Lăm tơdrong arih, đei dôm lu tơdrong kăl yua kơ lu bơ̆n kăl kơ bơngơ̆t- pơtih gia thoi kơ rơhing ‘maih nhă đak. Kơplah rơhing, đĭ akâu jăn nhen thoi đei krao, pơtrŭt lu bơ̆n athei chă đak nhă hăm dôm tơdrong. Đei hơ iă, tơdrong arih gah pơhngol đơ̆ng lu bơ̆n kŭm nhen thoi noh mơ̆n. Jrŭ tơ lăm, rim ‘nu bơngai tă kơ đei mĭnh tơdrong rơhing ngăl. Lu bơ̆n rơhing kơ tu đak arih tơpă, rơngơp păng tuh ‘bĕnh ưh kơ layơ hrĕng kro.

Năr ‘nâu, ‘năr 12/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Bill Gaultiere kơ̆l ‘bai BUĂL OEI RƠHING TRUH TƠ DANG YƠ?

Sơ̆p Hla Bơar ‘Bok Kei-Dei: “Tơpă wă tôch Năr Giĕng Bơsŭn ei, năr noh năr đe akŭm giĕng tih tơpă, na Yêsu iung dang dơ̆ng bơtho ‘bơ̆r re khan: “Bơngai bu rơhing ‘maih nhă đak, năm tơ Inh bĕ.” (Yôhan 7:37)

Buăl hăm đei layơ rơhing ‘maih nhă đak mah truh kơ ‘bơ̆r hơlŏng hrĕng kro, đak hai kơtuăl băl nhen thoi kơpaih ưh? Kơplah oei ‘lơ̆p, rim wơ̆t pơchơt đă bơlŏng tơ’nguaih cham tŏ hơhlĕng, inh ngăl đei thoi ei ngăl. Kơplah ‘noh, ưh kơ đei bơngai bu chĕp ba kơchai đak hơrŏng thoi dang ei. ‘Bơ̆r hơlŏng kro lei ưh kơ hiôk tơpă, mă lei ưh kơ đei bu lăng tơdrong ‘noh tih dêh. Lu ‘bok thây pơtho kơplah ‘noh ngăl pơma: “Huay kơ đei kiơ ôh, ĕnh tŏ sĕt gô jing juăt!”

Mă lei tơdrong đei mơn rơhing mah truh kơ akâu jăn gleh lap rơmơ̆n đĭ, jơ̆ng ti pơpơ̆, rơgah rơgĕnh, jê̆ ‘maih wă pơ̆k lei liơ?

Inh đơ̆ng hlôi đei mơn thoi noh ‘bar wơ̆t, kơplah yak tŏk tơkông hơdai păng kon drŏnglo. Blŭng a kơplah kon inh 16 sơnăm, lu nhôn đei hơdai mĭnh tơdrong chă ngôi đunh năr. Năr ‘noh, đĭ khŭl đei yak jơ̆ng hloh kơ 20 kơsô̆, hloh kơ rơbâu met kơjung, na pơm bơsŭn tơ ala jơ̆ng kông tih.

Lăp oei pă dôm kơsô̆ bơih na truh tơ bŏl kông, păng inh jê̆ ‘maih wă kơ tŏk hlôi kơ bŏl kông ‘nâu. Mă khan kơplah ‘noh đê̆ wă gơ sơ̆, păng ưh kơ đei bơngai bu yak hơdai, inh oei adrin tŏk mĭnh drô̆. Inh tuh tơ’bĕnh đak lăm kơdŭng pŭ, tah hăt hot dôm tŏ ‘bĕng ‘bôt hrĕng na pơtơm tŏk, đei tơchĕng khan gô brok tam adrol kơ măng.

Mă lei tôm tơdrong ưh kơ thoi inh tơchĕng hơmet. Trong năm anat hloh, ‘năr ‘bônh kơ măng hloh, păng inh đei wơ̆l jrok dơ̆ng.

Kơpal bŏl kông hơngiĕo tơngiĕt, lăp đei mĭnh pôm ŭnh ‘bin iĕ, inh đei pă kĕ đei wing măt yua kơ ưh đei kial wă dui jơhngơ̆m. Inh rơhing kro hơlŏng, jơ̆ng jê̆ ưh kơ đei jơhngơ̆m pran hloi. Kơplah inh chơ chă jơ jơ̆ brŏk truh tơ bơsŭn kơplah hloh kơ 8jơ kơmăng, lăm adrol kơ dôm lu bơngai hơmet wă yak năm chơ chă- tơdrong blŭng a inh pơm ‘noh jơ̆ nhă đĭ mĭnh kơchai đak.

