Kơplah Yang Yêsu tŏk tơ plĕnh, Kră Yang ưh kơ ăn dôm lu bơngai kiơ̆ Sư minh drô̆. Sư ăn Yang Bơhngol ‘Lơ̆ng wă kơ pơtho tơ’bôh păng chông anhăk lu bơ̆n lăm tôm tơdrong. Yang Bơhngol ‘Lơ̆ng bơ̆jang lăm rim ‘nu phara băl. Sư rŏ lăng kư̆m đơ̆ng lăm nơ̆r ‘Bok Kei-Dei juăt kơ kơtơ̆ng, đơ̆ng lăm rup chrêu ‘bôh, dah minh nơ̆r bu bu noh pơma ‘bơm. Kơplah mơ̆ng lăm jơhngơ̆m bơ̆n, lu bơ̆n gô mơn ‘bôh: Kră Yang oei pơma khan păng chông anhăk lu bơ̆n rim năr.

Năr ‘nâu, ‘năr 09/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Marsha Brickhouse kơ̆l ‘bai TƠPLIH JING ANAO JƠHNGƠ̆M ĐON LĂM YANG YÊSU KRIST.

Sơ̆p Hla Bơar ‘Bok Kei-Dei: “ ‘Bok Dŏng iĕm ei, anăn Sư Yang Bơhngol ‘Lơ̆ng, Sư ‘noh ‘Bă Inh wă wơh Sư jur oei păng iĕm jang tang Inh. Sư gô bơtho iĕm tôm tơdrong păng Sư gô tơ’blŏk ăn kơ iĕm tôm tơdrong mă Inh bơtho iĕm boih.” (Yôhan 14:26)

Tam đei layơ buăl đei mơn thoi kơ Kră Yang “blư” tơ’blŏk minh nơ̆r ‘Bok Kei-Dei ayơ noh wă pơtho tơ’bôh kơ buăl ưh? Nhen thoi Sư yua dôm tơdrong wă kơ buăl kơ nhăm tơ nơ̆r noh – buăl đei kơ tơ̆ng nơ̆r hơri ư-ang kơ ‘Bok Kei-Dei, đơ̆ng ‘bai pơtho lăm Hnam Akŭm, đơ̆ng lăm facebook, youtube dah bơngai bu bu noh đei pơma ‘bơm. Kră Yang lu bơ̆n jơ̆ Kră Yang pơjing tôm tơmam, păng Kră Yang gơh pơm wă kơ buăl mơn Sư oei pơma khan kơ buăl!

Kơdih inh đêl đei hlôi mơn lơ wơ̆t thoi noh, kơplah Kră Yang tơ’blŏk lơ wơ̆t mă minh nơ̆r ‘Bok Kei-Dei hăm inh, nhen wă athei inh thoi âu: “ thei kơnhăm lăm tơdrong trŏ tơpă ‘nâu.”

“Inh wă tơklah đơ̆ng iĕm na Inh ăn kơ iĕm jơhngơ̆m hiôk. Jơhngơ̆m Inh hiôk dang yơ, Inh ăn kơ iĕm hiôk dang noh mơ̆n. Inh ăn kơ iĕm hiôk ưh kơ thoi lu bơngai ala teh ăn kơ iĕm hiôk ôh. Iĕm ‘nĕ sơ’ngon păng ‘nĕ kơ hli.” (Yôhan 14:27)

Inh blŏk kơ đei jơnăr đei hiơ̆k bơngơ̆t, đei lơ tơdrong pŭ iŏk păng trăp trĭn, Kră Yang wă kơ tơ‘blŏk kơ inh ‘nĕ kơ ăn jơhngơ̆m đon tơchĕng inh ưh pă băt pơm thoi yơ. ‘Ngoaih kơ thĕng hreh hăm Kră Yang, nơ̆r ‘Bok Kei-Dei ‘nâu đei ‘bôh rim kơ anih. Đei minh pơge noh tơ trong năm jang, inh đei năm đơ̆ng rŏng kơ gre tih đei pơklep chư “Gre hiôk hian” – ưh kơ thoi noh đĕch na đei pơklep ‘bar tŏ sem kơtơp, rup pơtih kơ Yang Bơhngol ‘Lơ̆ng tăm dơ̆ng! Kơplah noh inh băt hơđăl Kră Yang oei tơ’blŏk kơ inh. Trong inh năm jang wă đei minh jơ, tôm kơ jơ inh pơwao kơ nơ̆r noh.

Wơ̆ ‘lŏ lăm Khŭl Bơngai Lui, inh băt kơ Yang Bơhngol ‘Lơ̆ng ăn tơdrong mơsêh păng pơlung. Mă lei ưh đei layơ inh kư̆m ‘blŏk khan Sư noh jơ̆ ‘Bok Pơtho Tơ’bôh – Sư tơgŭm lu bơ̆n hlôh dôm tơdrong trŏ tơpă păng tơ’blŏk dôm kơ nơ̆r ‘Bok Kei-Dei đei pơma khan. Yang Bơnhngol ‘Lơ̆ng bơih tơm kơ tơ plih jơhngơ̆m đon tơchĕng lu bơ̆n, tơgŭm lu bơ̆n hlôh nơ̆r ‘Bok Kei-Dei jrŭ hloh ( lăng lăm Rôm 12:1-2)

