Hơ’lơ̆p ngăl đei hli tơrơ tơpă thoi kơ hli kơ măng mu, hli kơ hơdrông, hli kơ lu kon sem bri kiơ̆ kơ thoi tơ chĕng pơwao… Mă ưh kơ hơdrô̆ hơ’lơ̆p đĕch đei hli tơrơ, bơngai ‘lŏ lu bơ̆n kư̆m đei pơm kơ jơhngơ̆m ưh kơ hơđơ̆ng, thoi kơ: tơdrong hiong răm, sơ‘ngon, tơtok tơtăm, dah tơ anăp ưh kơ băt wă pơm thoi yơ. Mă lei, kơplah hơ’lơ̆p đei dan nơ̆r jet: “ Dôm tơdrong trŏ kơ hli gô thoi yơ kơplah tơ’bơ̆p Kră Yang?”, rŏ lăng lu bơ̆n kư̆m athei jet kơdih akâu tơdrong noh. Nơ̆r jet ưh kơ sĭ ăn kơ hơ‘lơ̆p jơhngơ̆m hơđơ̆ng đĕch, mă kư̆m ăn tơdrong hiôk hian tơpă ăn kơ lu bơ̆n, dôm kơ lu bơngai oei yak năm tŏk bŏk ‘bĕnh kơ tơdrong tơplih.

Năr ‘nâu, ‘năr 05/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Mary Holloman kơ̆l ‘bai BUĂL ĐEI TƠDRONG HLI TƠRƠ?

Sơ̆p Hla Bơar ‘Bok Kei-Dei: “Bơngai bu ‘mêm kơ ‘Bok Kei-Dei tơpă, bơngai ‘noh huay kơ hli kơ ‘Bok Kei-Dei ôh.” (I Yôhan 4:18a)

“ Kon hli kơ wai!” Kon drŏ ‘nglo 4 sơnăm inh đei pơma khan, măt oei pơklep tơmam pơm ngôi tơti. Nơ̆r pơma nhen thoi đei pơm glăi hăm tơdrong noh.
Inh kŭm ưh đei ‘bôh hlĭch. Đei jơnăr kơjung, kon inh ngăl đei kơ hơpo hli tơrơ kơ wai dŭng, tơdrong hơpo mă khan bơngai ‘lŏ kư̆m ‘bôh ưh kĕ chơ̆n.

“Huay kơ đei kiơ, kon a!” inh đei tơl, “ Mĕ kư̆m ‘bôh wai dai hli tơrơ khăn. Bu bu kư̆m đei tơdrong kiơ noh pơm kơ bơ̆n hli tơrơ. ‘Ngoaih kơ bơngai phara kơ bơ̆n. ‘Ngoaih kơ minh ‘nu bơngai ưh kơ đei hli tơrơ kơ tơdrong kiơ, kon hăm băt kơngai bu noh ưh?” inh pơ’lơ̆ng jet kon inh.

Kon inh đei hiôk hloi, đei nơ̆r juăt kơ jet pơm kơ kon inh ‘maih wă tơl: “ Ŏ, noh jơ̆ ‘Bok Kei-Dei!”

Nă măt kon inh dui hơ’nhĕo na sư tơchĕng. “ Lei … kơplah dôm tơdrong hli tơ’bơ̆p Kră Yang, lu sư gô pơm thoi yơ?”

Inh đei tơtĕp măt, jơhngơ̆m tơchĕng: “truh tơ layơ kon inh đei jet dôm kơ nơ̆r ‘bônh biơ̆ kơ ‘nâu?”

Inh đei tơchĕng pơwao tơ anih đei krao jơ̆ “Tơpôl hli tơrơ”, anih pơpôi đĭ đăng tơdrong pơm kơ hơ’lơ̆p hli tơrơ, thoi kơ: wai, bơngai hlĭch … dôm tơdrong pơm kơ hơ’lơ̆p ôr ‘nhơ̆m lăm kơmăng dah kơdâu ôn yua kơ ưh kơ hơđơ̆ng. Na inh tơchĕng ‘bôh lu sư găng tơtơ̆, kŭp kơ̆l bơ̆t anăp ‘Bok Kei-Dei ‘lơ̆ng rơgoh păng mơsêh mơyang.

