Puas muaj zaum twg koj xav kom yus hloov pauv tau qee yam tsis zoo txaus ntawm yus tus kheej? Puas yog koj twn tau hnov qaug zog thaum pom yus tug kheej muaj tej yam zoo tsis txaus, thiab koj ntshai tsam tej ntawd yuav tav koj txoj hau kev tom ntej? Yog li cia li tso koj txoj kev ntshai ntawd tseg thiab koj cia li muab koj lub neej fij rau Vajtswv ua tus ntxiv zog thiab siv koj lub neej kom muaj nqis rau Nws.

Hnub no, yog hnub 07/10/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kellin Gibson dhau ntawm Zaj kawm QAUG ZOG LOSSIS MUAJ ZOG.

“Yog li ntawd qhov uas kuv qaug zog ua rau kuv zoo siab kawg li, rau qhov Yexus Khetos lub hwjchim yuav tsomkwm kuv.” (2 Kauleethaus 12:9)

Thaum nyuam qhuav muaj 4 xyoos, kuv muaj teeb meem txog kev hais lus. Thiab los txog thaum no, kuv muaj 28 xyoo, kuv yeej tseem tsis kam txaus siab rau kuv tus kheej. Txawm yog kuv lub hlwb nws yeej paub zoo tej ntawd los, tej lus ntawd nws pheej pauv mus txhua zaug uas kuv hais tawm ua lus. Muaj tej zaug, kuv cov lus nws kuj hais tau lus meej meej, tiamsis kuj muaj qee lub sijhawm kuv hais tsis tau txog qhov uas yuav tau qi muag thiab hnov mob taub hau. Txawm kuv twb sim kho ntau txoj kev lawm los, kuv tus mob no nws cuag li tsis zoo li.

Xav tsis thoob li, kuv qhov teeb meem hais lus dhau los ua tus choj coj kuv mus nyob ze Vajtswv dua. Txawm yog txoj kev hais lus tsis meej ntawd yog ib qhov kev sim siab loj, los qhov ntawd pab kom kuv txo hwjchim thiab ua rau kom kuv vam khom tus Tswv uas tau tsim kuv los li tamsim no.

Tiamsis yuav ua li cas kom kuv thiaj yuav qhia tau Txojmoo Zoo rau lwm tus, thaum uas kuv txaj muag sib tham vim kuv hais lus tsis meej? Vim yog txoj kev ntshai no, kuv nrhiav tau txoj kev txhawb zog nyob hauv Paulus tej lus xa mus rau cov neeg Kauleethaus. Kuv ntseeg tias tus neeg uas twb muaj ib “qhov txhab” rau ntawm nws sab nqaij tawv yuav nkag siab zoo dua txog tej uas kuv tab tom ntsib dhau. Nyob hauv I Kauleethaus 1:5-9, Paulus hais tias:
“Yexus Khetos ua rau nej muaj txhua yam, tsis hais tej us uas nej hais thiab tej kev txawj ntse uas nej muaj. Qhov ntawd yog qhov uas ua rau nej ua timkhawv qhia txog Yexus Khetos zaj. Yog li ntawd, thaum uas nej tabtom tos peb tus Tswv Yexus Khetos rov qab los nej thiaj tau koob hmoov, tsis muaj ib yam uas nej yuav tsis tau li. Vajtswv yuav pab kom nej muab siab rau ntseeg mus txog hnub kawg, …Vajtswv yog tus ncaj ncees; Vajtswv thiaj hu nej los nrog nws tus Tub Yexus Khetos uas yog peb tus Tswv sib nraug zoo.”

Peb tej kev qaug zog nws tsis yog tej teeb meem, tiamsis yog lub zog rau peb mus rau tom ntej. Tswv Yexus twb ntsib dhau txoj kev mob tshaj plaws saum Ntoo Khaub Lig. Yog tias muaj leej twg nkag siab qhov mob ntawd, ces ntshai tsuas yog Tswv Yexus xwb. Vim Tswv Yexus nrog nraim peb txhua txoj kev uas peb mus, yog li peb tsis muaj ib zaum twg nyob ib leeg hauv txoj kev qhia Txojmoo Zoo.

