Lăm trong yak năm hăm đon lui, kư̆m đei lu bơ̆n ‘maih wă kơ jah wơ̆ ‘lŏ mă tĕnh, wă kơ ‘bôh jơhngơ̆m bơ̆n pran hloh, pre hơmet hloh, đei wơ̆ tơ̆l hloi. Lu bơ̆n rơhing wă kơ đei tơplih mă hơđăl hloh, đei yua tih tơpă. Mă-lei Kră Yang Sư jơ̆ gơh hơgei păng chơ̆n jơhngơ̆m. Kră Yang ưh kơ hăt hot, yua kơ Sư băt kơ pơkao, plei ‘lơ̆ng gô wơ̆ ‘lŏ kăl kơ đunh sơnăm păng kăl kơ adrin ling lang.

Năr ‘nâu, ‘năr 11/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jordan Buntgen kơ̆l ‘bai CHƠ̆N JƠHNGƠ̆M CHANG GÔ PLEI ‘NGAM.

Sơ̆p Hla Bơar ‘Bok Kei-Dei: “ Mă-lei plei Yang Bơhngol ‘Lơ̆ng đei: ‘Mêm mơnat, chơt hiôk, hơđơ̆ng, kĕ chơ̆n, gơh tơgŭm, iơ̆m dim, tơnăp, iŏk đon ala, gơh gơ̆t, dôm tơdrong ‘lơ̆ng ‘noh yua kơ đơ̆ng Yang Bơhngol ‘Lơ̆ng tơgŭm bơ̆n ngăl. Tơdrong juăt ‘Bok Kei-Dei ưh kơ đei găn khă ôh dôm lu tơdrong ‘lơ̆ng noh.” (Galati 5:22-23)

Hơdrol kơ ‘nâu đei kơ jơ năr, inh đei apinh Kră Yang tơ gŭm inh hlôh lơ hloh gah Yang Bơhngol ‘Lơ̆ng. Kơplah noh, inh rơhing dêh kơ dôm tơdrong jang Yang Bơhngol ‘Lơ̆ng mă nơ̆r ‘Bok Kei-Dei đei pơma. Inh hơmet jơhngơ̆m wă sơng iŏk, wă kơ đei hlôi mơn kơ “tơdrong mơsêh”. Mă-lei tơplih kơ noh, Kră Yang đei tơ’bôh kơ dôm lu plei Yang Bơhngol ‘Lơ̆ng.

Blŭng-a, lăm jơ năr, inh đei ling lang ‘bôh kơ plei ‘bâu phu! Nhen thoi mơn đei Kră Yang wă pơma dơnuh hăm inh: “lu bơ̆n pơtơm blŭng-a hăm plei ‘nâu.” Pơma tơpă, kơplah noh inh ưh kơ hưch hanh. Inh đei mơn nhen thoi Kră Yang dui ba inh tơ lăm khŭl hơ’lơ̆p hŏk pơhrăm, tơplih kơ inh ngôi hơdai hăm lu “bơngai ‘lŏ”. Rŏ lăng đei dang kơ, ‘bar giĕng, inh đei achăng lê̆ jơhngơ̆m pơ-ang păng pơih jơhngơ̆m ăn kơ Kră Yang pơtho tơ’bôh kơ inh.

Plei ‘bâu phu đei đơ̆ng 18 truh tơ 32 khĕi wă kơ wơ̆ ‘lŏ. Lu bơ̆n kăl kơ đei anih rơhơi wă kơ wơ̆ ‘lŏ, tơdah ưh, gô ưh kơ đei plei ôh. Adrĕch ‘long ‘nâu kăl kơ pơtăm tơ anih tơtŏ, păng layơ kư̆m kăl kơ đei tôm kơ hơdah măt ‘năr. Rim kơ tơnơm ‘long ‘bâu phu đei lăp minh pôm plei đĕch lăm minh ‘măng pơtăm. Kră Yang ưh kơ ăn kơ inh thar ‘bôh đĕch mă inh đei mơn ‘bôh tơnơm ‘long ‘bâu phu.

Kră Yang ăn kơ inh ‘bôh nhen thoi tơnơm ‘long ‘bâu phu noh. Lăm tơdrong wei rong Kră Yang, Sư ăn kơ inh đei anih wă kơ inh wơ̆ ‘lŏ, pơchrang hơdah đơ̆ng Sư gô bơwei inh trŏ kơ lăm kăl kơ tơtŏ, păng wei rong bơhngol inh. Minh ‘nu bơngai juăt kơ Jang Pơgar, Kră Yang gô kăt hơmet lu dơng tơ’bla inh, kơnhăm kơ lu lăm wă kơ wơ̆ ‘lŏ, păng chơ̆n jơhngơ̆m chang gô truh tơ ding plei đum. Kră Yang ưh kơ đei ‘bơ̆l hăl, yua kơ trong yak năm tơ wơ̆ ‘lŏ đunh sơnăm, kư̆m ưh kơ đei blĕk, inh đei 32 khĕi ‘mơ̆i na đei plei. Sư ưh kơ hăt hot. Kră Yang hlôh hloh gah tơdrong gĭt kăl kơ tơdrong wơ̆ ‘lŏ.