Inh đei pơma dơnuh hăm kon drŏ ‘nglo inh thoi âu, dôm tơdrong ‘Bok Kei-Dei pơjing athei chu yom Sư ngăl, mă khan wai tih hloh păng hli dêh kư̆m ưh kơ gơh pơtŏ pơting hăm tơdrong mơsêh mơyang Kră Yang.

“Păng tơdrong hiôk hơ-iă hloh,” inh pơma pơthim dơ̆ng, “tơdah bơ̆n băt kơ Kră Yang, sơ̆p hla bơar ‘Bok Kei-Dei đei pơma lu bơ̆n ưh kơ kăl kơ hli tơrơ kơ Sư. Yua kơ Sư dơ̆ng gah lu bơ̆n, Sư bơwei păng tơblah tơplih ăn kơ lu bơ̆n.”

Kon inh mơ̆ng inh pơma, tơchĕng pơwao na drơ̆ng: “ Ô … hơ-iă dêh” Na sư chơt hiôk wih rŏng pơm ngôi hăm tơmam pơm ngôi sư dơ̆ng.

Gah inh ưh pă pơdơh tơchĕng kơ nơ̆r jet noh:
“Dôm tơdrong hli gô pơm thoi yơ kơplah tơ’bơ̆p Kră Yang?”

Inh kư̆m rŏ lăng “Tơpôl hli tơrơ”. Wai hăm ‘bih kơkuăl băl lăm mum măng mu. Sem bri ôn kơdih sư tơlăm kơmăng, gô pơ’lơ̆ng tơhli. Hơmơ̆l găm wă tơbăt kơ ‘mi gô đei grơ̆m wă jê̆, na bơngai hlĭch nơnăm hăm tơdrong pă đei chang hơmĕng kiơ.

Na inh đei jet kơdih, tơdrong kiơ pơm ăn kơ inh hli tơrơ?

Dôm tơdrong tơ’bôh ‘bơ̆t anăp inh pă minh ‘măng dơ̆ng. Kơplah ‘nâu ưh pă wai dah ‘bih, tơplih kơ ‘noh hli kơ kon inh hiong. ‘Bơ̆t anih sem bri juăt kơ gơ’nơp, dang ei tơdrong tơtok tơtăm ăn kơ tơdrong arih tơ anăp pă băt pơm liơ. Anih ‘bĕnh kơ tơdrong kơnê̆ păng ưh pă đei pơma kiơ, nhen thoi ket kơtĭt hơyuh kial păng hơdah lăm jơhngơ̆m inh.

“Dôm tơdrong hli tơrơ gô pơm kiơ kơplah tơ’bơ̆p Kră Yang?”

Nơ̆r tơl ăn kơ kon drŏ ‘nglo inh hăm ăn tôm kơ kơdih akâu inh kơplah jơ ‘nâu ưh?
‘Bok Pôl lăm Rôm chăl 8 đei pơma khan thoi âu:

“Na lei, tơdah ‘Bok Kei-Dei ‘mêm kơ lu bơ̆n, na bơ̆n ưh pă hli kơ tơdrong kiơ dơ̆ng? hăm đei bu wă sơlah lu bơ̆n đơ̆ng tơdrong ‘mêm Yang Yêsu Krist? Hăm trŏ kơ pơmat tat, mă đe rôp bơ̆n, pơngot rơwĕt, dơnuh hin, tơdrong hli dah đe blah bơ̆n ưh?… Na dang ei inh băt tơpă boih, mă đei tơdrong kiơ kiơ truh kơ bơ̆n, ‘Bok Kei-Dei Sư oei ‘mêm kơ bơ̆n hơnơ̆ng đĕch, yua kơ bơ̆n băt kơ Kră Yang bơ̆n Yêsu Krist ‘mêm kơ bơ̆n tơgŭm bơ̆n lăm tôm tơdrong. Mă bơ̆n lôch, mă bơ̆n oei arih, ‘Bok Kei-Dei Sư ‘mêm kơ bơ̆n ling-lang tơpă. Na mă linh jang, mă yang kơnê̆, mă yang kiơ wă tơgar iŏk bơ̆n đơ̆ng ‘Bok Kei-Dei ‘mêm kơ bơ̆n ưh kơ kĕ ôh. Mă tơdrong truh kơ bơ̆n kơnh pơgê, dah layơ Sư ưh kơ lê̆ ôh, Sư wei-lăng lu bơ̆n tơpă. Mă ‘bok kiơ tơ kơpal plĕnh, dah tơ ala teh âu, mă hăm tơdrong kiơ kiơ wă pơrơ̆ng tơgar iŏk bơ̆n đơ̆ng tơdrong ‘Bok Kei-Dei ‘mêm, lu noh ưh kơ kĕ ‘mơ̆i.” (Rôm 8:31-39)

