Koj puas tau muaj zaum twg txais tau ib qhov khoom plig rau ib hnub… uas tsis muaj dabtsi rau lwm tus yuav muab khoom plig pub lawm tau? Tsis yog hnub yug, tsis yog koob tsheej Tswv Yexus yug, tsis yog ib hnub nco txog dabtsi… tsuas yog ib hnub zoo li txhua hnub, tiamsis ho muaj ib tug neeg twg xav txog koj, thiab koj pom tias: “Oh, yus tau hlub!” Yog Vajtswv menyuam peb kuj tau hlub li ntawd thiab tseem zoo tshaj. Tsis yog tsuas yog tej lub caijnyoog tshwj xeeb xwb. Tiamsis yog txhua hnub. Peb nyob nraim hauv Vajtswv lub siab thiab Vajtswv txoj kev xav, tus tsim ib puas tsav yam, tus uas tau tsim lub ntiajteb no thiab peb txhua tus.

Hnub no, yog hnub 24/05/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Gene Markland dhau ntawm Zaj kawm LUB NTHAB PUV NPO KEV KAJ SIAB

Vajluskub: “Nej Leej Txiv tus nyob saum ntuj ceebtsheej paub nej cheem tsum yam dabtsi ua ntej nej thov lawm” (Mathais 6:8)

Hmoov tsis zoo, muaj ib txhia ntseeg Vajtswv lawv ris leej txiv tus duab hauv lub ntiajteb no thaum uas xav txog Vajtswv. Yog leej txiv hauv ntiajteb zoo, lawv yooj yim ntseeg tias Leej Txiv saum ntuj kuj ib yam li ntawd. Tiamsis yog yus txiv tsis zoo, pheej tsis tshwm ntsej muag, ces lub siab no kuj tsis nco qab tos, ntau zaug tseem tsis xav xav txog daim duab uas Vajtswv yog Leej Txiv.

Yam uas peb sawv daws yuav tsum tau paub, yog peb Leej Txiv saum ntuj Nws zoo kawg nkaus rau txhua feem. Nws yog leej txiv zoo tshaj.

Vajtswv nthuav qhia Vajtswv txoj kev zoo rau cov neeg Yixalayees thaum Vajtswv coj lawv tawm hauv txoj kev ua cev qhev thiab pub kom lawv muaj txaus txhua yam tom moj sab qhua. Vajtswv txojlus hais tias “Kuv yuav pub lub nroog Xi-oos muaj txhua yam nplua mias raws li uas nws xav yuav; kuv yuav muab zaub mov rau cov neeg txomnyem hauv lub nroog ntawd kom tau noj tsau npo” (Ntawv Nkauj 132:15).

Thaum Vajtswv hais rau Vajtswv cov menyuam, ntawd yog lo lus hlub, ua siab ntev, tsis yog lub suab npau taws, lossis nyaum. Nws yog tus ua siab ntev tu, zoo tshaj leej txiv hauv ntiajteb no. Vajtswv lub siab ntev tsis muaj leej twg piv tau, Vajtswv kev hlub thiab hlub tshua kuj tsis muaj nrim. Nws tsis muab pub zoo li ib tug vajntxwv nyob saum lub zwm txwv siab siab pov tej daim ncuav noj tsis tas, tiamsis Vajtswv pub nplua mias, vim Nws yog kev hlub, thiab Vajtswv paub peb cheem tsum dabtsi, ntau zaug ua ntej “peb tsis tau tawm suab taij thov” (Yaxayas 65:24).

Kuv nco thaum kuv tus ntxhais tseem yau, wb ib niam txiv pheej coj wb tus menyuam mus ncig ua si ntawm tej chaw muag khoom ua si. Ntau zaug wb tus menyuam tsis tas thov. Vim wb ib niam txiv zoo siab rau qhov uas wb tus menyuam cim civ xaiv yam khoom ua si uas nws nyiam, tas pom nws txaus siab rau tej khoom ntawd. Tej suab luag ntawd… yeej tseem khaws cia rau saum peb lub tsev me me, kuj ib yam li tej khoom ua si qub qub ntawd.

Ib qhov khoom ua si twg yog ib qhov chaw nco txog tseg cia. Txhua qhov chaw nco txog ces yog ib txoj kev zoo siab. Thiab kuv ntseeg, peb txhua tus kuj zoo li ib tug menyuam nrog yus Leej Txiv saum ntuj, kuj muaj ib qhov chaw rau khoom nco txog” zoo li ntawd. Ib qhov chaw rau puv nkaus tej kev zoo siab nrog “tej khoom” khaws cia ua kev nco txog thaum tau tu, tau Vajtswv muab pub.

Tsis ntev los no, kuv ntsib dhau ib qhov kev xav tsis thoob. Kuv cheem tsum tov ib cov tshuaj siv los ntxuav, tiamsis ho muaj tsis txaus. Kuv cov khoom los tsis tau txoj, haujlwm ho muaj ntau tos. Sawv ntxov hnub ntawd, kuv raug tsa sawv los ntawm ib lub suab nrov maj mam hauv siab: “Cia li muab koj cov tshuaj uas koj tab tom tov faib ua ob thoob kom sib npaug zos” kuv ua xyem xyav. Qhov no yeej tsis tau tshwmsim dua rau yav dhau los. tiamsis ib pliag xwb sib mos nrog txoj kev xav ntawd, kuv txiav txim siab ua li ntawd. Kuv muab cov tshuaj uas tseem tshuav, hliv rau thawj lub thoob thiab tshuav cov kuv muab hliv rau lwm lub.

