Kev txhaum yog yam uas quas peb tawm ntawm Vajtswv, thiab peb tib neeg tus cwjpwm pheej nyiam zais kev txhaum. Nyob rau lub sijhawm uas txomnyem tshaj plaws, yog lub sijhawm thaum peb tos Vajtswv txoj kev cawmdim, lees peb tej kev txhaum yuav pab rau peb nrhiav pom Vajtswv txojkev khuvleej thiab tus Tswv yuav teb peb tej lus thov.

Hnub no, yog hnub 27/09/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Beth Patch dhau ntawm Zaj kawm VAM KHOM RAU VAJTSWV TXOJKEV KHUVLEEJ.

“Yog koj pheej npog tej kev txhaum tseg koj lub neej yuav tsis vammeej; yog koj lees thiab tso plhuav tej kev txhaum tseg Vajtswv yuav hlub koj.” (Paj lug 28:13).

“Tag kev cia siab” yog lo lus qhia tawm kuv lub siab nyob rau tagkig uas txiag ziag hnub ntawd, yog ib hnub nyob hauv lub hli 1 xyoo 1988. Tus menyuam nyob hauv kuv plab tsis ua pa lawm, tshuav kuv ces ntshav los tsis tu, cov kws tshuaj lawv pab tsis tau li. kuv tus tub lawv hais tias yuav yug rau lub tsib hli, tshuav plaub hli lawm thiab xwb. Lub tsev kho mob hauv zej zog no kho tsis tau cov uas muaj menyuam, kuj tsis muaj txaus cuab yeej los mloog saib tus menyuam lub plawv puas tseem dhia, yog li, kuv thiaj tsis paub tias xyov kuv tus menyuam puas tseem muaj sia lossis tsis muaj.

Cov kwv tshuaj nyob hauv tsev kho mob thiaj hu ib lub tsheb thauj neeg mob menyuam tuaj thauj kuv mus rau lwm lub tsev kho mob uas nyob deb kwv yees li 45 feeb. Kuv nyob tos rau teev sijhawm, kws tshuaj hais rau kuv ntau zaug tias tsheb yuav tuaj txog sai xwb. Kuv yeej tseem ua siab loj, thiab ntseeg tej uas kws tshuaj hais.

“Tsheb tuaj txog lawm” ib tug kws tshuaj hais.

Cov kws tshuaj pab tsaws kuv thiab tag nrho tej khoom mus rau saum tsheb. Thaum kawg kuv kuj tau zaum lub tsheb uas muaj txaus txhua yam cuab yeej pab kuv yog tias kuv txog sijhawm yuav yug menyuam.

Xav tsis thoob li, cov kws tshuaj ho muab kuv pauv mus rau ib lub tsheb qub qub tso ntawm tshav puam. Tus tsav lub tsheb kho mob ua ntsej muag txhawj xeeb nyho thaum tsaws kuv mus rau hauv.

“Tau lawm” tus tsav tsheb qw nrov nrov kaw qhov rooj thiab mus rau ntawm qhov chaw tsav.

Cuag li kuv tsis paub yuav ua li cas lossis yuav hais dabtsi lub sijhawm ntawd. Kuv tsis xav rov qab los mus rau lub tsev tshuaj qub, qhov chaw uas kuv twb tos ntev heev. Tshuav kuv tus menyuam twb tsis hnov nti li, kuv yuav tau txais yuav qhov tseeb tau tshwmsim los li ntawd.

Kuv nug tus kws tshuaj hluas zaum ib sab: “Ntawm no puas muaj yam dabtsi pab kom kuv yug tau sai?”

Nws teb: “Peb tsuas muaj ob peb daim pam thiab ob peb daim phuam xwb”. nws ke hais nws ke taw tes rau lub hnab ntim cuab yeej dai tim phab ntsa.

Tseeb tiag cov kws kho mob lossis tsev kho mob tsis yog qhov chaw uas kuv yuav cia siab rau lub sijhawm no lawm. Kuv tsuas paub vam khom Vajtswv xwb. Kuv thiab kuv tus menyuam cheem tsum Vajtswv ua tus pab! Tiamsis kuv twb txav deb Vajtswv ntev heev lawm, thiab kuv lub kua muag thiaj poob. Nyob hauv kuv txoj kev xav twj ywm ntawd, kuv nco muaj ib tug xibhwb tau qhuab qhia hais tias yog xav kom tau Vajtswv mloog peb tej lus thov, peb yuav tsum lees peb tej kev txhaum.

