Lăng mĭnh sơnăm đei hlôi bơih, lơ bơngai lăm lu bơ̆n kŭm đei bơ̆l hăl păng pă gơh pơm kiơ yua kơ tơdrong arih kơdih liơ pơmat tat dêh. Dôm lu nơ̆r apĭnh ‘nâu đei truh: Yua kơ kiơ tơdrong ‘nâu gơh truh? Yua kơ kiơ Kră Yang wă kơ inh đei tơ’bơ̆p dôm lu tơdrong pơlong lăng ‘nâu? Tơpă, Kră Yang đei kơ nhăm đơ̆ng rŏng kơ dôm tơdrong ‘noh, mă lei tơdrong gĭt kăl ‘noh: buăl đei hŏk iŏk tơdrong kiơ đơ̆ng rŏng kơ dôm tơdrong kơdih hlôi đei bơih tơdrong ‘noh truh tơlăm chăl arih?

Năr ‘nâu, ‘năr 10/01/2025 tơdrong tơdă Amăn Jơ Krao Khan Rim Năr, apĭnh krao wơ̆n ‘bơngai mơ̆ng hơdai tơchĕng pơwao nơ̆r Kră Yang păng ‘bơngai chih Beth Patch kơ̆l ‘bai LĂNG ĐÊL MINH SƠNĂM HLÔI BƠIH.

“Ơ lu ‘nhŏng oh inh, mă iĕm đei tơdrong gleh kiơ truh kơ iĕm, iĕm athei hiôk đĕch hŏ, yua kơ iĕm băt boih, tơ̆ng bơ̆n đei lơ tơdrong gleh, tơdrong gleh noh wă pơlong lăng tơdrong lui bơ̆n, kư̆m bưh mơ̆n, wă kơ bơ̆n lui kơjăp. Păng bơ̆n athei adrin lui kơjăp khŏm khŏm wă kơ bơ̆n jing bơngai tơpăt huay kơ’bah tơdrong kiơ.” (Yakơ 1:2-4)

Đơ̆ng rŏng kơ đĭ mĭnh sơnăm, lu bơ̆n đei jơnăr wă đŏk lu tơdrong roi tơbăt đĭ mĭnh sơnăm hlôi bơih. Tơdrong roi tơbăt ‘noh kŭm đơ̆ng bôl buăl, Khŭl bơngai lui, Tơdrong jang, dah minh khŭl hơyơ mă lu bơ̆n gơh tơ‘bưh. Tơdrong roi tơbăt tơgŭm bơngai đŏk lăng đêl dôm tơdrong kăl kơ ‘blŏk lăm sơnăm, mă juăt ‘noh bơih dôm lu tơdrong kĕ jei, dôm lu tơdrong roi hiôk chơt, dôm lu tơdrong hiôk ‘lơ̆ng. Lăm bơyan đĭ sơnăm dah sơnăm ‘nao, lu sư đei ră roi “tơdrong roi tơbăt” ‘nâu hăm bôl buăl păng hnam dơnŏ nhen thoi mĭnh tơdrong tơ’bưh păng tơ‘bôh pơdah tơdrong hiôk chơt đơ̆ng dôm jơ gĭt kăl lăm sơnăm hlôi.

Mă lei buăl gô pơm kiơ tơdah đĭ lăm minh sơnăm buăl đei tơ‘bơ̆p dôm lu tơdrong ưh kơ ‘lơ̆ng? Lei buăl hăm wă ‘maih gưih “tơdrong roi tơbăt” ei kơ bơngai nai ưh? Lu nhôn đei hlôi tơ‘bơ̆p bơih tơdrong ‘noh lăm dôm sơnăm hơdrol sơ̆. Đơ̆ng rŏng kơ phĕt Bơnê, akăn inh pĭnh: “Anhŏng hăm wă pơm tơdrong roi tơbăt sơnăm ‘nâu ưh?”