Ob hnub tom qab, kuv rov qab los tov thoob ob. Thaum kuv tsaws thoob tshuaj nce, kuv ceeb tas. Nws puv nkaus. Kuv paub tias kuv yeej faib cov tshuaj no sib npaug zos. Tsis muaj leej twg kov. Tiamsis thaum no, ua cas nws ho puv nkaus npaum li yam kuv cheem tsum. Yog ib qhov txuj ci muaj nqis uas Vajtswv ua rau kuv thaum uas kuv twb tseem tsis tau thov Vajtswv li cas. Vajtswv twb pom kuv tej kev cheem tsum thiab Vajtswv ua qhov no los pab kuv, ua rau kuv luag ntxhi. Thiab kuv ntseeg tias, thaum kuv luag ntxhi, Vajtswv kuj yuav luag. Vajtswv zoo siab ua qhov no kom foom hmoov rau kuv thiab ntsia pom lub suab luag ntawm kuv lub ntsej muag. Kom kuv koom kev zoo siab nrog Vajtswv ua ke.

Qhov no ua rau kuv nco txog tus poj ntsuam nyob rau tiam Eliyas nyob, nws kuj ntsib dhau ib qhov txuj ci “Cov hmoov hauv thoob tsis tas thiab cov roj hauv hwj tsis tu” (1 Vajntxwv 17:14). Lossis rooj tshoob nyob hauv lub zos Kanas, qhov chaw uas Tswv Yexus muab dej txia ua cawv qab (Yauhas 2:7-10). Yog Vajtswv, tus uas thaum ub ua txujci, hnub no nws yeej tseem tsis tau hloov pauv. Nws yeej tseem pub rau peb, tsis yog tej yam uas peb cheem tsum xwb, txawm yog tej uas xav tsis thoob me me tib si, kom txaus rau peb qw zoo siab nrho nrooj nrog tej kev khwv hauv lub neej.

Koj puas tau muaj zaum twg xav txog ib ceg nthab, tsis yog muaj ntau yam khoom khaws tseg paug tshauv to, tiamsis yog ib qhov chaw ntis tej kev nco txog zoo txog kev hlub, txog txhua zaug uas Vajtswv, Leej Txiv saum ntuj tau ua twjywm foom hmoov rau peb txhua tus, kom ntsia pom Vajtswv tej menyuam lub suab luag?

Tej zaug hnub no koj tab tom qaug zos, Vajtswv txojlus hnub no ntuas peb tias “Nej Leej Txiv tus nyob saum ntuj ceebtsheej paub nej cheem tsum yam dabtsi ua ntej nej thov lawm” (Mathais 6:8). Nws ntsia pom koj, nws hlub koj, thiab nws yeej tseem pub rau koj, tej yam uas me tshaj, kom koj tau khaws cia rau koj qhov chaw cia koob hmoov ntawd, koj muaj kev zoo siab nrog Vajtswv mus phwj yaws.

Thov caw nrog kuv peb thov Vajtswv ua ke

Kuv tus Vajtswv uas muaj kev hlub, kuv ua Koj tsaug los ntawm Koj txoj kev hlub kuv uas tsis hloov pauv. Koj txoj kev hlub tsis yog vim kuv kev siv zog, tiamsis yog los ntawm koj txoj kev ua siab ntev, koj txoj kev zoo thiab txoj kev hlub puv npo hauv kuv. Thov pab kom kuv nkag siab koj txoj kev hlub thaum muaj kev sib raug zoo ua ke nrog koj, qhov chaw uas kuv hu Vajtswv ua kuv leej txiv, thiab kuv yog koj tus menyuam. Kuv ua Vajtswv koj tsaug rau koj txoj kev tu kuv, tiv thaiv thiab pab kuv. Ua Leej Txiv tsaug vim kuv muaj ib leej txiv zoo nyob ntawm kuv ib sab, thiab zoo rau kuv. Thov Vajtswv rub kuv los ze koj, paub koj ntau dua, hlub koj ntau dua. Thov kom Vajtswv siv kuv lub neej los pab lwm tus kuj saj tau koj txoj kev hlub thaum tau ua koj menyuam. Kuv thov hauv Tswv Yexus Khetos lub npe. Amees.

Cov kwv tij txhua tus, Vajtswv txojlus hnub no caw peb txhua tus los mus nyob ze Vajtswv hauv txoj kev sib raug zoo ua ke, thaum yog txoj kev sib raug zoo yog txiv thiab menyuam puv npo kev qab zib. Tej zaug nyob hauv lub neej no, koj tsis muaj ib leej txiv zoo hauv ntiajteb los, Vajtswv zoo siab hlo ua koj leej txiv zoo pub rau koj. Yog li, txhob txaj muag mus nyob ze Vajtswv, koj yuav pom nws nyob ze koj. Cia siab tias hnub no yuav yog ib hnub koj saj tau Leej txiv saum ntuj txoj kev hlub thiab kev zoo!

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.