Nyob hauv txoj kev nrog tus Tswv mus, peb pheej hais txog Vajtswv yog tus muaj kev hlub, siab ntev, thiab zoo siab hlo zam peb tej kev txhaum, tiamsis peb ho yooj yim hnov qab Vajtswv ib tug yamntxwv, ntawd yog ncaj ncees. Ib lo lus nug uas peb tsis tshua nug txog ntawd yog, “Tsis paub puas muaj zaum twg Vajtswv tsis xav muaj kev sib raug zoo ua ke nrog peb?”

Hnub no, yog hnub 29/04/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm Zaj kawm VAJTSWV PUAS TSO PEB TSEG?

“rau qhov cov Yixalayees tsis yog kuv haivneeg thiab kuv tsis yog lawv tus Vajtswv lawm.” (Hauxeyas 1:9)

Thaum uas tab tom npaj kev kawm Vajtswv txojlus nyob hauv phau Hauxeyas, kuv pom muaj ntau yam uas Vajtswv xav ntuas kuv. Muaj ib yam uas kuv xav txog, ntawd yog txoj kev uas Vajtswv tis npe rau tus cev lus Hauxeyas cov menyuam.

Peb tug menyuam ntawd tau tis npe hu ua, Yelexees, Lo-ru-ha-ma thiab Lo-am- mi. Peb lub npe no hais txog peb lub ntsiab lus uas Vajtswv xav hais rau Vajtswv haiv neeg. Vajtswv yuav rau txim rau cov neeg uas tsis mloog Vajtswv lus, thiab Vajtswv yuav tsis hlub lossis tsis zam txim rau lawv ntxiv lawm. Thiab qhov tshwjxeeb tau hais txog yog lub npe thib peb:

“Thaum uas Nkaumes tus ntxhais tseg taus mis lawm, nws rov suab menyuam thiab yug tau ib tug tub. Tus Tswv hais rau Hauxeyas hais tias, “Koj tis nws lub npe hu ua ‘Tsis Yog Kuv Haivneeg,’ rau qhov cov Yixalayees tsis yog kuv haivneeg thiab kuv tsis yog lawv tus Vajtswv lawm.” (Hauxeyas 1:8-9).

Vajtswv hais tias “tomqab Lo-ru-ha-mas tsis noj mis lawm, txhais tias lub sijhawm yog peb xyoos. Ntawm no yog lub sijhawm kawg uas Vajtswv tseg rau Vajtswv haiv neeg tso kev txhaum tseg, tig rov qab los lees txim thiab pehawm Vajtswv. Tiamsis lawv yeej ua siab tawv, xaiv pe mlom, vam khom rau tej tub rog nyob lwm qhov tsis vam khom Vajtswv tus uas yog lawv yawg koob tus Vajtswv tau tiv thaiv lawv thiab coj lawv ntau tiam txij thaum muaj tebchaws los. Thaum Vajtswv hais tias “Nej yuav tsis ua kuv haiv neeg, thiab kuv yuav tsis ua nej tus Vajtswv lawm”, txhais tias yog Vajtswv yog tus xub nrhiav txoj kev cog lus ua ntej, uas Vajtswv haiv neeg tau xub saib tsis tseem ceeb. Thaum kawg lawv thiaj ntsib kev puas tsuaj lawv rov qab mus ua cev qhev dua.

Tej zaug peb kuj pom tias tej no yeej tsis cuam tshuam txog yus, vim peb tab tom ua neej thiab ua Vajtswv haujlwm, peb mus pehawm txhua thiv, peb nyeem Vajluskub thiab thov Vajtswv txhua hnub, tej no yuav ua li cas tshwmsim los raug rau peb tau? Tiamsis Vajtswv txojlus ntuas peb tias:

“Tiamsis qhov uas nej tawv ncauj thiab tsis kam tso nej tej kev txhaum tseg yog nej ua kom Vajtswv chim thiab txiav txim rau nej. Hnub uas Vajtswv txiav txim ncaj ncees, nws yuav txiav txim hnyav rau nej. Rau qhov Vajtswv yuav muab nqi zog rau txhua tus raws li tes haujlwm uas nws tau ua los lawm” (Loos 2:5-6).