Nyob hauv 1 Kauleethaus 1:26-30, Paulus nthuav tawm ntxiv:
“Cov kwvtij, nej ua tib zoo xav thaum Vajtswv hu nej los ntseeg, nej yog neeg zoo li cas: Raws li neeg xav, nej cov tsis muaj pestsawg leej txawj ntse, tsis muaj pestsawg leej muaj hwjchim …Tiamsis Vajtswv xaiv yam uas neeg xav hais tias ruam kawg nkaus hauv lub ntiajteb no kom cov neeg txawj ntse txajmuag; thiab Vajtswv xaiv yam uas neeg suav hais tias tsis muaj zog hauv lub ntiajteb no kom cov neeg muaj zog … Tiamsis Vajtswv coj nej los nrog Yexus Khetos koom ib txojsia, Yexus Khetos yog lub tswvyim thiab txojkev ncaj ncees uas Vajtswv pub rau peb, peb thiaj tau los ua Vajtswv haivneeg uas dawbhuv kom peb dim peb lub txim”

Peb txhua tus ib leeg nyias yeej muaj nyias ib yam uas yus tsis nyiam, tiamsis Vajtswv twb tseem nqua hu peb txawm yog peb txaj muag rau tej ntawd. Txawm yog tej yam tsis zoo ntawd muaj cuab kav ua rau peb qaug zog los, Vajtswv tab tom muab yam uas cheem tsum rau peb kom peb nthuav tawm Vajtswv lub tebchaws. Thaum uas Xatas tawm tswv yim ua rau kom peb ntshai thiab peb siv zog npog tej ntawd, thaum ntawd Vajtswv nqua hu kom peb txais yuav yam uas yus zoo tsis txaus ntawd zoo ib yog ib feem ntawm peb tus kheej. Vim peb tau koom ua ke nyob hauv Yexus Khetos, peb muaj txhua yam uas peb cheem tsum los nthuav tawm Vajtswv txoj kev hlub. Cia li ntsia saib tej uas yus muaj tsis txaus los ntawm txoj kev txo hwjchim, kom thaum peb tiv dhau kev sim siab, peb thiaj yuav muab lub koob meej rau Vajtswv rau txhua yam uas peb ua tau ntawd.

Thov caw nrog kuv peb thov Vajtswv ua ke:
Tswv Yexus thov pab kom kuv paub txais yuav kuv tus kheej raws li txoj kev uas Koj tau txais yuav kuv. Txawm yog kuv yuav muaj yam tsis zoo los, thov pab kom kuv paub vam khom rau koj lub zog, thiab qhia koj lub hwjchim ntawd rau tej neeg ib ncig paub. Thov pub kom kuv hloov pauv txhua yam dhau los ua lub sijhawm qhuas Koj thiab tshaj tawm koj lub npe. Kuv thov hauv Tswv Yexus Khetos lub npe. Amees.

Cov kwv tij txhua tus, thaum kawm txoj kev txais yuav yam tsis zoo ntawm yus tus kheej, peb tsis yog tsuas txais yuav yam tsis zoo ntawm yus xwb tiamsis tseem qhib siab los saj Vajtswv lub zog loj ntawd. Vajtswv muaj cuab kav hloov pauv yam tsis zoo ntawm peb los ua qhov pov thawj rau Vajtswv txoj kev hlub zoo kawg nkaus. Cia txhua yam thiab kev sim siab dhau los ua ib lub sijhawm coj peb mus nyob ze Vajtswv, thaum ntawd, peb yuav pom tias txhua txoj kev muaj yeej puav leej yog los ntawm Vajtswv txoj kev hlub los xwb.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.