Inh tơl: “ Trŏ thoi ei bơih. ‘Nhŏng gô roi kơ đĭ đăng bơngai mơ̆ng gah minh sơnăm anat mă lu bơ̆n đei tơ‘bơ̆p.”

Kơplah tơ‘blŏk dơ̆ng đĭ đăng dôm lu tơdrong hlôi đei bơih tơdrong kơnê̆ krưp păng sơ’ngon đei truh lăm sơnăm ‘noh, lu nhôn đei ‘maih hyĕk. Sơnăm ‘noh, akăn inh đei hơchăng minh tơdrong jang mă sư gĭt kăl dêh wă năm hơdai inh, kơplah inh đei tơplih tơdrong jang năm tơ anih ‘nao plơ̆ng. Kơplah oei tơnoh, akăn inh đei tơbăt đei tơdrong jĭ păng đei hlôi kơ raih lơ wơ̆t. Kơplah akăn inh wă jê̆ hơdơ̆r păng wă hơmet tơmơ̆t pơgang, inh đei tơplih tơdrong jang tơ dêh char ‘nguaih, pơm kơ inh ưh kơ gơh hơdai akăn inh lăm jơ hơnat hơnot sư ‘noh. Tim mă dơ̆ng ‘bơ̆t doh, inh oei đei tơ’bơ̆p lơ tơdrong anat đơ̆ng bơngai jang kơpal kơ inh. Lu nhôn đei pêng ‘nu kon, mĭnh ‘nu ưh kơ đei tơdrong jang, ‘bar ‘nu ‘noh oei pơjah băl hăm dôm lu tơdrong akâu kơdih. Tơdrong hơnat pơthim hơnat, nhen thoi ưh kơ tôch.

Lu nhôn ‘bôh mơn tơdrong hơnat ‘bok Jop kơplah sư hơnơ̆ng kơ tơ’bơ̆p dôm lu tơdrong hiong răm krưp dêh, đĭ tơdrong ‘nâu truh tơdrong nai. Ưh kơ đei hlĭch kơplah kơdih ‘bok Jop kŭm đei mơn trăp dêh păng sơ’ngon. Akăn sư ‘noh khan kơ sư thei hiap pơtê̆ ‘Bok Kei-Dei păng athei lôch. Lu bơ̆n dang thoi ‘bôh kơdih ưh pă băt pơm liơ kơplah tơdrong arih jing anat anot hloh hnang, kơplah kơtơ̆ng tơdrong kơnê̆ oei ling lang truh. Hăm lu bơngai đei hlôi tơ’bơ̆p bơih lơ tơdrong anat anot dêh, lu nhôn đei hlôh tơpă dôm tơdrong ‘nâu.

Lăm dôm tơdrong sơ’ngon kơdih, ‘bok Jop ưh kơ đei tơwih rŏng hăm Kră Yang, ưh kơ hiap pơtê̆ Kră Yang, păng roi ưh kơ rơih iŏk tơdrong pơlôch akâu kơdih. Đon lui sư ưh kơ đei ngĭl ngŭl: “Lăm dôm tơdrong noh, Jop ưh kơ đei pơm yoch păng ưh kơ đei pơma kư̆ kă kơ Kră Yang ‘Bok Kei-Dei.” (Jop 1:22)

Lăm mĭnh sơnăm ‘bĕnh tơdrong anat ei, lu nhôn đei hŏk iŏk kơmĭl ‘bok Jop. Lu nhôn wă ngơ̆k măt kơdih lăng tơ Kră Yang Yêsu păng pơkă jơhngơ̆m tơnăp lăm dôm tơdrong. Kơplah teh đak pơma hăm lu nhôn athei hơchăng, dah hil jŏk kơ ‘Bok Kei-Dei păng lôch hloi, mă lei lu nhôn ưh kơ pơm thoi ‘noh. Mĭnh sơnăm đei hlôi mă lei lu nhôn oei tim mă ‘bôh tơdrong hơmĕng hơyơ wă lĕch hlôi đơ̆ng dôm tơdrong hơnat ‘noh. Mă thoi noh, mă lei lu nhôn oei wei jơhngơ̆m hiôk chơt hơdai. Bơngai chih kơthơ Yakơ đei tơ’blŏk kơ lu bơ̆n athei chơt hiôk kơplah tơ’bơ̆p tơdrong pơlong lăng:

