Tơdrong arih lu bơ̆n kư̆m nhen thoi trong yak năm bơ̆n chrêu kơ đon-kư̆m đei năr phiơl hiôk thoi kơ yak năm chă ngôi, mă kư̆m đei năr trăp trĭn, gleh lap, nhen thoi yak năm tŏk tơ kơpal kông mă ưh kơ đei layơ yak truh. Dôm kơ năr thoi noh, buăl hăm đei layơ jet kơdih ayơ mă bơ̆n wă pơtrơp năm dơ̆ng, dah yak năm dơ̆ng mă huay kơ wơ̆l jrok? Rŏ lăng nơ̆r tơl kư̆m huay kơ ataih thoi kơ lu bơ̆n đei tơ chĕng, yua kơ lu bơ̆n đei Kră Yang yak năm hơdai rim trong bơ̆n yak năm.

Năr ‘nâu, ‘năr 05/05/2025 tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jeannie Waters kơ̆l ‘bai PƠM LIƠ YAK HLÔI ROK TRONG PƠMAT TAT.

Sơ̆p Hla Bơar ‘Bok Kei-Dei: “Iĕm lui boih kơ Kră Yang Yêsu Krist, iĕm athei gơnang kơ Sư, na tơdrong lui iĕm pơm kiơ̆, trŏ thoi Sư wă.” (Kôlôssê 2:6)

Jơ̆ng inh jĭ truh tơ‘maih wă ôr pơret, dui jơhngơ̆m gleh lap. Inh adrin ngôi pơdơh tơ tang dŏ ‘bơ̆t cheng trong, sơ’ngon lăng ‘bôh tơ anăp trong yak năm tŏk tơ kơpal kông. Inh đei tơchĕng: “ Sơ̆năm đơ̆ng rŏng inh adrin pơjuăt wă kơ đei jơhngơ̆m pran hloh dơ̆ng!” Buăl hăm đei layơ thoi noh ưh?

Lăm lơ kơ sơnăm, hnam dơnŏ nhôn đei juăt kơ pơm hơ-iă dêh: Hơdai băl yak jơ̆ng kơ trong ataih. Lu nhôn pơtơm blŭng a đơ̆ng trong iĕ jê̆ tơ hnam, đơ̆ng rŏng kơ noh ‘net ‘net pơlong tơ anih tơnat hloh. Đei minh ‘măng, lu nhôn yak tŏk tơ kông kơ đeh dang kơ 5 km. Mơ̆ng nhen thoi ‘bônh, mă-lei dôm kơ tŏk kơ krang pơdơ̆ng pơm kơ lu nhôn lăng nhen thoi trong kơjung dêh. Kơplah truh tơ anih pơ dơh, bơuh bơang hơ iuh ‘bĕnh kơ ao, hnam dơnŏ nhôn gô đei tơ mam apah kơ trong yak năm ‘nâu – nhen thoi wă bơwei tơdrong juăt hnam dơnŏ.

Hăm đei layơ buăl đei mơn kơ minh năr đei hlôi nhen thoi yak năm tŏk tơ kông, mă kư̆m đei năr phiơl hiôk, rơ hăo, nhen thoi yak năm chă ngôi đĕch? Inh đei hlôi mơn kơ tơdrong noh bơih. Lăm dôm kơ năr pơmat tat truh, inh đei mơn nhen thoi oei pŭ balô trăp trĭn ‘bĕnh kơ gŏch tơmo lăm noh, pơm kơ inh gleh lap truh tơ ‘maih achăng lê̆.

Lăm sơ̆p hla bơar ‘Bok Kei-Dei, chư “ yak năm” đei ngăl kơ yua tơ ‘bôh tơdrong arih rim năr lu bơ̆n, noh jơ̆ tơdrong bơ̆n arih, noh jơ̆ tơdrong lu bơngai lui kơ Kră Yang pơm. Nơ̆r Kră Yang đei tơ‘blŏk dôm lu bơngai kiơ̆ Sư athei arih thoi yơ ‘blep trŏ thoi nơ̆r ‘Bok Kei-Dei pơtho tơ‘bôh.

“Iĕm lui boih kơ Kră Yang Yêsu Krist, iĕm athei gơnang kơ Sư, na tơdrong lui iĕm pơm kiơ̆, trŏ thoi Sư wă.” (Kôlôssê 2:6)

‘Bok Pôl kư̆m krao khan wă kơ bơngai lui “Thoi noh na iĕm gơh pơm trŏ thoi Sư wă, trŏ thoi Sư lăp đon. Iĕm gô pơm dôm tơdrong ‘lơ̆ng dôm tơdrong tơpăt, rai đunh rai hlôh băt tơdrong ‘Bok Kei-Dei.” (Kôlôssê 1:10)

Lei thoi yơ wă kơ arih ‘blep trŏ thoi kơ nơ̆r ‘bok Pôl tơtă, mă kơplah chăl arih đei lơ tơdrong pơlong lăng, nhen thoi oei tŏk tơ krang pơdơ̆ng?

Mă minh, athei chơchă tơdrong pơtho tơ‘bôh đơ̆ng nơ̆r ‘Bok Kei-Dei.

