Saib keeb kwm dhau los, peb pom Vajtswv kev tswj hwm thiab tiv thaiv. Hnub no yog hnub 31 hli 10 yog hnub nco txog txoj kev ntseeg hloov pauv, yog ib lub cim tseem ceeb hauv cov ntseeg Vajtswv keeb kwm. Tsis yog tsuas yog ib txoj kev hloov pauv kev ntseeg xwb tiamsis tseem yog ib lo lus ntuas txog txoj kev uas ib tug neeg yuav tau txais kev cawmdim – tsuas yog kev ntseeg xwb tsis yog vim peb tsimnyog. Hnub kev ntseeg hloov pauv yog lub caij tseg rau peb xav txog lub ntsiab ntawm txoj kev cawmdim thiab peb lub siab ncaj ncees tseg rau Vajtswv txojlus nyob rau lub sijhawm hloov pauv li niaj hnub nim no.

Hnub no, yog hnub 31/10/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Tara Jackson dhau ntawm Zaj kawm VIM KEV HLUB THIAB KEV NTSEEG PEB TAU CAWMDIM.

“Vajtswv tus uas hlub nej, nws cawm nej dim twb yog vim nej ntseeg. Qhov uas nej dim ntawd, tsis yog vim nej ua haujlwm zoo, tiamsis yog Vajtswv cia li pub dawb rau nej xwb.” (Efexaus 2:8-9)

Thaum mus tshawb fawb txog keeb kwm Pawg Ntseeg, kuv tau txhawb zog los ntawm ntau tus txiv neej thiab pojniam lub siab tawv uas lawv tau tuav Vajtswv txojlus ruaj. Nyob rau tej kev hloov pauv thiab teeb meem tshwmsim nyob rau tiam uas lawv nyob, peb pom meej meej txog Vajtswv txoj kev tiv thaiv thiab Vajtswv ua tus tswj thiab txoj kev uas Vajtswv nthuav tawm qhov tseeb uas yog Txojmoo Zoo. Tshwj xeeb, hnub kev ntseeg hloov pauv yog ib hnub tshwj xeeb, kom txhawb kuv txoj kev ntseeg ruaj khov. Ntawm no yog lub sijhawm uas peb ntsia pom Vajtswv siv Martin Luther lub siab tawv kam sawv los hloov pauv – dhau los ua ib tus xibhwb Vajluskub – yog tus pib txoj kev hloov pauv hauv txoj kev ntseeg. Hloov pauv keeb kwm Pawg Ntseeg mus ib txhis.

Thaum ntawd tib neeg tseb tej xov tsis zoo txog txoj kev ntseeg yuam kev tias, tib neeg muaj cuab kav “yuav tau txoj kev cawm dim” dhau los ntawm qhov uas lawv muag daim ntawv zam txim. Xav txog qhov tsis zoo no, hnub 31 hli 10 xyoo 1517, Martin Luther thiaj sau txog 95 nqe kevcai coj los ntsia rau ntawm tuam tsev nyob hauv Wittenberg. Qhov haujlwm no zoo li ib lo lus ceeb toom, nthuav tawm tej kevcai yuam kev tau nkag los rau hauv koom haum, tib txhij ntawd kuj nqua hu sawv daws tig rov qab los rau ntawm qhov tseeb uas yog Vajtswv txojlus.

Nyob ntawm kuv, hnub kev ntseeg hloov pauv yog lub sijhawm tseg rau peb xav txog Vajtswv txoj kev hlub zoo kawg nkaus yog thaum uas peb nco txog lub sijhawm uas yus tau ua neej nrog lub nra nyhav vim ntseeg yuam kev tias txoj kev cawmdim yog los ntawm qhov uas ua zoo. Ntau xyoo kuv ua neej nrog lo lus nug tias tsis paub yus puas poob yus txoj kev cawm dim thiab yus tej kev siv zog puas zoo txaus. Kom cim civ nplig tej kev txhawj ntawd, kuv siv zog ua zoo tshaj qub, thiab lees txhua txoj kev ua yuam kev. Tiamsis, thaum kawg qhov uas yus pheej hnov tias txhaum ntawd nws yeej tseem txiav txim rau yus lub hlwb thiab yog ib lub nra nyhav tsuam kuv tus ntsujplig.

“Vajtswv tus uas hlub nej, nws cawm nej dim twb yog vim nej ntseeg. Qhov uas nej dim ntawd, tsis yog vim nej ua haujlwm zoo, tiamsis yog Vajtswv cia li pub dawb rau nej xwb. Qhov uas nej dim tsis yog nej lub dag lub zog ua mas nej thiaj tsis muaj lus khav tau” (Efexaus 2:8-9).