“Ơ lu ‘nhŏng oh inh, mă iĕm đei tơdrong gleh kiơ truh kơ iĕm, iĕm athei hiôk đĕch hŏ, yua kơ iĕm băt boih, tơ̆ng bơ̆n đei lơ tơdrong gleh, tơdrong gleh noh wă pơlong lăng tơdrong lui bơ̆n, kư̆m bưh mơ̆n, wă kơ bơ̆n lui kơjăp. Păng bơ̆n athei adrin lui kơjăp khŏm khŏm wă kơ bơ̆n jing bơngai tơpăt huay kơ’bah tơdrong kiơ.” (Yakơ 1:2-4)

I Pêtrôs 4:12-13 kŭm tơ’blŏk kơ lu bơ̆n gah tơdrong tơ’bôh kơplah dơ̆ng ‘bơ̆t hơnăp tơdrong pơlong lăng:

“Ơ lu ‘nhŏng oh mă inh ‘mêm kơeng, iĕm đei boih tơdrong gleh truh wă pơlong lăng tơdrong lui iĕm, mă iĕm ‘nĕ kơ lăng hlĭch tơdrong kiơ hŏ, yua kơ tơdrong noh gô truh rim ‘nu kơ lu bơngai lui. Na iĕm athei gơ̆t lê̆ tơdrong sơ’ngon, iŏk tơdrong hiôk chơt đĕch, yua kơ Yêsu Krist sơ̆ Sư kư̆m đei tơdrong gleh truh boih. Na bơ̆n dang ei kư̆m đei tơdrong truh thoi noh mơ̆n. Thoi noh na truh năr bơ̆n tơ’bơ̆p Yêsu Krist mơsêh mơyang jur ning-mônh bơ̆n gô hiôk chơt hăm Sư.” (I Pêtrôs 4:12-13)

Tơplih yua kơ chĕp ba lăm đon tơchĕng sơ’ngon yua kơ ŭnh pơlong lăng trăp trĭn dêh, lu bơ̆n athei ngơk măt kơdih lăng tơ Kră Yang ‘Bok Dŏng Pơklaih, Tơ’ngla đei pŭ iŏk pơmat, păng wă ‘măn ăn kơ lu bơ̆n kơmĭl. Kŭm phŏ buăl oei tơ’bơ̆p dôm tơdrong trăp trĭn gah jên tơmam, jơhngơ̆m pran, hnam dơnŏ, tơdrong jang… Nơ̆r Kră Yang ưh kơ đei bơtho kơ lu bơ̆n athei hiôk chơt yua kơ dôm lu tơdrong ‘noh păng hơdrin hiôk chơt, mă lei Nơ̆r Kră Yang bơtho athei lăng tơ kơdih akâu Kră Yang Yêsu, păng lăng dôm lu tơdrong pơlong lăng ‘noh jơnăr wă kơ lu bơ̆n wơ̆ ‘lŏ lăm Kră Yang. Athei ‘blŏk ‘noh tơdah lu bơ̆n tơnăp lăm dôm lu năr đei tơdrong gleh truh, lei tơdrong ư-ang đơ̆ng Kră Yang gô tơ’bôh lăm lu bơ̆n.

