Yam dabtsi thiaj yuav txuas tau sawv daws los nyob ua ke, txawm yog yuav txawv neeg, txawv lus, lossis txawv meej mom? Ntawd yog kev ntseeg nyob hauv Yexus Khetos, nrog txoj kev hlub nyob hauv Vajtswv. Nyob rau hauv lub ntiajteb muaj ntau txoj kev sib faib thiab kev tawm tsam, Yexus Khetos lub cev yuav yog qhov chaw uas peb nrhiav tau txoj kev hais kom sib haum, tau tiv thaiv los ntawm Vajtswv lub hwjchim uas tsis muaj nrim.

Hnub no, yog hnub 05/10/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Dayna Lovelady dhau ntawm Zaj kawm KOOM UA IB NYOB HAUV LUB NROOG DAWBHUV.

“Ib yam nkaus li ntawd, tsis hais cov Yudais lossis lwm Haivneeg, cov ua qhev lossis cov uas tsis ua qhev, peb sawvdaws puavleej koom tib lub cev, peb ua kevcai raus dej los ntawm tib tug Vaj Ntsujplig thiab tib tug Vaj Ntsujplig ntawd nyob hauv peb.”
(I Kauleethaus 12:13)

Nyob rau lub sijhawm uas kuv kawm ntawv hauv Yeluxalees, kuv khaws tau tej yam uas kuv ntsib dhau zoo kawg nkaus cia: ntawd yog cov neeg tuaj qhov txhua chaw hauv qab ntuj no tuaj ua ke hu nkauj – tag nrho txhua tus puav leej tuaj koom ua ke hauv Vajtswv lub nroog dawbhuv nyob hauv txoj kev mus rau tebchaws cog lus tseg. Peb lub suab nkauj rov txhia mus rau ntawm tej phab ntsa qub qub, ntawm tej chaw nco txog yav thaum ub, tsim muaj ib txoj kev koom ua ib nyob hauv Yexus Khetos. Qhov no muaj nqis nyob rau hauv ib lub nroog uas nws yeej ib txwm muaj kev sim siab los ntawm kev tsov rog, kev tawm tsam thiab kev sib txeeb.

Txawm yog peb ib leeg nyias hais nyias ib yam lus los, dhau los ntawm tej suab nkauj uas sawv daws puav leej paub, tag nrho peb puav leej txais tau thiab sib faib txoj kev zoo siab ntawd hauv txoj kev ntseeg thaum uas peb taug kev ua ke ntawm txoj kev qub nyob rau hauv lub nroog Yeluxalees qub. Peb ib leeg luag ntxhi rau ib leeg, sawv daws puav leej xav tsis thoob thaum uas thawj zaug pom lub roob txiv ntoo roj, thiab zoo siab thaum mus txog rau tej thaj chaw tau hais txog nyob hauv Vajluskub, tej thaj chaw uas Tswv Yexus ua txujci kho mob thiab ntiab dab, tej qhov chaws uas tau muaj tseeb raws li Vajtswv txojlus hais txog.

Thaum sawv nruab nrab ntawm Yeluxalees, kuv xav txog qhov uas lub nroog no txuas txhua haiv neeg hauv lub qab ntuj no los ua ke, txawm yuav muaj kev tsov rog ntau tiam. Los Yeluxalees yeej tseem yog qhov chaw uas peb koom ua ke ntsia pom txog lub nroog dawbhuv no lub hwjchim.

Ntawv Nkauj 87:3: “Vajtswv lub nroog, cia li ua tib zoo mloog tej lus zoo uas nws hais txog koj” Txij puas tiam tus sau phau Ntawv Nkauj, nws twb hais txog tej lus qhuas txog lub nroog no lawm, thiab qhov no yeej tseem nrov los txog niaj hnub nim no. Zoo li thaum ub, lub nroog Yeluxalees yeej tseem yog qhov chaw txuas txhua haiv neeg, txawm yuav muaj kev hloov pauv. Txawm yuav ntsib tej kev tsov rog tawm tsam tsis so, los Yeluxalees yeej tseem yog qhov chaw uas coob tug uas muaj kev ntseeg ntshaw kom tau mus txog.

