Lu bơ̆n ‘nao hlôi ‘blŏk kơ phĕt Kră Yang Yêsu tŏk tơ plĕnh. Sư đei ăn mĭnh nơ̆r tơtă tih. Lu bơ̆n hăm rơhing wă kơ gơh băt hơđăl nơ̆r tơtă đơ̆ng Kră Yang ‘măn ăn kơ lu bơ̆n ưh? Păng ayơ jơ̆ tơdrong wă kơ lu bơ̆n adrin druh kiơ̆ nơ̆r tơtă ‘noh? Kơplah dơ̆ng ‘bơ̆t anăp trong gơwĕch tih đơ̆ng tơdrong arih, lu bơ̆n ngăl chơ chă mĭnh nơ̆r tơl hơđăl, mĭnh tơdrong proh hơmet hơđăl Kră Yang ăn. Mă lei tŏk bŏk kơplah kơnhăm tơchĕng tơtăm gah tơ anăp ning mônh oei bơbul, hơbŏ lu bơ̆n đei pơrơ̆ng hiơt kơ nơ̆r tơtă mă Sư oei ling lang krao đơ̆ng blŭng a- tơdrong nhen thoi hmă đĕch, mă lei gĭt kăl hloh: ‘mêm kơ Kră Yang păng ‘mêm kơ bơngai. Kơplah wei răk khôi juăt ‘noh, lu bơ̆n gô gơh oei lăm Sư, păng Sư gô chông anhăk rim yak lu bơ̆n năm.

Năr ‘nâu, ‘năr 30/05/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Benjamin Brittain kơ̆l ‘bai OEI LĂM KRĂ YANG.

Sơ̆p Hla Bơar ‘Bok Kei-Dei: “Bơngai bu răk dôm tơdrong ‘Bok Kei-Dei pơkă, bơngai ‘noh sư pôm đon păng ‘Bok Kei-Dei păng ‘Bok Kei-Dei gô oei lăm sư. Păng bơ̆n băt kơ ‘Bok Kei-Dei oei lăm bơ̆n yua kơ Yang Bơhngol ‘Lơ̆ng đơ̆ng Sư ăn kơ bơ̆n.” (I Yôhan 3:24)

Buăl hăm đei layơ jet kơdih ayơ jơ̆ tơdrong proh hơmet đơ̆ng ‘Bok Kei-Dei ăn kơ chăl arih bơ̆n ưh? Inh lei đei- hloh ‘noh bơih lăm dôm lu khei năr oei hơoei kơpal tang dŏ lăm hnam trưng. Inh đei ‘măn lơ jơ năr wă tơchĕng tơtăm kơ tơnăp ning mônh: wă hŏk tơdrong jang kiơ, rơih tơdrong jang thoi yơ, păng ayơ bơih “nơ̆r krao” gĭt kăl mă ‘Bok Kei-Dei ‘măn ăn kơ inh?

Dĭng truh tơ mĭnh năr ‘nei, kơplah oei đŏk Nơ̆r Kră Yang lăm sơ̆p hla ar I Yôhan, inh nhen thoi đei “pơchrang hơdah” kơplah tơ ‘bơ̆p kơ chăl ‘nâu:

“Tơdrong Sư wă kơ bơ̆n răk thoi âu: Bơ̆n athei lui kơ Kon Sư Yêsu Krist păng ‘mêm mơnat dih băl tơduă bơ̆n, kư̆m thoi Yêsu pơkă kơ bơ̆n sơ̆. Bơngai bu răk dôm tơdrong ‘Bok Kei-Dei pơkă, bơngai ‘noh sư pôm đon păng ‘Bok Kei-Dei păng ‘Bok Kei-Dei gô oei lăm sư. Păng bơ̆n băt kơ ‘Bok Kei-Dei oei lăm bơ̆n yua kơ Yang Bơhngol ‘Lơ̆ng đơ̆ng Sư ăn kơ bơ̆n.” ( I Yôhan 3:23-24)

