Puas tau muaj zaum twg koj xav txog qhov uas Vajtswv yog tus loj dua ntais, thiab koj xav tsis thoob vim tus uas loj kawg nkaus ntawd hu koj ua Nws tus menyuam? Thaum koj tsau tsawv rau hauv txoj kev txhaum, cuag li tsis muaj ib yam dabtsi tsimnyog ntawm Vajtswv xub ntiag, ces Vajtswv txais koj los ua Nws tus menyuam thiab coj koj los nyob rau hauv Vajtswv tsev neeg. Lub meej mom “tau hu ua Vajtswv menyuam nws muaj nqis npaum li cas?

Hnub no, yog hnub 13/07/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Byron Clay Bohnert dhau ntawm Zaj kawm TAU UA VAJTSWV MENYUAM.

“Vajtswv thiaj xub xav tseg lawm hais tias Vajtswv yuav txib Yexus Khetos los coj peb mus ua Vajtswv cov menyuam. Qhov ntawd haum Vajtswv siab thiab raws li Vajtswv tau xav tseg lawm.” (Efexaus 1:5).

Kuv hwm cov neeg uas lawv puag menyuam los ua lawv menyuam thiab tu zoo li tus uas yog lawv yug los. Qhov no tsis yog tsuas qhia tawm tias lawv yuav tau tso lawv tus kheej los tu tus menyuam ntawd tiamsis tseem yog qhia tawm txog lawv nplooj siab hlub suav tsis tag uas tau muab hlub tus menyuam ntawd. Puag menyuam los tu tsis yog tsuas yog ib qhov haujlwm zoo xwb tiamsis tseem tseg sijhawm rau tej menyuam nrhiav tau txoj kev sov siab hauv tsev neeg thiab muaj lub neej tom ntej tshav ntuj nrig.

Kuv ob tug phooj ywg yog Randy thiab Martha nkawd tau puag ob tug mentxhais neeg Suav los tu yog Emma thiab Ali. Txhua thiv, thaum sib ntsib hauv tuam tsev, txoj kev zoo siab puv npo thaum ob tug menyuam ntxhais khiav los puag kuv. Tiamsis yam ua rau kuv zoo siab tshaj yog ob lub qhov muag tau txais kev hlub ntawm Randy thiab Martha nkawd thaum nkawd saib nkawd ob tug mentxhais – ob tug mentxhais ua si, tsis muaj kev txhawj dabtsi.

Koj thiab kuv kuj tau Vajtswv puag los ua menyuam thiab dhau los ua ib feem nyob hauv Vajtswv tsev neeg. Tej zaug koj yuav cim civ nug tias: Ua li cas tej no thiaj yuav tshwmsim tau tuaj? Vajluskub muab lo lus teb rau peb: Tsuas yog peb qhib siab los txais yuav Tswv Yexus thiab ntseeg Nws, ces peb yuav tau lub hwjchim kom dhau los ua Vajtswv menyuam.

Vajluskub qhia txog Tswv Yexus nyob hauv Yauhas 1:10-13:
“Txojlus ntawd twb los nyob hauv ntiajteb no lawm, thiab Vajtswv kom nws tsim lub ntiajteb, tiamsis ntiajteb tsis paub nws. Nws los rau hauv nws lub tebchaws, tiamsis nws haivneeg tsis lees yuav nws. Txawm yog li ntawd los cov neeg uas lees yuav nws thiab ntseeg nws, nws pub lawv muaj cai los ua Vajtswv cov menyuam. Qhov uas lawv tau los ua Vajtswv cov menyuam tsis yog raws li neeg ibtxwm muaj menyuam uas yog muaj niam muaj txiv yug; Vajtswv yog lawv txiv”.

Peb leej txiv nyob saum ntuj nws tsis muaj ib zaum twg yuav xaiv ntsej muag ntawm nws cov menyuam, peb los kuj yuav tau xyaum raws li Tswv Yexus tus qauv. Nyob hauv Vajtswv lub qhov muag, tag nrho peb txhua tus koom ua ib lub siab zoo li ib tsev neeg, sib txuas ua ke nyob hauv Yexus Khetos.

