Puas muaj zaum twg koj pom twg kev thiab tsis paub yuav ua dabtsi nyob rau hauv lub ntiajteb no? Ib yam li koj tsis muaj nqis dabtsi, yeej tsis muaj feem nyob qhov twg, thiab tsis muaj leej twg quav ntsej koj? Tej kev xav ntawd tej zaug nws yuav txeem los rau hauv koj lub siab, ua rau koj cim civ nug tias puas muaj leej twg nkag siab thiab pom koj txoj kev nyob ib leeg uas koj tab tom tiv ntawm no. Tiamsis txawm yog nyob rau tej lub sijhawm tsaus ntuj nti ntawd los, muaj ib qhov chaw uas yog koj li thiab muaj ib txoj kev hlub pub dawb tab tom tos koj.

Hnub no, yog hnub 28/09/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jessica Teed dhau ntawm Zaj kawm KEV CAWMDIM YOG PUB RAU TXHUA TUS.

“Vajtswv txojlus hais tias, “Txhua tus uas thov tus Tswv pab yuav dim.” (Loos 10:13)

Kuv muaj ib tug phooj ywg ua haujlwm ua ke npe hu ua Dani. Nws yog ib tug neeg uas ua rau lwm tus xav xav paub ntau txog nws. Thaum twg nws twb luag ntxhi thiab zoo siab, txawm yog haujlwm yuav ntau. Hos nyob ntawm kuv, cuag li kuv tsuas tab tom luag ceg ib hnub dhau ib hnub. Kuv thiaj nug tias vim li cas nws ho yuav zoo siab li ntawd. Yam dabtsi ua rau nws zoo siab ua luaj? Tsis ntev tom qab, wb pib sib tham ntau dua. Dhau pluag noj su uake thiab sib tham, kuv paub tias Dani nws rau siab ntso mus pehawm, thiab nws yog ib tug uas kub siab lug caum lawv Tswv Yexus qab.

Dani pheej caw kuv mus pehawm Vajtswv, thiab txhua zaug li no, kuv pheej yig. Muaj ib zaug, kuv luag thiab hais tias: “ Tuam tsev tsis yog qhov chaw tseg rau kuv!” Txawm li los, nws yeej ua siab ntev. Kuv twb mus tuam tsev thaum kuv tseem yau, tiamsis tsis tau muaj ib zaum twg kuv pom tias kuv yog ib tug neeg nyob rau qhov ntawd. Hais tiag kuv pom tias kuv tsis muaj ib qhov chaw twg yuav yog yus li. Kuv nyob ib leeg thiab cuag li yeej tsis muaj neeg nkag siab kuv. Ntau zaug kuv tseem muaj ib txojkev xav tias, yeej tsis muaj neeg quav ntsej txog kuv yog tias kuv ploj mus. Kuv tsis quav ntsej txog ib yam dabtsi lossis leej twg, txawm kuv tus kheej tib si.

Txawm li los, Dani txoj kev zoo siab ntawd twb nqus tau kuv, nyob hauv kuv lub hlwb, kuv xav kom tau txoj kev zoo siab ntawd. Yam uas kuv tsis paub nyob rau lub sijhawm ntawd ces yog lub hauv paus kev zoo siab yog los ntawm Tswv Yexus los. Thaum kuv tseg sijhawm los nyob ntawm Dani thiab nws tsev neeg, kuv mam nkag siab yam uas yav dhau los kuv tsis paub txog. Kuv pom tias kuv cheem tsum Tswv Yexus nyob hauv lub neej. Nws tib leeg thiaj yog tus yuav txhawm tau kuv txoj kev nqhis, tias muaj ib qhov chaw uas yog kuv li, qhov chaw uas kuv tau hlub.

Loos 10:9-10 sau: “yog koj lub qhov ncauj lees hais tias Yexus Khetos yog tus Tswv thiab koj lub siab ntseeg hais tias Vajtswv twb tsa Yexus Khetos sawv hauv qhov tuag rov qab los lawm, koj yuav dim. Rau qhov tus uas ntseeg hauv nws lub siab, Vajtswv suav hais tias nws yog tus uas ncaj ncees, thiab tus uas lees ntawm nws lub qhovncauj, Vajtswv suav hais tias nws yog tus uas dim txim.”