Txawm yog twb nyeem nqe Vajluskub no ntau zaug lawm los, kuv yeej tseem nco ntsoov lub sijhawm uas kuv nkag siab lub ntsiab tiag ntawm Txojmoo Zoo. Ntawd yog Txojmoo Zoo cawm dim!

Tsuas yog Vajtswv txoj kev hlub xwb kuv thiaj tau txais kev cawmdim thiab kuv txais txoj kev cawmdim los ntawm kev ntseeg. Kuv txoj kev ua zoo tsis muaj hnub yuav cawm tau kuv. Kuj zoo li cov neeg uas yuav daim ntawv zam txim kom tau txais kev cawmdim nyob rau Martin Luther tiam, kuv tau siv zog ua ntau txoj haujlwm zoo kom nrhiav txoj kev cawmdim. Tiamsis Loos 3:10 hais meej meej tias yeej tsis muaj ib tug twg yog neeg ncaj ncees, txawm yog ib tug los yeej tsis muaj. Yaxayas 64:6 hais meej tias peb txhua txoj haujlwm zoo puav leej zoo li daim phuam ntuag qias neeg xwb. Tsuas yog Tswv Yexus Khetos, Vajtswv tib leeg tub xwb thiaj ua ib lub neej tsis muaj kev txhaum nyob hauv ntiajteb, yog tus pab hais peb zaj thiab suav tias ncaj ncees rau peb. Thaum nkag siab txog txoj kev uas Vajtswv tau cawm kuv, kuv pom kuv lub neej tau hloov pauv. Kuv tsis ua neej nrog lub nra nyhav ntawm txoj kev cai tiamsis tau ywj pheej nyob hauv Yexus Khetos!

Yog ib tug ntseeg Vajtswv, peb yuav tsum ncajncees rau txoj lus qhia tseeb txog kev cawmdim thiab rhuav tshem txhua txojkev qhia cuav. Txojmoo Zoo yog lub hwjchim cawm txhua tus uas ntseeg, ib yam li Loos 1:16 tau hais meej meej. Martin Luther totaub zoo txog qhov uas, yog tias ib tus twg ntseeg tias lawv yuav txais tau kev cawmdim dhau ntawm lwm yam tiamsis tsis yog los ntawm lub siab ntseeg rau Yexus Khetos txojkev cawmdim, ces tus ntawd tsis to taub txog txojmoo zoo. Luther ua siab tawv tiv rau qhov tseeb no txawm yog nws yuav raug tsim txom, los nws tsis thim nws cov lus.

Thaum sawv daws koom siab ua ke ua kev nco txog hnub kev ntseeg hloov pauv, peb cia li xav txog Martin Luther cov lus thaum uas yawg raug quab yuam kom thim txoj kev ntseeg nyob rau hauv rooj sab laj ntawm Worms:
“Kuv lub siab raug khi ua ke nrog Vajtswv tej lus. Kuv ua tsis tau thiab kuv yuav tsis thim rov qab, vim nws ua yuam kev kuv lub siab yog ib txoj haujlwm tsis ncaj ncees thiab phomsij. Thov Vajtswv cawm kuv. Kuv thov hauv Tswv Yexus Khetos lub npe. Amees.”

Thov caw nrog kuv peb thov Vajtswv ua ke:
Leej Txiv saum ntuj, ua Leej Txiv koj tsaug rau Vajtswv koj txoj kev hlub tsis muaj nrim uas koj tseg pub rau kuv. Thov koj pub rau kuv kom muaj lub siab tawv sawv khov kho ntawm tej kev sim siab, thiab pab kom peb ncaj ncees rau Vajtswv txojlus. Nyob rau hauv lub ntiajteb tsis muaj kev ruaj khov li no thiab hloov pauv tsis so zoo li no, thov kom koj tus duab ci dhau ntawm kuv lub neej, kom kuv dhau los ua ib tug tim khawv ncaj ncees rau Txojmoo Zoo. Kuv thov hauv Tswv Yexus Khetos lub npe. Amees.

Cov kwv tij txhua tus, hnub kev ntseeg hloov pauv tsis yog tsuas yog lub caij tseg rau peb tig rov mus saib yav dhau los, tiamsis tseem yog lo lus nqua hu muaj zog tseg rau peb txhua tus hnub no: Ncaj ncees rau Vajtswv tej lus, txawm yog lub ntiajteb yuav hloov pauv. Yeej tsis muaj dua lwm txoj kev ntseeg tsuas yog Txojmoo Zoo los ntawm Yexus Khetos los xwb. Thov Vajtswv pub rau peb kom muaj lub siab tawv khov kho ua lub neej thiab ua tim khawv rau Txojmoo Zoo – yog txoj kev hlub zoo kawg nkaus uas Vajtswv tseg rau peb.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw: [email protected]. Tswv Yexus hlub koj. Thiab peb xav kom txuas tau nrog koj.