Thaum saib Emma thiab Ali nkawd, ces koj yuav pom tias nkawd yog tau puag los tu, vim nkawd yog neeg sab Axias, tsis zoo li nkawd niam nkawd txiv puag nkawd yog neeg tawv dawb. Tiamsis yog koj qi muag thiab tsuas mloog nkawd sib tham xwb, koj yuav tsis pom ib qhov kev sib txawv twg nyob rau hauv tsev neeg no.

Vajtswv nthuav tawm Vajtswv tus dejsiab meej meej nyob hauv Efexaus 1:5
“Vajtswv thiaj xub xav tseg lawm hais tias Vajtswv yuav txib Yexus Khetos los coj peb mus ua Vajtswv cov menyuam. Qhov ntawd haum Vajtswv siab thiab raws li Vajtswv tau xav tseg lawm.”

Vajtswv kuj hu peb ua Vajtswv menyuam thaum peb tau Vaj Ntsujplig ua tus coj ib yam li Loos 8:14-16 sau:
“Tus uas cia Vajtswv tus Ntsujplig qhia, tus tus ntawd thiaj yog Vajtswv tus menyuam. Rau qhov nej tsis tau tus ntsujplig uas coj nej mus ua qhev kom nej txhawj nej ntshai, tiamsis nej tau Vaj Ntsujplig tus uas coj nej los ua Vajtswv cov menyuam, kom nej muaj cuabkav hu Vajtswv hais tias, “Anpas! Kuv Txiv!” Vajtswv tus Ntsujplig qhia rau peb lub siab hais tias peb yog Vajtswv cov menyuam”.

Thaum uas kuv ob tug phooj ywg xyab tes mus txais yuav Emma thiab Ali nkawd, nkawd dhau los ua niam thiab txiv rau ob tug menyuam. Ib yam li ntawd, Vajtswv kuj xyab tes los txais yuav peb ua Vajtswv menyuam. Vajtswv ua leej txiv rau tej menyuam ntsuag, yog leej txiv hlub tsis yuam ua dabtsi. Txawm yog niam txiv hauv ntiajteb no ua rau peb tag kev cia siab los peb yeej tau so rau hauv Vajtswv txoj kev hlub nyob mus ib txhis tsis hloov pauv saum ntuj ceebtsheej.

Nyob hauv Ntawv Nkauj 27:10 vajntxwv Daviv txhawb peb txog leej txiv saum ntuj qhib siab los txais yuav nws tej menyuam:
“Thaum koj niam koj txiv tso koj tseg tus Tswv yuav txais yuav koj.”

Thov caw nrog kuv peb thov Vajtswv ua ke:
Tus Tswv, tau koob hmoov tshaj plaws thaum uas kuv tau ua Koj tus menyuam, thiab tau hu koj ua Anpas- kuv txiv! Thov Leej Txiv Koj pab kom kuv ua lub neej tsimnyog rau koj txoj kev hlub thiab kev cawmdim, kom ua rau koj tau koob meej hauv kuv lub neej! Kuv thov hauv Tswv Yexus Khetos lub npe. Amees.

Cov kwv tij txhua tus, koj ib txwm yog ib tug neeg txhaum tab tom puas tsuaj, tiamsis los ntawm Vajtswv txoj kev hlub, koj muaj caij dhau los ua ntxhais vajntxwv tub huab tais nyob rau hauv tus Vajntxwv ntawm txhua tus vajntxwv lub tebchaws – thiab yeej tsis muaj ib txoj kev zoo siab twg loj npaum li ntawd! Cia siab tias zaj lus tim khawv hnub no yuav tshoov kom koj nco Vajtswv tshav ntuj vim tau ua Vajtswv tus menyuam thiab ua lub neej pom kev rau lub ntiajteb kom sawv daws paub txog Vajtswv lub npe – yog Leej Txiv uas hlub koj!

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.