Lăm trong yak năm kơdih akâu inh, inh đei mơn ‘bôh dôm kơ kơ‘bang dơhlâu tơ‘bôh kăl tơpă, sĭt kơ dôm anih mă ‘long ‘nhĕt chăt đei dơhning. Kư̆m nhen thoi noh, sơ̆p hla bơar ‘Bok Kei-Dei jơ̆ thoi kơ‘bang dơhlâu tơ‘bôh lăm tơdrong arih, tơgŭm lu bơ̆n yak năm ‘blep trŏ thoi kơ Kră Yang wă. Tơdrong hŏk pơhrăm Nơ̆r Kră Yang bơwei lu bơ̆n dơ̆ng kơjăp păng pơtho tơ‘bôh trong yak năm lu bơ̆n kơplah tơdrong pơlong lăng truh lăm trong gleh lap. Thoi kơ lăm Hơriso 119: 105 đei pơlung tơgŭm:

“Nơ̆r Ih jing ŭnh kơđeng kơ jơ̆ng inh. Nhơk pơchrang ăn kơ trong inh.”

Mă ‘bar, athei gơnang kơ Kră Yang đơ̆ng lăm nơ̆r krao khan.

‘Long jra tŏk tơ kông noh bơih sư jơ̆ dŏng tơgŭm inh dơ̆ng kơ jăp păng pơ trơp yak năm tŏk dơ̆ng mă khan jơ̆ng gleh lap bơih. Kư̆m thoi noh, tơdrong pơgơ̆p hăm Kră Yang đơ̆ng lăm nơ̆r krao khan tơgŭm lu bơ̆n kơplah pơmat păng đei tơdrong pơgăn. Tơdrong ling lang krao khan hăm Kră Yang ưh kơ sĭ tơgŭm lu bơ̆n mơn kơ đei Sư oei hơdai, mă ăn kơ bơ̆n đei hiôk hian păng hlôh wao gô tơgŭm bơ̆n đei tơdrong plơ̆ng dơ̆ng. Philip 4:6 athei lu bơ̆n:

“Iĕm ‘nĕ kơ hli, ưh kơ hli kơ minh tơdrong kiơ ôh. Mă-lei iĕm athei krao khan apinh ‘Bok Kei-Dei wei-lăng păng tơgŭm iĕm lăm tôm tơdrong păng athei băt bơnê kơ Sư ling-lang.”

Mă pêng, athei sơng iŏk nơ̆r pơlung đơ̆ng ‘nhŏng oh lăm đon lui.

Mă khan đei kơ‘bang tơhlâu tơ‘bôh trong păng ‘long jra đei tơgŭm, inh oei đei đơ̆ng hnam dơnŏ pơlung. Păng kư̆m đei, inh kư̆m yua đơ̆ng lơ bơngai chông anhăk hlôi đơ̆ng kơ dôm trong tơnat. Lu bơ̆n ngăl ưh kơ pơ̆n yua bơngai nai tơgŭm, dôm kơ lu ‘nhŏng oh lăm Kră Yang ling lang tơgŭm lu bơ̆n hăm tơdrong tơpă tơpăt đơ̆ng lăm sơ̆p hla bơar ‘Bok Kei-Dei. Lu sư tơ ‘blŏk kơ lu bơ̆n Kră Yang ling lang oei hơdai, mă khan lăm dôm năr tơnat dêh. Buăl tam đei sơng iŏk nơ̆r pơlung đơ̆ng ‘nhŏng oh lăm đon lui ưh? I Têsalônica 5:11 pơ ‘lơ̆ng đei tơ‘blŏk.
“Thoi noh tơdrong âu gô sĭt tơpă, na iĕm kư̆ adrin bơtho pơlung dih băl, kư̆m thoi iĕm adrin bơtho dih băl dang ei, wă kơ iĕm lui rai pran kơjăp.”

Mă tơdrong arih đei kơ dôm tơdrong pơmat thoi kơ tŏk tơ kông kơ jung, athei ‘blŏk lu bơ̆n huay kơ yak minh drô̆. Nơ̆r Kră Yang jơ̆ pơchrang hơ dah chông trong, nơ̆r krao khan noh jơ̆ jơhngơ̆m pran, păng ‘nhŏng oh lăm đon lui jơ̆ lu bơngai hơdai pơlung lu bơ̆n. Athei lui gơnang kơ Kră Yang păng hơdai tŏk tơ anih kơpal hloh dơ̆ng.

Apĭnh đĭ đăng krao khan hơdai:
Kơkuh kơ Kră Yang mă ‘mêm, kon bơnê kơ Ih yua kơ Ih ling lang oei hơdai rim trong yak năm. Kơ plah kon gleh lap, apinh Ih pơthim jơhngơ̆m pran wă pơtrơp yak năm dơ̆ng, păng pơchrang hơdah wă kơ kon huay kơ wơ̆l jrok. Apinh tơgŭm kon ‘blŏk kơ Ih jơ̆ jơhngơ̆m pran pôk tơ iung kơplah kon pơ̆k. Apinh pơtho tơ‘bôh kơ kon băt kơ mơ̆ng Nơ̆r Ih đơ̆ng lăm sơ̆p hla bơar ‘Bok Kei-Dei, păng tơ‘blŏk kơ kon năm chă Ih lăm kơplah rơdu tơrăn. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, năr ‘nâu trong yak năm buăl thoi yơ? Lu nhôn pơlung tơgŭm buăl athei chih dôm kơ nơ̆r ‘Bok Kei-Dei lăm ‘bai hŏk ‘nâu tơ hla bơar, na pơ klep ‘bơ̆t yơ noh wă kơ ‘bônh kơ ‘bôh. Păng truh tơ minh năr buăl ‘bôh kơdih akâu nhen thoi oei yak tŏk tơ krang kông, athei lăng noh jơ̆ trong yak năm hơdai hiôk hăm Kră Yang. Athei chơ chă Kră Yang đơ̆ng lăm Nơ̆r Sư, krao khan păng sơng iŏk tơdrong pơlung đơ̆ng bôl buăl hơdai lăm đon lui hŏ!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.