Inh thar băt kơnăl khan kơdih đei kơnhăm dêh năm chơ chă tơdrong pơtho kơ rim tơdrong iĕ lăm tơdrong arih, mah truh kơ hiơt kơ tơdrong tơm mă Kră Yang oei ling lang krao đơ̆ng blŭng a. Khôi juăt tih đơ̆ng Sư ‘noh bơih: ‘mêm kơ Kră Yang păng ‘mêm kơ bơngai jum dăr. Tă kơ, dôm tơdrong ưh kơ đei tơnat thoi inh đei tơchĕng. Kơplah đei tơ‘blŏk gah tơdrong sĭt ‘noh, inh hlôh khan rim năr inh arih tơ lăm teh đak kăl kơ đei chông anhăk hăm tơdrong ‘mêm mơnat- ăn kơ Kră Yang păng ăn kơ dôm lu bơngai jum dăr bơ̆n. Tơplih kơ nŏng kơ nhăm tơchĕng tơtăm gah “nơ̆r tơtă gĭt kăl” đơ̆ng tơdrong arih, inh kăl kơ kơnhăm lăm inh kơ jơnăr iĕ mă Kră Yang oei dan ‘bơ̆t anăp inh, wă tơ‘bôh tơdrong ‘mêm mơnat ‘noh.

Tơdah lu bơ̆n chu kiơ̆ khôi juăt đơ̆ng Kră Yang Yêsu- ‘mêm kơ ‘Bok Kei-Dei păng ‘mêm kơ bơngai kiơ̆ hăm mĭnh tơdrong tôm mah- lei Sư gô pơtho rim yak năm kơ lu bơ̆n rim năr.

Thoi noh ‘mêm kơ Kră Yang păng ‘mêm kơ bơngai đei tơdrong tơm ‘noh kiơ? I Yôhan 3:18 chih: “Ơ lu kon hơ’lơ̆p, tơdrong ‘mêm mơnat dih băl, bơ̆n ưh kơ wă ‘bơ̆r bơ̆n đĕch ôh mơnat. Bơ̆n athei ‘mêm mơnat dih băl păng jơhngơ̆m đon bơ̆n tơpă păng tơdŏng băl tơdrong jang.” ‘Mêm mơnat ưh kơ sĭ lăp mơn lăm jơhngơ̆m dah nơ̆r pơma- ‘mêm mơnat kăl kơ tơ‘bôh hăm tơdrong jang hơđăl.

Adrol kơ ‘noh, ‘bok Yôhan kŭm pơma khan: “Bơngai bu mơdrŏng ‘bôh ‘nhŏng oh sư dơnuh hin sơmă ưh kơ mơnat ăn tơmam kiơ kơ ‘nhŏng oh sư, dah ưh kơ tơdŏng dih băl tơdrong jang, noh thoi yơ khan sư ‘mêm kơ ‘Bok Kei-Dei lĕ?” (I Yôhan 3:17) Tơdah lu bơ̆n băt kơ mĭnh ‘nu ‘nhŏng oh oei kơ‘bah, na tơdrong ‘mêm mơnat tơpă ưh kơ sĭ lăp dơ̆ng ‘bơ̆t tơdrong băt mơnat, mă kăl kơ tơ‘bôh hăm tơdrong pơm tơ‘bôh hơđăl, tơpă. Kơplah bơ̆jang tơdrong jang lăm teh đak, Kră Yang Yêsu lăng ‘bôh dôm lu tơdrong kăl yua gah akâu jăn, Sư đei dŏng tơgŭm gah tơdrong kăl wă ‘noh, na ră roi Tơdrong ‘Nao ‘Lơ̆ng gah kơdih Sư- ‘nâu bơih mĭnh rup ‘lơ̆ng kơ tơdrong wih wăn lăm tơdrong arih kơdih kâu đơ̆ng lu bơ̆n.

‘Mêm kơ Kră Yang păng ‘mêm kơ bơngai ‘noh bơih tơdrong tơ‘bôh tơdrong pơgơ̆p tơ‘bưh đơ̆ng lu bơ̆n hăm ‘Bok Dŏng Pơklaih Yang Yêsu. Nhen nơ̆r lăm Sơ̆p Hla Bơar ‘Bok Kei-Dei pơkă khan: “Bơngai bu răk dôm tơdrong ‘Bok Kei-Dei pơkă, bơngai ‘noh sư pôm đon păng ‘Bok Kei-Dei păng ‘Bok Kei-Dei gô oei lăm sư.” Păng tơdrong oei hơdai đơ̆ng Yang Bơhngol ‘Lơ̆ng lăm lu bơ̆n ‘noh bơih tơdrong tơ‘bôh rơđah hloh kơ tơdrong ‘nâu.