Peb yooj yim ntsia pom tej yam tsis zoo, tej uas lwm tus ua yuam kev, tiamsis ho tsis ntsia tej yam uas Vajtswv tsis txaus siab hauv peb tus kheej. Peb siv qhov tseeb, siv Vajluskub los txiav txim rau lwm tus, tiamsis ho hnov qab tias txoj kev txiav txim tsis yog peb li haujlwm. Peb ua neej nrog kev khav theeb ntawm sab ntsujplig vim cim civ suav tias yus twb ua neej zoo lawm, ho hnov qab txo yus lub hwjchim los nrhiav Vajtswv ua tus coj peb kev. Thiab peb kuj muaj tej lub sijhawm muaj lub siab tawv thaum ntsib tej yam yuam kev, cim civ suav tias tej ua yuam kev ntawd “tsis loj” tiamsis ho tsis ua zoo saib tias tej ntawd yuav yog “lub noob” ntawm txoj kev txhaum uas dab ntxwgnyoog tseb rau, tso rau hauv peb lub neej. Peb yooj yim khiav caum lub ntiajteb ntau zaug tsis ceev faj lossis txhob txwm los yeej hais tias yus tus kheej yuav khiav dhau txoj kev ntxeev ntxias. Muab hais, thaum peb lub siab tsis cia Vajtswv ua tus tseem ceeb tshaj lawm ces txhua yam uas peb siv zog puav leej tsis muaj nqis.

Kuj txhob hnov qab tias Vajtswv yog tus muaj kev hlub tiamsis Vajtswv kuj ncaj ncees. Nws zoo siab hlo zam peb tej kev txhaum thaum peb lees txim thiab tso tseg. Ntawm no yog lo lus cog tseg uas Vajtswv sau meej meej nyob hauv I Yauhas 1:9:

“Tiamsis yog peb lees peb tej kev txhaum rau Vajtswv, Vajtswv yog tus ncaj ncees, nws yuav ua raws li nws tau coglus tseg lawm, nws yuav zam peb tej kev txhaum thiab nws yuav ntxhuav peb tej kev txhaum huv tibsi mus”.

Yam uas Vajtswv yuam kom peb ua yog “Peb yuav tau lees peb tej kev txhaum”, txhais tias peb paub Vajtswv txoj kev, txhais tias thaum peb paub tias peb mus yuam kev ces peb yuav tau tig rov qab los. Yog peb tsis txo hwjchim los ua qhov no, ces peb kuj zoo ib yam li cov neeg Yixalayees tiam tus cev lus Hauxeyas thiab xwb, Vajtswv twb tseg sijhawm ntau tiamsis lawv yeej tsis txais yuav Nws, thaum kawg lawv thiaj raug teem txim txaus ntshai heev.

Yog li lo lus nug yuav nug tsis yog hais tias “Vajtswv puas tso peb tseg?” tiamsis yuav tsum yog hais tias “Peb puas kam tig rov qab los cuag Vajtswv?”

Cia siab tias peb yuav ceev faj, tshwj xeeb yog nyob rau lub sijhawm ntiajteb yuav kawg no, kom peb txhais ruam nrog Vajtswv mus ncaj ncees mus kom txog thaum kawg!

Thov caw nrog kuv peb thov Vajtswv ua ke:
Kuv tus Vajtswv, kuv ua Koj tsaug tau nrog nraim kuv nyob thiab tiv thaiv kuv rau txhua lub caijnyoog, txawm yog thaum uas kuv qaug zog, txav deb koj. Thov Vajtswv ntuas kom kuv ua lub neej raws li Vajtswv ua tus coj kev tsis yog raws li kuv lub siab nyiam, kom kuv tsis mus dhau ntawm Vajtswv txoj kev. Kuv thov hauv Tswv Yexus Khetos lub npe. Amees.

Cov kwv tij, yog ib tug ntseeg Vajtswv peb yuav tau ceev faj txog qhov uas paub Vajtswv lub siab nyiam thiab ncaj ncees ua raws li tej uas Vajtswv nthuav qhia rau peb. peb yuav tau nyob ze Vajtswv hauv txoj kev thov Vajtswv thiab kawm paub Vajtswv tej lus zam deb txoj kev khav theeb thiab tus cwjpwm kev txhaum. Cia li thov Vajtswv pub zog kom peb txhua tus ua siab ntev kov yeej tej kev ntxeev ntxias, kev sim siab tshwm tuaj kom peb muaj lub siab tawv ua raws li Vajtswv lub siab nyiam tau tseg rau peb.

Hnub no, puas muaj yam dabtsi hauv peb lub neej uas yuav tau nug tias “Vajtswv tab tom xav kom kuv tig rov qab los rau hauv Vajtswv txoj kev?” peb puas zoo siab hlo tso txoj kev uas peb nyiam tseg tig rov qab los rau hauv Vajtswv txoj kev? Peb yeej tseem tshuav sijhawm los txiav txim siab ua lub neej raws li Vajtswv tej lus qhia hnub no, tiamsis lub sijhawm ntawd puas tseem tshuav rau taig kis lossis tsis tshuav tsis muaj leej twg paub tau. Cia li los cuag Vajtswv hnub no, tshuaj peb lub neej ntawm Vajtswv xub ntiag, lees txim rau Vajtswv, thov Vajtswv zam txim, Vajtswv kev hlub tshua, thiab tab pov tias peb tsis yog tus neeg raug Vajtswv hais tias “Kuv tsis paub koj yog leej twg”

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.