Thaum hais txog lub siab nco tshav ntuj, peb txhua txhia tus ib leeg nyias yeej muaj nyias ib lub sijhawm tshwj xeeb tig rov qab los saib tej uas tau tshwmsim nyob rau hauv yus lub neej. Ntawd yog lub sijhawm tau nyob ua ke nrog tej neeg txheeb ze, sib faib txoj kev zoo siab thiab saib taus tej yam yooj yim muaj nyob txhua hnub. Nyob rau lub caijnyoog tamsim no, thaum uas muaj ntau tus ntsib tej kev txomnyem, xws li, toj pob dej nyab, kub nyhiab, kab mob kev nkeeg lossis tej teeb meem uas peb xav tsis txog ua ntej, peb yuav nco Vajtswv tshav ntuj txog Vajtswv txoj kev tiv thaiv hauv peb lub neej.

Hnub no, yog hnub ua kevcai ua tsaug 28/11/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Cathy Irvin dhau ntawm Zaj kawm NCO TXIAJ NTSIG MUS LI

“Kuv paub tseeb hais tias kuv tau ua neej nyob saib ntsoov tus Tswv tes haujlwm zoo thaum tsis tau tas kuv simneej.” (Ntawv Nkauj 27:13)

Lub sijhawm twb dhau mus lawm – txog lub sijhawm cia tsev neeg los nyob ua ke ntawm rooj noj rooj haus sov so, noj tej zaub mov uas ib txwm noj nyob rau lub koobtsheej ua Vajtswv tsaug. Kuv tus ntxhais nyuam qhuav rov qab los tau 7 xyoo nws nyob deb tsev, kuv tus ntxhais xeeb nyuam qhuav nrog nws tus txiv thiab ob tug menyuam txav los nyob ntawm no. Ntxiv rau qhov ntawd, kuv muaj dua ib tug menyuam xeeb kuj rov qab los nrog tsev neeg nyob ua ke tom qab ntau xyoo ua haujlwm deb tsev. Kuv zoo siab thiab ua tsaug vim kuv tej neeg txheeb ze puav leej nyob ze kuv rau lub sijhawm tshwj xeeb no.

Thaum tseem yau, Koob tsheej ua Vajtswv tsaug yog ib hnub tau so zoo siab heev vim tag nrho tsev neeg tau nyob ua ke. Tomqab noj mov tsau tas, sawv daws pw pawg lug ntawm tej rooj yeej tsis xav ua dabtsi lawm!

Peb pheej sib tuav tes thiab thov Vajtswv foom koob hmoov nplua mias. Tiamsis hnub ntawd yog ib hnub tseem ceeb dua me ntsis. Tomqab noj mov tas, kuv zoo siab sau tej twj taig thiab nrog kuv tus niam laus ntxuav phaj ntim. Kom kuv niam tau so me ntsis. Hnov cuag li yus nyuam qhuav noj tsau tsau, leej twg twb cog lus tias yuav tsis noj ntau, tiamsis niam ho hais tias: “Yuav tau xav txog tej menyuam uas lawv tab tom tshaib nqhis thiab txhob cia zaub mov seem tseg.”

Kev ua tsaug tsis yog tsuas noj, so xwb, tiamsis ntawm no yog lub sijhawm peb rov qab xav txog Vajtswv tej koob hmoov. Ntawm kuv tus kheej, no yog lub sijhawm kuv nco txog Vajtswv txoj kev ncaj ncees thiab tag nrho tej koob hmoov Vajtswv tau foom rau kuv nyob hauv kuv lub neej, tshwj xeeb yog thaum uas kuv tau txais kev cawmdim tau 30 xyoo dhau los.

Kuv nco Vajtswv tshav ntuj txog Vajtswv txoj kev hlub tau pab kom kuv tiv dhau lub caijnyoog muaj kev txomnyem hauv lub neej. Kuv twb mloog ntau zaj lus qhuab qhia txog kev ua tsaug thiab saib taus tej koob hmoov uas Vajtswv tau pub, thiab kuv pom tias tsis yog tsuas yog lub caij no xwb tiamsis txhua hnub puav leej yog lub sijhawm cia kuv xav txog Vajtswv txoj kev zoo. Vajtswv lub siab hlub tshua nws tshiab thiab puv npo txhua hnub.