“Yog kuv tsis lees kuv tej kev txhaum,
tus Tswv yuav tsis mloog kuv tej lus thov” (Ntawv Nkauj 66:18).

Yog li, kuv thiaj tig mus rau ntawm tus kws tshuaj thiab hais tias, “Thaum no kuv paub leej twg thiaj yog tus tuav kuv lub neej. Kuv yuav tau thov Vajtswv.” Hais li tag, kuv pib lees ib qhov kev txhaum zuj zus uas kuv nco tau. Kuv tsis xav ib yam dabtsi yuav tav kuv txoj kev thov Vajtswv. Kuv lees ib qhov zuj zus thiab thov Vajtswv zam txim. Kuv hais rau Vajtswv tias kuv khuv xim txog tej kev txhaum kuv tau ua yav dhau los, thiab kuv tsis xav ua ntxiv lawm, ua Vajtswv tsaug rau Vajtswv txoj kev zam txim. Kuv tsis paub tias kuv thov Vajtswv ntev npaum cas, tiamsis txog thaum uas kuv xav tsis tau ib qhov kev txhaum twg lawm, kuv mam nres thiab qhuas Vajtswv. Tom qab, kuv thov Vajtswv cawm kuv tus tub. Kuv fij kuv lub kua muag thiab kuv lo lus thov tagnrho huvsi rau Vajtswv.

Thaum mus txog tom tsev tshuaj, kuv pib qw nrov nrov. “Kuv tus tub rov qab tuam taus lawm!” “Nws tseem muaj sia! Ua Vajtswv tsaug, ua Vajtswv tsaug! Kuv tus menyuam tseem ciaj! Tseeb tiag nws tseem ciaj!”

Tus tsav tsheb thiab tus kws tshuaj tau pom ib qhov txujci. Nkawd ob lub qhov muag cia li tauv kua muag zeeg thaum thawb kuv tawm hauv lub tsheb los thiab hais rau kuv: “Vajtswv foom hmoov rau koj”.

Thiab Vajtswv tau foom koob hmoov rau kuv. Kuv tus tub yug los ob hlis tom qab, txawm yog yug ntxov los nws muaj zog zis.

Thaum thov Vajtswv, txhob hnov qab tej kev txhaum uas koj tsis tau lees tawm nyob hauv koj lub neej. Cia li lees tag nrho tej kev txhaum rau Vajtswv kom thiaj tsis muaj ib yam dabtsi tav koj thiab Vajtswv. Thaum ntawd tej uas koj muab fij rau Vajtswv, Vajtswv thiaj yuav mloog. Vajtswv lub siab khuvleej thiab kev hlub loj tshaj tej uas peb yuav xav tsis txog.

“Yog koj pheej npog tej kev txhaum tseg koj lub neej yuav tsis vammeej; yog koj lees thiab tso plhuav tej kev txhaum tseg Vajtswv yuav hlub koj . (Paj lug 28:13).

Thov caw nrog kuv peb thov Vajtswv ua ke:
Ua Vajtswv tsaug rau qhov Vajtswv koj tseem nthuav tawm koj txoj kev khuvleej rau kuv txawm yog kuv tsis tsimnyog. Tiamsis ntau zaug kev txhaum ua rau Vajtswv koj tsis mloog peb, thov Vajtswv pab kom txhua hnub peb paub tshuaj peb tej kev txhaum, lees tawm thiab vam khom Vajtswv lub zog muab tej ntawd tso pov tseg. Kuv thov hauv Tswv Yexus Khetos lub npe. Amees.

Cov kwv tij, tsis yog Vajtswv txhais tes luv cawm tsis tau peb, lossis Vajtswv lub pob ntseg tsis hnov peb, tiamsis vim peb tej kev txhaum thiab kev phem ua rau Vajtswv nraim peb thiab tsis mloog peb. Cia li tshuaj peb lub siab thiab lees tawm, cog lus tso tej kev txhaum uas koj tsis yog txhob txwm lossis koj tau ua txhaum lawm. Vajtswv nyiam txoj kev lees txim thiab zoo siab hlo zam txim rau tus uas paub txo hwjchim los mloog Vajtswv.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj. Thiab peb xav kom txuas tau nrog koj.