Puas tau muaj zaum twg koj nug tias Vajtswv hlub koj ntau npaum li cas? Txawm yog paub tias Vajtswv hlub yus los, nyob rau tej lub sijhawm muaj kev txomnyem lossis Vajtswv tsis tau teb yus tej lus thov koj puas ua xyem xyav rau Vajtswv txoj kev hlub. Tiamsis tseeb tiag yog Vajtswv hlub koj tsis yuav dabtsi, tsis xaiv ntsej muag, tsis hloov pauv. Vajtswv txoj kev hlub tseg rau koj nws yeej zoo kawg nkaus – qhov tseem ceeb yog koj puas ntseeg tej ntawd xwb.

Hnub no, yog hnub 12/03/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Lorie Hartshorn dhau ntawm Zaj kawm VAJTSWV HLUB KOJ NPAUM CAS?

“Ntiajteb thiaj paub hais tias koj txib kuv los thiab paub hais tias koj hlub lawv ib yam li koj hlub kuv” (Yauhas 17:23).

Kev txhawj ntshai tshwm sim txhua qhov hauv lub ntiajteb nyob ib ncig peb. Peb tsuas qhib xov xwm xwb twb pom ntau yam kwv txhawj ntshai vij puag ncig peb lawm. Kev txhawj ntshai muaj cuab kav tswj peb lub neej, siv thiab cuam tshuam ntau heev txog peb tej kev txiav txim siab. Ntau zaug, muaj ntau qhov teeb meem hais txog peb txoj kev xav kuj pib los ntawm txoj kev ntshai. Yog li yuav ua li cas thiaj yuav dim hauv tej ntawd los?

Vajluskub taw kev rau peb kom peb dim kev txhawj ntshai. 1 Yauhas 4:18 sau tias:
“Tus uas muaj kev hlub lawm tsis tas nws yuav ntshai, rau qhov txojkev hlub uas zoo kawg nkaus yuav tshem tau txojkev ntshai tawm”

Thaum uas paub tias yus tau Vajtswv hlub tshaj plaws ces kev txhawj ntshai hauv kuv zoo cuag li yaj tshis lawm. Ntawd yog qhov tseeb: Peb tau Vajtswv hlub, yog kev hlub pub dawb dawb xwb. Ntawm no yog yam muaj nqis tiag ntawm peb txhua tus, thiab kuj yog tus yaum sij tseg rau peb kov yeej txoj kev ntshai. Thaum paub tias yus tau hlub, qhov kev txhawj ntawd yuav ploj zuj zus mus.

Vajtswv hlub koj tshaj txhua tus uas lawv hlub koj. Vajtswv hlub koj ib yam li Vajtswv tus menyuam, thiab Vajtswv xav pub rau koj txhua yam uas koj cheem tsum, ib yam li Leej Txiv zoo. Tej zaug koj kuj tau nug tias: “Tsis paub Vajtswv puas hlub kuv tiag? Puas muaj zaum twg Vajtswv hlub lwm tus ntau dua li hlub kuv?” Mloog Tswv Yexus tej lus hais qhia rau koj paub txog Leej Txiv nyob hauv Yauhas 17:23:

“Ntiajteb thiaj paub hais tias koj txib kuv los thiab paub hais tias koj hlub lawv ib yam li koj hlub kuv”

Ua tib zoo mloog Tswv Yexus tej lus hais ntawm no. Koj puas pom yam uas Tswv Yexus tab tom hais ntawm no? Vaj Leej Txiv hlub koj – hlub koj ntau npaum li Vajtswv hlub Tswv Yexus! Nres ib mentsis thiab xav txog tej ntawd.

Tej zaug peb ntseeg tias Vajtswv hlub peb, tiamsis ntau zaug ho tsis nkag siab tias Vajtswv hlub peb npaum cas. Vajtswv tsis hlub tus no ntau tshaj tus tod. Peb xav tias Vajtswv hlub tus no ntau dua tus tod, lossis Vajtswv hlub Tswv Yexus ntau dua hlub peb. tiamsis qhov tseeb tiag tsis yog li ntawd.

Koj tau Vajtswv hlub tshaj plaws los ntawm ib txoj kev hlub zoo kawg nkaus, tsis xaiv leej twg ntsej muag, tsis sib piv. Vajtswv hlub koj raws li txoj kev hlub uas Vajtswv hlub Vajtswv tus tub. Tswv Yexus tsis yog tsuas yog peb tus Cawm Seej xwb, tiamsis Nws tseem zoo li yog ib tug “tij” muaj kev hlub. Nws hais txog qhov no nyob hauv Henpalis 2:11

“Yexus thiab cov neeg uas Yexus twb pub lub siab tshiab rau lawm puavleej yog tib leeg txiv yug xwb. Twb yog vim li ntawd Yexus thiaj tsis txajmuag hu hais tias lawv yog nws cov kwvtij”.

Ntawm no yog qhov khoom plig uas Tswv Yexus tseg rau peb, thaum peb muab peb txoj kev ntseeg rau ntawm Tswv Yexus. Peb tau txais los rau hauv Yexus Khetos tsev neeg, dhau los ua Tswv Yexus kwv tij thiab txais tau tag nrho tej koob hmoov uas Vajtswv ib txwm muaj nyob hauv yog Vajtswv kev hlub tsis yuav dabtsi thiab Vaj Leej Txiv txoj kev uas tsis muaj nrim.

Thov caw nrog kuv peb thov Vajtswv ua ke:
Leej Txiv saum ntuj, kuv thov fij kuv tej kev txhawj thiab ntshai hauv kuv lub siab rau koj. Thov pab kom kuv tso kuv txoj kev ntseeg rau ntawm koj, pub kom kuv muaj kev kaj siab thiab muaj lub zog tiv dhau tej kev txhawj. Kuv ntseeg tias koj txoj kev hlub tsis muaj nrim yuav rhuav tshem txhua txoj kev ntshai hauv kuv. Thov hliv kom puv nkaus kuv tus ntsujplig los ntawm koj txoj kev hlub thiab kev tshwm ntsej muag, kom kuv muaj lub siab tawv mus hauv txoj kev ntseeg, tsis ntshai lossis tsis thaub qab. Kuv thov hauv Tswv Yexus Khetos lub npe. Amees.

Cov kwv tij txhua tus, tsis paub txoj kev nshai puas tab tom muab koj khi cia? Yog tias muaj li ntawd, ntawm no yog hauv tshuaj daws tseg rau koj: Cia li txais yuav Vajtswv txoj kev hlub zoo kawg nkaus tseg rau koj. Cia li npaj qhov tseeb no puv npo rau hauv koj lub siab, ntxiv zog rau koj kom muaj lub siab tawv tso tau tej kev txhawj ntshai tseg. Xyaum Tswv Yexus tus qauv, pheeb rau ntawm Vajtswv txoj kev hlub, tas koj yuav pom tias txoj kev ntshai ntawd yuav yaj zuj zus mus.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.