Nyob rau tej hnub uas tseem yog lub xyoo tshiab, nrog txoj kev cia siab rau ib txoj kev pib dua tshiab, peb kuj tseem tshuav tej lo lus taij thov Vajtswv tsis tau teb. Thaum tos ntev heev lawm, peb yuav ua tsis tshua tau siab ntev thiab ua xyem xyav txog Vajtswv tej lus cog tseg. Tiamsis, Vajluskub ntuas kom peb nco ntsoov tias tos hauv txoj kev ntseeg tsis muaj ib zaum twg yuav yog tsis muaj qab hau. Txawm yog muaj qee zaus peb tsis pom nws tawg paj txi txiv tamsim, Vajtswv cog lus tias tus twg tos Vajtswv ces yuav tsis muaj ib zaum twg txaj muag.

Hnub no, yog hnub 31/01/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Andrew Murray dhau ntawm Zaj kawm TOS TXOJ KOOB HMOOV UAS RUAJ KHOV.

“Ces nej thiaj yuav paub hais tias kuv yog tus Tswv; cov neeg uas tos rawv kuv pab yuav tsis nkim lawv lub zog li. (Yaxayas 49:23).

“Cov neeg uas tos nws yuav tau txais koob hmoov. (Yaxayas 30:18).

Tej lus cog tseg ntawd zoo kawg nkaus li! Vajtswv nqua hu kom peb tos Vajtswv, thiab Vajtswv tab pov tias tej ntawd yuav tsis muaj ib zaum twg nkim sijhawm: “Cov neeg uas tos kuv yuav tsis nkim lawv lub zog li”.

Yam uas xav tsis thoob yog, txawm yog twb muaj ntau zaug saj tau Vajtswv txoj kev ncaj ncees lawm los, peb ho txais tau zaj kawm no qeeb heev. Tos tus Tswv tsis yog ib qhov haujlwm ua ib zaug tas cia li tsis tos, tiamsis zoo li txoj kev ua pa txhua hnub hauv lub neej. Yog txoj kev so ntev hauv txoj kev hlub thiab Vajtswv kev tshwm ntsej muag, yog ib txoj kev muab tso tag nrho rau Vajtswv kom Vajtswv ua tiav Vajtswv tes haujlwm hauv peb. Tseg sijhawm los mloog thiab xav, cia peb lub siab tsa suab rau txoj kev ntseeg ruaj khov tias: “Tus uas cia siab tos tus Tswv yuav tau koob hmoov.”

Nyob hauv Ntawv Nkauj 25:3, peb pom tus sau thov Vajtswv tias: “Tseeb tiag tsis muaj leej twg tos tus Tswv es yuav txaj muag.” Twb yog cov lus thov no ua rau peb txhawj tsam tej ntawd tshwmsim tuaj. Tiamsis ua tib zoo mloog Vajtswv lo lus teb, txog rau thaum tej kev ntshai ntawd yaj tshis mus, thiab peb yuav khov kho hais tias: “Ua li, tus Tswv, peb ntseeg Koj tej lus: “Tus uas cia siab tos tus Tswv yuav tau koob hmoov.”

Tej nqe Vajluskub no tau sau rau lub sijhawm Vajtswv haiv neeg ntsib kev sim siab ntau, tiamsis tseeb tiag cuag li lawv yeej tsis muaj ib txoj hau kev twg tawm tau. Tiamsis Vajtswv tau pab, Vajtswv pub Vajtswv tej lus cog tseg thiab cog lus yuav siv Nws lub hwjchim los cawm Nws haiv neeg. twb yog Vajtswv, tus pib ua txoj haujlwm cawm dim, tab tom nqua hu kom peb tos Nws, thiab cog lus tias peb yuav tsis muaj hnub tag kev cia siab.

Nyob rau tiam uas peb tab tom ua neej nyob niaj hnub nim no. Pawg Ntseeg kuj muaj kev nyuaj siab ntau. Txawm yog muaj ntau yam peb fij lus ua Vajtswv tsaug los, yeej tseem tshuav qee qhov teeb meem ua rau peb tu siab. Yog tsis muaj Vajtswv tej lus, peb yuav yooj yim tag kev cia siab. Tiamsis nyob rau hauv tej lus cog tseg ntawd. Vajtswv tus muaj sia nyob tau cog lus rau peb tias. Vajtswv nqua hu kom peb tos Vajtswv thiab cog lus tias peb yuav tsis nkim peb lub sijhawm li.
Txoj kev tos no tsis yog tsuas tseg rau Pawg Ntseeg, tiamsis tseem pib ntawm peb txhua tus. Tej uas peb ntsib dhau txog Vajtswv yog txoj kev uas tus kheej yuav daws txoj kev uas cia siab tos tus Tswv- Nws yog tus kov yeej tej yeebncuab uas qhov muag ntsia tsis pom, tus saib xyuas thiab nthuav tawm Nws tus kheej hauv txoj kev dawbhuv thiab lub hwjchim tsis muaj nrim.

