Koj puas yog ib tug neeg ua siab ntev? Koj puas paub tias ua siab ntev nws muaj nqis heev nyob ntawm koj txoj kev sib raug zoo nrog Vajtswv? Ua siab ntev yog ib tug cwjpwm ua neej, nthuav tawm txoj kev ntseeg thaum uas koj tos Vajtswv. Ntawd yog Vaj Ntsujplig lub txiv, pab kom peb ua ib lub neej qhuas Vajtswv dhau ntawm ib tug cwjpwm zuj zus, dhau ntawm txhua lo lus hais thiab peb txhua tes haujlwm.

Hnub no, yog hnub 20/02/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Joan Ingram dhau ntawm Zaj kawm UA SIAB NTEV KOM QHUAS VAJTSWV LUB NPE

“Rau qhov nej twb paub lawm hais tias yog nej ua siab ntev nyiaj tej kev nyuaj siab, ces tej ntawd yuav ua rau nej muab siab rau ntseeg ntxiv. Tiamsis nej yuav tsum ua siab ntev mus li tsis txhob tso tseg, nej thiaj yuav ua tau neeg zoo kawg nkaus, tsis muaj ib qho uas lwm tus yuav thuam tau.” (Yakaunpaus 1:3-4)

Zoo li cas thiaj yog ib lub neej qhuas Vajtswv? Ntawd yog thaum peb pehawm Vajtswv los ntawm tag nrho tej uas peb muaj – ntawm tus cwjpwm, kev xav txog rau peb tej haujlwm tag nrho tej no yuav tsum pib ntawm lub siab ncaj ncees.

Nyob rau tej lub sijhawm muaj kev sim siab, koj puas ua siab ntev thiab tos, npog koj txoj kev qaug zog, kev npau taws thiab kev chim cia? Twb yog los ntawm txoj kev ua siab ntev tiv ntawd, peb thiaj tiv dhau tej lub sijhawm muaj kev txomnyem, muaj kev txhawj thiab kev tsis kaj siab.

“Twb yog vim li ntawd nej cov uas ntseeg Vajtswv, nej yuav tsum muab siab rau ua tej haujlwm zoo; nej ua haujlwm zoo lawm, nej yuav tsum muaj tswvyim; nej muaj tswvyim lawm, nej yuav tsum tswj nej lub siab; nej tswj nej lub siab lawm, nej yuav tsum ua siab ntev; nej ua siab ntev lawm, nej yuav tsum ua nej lub neej kom haum Vajtswv siab; nej ua haum Vajtswv siab lawm, nej yuav tsum sib hlub li kwvtij sib hlub; nej sib hlub li kwvtij sib hlub lawm, nej yuav tsum sib hlub li cov ntseeg sib hlub” (2 Petus 1:5-7)

Thaum kuv tseem yog menyuam yaus, kuv niam pheej hais tias: “Kuv yuav tau thov Vajtswv kom Vajtswv pub rau kuv ua tau siab ntev.” Tiamsis kuv teb kuv niam tias: “Vim li cas kuv ho yuav tau thov Vajtswv pub rau yam uas kuv tsis xav?” Txhua zaug kuv niam yeej maj mam hais tias: “Ua siab ntev yog tus cwjpwm yog thaum uas peb tos!” Thaum no, kuv thiaj nkag siab kuv niam nplooj siab. Niam xav kom kuv kawm kev ua siab ntev nws tseem ceeb heev, vim nws yog tus cwjpwm nthuav tawm txoj kev txo hwjchim, mloog thiab muaj kev hlub tshua.

Hmoov tsis zoo, kuv tus cwjpwm ua tsis tau siab ntev ho “kis” mus rau kuv tus ntxhais. Muaj ib zaug kuv tus niam laus kwv tij nug kuv tias: “Ua cas thaum no saib tus mentxhais nws txawv ua luaj?” Kuv thiaj tham tias nws muaj ntsis npau taws, nyuaj siab, chim, thiab yws txog txhua yam. Nws tseem tsis txaus siab thaum tsis muaj ntawv tsav tsheb thiab tsis muaj tsheb mus nrog tej phooj ywg ua si ua ke. Kuv tus niam laus kwv tij hnov tas nws ceeb hais tias: “Dabtsi no?!”