Kuv nco Vajtswv tshav ntuj rau Vajtswv txoj kev tshua thiab Vajtswv txoj kev hlub. Ua Vajtswv tsaug rau txoj kev zoo siab, kev kaj siab, tsev neeg, tes haujlwm, Pawg Ntseeg tej phooj ywg, dag zog, thiab nyiaj txiag uas Vajtswv tau pub los ntawm Vajtswv txoj kev ncaj ncees.

Yog ua zoo xav, peb yuav tsis muaj dabtsi los yws Vajtswv? Ua neej nyob qab ntawm Vajtswv tej koob hmoov, peb yuav tau tsa suab hlo hais nrov nrov txog “Vajtswv txoj kev zoo nyob rau hauv daim av uas tib neeg nyob” ib yam li Vajluskub tau sau tseg hauv Ntawv Nkauj 27:13. Vajtswv txojlus hais tias Vajtswv tej koob hmoov Vajtswv ua rau kom peb nplua nuj “tsis yog tej uas peb niaj hnub khwv ua rau peb nplua nuj” (Pajlug 10:22).

Tsis ntev los no, muaj ntau tsev neeg tau sib ncaim vim cua daj cua dub, dej nyab, thiab muaj ntau lub tsev tau pob puas thaum dej huam loj tuaj. Tiamsis qhov tseem ceeb hnub ua tsaug no yog peb txoj kev ntseeg nyob ntawm Vajtswv, xav txog Vajtswv txoj kev ncaj ncees thiab Vajtswv txoj kev muab pub, ib yam li nco Vajtswv tshav ntuj thaum peb tsev neeg yeej tseem nyob ntawm peb ib sab.

Cia li nyob ze Vajtswv. Hauv peb lub siab kuj yuav tau xav txog tsev neeg, thiab txhob hnov qab tawm suab ua Vajtswv tsaug txhua hnub mog phooj ywg!

Thov caw nrog kuv peb thov Vajtswv ua ke:
Tus Tswv, kuv tsa suab ua koj tsaug rau txhua txoj koob hmoov uas koj tau muab pub rau kuv. Nyob rau tej lub sijhawm muaj kev txomnyem lossis muaj kev noj qab nyob zoo, kom kuv pom koj txoj kev hlub thiab kev pab kuv tsis tu li. Thov kom kuv lub siab puv npo kev nco koj tshav ntuj, kom txhua hnub dhau mus kuv yuav nco ntsoov txog tej yam zoo uas koj tau ua. Cia siab tias lub siab nco koj tshav ntuj yuav yog lub zog loj tseg rau kuv ua lub neej ua rau kom koj tau koob meej. Kuv thov hauv Tswv Yexus Khetos lub npe. Amees.

Cov kwv tij, hnub no koj ua Vajtswv tsaug rau yam dabtsi? Peb muaj cuab kav ua Vajtswv tsaug rau Vajtswv lub siab hlub tshua thiab Vajtswv txoj kev cawmdim uas koj txais tau nyob hauv Tswv Yexus. Ua Vajtswv tsaug vim cov neeg uas hlub koj yeej tseem tab tom nyob ib ncig ntawm koj, rau qhov tej hnub muaj kev txomnyem ntawd pab kom peb loj hlob tuaj, vim tej kev zoo siab me me nyob hauv lub neej txhua hnub. Tuav rawv txoj kev ntseeg kom ruaj, saib taus tej uas peb tab tom muaj, thiab txhob hnov qab nthuav tawm lub siab nco Vajtswv tshav ntuj txhob yog ua rau hnub ua tsaug xwb, tiamsis yuav tau nco txhua hnub, txhua feeb. Twb yog vim muaj tej feeb ntawd peb thiaj pom lub neej no zoo tuaj.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw: [email protected]. Tswv Yexus hlub koj. Thiab peb xav kom txuas tau nrog koj.