Rim ‘nu lu bơ̆n đei tơdrong kiơ kiơ noh pơm kơ bơ̆n hli tơrơ. Mă lei tơdah inh oei lăm Yang Yêsu Krist, dôm tơdrong hli noh ưh kơ gơh pơm kơ inh. Yua kơ bơhngol inh păng tơdrong arih inh đei pơsĭt hăm pham Yang Yêsu bơih. Pă đei hiong răm, pă đei tơtok tơtăm, pă đei sơ’ngon, pă đei oei hơdrô̆, na trŏ bơih kư̆m pă đei “kon wai” bơih, mă khan sơlah inh đơ̆ng tơdrong ‘mêm Yang Yêsu Krist.

“Dôm tơdrong hli tơrơ gô pơm kiơ kơplah lu sư tơ’bơ̆p Kră Yang?”

Lu sư gô sơtơ̆p kŭl tăng ‘bơ̆t anăp ‘Bă inh tih hloh tơ kơpal Plĕnh Ti.

Păng nhen thoi nơ̆r hơ’lơ̆p wă jê̆ puăn sơnăm đei ôr pơma: “Tơdrong ‘noh hiôk hơ iă dêh”

Apĭnh đĭ đăng krao khan hơdai:
Kơkuh kơ Kră Yang mă ‘mêm, kon bơnê kơ Kră Yang yua kơ Ih ling oei hơdai kon. Kon bơnê kơ Kră Yang yua kơ pă đei kiơ sơlah lê̆ kon đơ̆ng tơdrong ‘mêm mơnat Kră Yang. Jơ ‘nâu, apinh Kră Yang hŭt lê̆ dôm tơdrong hiơ̆k bơngơ̆t păng hli tơrơ đơ̆ng lăm kon. Kră Yang ơi, apinh Ih ăn kơ kon đei jơhngơ̆m hiôk hian păng chơt hiôk yua kơ băt kơ ling lang Ih oei hơdai kon. Tơdah kon oei lăm Ih, kon băt kon pă đei hli tơrơ bơih, yua kơ dôm tơdrong Ih pơgơ̆r ngăl bơih. Kon bơnê kơ Kră Yang yua kơ đei tơdrong ‘mêm mơnat Ih ling lang oei hăm kon! Kon krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, buăl athei pơwao kơ “Tơpôl” dôm kơ hli tơrơ dah hiơ̆k bơngơ̆t đơ̆ng bơ̆n lăm jơ ‘nâu. Truh tơ jơ lu bơ̆n athei krao anăn dah roi tơ’bôh gah lu sư wă kơ tơlĕch lu sư đơ̆ng lăm jơhngơ̆m bơ̆n. Năr ‘nâu, kơplah tơdrong hli oei chơchă wă mơ̆t lăm jơhngơ̆m buăl, athei ‘blŏk thoi âu, dôm tơdong hli tơrơ noh gô kŭp kơ̆l ‘bơ̆t anăp Tơ’ngla Pơjing. Buăl oei gah Kră Yang, đei krôp gom hăm tơdrong ‘mêm mơnat Sư. Athei arih hăm đon lui mă pran, lui ngeh pă đei tơdrong kiơ, mă tơdrong hli tơrơ sơlah lu bơ̆n đơ̆ng Kră Yang. Păng tơdah lu bơ̆n oei bơwei pơtho tơ’bôh kơ kon hơ’lơ̆p, dah đei kon hơ’lơ̆p jum dăr kơ bơ̆n athei tơgŭm lu sư hlôh băt thoi âu: ‘Bok Kei-Dei jơ̆ mơsêh mơyang păng ling lang dơ̆ng gah lu bơ̆n, Sư bơih tơm kơ tơgŭm lu bơ̆n kĕ jĕi đơ̆ng dôm tơdrong hli tơrơ.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.