Thaum ntawd, qhov uas nws tsis muaj ntawv tsav tsheb yog nws nyuam qhuav 14 xyoos xwb! Ntawm no yog ib qhov ua tsis taus siab ntev tsis zoo. Txawm li cas los, kuv kuj tab tom “sau” tej uas kuv “tau tseb” thaum tseem hluas. Xav txog thaum no ces zoo luag kawg nkaus, tiamsis thaum ntawd, kuv zoo li kuv ntsia pom kuv tus kheej hauv daim tsom iav.

Kuv yuav tau lees tias kawm kev ua siab ntev yeej tsis yooj yim kiag li. Kuv muaj homphiaj rau txhua yam, thiab hnov qaug zog thaum uas txhua yam tsis tshwm sim raws li yus siab xav. Tiamsis thaum ua siab ntev rau tej haujlwm me, kuv pom tias kuv tab tom xyaum ntsib tim ntsej tim muag tej kev sim siab loj dua los ntawm kev ua siab ntev. Kuv nkag siab tias tus cwjpwm thiab kuv lo lus hais thaum twg twb yuav tau qhuas Vajtswv, txawm yog nyob rau lub sijhawm uas txomnyem lossis muaj kev sim siab.

Thaum no, kuv ntshaw kom tau ua ib lub neej nthuav tawm Vajtswv tus yamntxwv – nthuav tawm kev ua siab ntev – yog Vaj Ntsujplig lub txiv. Kev ua siab ntev tsuas muaj thaum uas kuv cia Vaj Ntsujplig ua haujlwm hauv kuv lub siab. Kuv kawm tau txoj kev nrhiav Vajtswv lub siab nyiam, txais yuav Vajtswv lub sijhawm, thiab ntseeg tias Vajtswv yuav ua tiav txhua lo lus uas tau cog tseg rau kuv.
Tus qauv loj tshaj plaws txog kev ua siab ntev yog Vajtswv “Vajtswv ua siab ntev rau nej, rau qhov nws tsis xav cia ib tug twg puastsuaj mus, tiamsis nws xav kom txhua tus nyias muab nyias tej kev txhaum huv tibsi tso povtseg (2 Petus 3:9). Dhau ntawm Vaj Ntsujplig lub hwjchim, peb kuj nthuav tawm kev ua siab ntev zoo li Vajtswv tau ua pub rau sawv daws, nyob rau txhua lub caijnyoog ua neej.

Koj puas tab tom siv zog ua ib lub neej qhuas Vajtswv dhau ntawm tus cwjpwm, kev xav thiab koj tes haujlwm?

Thov caw nrog kuv peb thov Vajtswv ua ke:
Tus Tswv, kuv ua Koj tsaug rau Vaj Ntsujplig tej txiv uas Koj tau pub rau kuv. Thov pab kom kuv ua lub neej nthuav tawm txoj kev ua siab ntev dhau ntawm txhua lo lus hais thiab txhua tes haujlwm. Thov kom kuv lub neej yuav nthuav tawm Tswv Yexus tus yamntxwv, kom kuv lub neej yuav ci pom kev thiab txhawb nqa Vajtswv Koj lub npe. Kuv thov hauv Tswv Yexus Khetos lub npe. Amees.

Cov kwv tij, kev ua siab ntev tsis yog los ntawm peb tus kheej lub zog, tiamsis yog tej paj txiv thaum uas peb caw Vaj Ntsujplig ua haujlwm hauv peb lub siab. Thaum kawm tau txoj kev ua siab ntev txawm yog zoo caij thiab tsis zoo los, peb tab tom ua lub neej nthuav tawm Vajtswv tus yamntxwv thiab fij lub koob meej rau Tswv Yexus. Thov kom txoj kev ua siab ntev yuav coj koj thiab kuv hauv txoj kev uas nrog tus Tswv mus, ntseeg tias Vajtswv lub sijhawm yuav yog zoo tshaj plaws rau peb.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.