Inh băt bơnê tơpă yua kơ Yang Yêsu đei ăn Yang Bơhngol ‘Lơ̆ng adrin wă pơtho tơ’bôh kơ lu bơ̆n. Pơtơm tơdrong tih lăm chăl arih inh kơplah Yang Bơhngol ‘Lơ̆ng pơih măt inh, wă kơ hlôh bơ̆n đei krao ‘lơ̆ng tơpăt noh yua kơ đơ̆ng Yang Yêsu Krist păng inh ưh kơ kăl adrin đơ̆ng jơhngơ̆m pran kơdih. Tơpă, kơdih akâu adrin wă kơ jing ‘lơ̆ng tôm ưh kơ đei layơ đei tơdrong rơngei. Inh ưh kơ đei layơ hiơt kơ tơdrong noh, mă khan đei 25 sơnăm hlôi bơih.

Đei minh năr nai, Kră Yang ăn kơ inh mơ̆ng minh ‘bai bơtho, pơma kơnhăm kơ ‘Bok Kei-Dei jơ̆ “A-ba” – ‘Bă mă ‘mêm. Hơdrol kơ noh, inh đei tơchĕng gah Kră Yang nhen thoi Sư ataih dêh, Sư ‘bôh tơdrong yoch inh đĕch. Mă-lei kơplah băt mơn kơ Sư jơ̆ ‘Bă – pơgơ̆p hiôk hơ-iă – jơhngơ̆m inh jing rơmuăn.

Rim wơ̆t đŏk lăm Yôhan chăl 14, inh ‘bôh hlĭch yua kơ jơhngơ̆m bơwih bơwăn Yang Yêsu ăn kơ bơngai pơhrăm păng Sư, lăm kơplah mă Kră Yang đe gô tơ’blơ̆ Sư. Kră Yang ôp ăn jơ̆ng kơ lu sư, pơkă gô ăn ‘Bok Dŏng Mơnat truh tơ lu sư, păng đei pơkă kơ lu sư ‘nĕ kơ hli, ‘nĕ kơ bơngơ̆t. Kơplah wă pơ̆ng tơ ‘long pơglang pơmat tat yua kơ tơdrong yoch đĭ đăng kon bơngai, Kră Yang oei bơwei, oei ‘mêm mơnat. Kră Yang tơpă Sư jơ̆ ‘Bok Dŏng Pơklaih ‘lơ̆ng tơpă!

Năr ‘nâu, inh wă pơlung buăl: athei ‘blŏk kơ dôm nơ̆r Kră Yang đei pơma khan hăm buăl. Athei ăn Yang Bơhngol ‘Lơ̆ng Sư tơplih jing ‘nao jơhngơ̆m buăl, tơ’blŏk kơ buăl thoi âu: dôm kơ nơ̆r Sư đei pơkă khan oei gĭt kăl truh tơ hrei âu.

Apĭnh đĭ đăng krao khan hơdai:
Kơkuh kơ Kră Yang, kon bơnê kơ Ih yua kơ Ih ăn Yang Bơhngol ‘Lơ̆ng pơtho tơ’bôh ăn kơ kon rim năr. Apinh pơih jơhngơ̆m đon kon, tơgŭm kon kơtơ̆ng hơđăl nơ̆r Ih đei pơtho tơ’bôh. Tŏk bŏk tơtok tơtăm păng hiơ̆k bơngơ̆t lăm chăl arih rim năr, hơpơi nơ̆r Ih jing hơđăl rơđah, re jơwa, păng ăn kơ kon hiôk hian tơpă. Apinh tơgŭm kon ling lang kơ yak năm lăm chông anhăk đơ̆ng Yang Bơhngol ‘Lơ̆ng, wă kơ jơhngơ̆m păng bơhngol kon đei tơplih jing ‘nao lăm Yang Yêsu Krist rim năr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, lu bơ̆n ‘nao đei ‘blŏk kơ Phĕt Yang Bơhngol ‘Lơ̆ng jur, năr mă pơih jing plơ̆ng ăn kơ Khŭl Bơngai Lui kiơ̆ kơ tơdrong ‘nao ‘lơ̆ng. Kư̆m rŏ lăng đơ̆ng năr ‘nâu, Yang Bơhngol ‘Lơ̆ng oei wă tơ ‘blŏk ăn kơ lu bơ̆n ‘blŏk kơ nơ̆r ‘Bok Kei-Dei đei tơtă, wă kơ pơlung păng pơm jing ‘nao đon lui rim ‘nu kơ lu bơ̆n. Kră Yang jơ̆ tơ’ngla adrin pơtho tơ’bôh, Kră Yang đei pơma hơdar mă lei pran kơtang ăn tơdrong tơpăt. Athei iŏk jơhngơ̆m đon ala ‘bơ̆t anăp Kră Yang, păng ăn jơhngơ̆m đon bơ̆n kơ Yang Bơhngol ‘Lơ̆ng tơ’blŏk, chông anhăk, wă kơ lu bơ̆n đei kơjăp dơ̆ng lăm tơdrong ‘mêm mơnat păng hiôk hian mă minh ‘nu Sư đĕch đei ăn kơ lu bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.