‘Bok Jop trŏ kơ đei mơn băt hơđăl kơ tơdrong ‘nâu, yua kơ ‘noh sư đei nuih pơma lăm Jop 19:25 khan: “Mă-lei inh băt sĭt Tơ’ngla Dŏng Pơklaih inh oei arih, Sư gô iung dơ̆ng lăm năr tôch kơnh wă pơma dŏng inh kơpal teh.” (Jop 19:25)

Đĭ jơhngơ̆m gơnang kơ Kră Yang, wă kơ, mă oei tơlăm tơdrong pơlong lăng, buăl oei đei tơdrong hiôk chơt păng tơnăp hăm Kră Yang. Yua kơ đơ̆ng Kră Yang ăn, buăl gô đei jơhngơ̆m đon lui kơjăp thoi kơ ‘bok Jop: “Inh băt sĭt Tơ’ngla Dŏng Pơklaih inh oei arih!”

Apinh đĭ đăng krao khan hơdai:
Kơkuh kơ Kră Yang ‘mêm! Kră Yang ơi, Ih bơih Tơ’ngla băt hơđăl dôm tơdrong hơnat hơnot mă kon oei tơ’bơ̆p. Kon apĭnh pơyơ̆r kơ Ih dôm lu tơdrong ơh sơ’ngon lăm kon, dôm tơdrong ưh kơ hiôk păng dôm tơdrong hiơ̆k bơngơ̆t kơplah lăng tơ sơnăm ‘nao păng tơdrong tơ hơnăp wă truh. Apĭnh Kră Yang tơgŭm kon ling lang đei hiôk hian păng hiôk chơt mă tơ’bơ̆p dôm tơdrong ưh kơ hiôk lăm chăl arih, yua băt kơ Ih yua dôm lu tơdrong ‘noh wă kơ kon gơh wơ̆ ‘lŏ lăm tơdrong hlôi đei đơ̆ng Kră Yang. Hơpơi kơ dôm lu tơdrong pơlong lăng mă kon đei tơ’bơ̆p lăm năr ‘nâu bơih jing ‘bai hơri đơ̆ng jơhngơ̆m băt bơnê yua kơ hiôk chơt lăm dôm lu năr wă truh. Yua kơ kon lui kơjăp lăm Kră Yang, păng kon băt tơpă “Tơ’ngla dŏng pơklaih kon oei arih!” Kon bơnê kơ Ih păng kŭp kơ̆l krao khan lăm a năn Yang Yêsu Krist, A- men.

Ơ lu bơngai mơ̆ng ‘mêm kơ eng, buăl ‘bôh kiơ kơplah lăng mĭnh sơnăm đei hlôi bơih? Dôm lu tơdrong pơlong lăng lăm chăl arih hăm đei tơgŭm buăl wơ̆ ‘lơ̆ hloh lăm trong năm đon lui dah ưh? Năr ‘nâu, mĭnh wơ̆t dơ̆ng athei lăng sơnăm so 2024 păng apĭnh Kră Yang pơchrang hơdah wă kơ lu bơ̆n sơng iŏk dôm lu ‘bai hŏk đơ̆ng Kră Yang. Athei roi hăm Kră Yang lăm tơdrong lui kơjăp “Yua kơ kon băt kơ Tơ’ngla dŏng pơklaih kon oei arih!”

Năr ‘nâu, tơdrong tơdă Amăn Jơ Krao Khan Rim Năr krao wơ̆n buăl ‘măn jơnăr wă chih tơ ala “tơdrong roi tơbăt” đơ̆ng kơdih kâu lăm sơnăm hlôi, păng klah song dôm lu ‘bai hŏk ‘nâu hăm hnam dơnŏ dah ‘nhŏng oh lăm đon lui wă kơ tơiung băl lăm trong năm kiơ̆ Kră Yang. Kŭm athei klah song “tơdrong roi tơbăt” đơ̆ng buăl hơdai tơdrong tơdă Amăn Jơ Krao Khan Rim Năr hăm dôm lu nơ̆r chih pơma dơnuh tơ ala dah gưih email tơ tơdrong tơdă hŏ.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.