20.12 Amăn Jơ Krao Khan Rim Năr: TƠDRONG GĬT KĂL TƠPĂ KƠ BƠYAN PHĔT NÔEL

Buăl hăm đei mơn ‘bôh păng hăm lui ngeh kơ jơ‘năr nơnăm hrĕnh ưh, mă loi wă jê̆ truh bơ yan Nôel wă đĭ sơnăm ưh? Nôel trŏ kơ bơyan chơt hiôk, chang hơmĕng păng hiôk – hian. Mă lei phŏ bơ̆n oei hiơ̆k bơngơ̆t, hrăt hrot păng đei hiong răm, lu bơ̆n ‘bônh kơ hiơt kơ tơdrong kăl kơ nhăm kơ phĕt ‘nâu. Nôel wă kơ bơ̆n dơ̆ng lăng ‘mơ̆i, tơchĕng pơwao, păng tơ‘blŏk kơdih kâu tơdrong kăl tơm kơ bơyan phĕt, ‘noh tơm kơ ‘năr blŏk hơdơ̆r năr tơpŭ kơ ‘Bok Dŏng Pơklaih Yêsu.

Năr ‘nâu, ‘năr 20/12/2024, Tơdrong tơdă Amăn Jơ Krao Khan Rim Năr apĭnh krao wơ̆n ‘bơngai mơ̆ng hơdai tơchĕng pơwao nơ̆r Kră Yang păng ‘bơngai chih Sandra Holcombe kơ̆l ‘bai TƠDRONG GĬT KĂL TƠPĂ KƠ BƠYAN PHĔT NÔEL

“Mă lei Inh sơ’ngon kơ iĕm minh tơdrong âu: Iĕm ưh pă ‘mêm kơ Inh hăm ‘mêm kơ bôl buăl dang iĕm ‘mêm tơm hnơm iĕm lu sơ̆.” (Tơdrong Tơbôh 2:4)

Buăl hăm lui ngeh ưh? Pă dôm năr đĕch bơih na truh tơ năr phĕt Nôel bơih! Jơ năr nhen thoi kơdâu pơjei wă truh tơ sơnăm ‘nao. Mă lei …buăl thoi yơ bơih? Lăm tơdrong hiơ̆k bơngơ̆t kơ bơyan Nôel păng bơngơ̆t hơmet kơ sơnăm ‘nao, buăl ‘bôh thoi yơ?

Inh hơmĕng thoi âu, gô đei minh năr noh buăl bôh trăp trĭn lăm jơhngơ̆m, buăl pơlong dơ̆ng lăng amơ̆i. ‘Măn jơ hrĕp oei lăm Kră Yang, jơhngơ̆m tơ chĕng tơ Kră Yang, păng kơnhăm tơ Kră Yang đĕch. Tơ drong ‘noh gô đei lơi yua kơ buăl lơ hloh!

Gah inh thoi yơ? Inh tơchĕng inh hơđơ̆ng biơ̆ bơih. Kơplah oei ‘lơ̆p, đơ̆ng rŏng kơ ‘bă inh brŏk tơ Kră Yang, inh tơ chĕng Kră Yang jur tơ teh đak ưh kơ đei la yơ chơt hiôk nhen thoi hơdrol sơ̆ dơ̆ng. Na kơplah mĕ inh kư̆m dai brŏk tơ Plei ‘Lơ̆ng, khĕi jĭt ‘bar hăm inh jơ ‘nâu pơm kơ inh hli- tơpă đơ̆ng lăm jơhngơ̆m, truh tơ dang ei minh puăt jơhngơ̆m inh oei thoi noh.

Tơpă, tơdrong pơdjong ‘long hơngo đêl pơm kơ inh amaih wă hơmet hơdai hnam dơnŏ, mă lei dang ei pơm kơ inh ưh pă ‘maih bơih. Tơplih kơ tơdrong noh, inh pơdơ̆ng minh tơnơm ‘long hơngo chai iĕ ‘bơ̆t mum kơbang păng hơtol minh gơnăp pơkao bơt ‘măng. Dôm noh đĕch. Mă lei gah inh, pơm thoi noh tôm bơih.
Lơ tơdrong et sa dah tơdrong jang hưch hanh kơ bơyan Nôel pơm kơ inh ưh pă hưch hanh bơih. Hơbŏ lăng đơ̆ng rŏng kơ ‘nâu gô tơplih, mă lei kơplah dang ei, tơdrong noh inh rơih iŏk wă kơ hlôi kơ bơyan phĕt ‘nâu.

Tơpă đơ̆ng lăm jơhngơ̆m inh, inh hơpơi inh kĕ hlôi kơ phĕt Nôel păng năm lăm sơnăm ‘nao hoei kơ sơngon. Yua kơ mơ̆ng bai hơri dah lăng phim, tôm tơ drong đêl ‘lơ̆ng rŏ sơ̆ tơ’blŏk tơ lăm jơhngơ̆m inh.

Tơdrong noh pơm kơ jơhngơ̆m inh jĭ păng gleh lap, pơm kơ inh ưh kơ ‘maih pơma dơnuh păng bôl buŏl. Inh ưh kơ ‘maih a-rih thoi noh ră.

Mă lei inh ‘bôh inh ưh kơ kăl pơm thoi noh. Na buăl kư̆m thoi noh mơ̆n. Bơ̆n oei ‘blŏk hơdơ̆r kơ năr tơpŭ kơ ‘Bok tih kơ đĭ đăng, athei kơ nhăm kơ minh ‘nu ‘Bok noh đĕch, noh bơih ‘Bok Dŏng Pơklaih Kră Yang Yêsu!