Tsuas yog thaum twg peb saj tau txoj koob hmoov thaum tos Vajtswv lawm, peb thiaj yuav cia siab tau rau tej koob hmoov yuav los rau peb tus kheej, nyob ntawm Pawg Ntseeg, thiab tej neeg ib ncig peb. yam dabtsi ua rau peb muaj kev cia siab yog tej lus cog tseg: “Cov neeg uas cia siab tos kuv yuav tsis nkim lawv lub zog”.
Txawm yog tej lus cog tseg yuav los qeeb los, txoj kev zoo siab uas yuav piav tsis tau ces yog kiag lub sijhawm no, peb paub Vajtswv thiab muaj Vajtswv nrog nraim peb nyob – tus pub koob hmoov thiab yog lub hauv paus cia siaj ruaj khov. Cia qhov tseeb no txheem mus rau koj tus ntsujplig: tos Vajtswv yog ib txoj koob hmoov loj tseg rau Vajtswv tej menyuam.

Zoo li tus duab tshav ci tuaj rau hauv txhua lub ntsis nroj tsuag, ua rau kom tej ntawd pom kev, hnov sov thiab muaj sia, Vajtswv tus muaj sia nyob kuj yuav ntsib txhua tus ntseeg uas tab tom tos Nws, pub rau lawv kom muaj kev sov siab “Qhov kaj cia li ci hauv qhov tsaus ntuj tuaj,” tus ntawd yog tus Vajtswv uas ua kom qhov kaj ci tuaj rau hauv peb lub siab, qhia kom peb paub Vajtswv lub tshwjchim uas ua rau Yexus Khetos lub ntsejmuag ci ntsa iab (2 Kauleethaus 4:6).

Ntseeg tias thaum koj tos Vajtswv, Vajtswv txoj kev zoo kawg nkaus thiab koj yog tus me yuav sib tov xyaw ntxaws ua ke zoo kawg nkaus. Txo hwjchim, ntawm Vajtswv xub ntiag, thiab ua raws li Vajtswv lub siab nyiam. Nyob twj ywm tos. Thaum koj tos, Vajtswv yuav nyob ze thiab nthuav tawm Vajtswv tus kheej rau koj – yog tus yuav ua tiav txhua lo lus cog tseg los ntawm Vajtswv lub hwjchim uas tsis muaj nrim.

Thov kom koj lub siab yuav tsa suab hlo qhuas Vajtswv:
“Cov ua cia siab tos tus Tswv yuav tau koob hmoov”
“Kuv tus ntsujplig, cia siab rau Vajtswv tib leeg xwb”

Thov caw nrog kuv peb thov Vajtswv ua ke:
Tus Tswv uas yog Leej Txiv saum ntuj zoo kawg nkaus. Tus Tswv, thov pab kom kuv kawm tau txoj kev tos koj hauv txoj kev ntseeg, txhob ua xyem xyav lossis txhawj, tiamsis ntseeg Koj lub homphiaj zoo kawg nkaus. Thov qhia kuv paub ua siab ntev tos Koj tej lus cog tseg tau ua tiav, txawm yuav tos ntev npaum twg. Kuv thov nrog koj mus hauv txoj kev ntseeg thiab muab tag nrho kuv lub neej tso rau Koj txhais tes. Kuv thov hauv Tswv Yexus Khetos lub npe. Amees.

Cov kwv tij txhua tus, tos tsis yog ib ncua sijhawm uas mob, tiamsis yog txoj kev hlub tsis muaj nqi uas Vajtswv pub rau Vajtswv tej menyuam. Twb yog vim ua siab ntev tos yuav pab kom peb muaj kev zoo siab ntau npaug thaum saj tau txoj koob hmoov nplua mias Vajtswv pub. Txawm yog yuav muaj ntau txoj kev txomnyem, los cia siab tias koj thiab kuv yuav ntseeg siab rau Vajtswv thiab ua tiav tej lus cog tseg uas Vajtswv tau cog lus tseg lawm. Yog li nyob rau xyoo tshiab no, peb yuav tau ua siab ntev tos Vajtswv lub homphiaj zoo tau ua tiav hauv peb lub neej. Nyob rau xyoo tshiab no, Kev thov Vajtswv txhua hnub txhawb cov mloog sawv daws kom nyias muaj nyias ib phau ntawv sau, sau txog tej uas peb tos Vajtswv, tej lus cog tseg uas Vajtswv cog lus yuav pub rau peb, thiab tej uas Vajtswv twb teb lawm, nrog rau tej koob hmoov uas Vajtswv pub rau peb txhua hnub. kom peb muaj sijhawm tig rov qab mus saib txoj kev uas peb nrog tus Tswv mus nyob rau xyoo no thiab muajlus ua Vajtswv tsaug, mog phooj ywg!

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.