ” kung be hơ̆ sơl . Dròm be tac dô nơm kòn kơnrồ gen rơp gơs oă jền priă. Tài bơh dô pet poac kơnrồ la oă priă rau, mơya hơ̆ mìng dô pơnah dềt lơm mơ jơh kòn kơnrồ dê.

Tŭ bol he ơn prap lơh kwơ tòm lơgar Yàng Tòm Trồ gan dê bơta ơn pơnah jơt mơ phan duh khoai he dê, Sră Goh ho pơgon lah bol he rơp geh ai pà bơta lơngap lơngai oă rlau tai. Hơ̆ kung lah mìng pơnah mơ Yàng Tòm Trồ hòi jà bol he lòng Yàng.
‘ …Lòng tĕ Añ tòm bơta do,” Yàng Jehôwa Gơnap Gơnoar Dờng Làm Jơh đơs behơ̆. “Mơ sền dilah Añ ò pò ală mpồng dềt hơđang trồ bol mê in, mơ tuh bơta lơngai lơngò oă ngan bol mê in, tian gơs ò tang tiah prap tai! ‘ (Malaci 3:10)

Yàng Tòm Trồ la Jehôwa Jirê, la Bơtau ai pà ală phan pal càng bol he in. Kơnràñ kung la cau jak chài bơh jền priă niam rlau jơh mơ bol he gơs tòm rài kis do. Kơnràñ bơto sồr bol he pal ơn phan wèt mơ nùs dờng ơnàng gen tàng ho pơ gon lah bol he rơp geh dòp wơl oă rlau ò jai kòp.

Do la tŭ nàng sih mơ toès. Yàng Jesu đơs Kơnràñ rơp ai pà ală bơta pal càng bol he dê jat bơta pas gơs mơ ryŭ ryơm Lơgar Trồ dê. Bol he pal sền hơ Bèp Lơgar Trồ mơ at bồ dô bă jak chài ală phan mơ Kơnràñ ai pà. Bol he ò càng ơn nùs ơn tồr dê ală broă mơ dunia do ai pà. Bol he pal cang bơtê prap lòi mơ ơn prap lơh kwơ dô bă jak chài. Mơya bol he bañ gơ hŭi ò rgơi ai pơnah jơt mơ ală phan ơn duh khoai gơ rê hơ Yàng. Ơn phan Yàng in lah gùng dà bol he ơn prap lơh kwơ phan mơna tòm đam jar Hơđang Trồ.
Ngai do, bol he kơlôi sơ nơng tai bơh phan poan jơng hơđang rbô mơnơm, mơ ơn prap lơh kwơ oă rlau tai tòm đam jar Lơgar Trồ. Dilah ồng mò oh mi òhềt lơh bơta hơ̆ gen sơntòm pò “tài khoản Hơđang Trồ” jơ do tơn. Ò tŭ lơi la bat ir nàng ơn prap lơh kwơ tòm Lơgar Trồ mơ prap lòi phan màng Hơđang Trồ!

Dan jà bol he dô nùs bal tòm bơta hòi dan:
Khoai Yàng, dơ̆ dơ̆ kò gơboh gơbàì bơta prap lòi jền priă he dê hơđang dunnia do, mơ gơ hŭi la phan mơna hơ̆ la roh lơm mơ ìng lơm. Dan Yàng toh glài kòn in mơ dong kòl kòn kah lah mìng gơs Yàng la Bơtau ai pà sùm sùm. Dan Yàng bơtê kòn dòn song ơn phan Yàng in gan dê ală phan duh khoai niam rlau jơh he gơs, nàng kòn rgơi ơn prap phan màng he dê hơđang trồ, la tiah ò gơs mŏ tu mơ ò gơs è sa siar roh, kung ò gơs cau blơ̆ tò ƀlong mut kơñau. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, jơ do tòm đam jar ồng mò oh mi dê gơs ală phan mơna lơi taih? Ồng mò oh mi ơn ơn prap phan mơ na he tòm đam jar Hơđang Trồ hala ò? Kah prap jơnau ho pơgon Yàng dê, tŭ dòn song ơn phan Yàng in wèt mơ nùs ưn ngài , Kơnràñ rơp ai pà ồng mò oh mi in bơta lơngap lơ ngai oă rlau mơ ală bơta ồng mò oh mi kơp gơn. Hơ̆ ò dê mìng la bơta lơngai lơ ngo bơh phan mơ na mơ gam la cat lơngai lơ ngo ò git nđò hơđang ală pơnah tòm rài kis he dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.