Qhov no ua rau kuv xav txog Yexus Khetos lub cev, thaj chaw uas koom ua ib thiab peb txoj kev ntseeg yuav pab kom peb los nyob tau ua ke, txawm yog peb nyias yuav yog nyias ib haiv neeg, hais lawm ib yam lus lossis nyias muaj nyias lub meej mom txawv. Ntawv Nkauj 87:5 sau tias “Lawv yuav hais tias txhua haivneeg uas nyob saum Roob Xi-oos, tus uas muaj Hwjchim Loj kawg nkaus yuav ua kom lub Roob Xi-oos nyob ruaj khov” Vajtswv tau tsim lub nroog Yeluxalees zoo li ib lub nroog txuas txhua tus ntseeg nyob txhua qhov hauv qab ntuj no los txoos ua ke, thiab qhov tseeb no yeej tseem muaj nyob los txog niaj hnub no. Txawm yog nyob rau lub sijhawm muaj kev sib tawm tsam los peb yeej nrhiav tau kev hais kom sib haum los ntawm Vajtswv lub hwjchim. Thiab koom saj txoj kev sib txuas ua ke uas Vajtswv twb npaj txhij rau peb lawm.

Nyob rau lub sijhawm uas kuv ua dejnum ntawm CBN, kuv txais tau txoj koob hmoov loj thaum tau Vajtswv pub muaj sijhawm qhia Txojmoo Zoo rau 150 lub tebchaws hauv qab ntuj no. Yog Yexus Khetos ib tug thwjtim, peb tau nqua hu los ua ib tug cev txoj kev sib haum xeeb, coj Vajtswv qhov kaj mus rau txhua tus. Vajtswv nqua hu kom peb rhuav tshem tej phab ntsa faib cais, tsim muaj txoj kev sib raug zoo, kom nthuav tawm Yexus Khetos txoj kev hlub. Thaum txais yuav txoj kev koom ua ib lub siab, twb yog peb tab tom nthuav tawm lub zog loj hloov pauv ntawm Yexus Khetos txoj kev hlub tseg rau lub ntiajteb no, thiab koom tes kho cov ntsujplig uas muaj kev tu siab kom zoo, kom txiav tu nrho tib neeg tej kev faib cais.

Thov caw nrog kuv peb thov Vajtswv ua ke:
Leej Txiv saum ntuj, thov pab kom kuv yuav txais yuav koj lub suab hu los koom ua ib nyob hauv koj. Thov qhia kom kuv paub qhib siab los hlub thiab ib leeg hwm taus ib leeg, txawm yog peb yuav sib txawv. Thov Koj pub lub hwjchim kom kuv yuav rhuav tshem tau daim phab ntsa thaiv hauv kuv lub siab mus thiab tsim muaj tus choj txuas ua ke. Thov kom kuv lub neej yuav dhau los ua daim tsom iav ci lub zog loj hloov pauv los ntawm txoj kev hlub koj, yog txoj kev hlub coj peb los nyob ua ke. Kuv thov hauv Tswv Yexus Khetos lub npe. Amees.

Cov kwv tij, thaum peb koom ua ib lub siab nyob hauv Yexus Khetos, tag nrho txhua tus ciam txog txhua haiv neeg, txhua hom lus lossis meej mom puav leej dua mus, tsuas yog ib lub zej zog tau tsim muaj los ntawm txoj kev ntseeg thiab kev hlub xwb. Txawm yog thaum peb ntsib tej kev sim siab thiab teeb meem los, peb yeej nrhiav tau kev hais kom sib haum xeeb thiab muaj kev kaj siab hauv Vajtswv txoj kev tshwm ntsej muag. Thov kom Vajtswv lub hwjchim coj peb los nyob ua ke, pab kom peb saj tau txoj kev koom ua ib lub siab zoo kawg nkaus nyob hauv Tswv Yexus lub npe.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw: [email protected] Tswv Yexus hlub koj. Thiab peb xav kom txuas tau nrog koj.