Thaum ntsia saib txhua yam uas kub nyhiab tas, ces tej zaug peb yuav nug tias: Yog tias tag nrho tej uas yus muaj puav leej yaj tshis mus, tsis paub tseem tshuav yam dabtsi? Thaum ntsib dhau tej teeb meem loj hauv lub neej, tsis paub tej khoom ntiajteb, tej qub txeeg qub teg uas peb khaws cia ntau xyoo puas yuav nrog peb nyob ua ke dhau ntawm tej teeb meem ntawd? Lossis kev hlub thiab kev ntseeg thiaj yog yam uas muaj nqis, thiab yog qhov chaw pheeb ruaj khov rau peb xwb?

Hnub no, yog hnub 21/10/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Cheri Cowell dhau ntawm Zaj kawm THAUM RAUG HLUAVTAWS HLAWV TSHUAV DABTSI TOM QAB.

“Hnub uas Yexus rov qab los, nws yuav muab txhua tus tes haujlwm nthuav qhia rau sawvdaws porn, Hnub ntawd yuav tsis muab npog cia lawm, rau qhov Hnub ntawd yuav muab hluavtaws sim txhua tus tes haujlwm saib puas ruaj puas khov.” (1 Kauleethaus 3:13)

Txog lub caij ntuj qhuav xyoo ntawd, peb zaum saib tivi, saib tej xov xwm tham txog toj roob kub nyhiab rau txhua qhov. Txawm cia li muaj ib lub nra nyhav tsuam nkaum chav peb nyob ntawd. Sawv daws puav leej nug tias, yog tias yus poob rau lub sijhawm ntawd yus yuav ua dabtsi? Peb yuav nqa dabtsi nyob rau hauv tej khoom muaj nqis uas yus muaj? Tshuav kuv, kuv cim civ nug tias tsis paub yus puas yuav muaj txaus zog los ntsib tej uas yus muaj ntawd cia li poob tag nrho lawm.

Zoo li cov neeg uas lawv twb poob vaj poob tsev lawm, kuv kuj muaj lwm yam muaj nqis. Qhov khoom plig los ntawm tej neeg uas twb poob lawm, tej qub txeeg qub teg khaws cia tsis muaj ib yam dabtsi hloov pauv tau, thiab qhov khoom plig khaws cia ua kev nco txog txawm yog me los nws ho muaj nqis rau kuv. Kuv tsis nkag siab tag nrho tej yam uas kuv tau poob mus ntawd, tiamsis kuv paub tias Vajtswv nkag siab. Tseeb tiag, Vajtswv tau hais txog qhov uas yuav tiv dhau ib qhov kev kub nyhiab nyob hauv 1 Kauleethaus 3:11-15:
“Rau qhov yeej tsis muaj leejtwg yuav muaj cuabkav tsa dua lwm lub tsev hloov lub uas Vajtswv twb tsa tau lawm, lub ntawd yog Yexus Khetos ntag. Muaj qee leej yuav muab kub, muab nyiaj, muab tej pobzeb muaj nqis, muab ntoo, muab nqeeb thiab muab quav nyab tuaj vov thiab tuaj xov lub tsev ntawd, Hnub uas Yexus rov qab los, nws yuav muab txhua tus tes haujlwm nthuav qhia rau sawvdaws porn, Hnub ntawd yuav tsis muab npog cia lawm, rau qhov Hnub ntawd yuav muab hluavtaws sim txhua tus tes haujlwm saib puas ruaj puas khov. Yog tej uas sawvdaws coj tuaj vov lossis xov lub tsev ntawd leejtwg li tsis kub hnyiab, tus ntawd thiaj tau nqi zog. Tiamsis yog leejtwg tes haujlwm kub hnyiab lawm, nws yuav tsis tau dabtsi; nws yuav dim, tiamsis nws tsuas dim ib yam li tus uas khiav dim hauv hluavtaws los xwb.”

Paulus hais tias peb cov ntseeg Vajtswv nyias tab tom ua nyias lub tsev rau saum tus cag ruaj khov yog – Tswv Yexus Khetos. Tiamsis lo lus nug tau nug tias: Peb tab tom siv dabtsi los ua peb lub tsev hauv lub neej? Tsis paub peb puas saib sab nraud tseem ceeb, ua kom lwm tus txaus siab, los yog ua kom txhawm rau yus tus kheej kev ntshaw, lossis tej uas yus muaj? Tej yam uas peb pheeb rau ntawd yog nws ua rau kom lwm tus ntseeg peb lossis yus lub meej mom hauv lub zej zog kom ruaj khov?