Mă khan lu bơ̆n oei lăm tơdrong phĕt ‘nâu, hrăt hrot kơ răt tơmam, ‘nŭng hơmet tơmam, ngôi hơdai tơdrong tơdă kơ Nôel tơ lăm Hnam Hơkŭm, bơ̆n hăm dan ‘Bok Dŏng Pơklaih Yang Yêsu tơm kơ lăm jơhngơ̆m hăm tơdrong tơchĕng bơ̆n ưh? Tơdah ưh, lei nhen thoi buŏl năm ngôi hơpong kơ năr tơpŭ kơ minh ‘nu bơngai bu noh đĕch hiơ̆k kơ chơt hiôk, sa ‘bĕng ‘lơ̆ng, tơ’bơ̆p bôl buăl đunh sơnăm-hiơt lê̆ kơ bơngai tơm kơ tơdrong et sa noh. Lăm Tơdrong Tơbôh 2:4, Kră Yang Yêsu khan: Iĕm ưh pă ‘mêm kơ inh hăm ‘mêm kơ bôl buăl dang iĕm ‘mêm tơm hmơm iĕm lui sơ̆”. Đŏk nơ̆r ‘nâu buăl hăm jĭ lăm jơhngơ̆m ưh.

Tơdah bơ̆n ‘blŏk hơdơ̆r kơ Kră Yang Yêsu na kơnhăm kơ Sư lei ưh kơ kăl pơjing năr ‘blŏk hơ dơr ‘lơ̆ng rŏ, lu bơ̆n oei đei tơdrong chơt hiôk păng hiôk- hian kơ bơyan phĕt. Yang Bơhngol ‘Lơ̆ng gô soh chhông lăm jơhngơ̆m tơdrong chơt hiôk păng hiôk-hian, thoi noh, Nôel gô đei lơi yua.

‘Nĕ kơnhăm dêh kơ tơdrong pơjing gah ‘ngoaih kơ phĕt Nôel, yua kơ ‘Bok mă bơ̆n ‘blŏk hơdơ̆r noh kăl hloh: ‘Bok Dŏng Pơklaih Yang Yêsu. Sư noh ‘Bok Mêsi, tơm tơdrong chang hơmĕng, hiôk- hian păng chơt hiôk kơ lu bơ̆n, ‘noh Dăm Brang kơtang kơ dêh Juđa, ‘Bok pơgơ̆r ling lang. Kră Yang ưh kơ sĭ kon nge bĭch kơpal ‘nhĕt kro, mă Pơtao kơ đĭ đăng pơtao, Yang kơ đĭ đăng yang. Truh kơ jơ hơgăt, Kră Yang gô wơ̆t jur tơ teh đak ‘nâu. ‘Bok Kei -Dei mă oei tơ tang – dŏ khan: “ Inh pơjing tôm tơdrong ‘nao” ( Tơdrong Tơbôh 21:5). Kơplah tơchĕng pơwao gah a-năn Kră Yang, lu bơ̆n ưh kơ đei la yơ hiơt kơ Sư, mă lăm năr Nôel dah tơ a-nih hơ yơ lăm sơ năm ‘nâu.

Apinh đĭ đăng bơ̆n krao khan hơdai:
Kơ kuh kơ Kră Yang Yêsu, pĭnh Ih mơnat kơ kon phŏ hiơt kơ Ih păng ưh kơ pôk tơ iung Ih lăm jơhngơ̆m kon. A-pĭnh Ih tơgŭm kon hlôh tơ pă a-năn Ih păng tơdrong jang Ih ăn kơ kon hăm lơ bơngai lăm teh đak ‘nâu. Trŏ kơ bơnê păng ư- ang a năn Ih! Bơnê kơ Kră Yang yua kơ Ih jur tơ lăm teh đak ‘nâu vă pơkeh kơ tơdrong dŏng pơklaih kon bơngai nhôn. Kon kơkuh kơ Ih krao khan lăm Anăn Kră Yang Yêsu Krist, A-men.

Ơ lu bơngai mơ̆ng, nĕ ăn kơ tơdrong gleh trăp lăm bơyan Nôel pơm kơ buăl hiơt lê̆ kơ ‘Bok mă bơ̆n ‘blŏk hơdơ̆r kơ năr tơpŭ Sư. Sư bơih tơm kơ tơdrong chang hơmĕng, hiôk-hian păng chơt hiôk tơpă kơ tơdrong a-rih lu bơ̆n. Kơlih kơ thoi noh na rim năr ‘nâu, buăl kư̆m ‘măn jơ hăm Kră Yang, soh chhông ming tơdrong ‘mêm blŭng a lu bơ̆n kơ Sư, wă kơ bơyan Nôel đei kơ tơdrong gĭt kăl. Yua kơ đĭ đăng, kơ nhăm kơ phĕt ‘nâu ‘Bok Dŏng Pơklaih Yêsu, Sư truh bơih đơ̆ng lăm tơdrong tơpŭ păng gô truh hăm tơdrong ‘lơ̆ng rŏ hăm jur tơ teh đak păng ư-ang! A-thei a-rih tôm tơdrong ăn kơ Kră Yang lăm bơyan Nôel ‘nâu păng đĭ lăm chăl a-rih lu bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buŏl. Tơdrong tơdă hơmĕng kơ gơh tơ ‘bưh hăm buăl.