Peb txhua tus ib leeg nyias muaj nyias ib qhov kev ntshai. Txawm yog ntsib kiag lossis tsuas nyob hauv kev xav xwb los, kev ntshai muaj cuab kav ua rau kom peb yuam kev hauv qhov tsaus ntuj. Tiamsis, peb tsis yog ntsib txoj kev ntshai ntawd ib leeg. Vajtswv yog qhov kaj coj peb kev mus dhau ntawm tej kev sim siab, pab kom peb nrhiav tau txoj kev kaj siab txawm yog tej lub sijhawm ntawd tsaus ntuj nti tshaj plaws.

Hnub no, yog hnub 12/10/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Merle Mills dhau ntawm Zaj kawm NTSEEG LOSSIS NTSHAI?

“Kuv yog qhov kaj rau neeg ntiajteb. Tus uas raws kuv qab yuav tsis taug txojkev uas tsaus ntuj nti, tiamsis nws yuav tau lub neej tshav ntuj nrig.” (Yauhas 8:12)

Ib yam uas txaus ntshai tshaj plaws ntawm kuv thaum tseem yau yog tej zaug uas peb tsev neeg tsis muaj hluav taws xob. Thaum kev tsaus ntuj voob nkoos, peb xav txog tej tsiaj loj loj muaj kaum txhais taw, qhov muag xiav, plaub hau ntsuab, tab tom nkaum hauv qhov tsaus ntuj tos. Peb cov kwv tij sib puag, ib ce tshee nyho vim tej kev ntshai uas peb cim civ xav txog ntawd, txog rau thaum uas niam txiv lawv taws teeb kom pom kev. Qhov nyuag pom kev me me ntawd rhuav tshem txoj kev ntshai tawm, ua rau peb lub nyuag ntsej muag caws ntawd luag ntxhi, rhuav tshem daim duab uas peb cim civ xav txaus ntshai ntawd tawm.

Peb tus yeebncuab ntawm sab ntsujplig xav kom peb lub hlwb thiab lub siab tsau tsawv rau txoj kev ntshai, ua rau peb tsis vam khom Leej Txiv saum ntuj tej lus cog tseg puv npo hwjchim thiab kev hlub. Txawm ntawd yuav yog nyob hauv kev xav lossis muaj tseeb tiag, txoj kev ntshai no nws nkaum ntawm tej qhov tsaus ntuj hauv peb lub hlwb, hem thiab rhuav tshem peb txoj kev kaj siab.

Sadalas, Mesakas thiab Anpenekaus lawv tsis kam pe tus mlom kub uas vajntxwv Nenpukanaxeles puab. Lawv tsi ntshai tiamsis vam khom rau Vajtswv lub hwjchim:
“Lawv teb vajntxwv hais tias, “Vajntxwv, tsis yog peb xav hais kom peb yeej koj. Tiamsis yog hais tias tus Vajtswv uas peb hwm porn zoo pab peb, nws yeej yuav pab b kom peb dim ntawm cov nplaim taws thiab ntawm koj txhais tes” (Daniyees 3:16-17).

Tus pojniam uas muab tshuaj tsw qab pleev Tswv Yexus ko taw tau kov yeej kev ntshai thiab kov yeej tej lus thuam txog nws tej kev txhaum. Pauv qhov uas cia kev ntshai tav kev, pog saib ntsoov Tswv Yexus thiab pehawm ntawm Nws kotaw. Tswv Yexus hais rau cov neeg ib ncig tias:
“Kuv qhia tseeb rau nej hais tias, qhov uas tus pojniam no ua yuav nrov ncha mus rau hauv qab ntuj no txhua qhov uas muaj neeg mus qhia Txojmoo Zoo, kom sawvdaws nco txog tes haujlwm uas tus pojniam no tau ua lawm” (Mathais 26:13).

Petus thiab Yauhas nkawd raug cov pov thawj hlob hauv Yeluxalees txwv tsis pub qhia lossis tuav Tswv Yexus lub npe ntxiv (Tes Haujlwm 4:18).

Pauv qhov uas cia txoj kev ntshai kav, lawv muaj lub siab tawv hais tias:
“Tiamsis Petus thiab Yauhas teb lawv hais tias, “Wb mloog nej lus zoo dua li wb mloog Vajtswv lus los? Nej sim xav saib, ob qho no qhov twg yuav haum Vajtswv siab dua? Tej uas wb hnov thiab wb porn lawm, wb yeej yuav qhia, wb tsis npog li.” (Tes Haujlwm 4:19-20).

Txoj kev ntshai yuav tuag mus thaum ntsib txoj kev ntseeg ruaj khov.

Txawm yog twb tau ntau xyoo dhau mus, tiamsis thaum tsis muaj hluav taws xob yeej ua rau kuv ntshai nyo tias hauv kev tsaus ntuj yuav tshwm tej yam phem. Tiamsis, kuv twb kawm tau lub tswv yim tig rov qab los rau hauv Vajtswv tej lus cog tseg, yog qhov chaw uas kuv tau tso dim ntawm tej kev ntshai, txawm yog nyob hauv qhov tseeb lossis xav xwb. Qhov kaj los ntawm Vajtswv tej lus ntawd ua rau muaj kev kaj siab thiab muaj suab luag, rhuav tshem txhua txoj kev ntshai thiab txhawj.

Ib yam li Ntawv Nkauj 119:130 sau tseg: “Koj tej lus qhia ua qhov kaj ci porn kev rau kuv, thiab ua rau cov neeg ruam kom txawj ntse tuaj”

Hnub no koj tab tom ntshai txog yam dabtsi? Peb muaj cai tsis pub tej kev ntshai ntawd tswj peb, vim peb saib ntsoov rau Tswv Yexus qhov pom kev – qhov kaj cia siab tab tom ci rau hauv qhov tsaus ntuj, rhuav tshem tej kev ntshai:
“Kuv yog qhov kaj rau neeg ntiajteb. Tus uas raws kuv qab yuav tsis taug txojkev uas tsaus ntuj nti, tiamsis nws yuav tau lub neej tshav ntuj nrig. (Yauhas 8:12).

Los ntawm Vajtswv lub hwjchim, koj thiab kuv yuav tiv dhau txhua txoj kev ntshai, txawm yog nyob hauv kev xav lossis muaj tiag.

Thov caw nrog kuv peb thov Vajtswv ua ke:
Tus Tswv, nyob rau lub sijhawm tsaus ntuj txaus ntshai hauv lub neej, thov kom Vajtswv koj tshwm ntsej muag thiab rhuav tshem txhua txoj kev ntshai tab tom voob nkaus koj lub hlwb thiab lub siab. Thov pab kom kuv tsom ntsoov rau koj qhov pom kev, kom dhau ntawd kuv tau tso dim hauv txhua txoj kev ntshai. Kuv thov hauv Tswv Yexus Khetos lub npe. Amees.

Cov kwv tij txhua tus Vajtswv lub hwjchim yuav pab kom peb tiv dhau tej kev ntshai. Vajtswv yog qhov kaj yuav ci rau peb txojkev mus, ua rau txoj kev tsaus ntuj yaj ntshis. Thaum ntseeg tias Vajtswv tshwm ntsej muag thiab muaj hwjchim, peb yuav nrhiav tau kev kaj siab thiab muaj zog los ntsib tej kev sim siab. Vajtswv txoj kev hlub tsis muaj nrim yuav tso peb dim ntawm txhua txoj kev nshai thiab txhais ruam kom ruaj khov nyob hauv Vajtswv tus duab ci pom kev.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw: [email protected]. Tswv Yexus hlub koj. Thiab peb xav kom txuas tau nrog koj.