“Oei lăm Sư” ưh kơ trŏ ‘noh tơdrong pơmơ̆ng, mă ‘noh bơih mĭnh tơdrong pơdrơ̆ng pơrơ̆ng, athei kăl kơ tơdrong pơjing, jơnăr, păng adrin wă kơ arih hơdai hăm ‘Bok Dŏng Pơklaih Yang Yêsu rim năr. Thoi noh na, hơpơi kơ rim ‘nu lu bơ̆n gô đei pơlung păng pơtrŭt wă ‘măn jơnăr oei lăm tơdrong oei hơdai đơ̆ng Kră Yang, pơjing lăm tơdrong pơgơ̆p hăm Sư- wă kơ rim jơhngơ̆m lu bơ̆n đei tơplih ‘nao rim năr, wă kơ bơ̆n gơh đei ‘mêm kơ Kră Yang păng ‘mêm kơ bơngai jrŭ să hloh dơ̆ng. Hơpơi kơ dôm tơdrong lu bơ̆n bơ̆jang đei ư-ang ăn kơ Kră Yang, wă kơ anăn Sư đei đĭ đăng kon bơngai băt- đơ̆ng dôm lu bơngai jum dăr lu bơ̆n truh tơ đĭ đăng khŭl bơngai jơ̆p kơ teh đak! Thoi nơ̆r tơtă Kră Yang Yêsu đei pơjao: “Thoi noh năm bĕ lu iĕm, bơtho kơ đĭ-đăng lu khŭl bơngai jơ̆p kơ teh đak, athei lu sư lui kiơ̆ kơ Inh.” (Mathiơ 28:19)

Apĭnh đĭ đăng krao khan hơdai:
Kơkuh kơ Kră Yang ‘mêm, bơnê kơ Kră Yang gah tơdrong ‘mêm tơdrong mơnat păng tơdrong dŏng pơklaih đơ̆ng Ih. Kră Yang ơi, apĭnh tơgŭm kon arih hăm nơ̆r tơtă Ih đei pơjao, păng druh kiơ̆ nơ̆r tơtă ‘noh hăm jơhngơ̆m ‘mêm kơ Kră Yang păng ‘mêm kơ bơngai thoi Nơ̆r Ih pơtho. Apĭnh Yang Bơhngol ‘Lơ̆ng ‘bĕnh blai jơhngơ̆m kon mơsêh mơyang păng tơdrong ‘mêm mơnat đơ̆ng Ih, wă chông anhăk kon arih tơ ‘bôh tơdrong ‘mêm mơnat tơpă- ưh kơ sĭ lăp hăm nơ̆r pơma, mă hăm tơdrong pơm tơ’bôh tơpă, ră roi anăn Kră Yang kơ đĭ đăng bơngai. Apĭnh Kră Yang tơgŭm kon ling lang oei lăm Ih, hơdai kơjăp hăm Ih păng ‘mêm kơ Ih ling lang. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, hăm đei layơ buăl kơnhăm kơ druh kiơ̆ “nơ̆r tơtă gĭt kăl” yua kơ đơ̆ng kơdih tơchĕng truh kơ mah hiơt kơ nơ̆r tơtă Kră Yang pơjao, păng tơm kăl đơ̆ng nơ̆r tơtă ‘noh ưh? Tơdrong gĭt kăl hloh lăm tơdrong proh hơmet tih hloh đơ̆ng Kră Yang, tơdrong dŏng pơklaih păng tơdrong ‘mêm mơnat đơ̆ng Yang Yêsu hăm dôm lu bơngai hiong răm oei đei tuh ro, hăm đei pơtrŭt jơhngơ̆m buăl ưh? Năr ‘nâu, buăl gô pơm kiơ wă wơ̆t brŏk hăm tơdrong tơm kăl hloh mă Kră Yang ling lang oei krao: jơ̆ tơdrong ‘mêm kơ Kră Yang păng ‘mêm kơ bơngai, jơ̆ arih hăm nơ̆r tơtă Kră Yang pơjao, jơ̆ yak năm păng pơm kơ khŭl bơngai jing lui kiơ̆ kơ Kră Yang? Băt kiơ, trŏ đơ̆ng dôm lu tơdrong pơm tơ ‘bôh ‘mêm mơnat hmă đĕch hloh năr ‘nâu, Kră Yang gô chông anhăk buăl mơ̆t lăm mĭnh trong yak năm tih hloh kơ dôm tơdrong tơchĕng đơ̆ng buăl ăn kơ dêh char đơ̆ng Sư pơgơ̆r.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.