Tsis ntev tom qab, kuv thiaj nrog Dani mus tuam tsev. Thawj zaug kuv mus rau hauv, kuv lub siab no txhawj heev, tiamsis tag nrho kuv tej kev txhawj ntawd cia ploj mus thaum kuv tau cov ntseeg txais tos – lawv zoo siab thaum uas pom kuv. Kuv pom tias txoj kev cawm dim no tsis tshwj leej twg, tiamsis tseg rau txhua tus uas lawv xav txais yuav. Kuv twb txiav txim siab tias kuv yuav txais tau kev zoo siab thiab xav caw Tswv Yexus nkag los rau hauv kuv lub neej. Ob peb hlis tom qab, kuv thiaj nrog xibhwb sib tham tias kuv xav txais yuav Yexus Khetos ua kuv tus Cawm Seej. Qhov uas kuv ntseeg Vajtswv ua rau Dani zoo siab txog qib uas tsis paub yuav hais tau ua lus li.

Ib hlis tom qab, kuv ua kevcai raus dej thiab zoo kawg nkaus thaum kuv niam thiab kuv tus tij laug kuj pib mus tuam tsev. Tswv Yexus hloov pauv kuv lub neej. Txhua zaug uas xav txog lo lus “Tuam tsev tsis tseg rau kuv!” Kuv rov qab luag, rau qhov Vajtswv muaj lwm lub homphiaj tseg rau kuv. Kuv tsis tau muaj ib zaum twg xav tias kuv yuav sawv ntawm no, thiab ua haujlwm rau cov ntseeg Vajtswv ntawd yog ua dejnum pub rau Vajtswv los ntawm kuv lub siab. Txhua hnub kuv puav leej ua Vajtswv tsaug rau tus phooj ywg ntawd, kuv tus phooj ywg 22 xyoo dhau los tau ua siab ntev caw kuv mus hauv tuam tsev. Nws ua rau kuv pom Cawm Seej Tswv Yexus txij thaum uas kuv paub Tswv Yexus lub npe.

Txoj kev cawm dim tau muab pub rau tus uas txaus siab hlo txais yuav. Yog tias koj pom tias koj twb txav deb Vajtswv lawm ces, kuv xav hais qhia rau koj paub tej uas kuv twb tau ntsib dhau: Yeej tsis muaj ib zaum twg yuav deb rau koj tig rov qab los cuag Vajtswv thiab txais yuav txoj kev cawm dim nrog kev zam txim uas tsuas yog Vajtswv xwb nws thiaj muaj cuab kav muab pub. Nyob hauv Loos 10:13 hais, “Txhua tug uas tuav tug Tswv lub npe thov yuav dim.”

Yog koj hnov ntsuagnos, lossis koj pom tias tsis muaj ib qhov chaw twg tseg rau koj, thov kom koj cia li nco ntsoov tias tus Tswv nco txog koj thiab niaj hnub saib xyuas koj. Vajtswv yuav mloog koj tej lus thov, Nws paub txhua yam uas koj cheem tsum xav yuav ua ntej uas koj hais tawm, Vajtswv nyob ze koj dua li tej pa uas koj nqug haus txhua hnub. Nws yuav tsis tso koj tseg. Vajtswv paub txhua yam txog koj tug kheej, thiab yuav tsis muaj ib yam dabtsi tav tau Nws txojkev hlub muab pub rau koj. Yog hnub no koj taij hu Nws, koj yeej yuav txais tau kev cawmdim.

Thov caw nrog kuv peb thov Vajtswv ua ke:
Ua Vajtswv tsaug rau Koj txoj kev hlub uas koj tseg rau kuv, txawm yog kuv tsis tsimnyog. Thov koj cawm kuv, coj kuv, thiab hloov pauv kuv raws li koj lub siab nyiam. Thov koj los kav kuv lub neej, hloov kuv lub neej uas txomnyem mus ua luvb neej muaj kev zoo siab ib txhis. Thov Vajtswv coj kuv txoj kev uas nrog koj mus, kom kuv nco ntsoov tias kuv yog koj tug thiab tau Vajtswv koj hlub. Kuv thov hauv Tswv Yexus Khetos lub npe. Amees.

Ib tsoom kwvtij phoojywg, yeej tsis lig rau koj tig rov qab los cuag Vajtswv hnub no. Txawm yog koj yuav nyob qhov twg, koj ntsib dhau yam dabtsi, los Vajtswv yeej tos ntsoov koj, nws xyab tes dav los txais. Vajtswv nkag siab zoo koj txoj kev mob dua lwm tus. Cia li los nrhiav Vajtswv, thov Vajtswv lub npe, koj yuav tau txais tos thiab tau hlub. Vim koj muaj nqis thiab koj yog Vajtswv tug.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.