Na inh wă ‘maih pơma pơkă thoi âu: athei ăn kơ Yang Bơhngol ‘Lơ̆ng chông anhăk chăl arih buăl, kơplah noh buăl huay pă arih kiơ̆ kơ ‘maih wă đơ̆ng sĕch akar. Tơdrong yoch juăt kơ đei ling lang ‘maih wă pơm tơdrong kơnê̆, pơm tơplơ̆ kơ tơdrong jang Yang Bơhngol ‘Lơ̆ng ‘maih wă. ‘Bar tơdrong ‘nâu ling lang tơblah băl, pơm kơ buăl pă đei rơngei, pơm dôm tơdrong ‘lơ̆ng mă bơ̆n ‘maih wă. Mă-lei kơplah ăn kơ Yang Bơhngol ‘Lơ̆ng chông a-nhăk, buăl huay pă đei khôi juăt ‘bok Môis chô̆ bơih. ( Galati 5:16-18)

Đei tơdrong tơpă noh jơ̆ lu bơ̆n ưh kơ gơh wơ̆ ‘lŏ đơ̆ng kơdih. Kang adrin wă kơ đei kang ưh pă đei kiơ. Tơdrong wơ̆ ‘lŏ kăl kơ jơ năr. Kră Yang pơjing lu bơ̆n thoi noh. Lu bơ̆n ưh kơ gơh pơm kơdih wă kơ đei ‘mêm mơnat hloh, wă kơ iơ̆m dim hloh. Đơ̆ng Kră Yang pơtho tơ’bôh đĕch tơgŭm dôm kơ lu plei ‘ngam ‘nâu đei lăm chăl arih lu bơ̆n. Tơplih hrăn kơ pơma khan: “ Kon kăl kơ jing ‘lơ̆ng hloh. Kon apinh Kră Yang huay kơ jô̆ yo, đŏng rŏng kon gô adrin lơ hloh!” – na inh ling lang kơ hŏk pơma thoi âu: “ Yang Bơhngol ‘Lơ̆ng ơi, kon kăl kơ Ih tơgŭm. Apinh Ih pơtho tơ’bôh kơ kon bơ̆jang tơdrong jăng ‘lơ̆ng!”

‘Bai hŏk mă inh ngeh kơ ‘măn kơ khŭl hơ’lơ̆p tătơ tơplih tôm tơdrong hlôh wao inh gah Yang Bơhngol ‘Lơ̆ng. Noh jơ̆ ‘bai hŏk ưh kơ iĕ đĕch, mă jơ̆ nơ̆r krao wơ̆n kăl tơpă, ba inh yak năm jrŭ hloh tơlăm tơdrong ‘lơ̆ng tơpăt mă inh ngeh kơ inh hlôh bơih. Na dang ei, inh kư̆m hưch hanh kơ plei ‘bâu phu hloh dơ̆ng păng pơyom kơ bơngai pơtăm lu sư hloh dơ̆ng!

“Mă-lei plei Yang Bơhngol ‘Lơ̆ng đei: ‘Mêm mơnat, chơt hiôk, hơđơ̆ng, kĕ chơ̆n, gơh tơgŭm, iơ̆m dim, tơnăp, iŏk đon ala, gơh gơ̆t, dôm tơdrong ‘lơ̆ng ‘noh yua kơ đơ̆ng Yang Bơhngol ‘Lơ̆ng tơgŭm bơ̆n ngăl. Tơdrong juăt ‘Bok Kei-Dei ưh kơ đei găn khă ôh dôm lu tơdrong ‘lơ̆ng noh.” (Galati 5:22-23)

Apĭnh đĭ đăng krao khan hơdai:
Kơkuh kơ ‘Bă mă ‘mêm, kon bơnê kơ Ih yua kơ jơ̆ tơm kơ Bơngai Jang Pơgar tih hloh tơ lăm teh jơhngơ̆m kon. Apinh tơgŭm kon pơih jơhngơ̆m wă kơ băt Kră Yang tơ’bôh kơ dôm pơkao, plei ‘lơ̆ng mă Ih ‘maih wă pơtăm lăm chăl arih kon. Yang Bơhngol ‘Lơ̆ng ơi, apinh chông anhăk dôm kơ trong yak năm wơ̆ ‘lŏ gah đon lui kon. Hơpơi kơ tơdrong hơdah Ih pơchrang tơ lăm jơhngơ̆m rơdu kon, păng pơtŏ kơ lăm dôm anih oei tơ’ngiĕt hăm tơdrong tơtŏ đơ̆ng Ih. Kon ‘mêm kơ Ih khŏm khŏm! kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, rŏ lăng buăl oei ‘maih wă kơ tơplih mă tĕnh, đei pơkao, plei ‘lơ̆ng hloh ăn kơ lăm Hnam Kră Yang. Mă- lei Kră Yang băt kơ dôm tơdrong ‘lơ̆ng hloh kăl kơ đei jơ năr wơ̆ ‘lŏ. Athei chơ̆n jơhngơ̆m, yua kơ buăl oei lăm tơpang ti gơh hơgei Bơngai Jang Pơgar tih hloh. Sư ling lang wei rong chông anhăk đơ̆ng rim kơnao yăk năm lăm chăl arih lu bơ̆n, wă kơ dôm lu găr adrĕch ‘lơ̆ng Sư rĕi pơtăm wơ̆ ‘lŏ ‘lơ̆ng hloh. Athei pơih jơhngơ̆m păng ăn kơ Yang Bơhngol ‘Lơ̆ng bơ̆jang hăm tơdrong mơsêh mơyang noh lăm bơhngol buăl rim năr.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.