Paulus hais tias yuav muaj tej lub sijhawm kev sim siab yuav tshwm tuaj, thiab thaum ntawd, lub siab tiag hauv txhua tus lub siab yuav tau muab nthuav tawm. Txhob xav yuam kev tias Vajtswv yuav tso cai rau hluav taws cig tom hav zoov kub nyhiab sim cov pej xeem nyob ntawd, tiamsis Vajtswv kuj siv tej teeb meem no los pab kom peb yuav tau tshuaj peb lub siab. Ntawm no yog lub sijhawm uas peb yuav rov qab tshuaj peb lub “pob zeb” uas yus siv los ua yus lub tsev hauv lub neej saib puas yog tej cuab yeej ruaj khov, lossis tej nyuag nyob ib ntus, tsis muaj nqis ntev.

Thiv no, thaum kuv nyob hauv kuv lub tsev sov so rau lub caij nplooj ntoo zeeg, kuv mam nug tias: Tsis paub kuv puas txhawj txog tej qub txeeg qub teg uas kuv muaj nws yuav poob mus, dua li qhov uas kuv tsim kom muaj lub neej sib raug zoo ua ke nrog Vajtswv? Yog tias txhua yam cia li yaj tshis mus, txoj kev sib raug zoo ntawm kuv thiab Vajtswv puas tseem nyob li qub, tsis paub kuv puas cim civ suav tias kuv yog ib tug neeg tau koob hmoov? Tsis paub kuv puas nrhiav tau kev kaj siab tiag nyob hauv Nws, txawm yog tej uas puas tshuaj ntawd?

Tus nplaim taws sim siab ntawd yuav nthuav tawm tej uas peb muab tso ua ntej nyob hauv peb lub siab. Yog tias yam muaj nqis tshaj plaws ntawm peb yog – kev hlub, txhua txoj kev sib raug zoo, thiab kev ntseeg – yeej tseem nyob tom qab txoj kev sim siab ntawd, ces ntawd yog qhov khoom plig loj. Tsis paub puas tseem muaj qhov khoom twg muaj nqis tshaj qhov uas tiv dhau hluav taws los nws yeej tseem nyob khov kho yam uas yus saib ua tseem ceeb nyob rau hauv lub neej?

Thov caw nrog kuv peb thov Vajtswv ua ke:
Ua Vajtswv tsaug vim Koj yog tus cag ruaj khov nyob rau hauv kuv lub neej. Thaum ntsib tej kev sim siab thiab teeb meem, thov pab kom kuv ntsia pom yam twg thiaj yog yam muaj nqis. Thov qhia rau kom kuv paub muab kev hlub, txoj kev sib raug zoo thiab kev ntseeg rau koj tso ua ntej txhua yam hauv ntiajteb no. Txawm yog lub ntiajteb no yuav hloov pauv los, thov Vajtswv pab kom kuv muaj lub siab tawv pheeb ruaj ruaj rau Vajtswv thiab ntseeg Vajtswv ua tus coj kev. Thov kom kuv nco ntsoov tias, thaum txhua yam ib ncig kuv yaj tshis lawm ces Vajtswv txoj kev hlub yog nyob ib txhis tsis hloov pauv. Kuv thov hauv Tswv Yexus Khetos lub npe. Amees.

Cov kwv tij txhua tus, tom qab txhua yam, tej uas tseem nyob tsis raug hluav taws kub nyhiab thiaj yog yam muaj nqis tiag. Kev hlub, txoj kev sib raug zoo ncaj ncees, thiab kev ntseeg yeej yuav tsis yoj yees hauv Vajtswv yog qhov khoom plig muaj nqis uas tsis muaj dabtsi yuav piv tau. Thaum tiv dhau tus nplaim tawm sim lawm, yam uas tseem nyob cia tsis yog tej khoom ntiajteb, tiamsis yog feem khoom plig sab ntsujplig muaj nqis – kev kaj siab thiab kev ntseeg ruaj khov hauv Vajtswv. Cia siab tias peb yuav hla dhau tej nthwv cua daj cua dub thiab yeej tseem tuav ruaj ruaj tej yam muaj nqis uas Vajtswv tau muab pub.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.