Thoi noh athei pơlong tơchĕng lăng: tơdah lu bơ̆n kŭm rơhing kơ Kră Yang thoi noh lei thoi yơ? Pơtao Đawit pơyơ̆r nơ̆r krao khan lăm Hơriso 63:1:

“Ơ Kră Yang ‘Bok Kei-Dei Ih boih Kră Yang ‘Bok Kei-Dei inh, inh krao chă Ih; thoi teh hrĕng kro, hơđang, ưh kơ đei đak. Bơhngol inh rơhing kơ Ih. Akâu jăn inh hơpơi kơ Ih.”

Dĭng truh tơ dang ei, nơ̆r krao khan ‘noh oei đei hơtŭt truh tơ jơhngơ̆m lu bơ̆n. Yua kơ teh đak ‘nâu kŭm nhen thoi mĭnh anih teh hrĕng kro, ưh kơ đei tơdrong arih tơpă. Mưh lăp inh tơ’blŏk jơhngơ̆m kơdih hăm kơdih nơ̆r krao khan ‘noh, khan akâu jăn inh kŭm oei kăl dêh kơ Kră Yang. Inh kŭm đei chih lê̆ Hơriso 63 jing nơ̆r krao khan kơ kơdih inh, dan ăn hơnăn jơ̆ “Rơhing kơ ‘Bok Dŏng Pơklaih Yang Yêsu.”

Păng kŭm ‘nĕ kơ hiơt kơ nơ̆r krao wơ̆n ‘lơ̆ng rŏ mă Kră Yang Yêsu ‘măn ăn kơ dôm bơngai bu oei rơhing:

“Tơpă wă tôch Năr Giĕng Bơsŭn ei, năr noh năr đe akŭm giĕng tih tơpă, na Yêsu iung dang dơ̆ng bơtho ‘bơ̆r re khan: “Bơngai bu rơhing ‘maih nhă đak, năm tơ Inh bĕ. Bơngai bu lui kơ Inh sư gô đei kư̆m thoi đe chih lăm sơ̆p hla bơar ‘Bok Kei-Dei sơ̆.” Sư khan thoi noh dang khan kơ lu bơngai lui kơ Sư gô đei Yang Bơhngol ‘Lơ̆ng đơ̆ng ‘Bok Kei-Dei ăn jur oei păng lu sư. Mă-lei kơplah noh ‘Bok Kei-Dei tam mă ăn Yang Bơhngol ‘Lơ̆ng ôh, kơlih Yêsu tam mă lôch iung arih tŏk tơ plĕnh.” (Yôhan 7:37-39)

‘Lơ̆ng rŏ dêh tơpă! Kơplah pơih jơhngơ̆m sơng iŏk ‘Bok Dŏng Pơklaih Yang Yêsu, lu bơ̆n ưh kơ sĭ lăp gơh nhă đak tŏsĕt- mă kơdih Yang Bơhngol ‘Lơ̆ng Sư gô pơm kơ jơhngơ̆m lu bơ̆n ‘bĕnh blai đak ro tơdrong arih, rơngơp, ‘bĕnh blai, păng ưh kơ layơ hrơ̆!

Apĭnh đĭ đăng krao khan hơdai:
Kon bơnê kơ Kră Yang yua kơ Ih băt hơđăl kơ kon oei rơhing jrŭ tơ lăm jơhngơ̆m kon. Kon băt khan ưh kơ đei tơdrong kiơ kơpal teh đak ‘nâu gơh pơm kơ pơhngol kon lăp đon ‘nguaih kơ tơdrong oei hơdai đơ̆ng Ih. Apĭnh Yang Bơhngol ‘Lơ̆ng Ih tuh ‘bĕnh đak glung ro arih lăm tơdrong arih kon, pơm tơplih ‘nao dôm lu anih phang ang, hrĕng kro. Apĭnh pơtho kon băt kơ rơhing kơ Ih hloh kơ dôm tơdrong, yua kơ Ih jơ̆ tu arih, tu jơhngơ̆m pran mơsêh mơyang tơgŭm kon yak năm rim năr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, tŏk bŏk teh đak phang ang păng gleh lap ‘nâu, Kră Yang oei krao lu bơ̆n: “Bơngai bu rơhing ‘maih nhă đak, năm tơ Inh bĕ.” Sư ưh kơ sĭ lăp pơm ưh kơ ‘maih nhă đak dang ei đĕch, mă kŭm đei đak glung ro lăm jơhngơ̆m arih ling-lang ruh rơngơp pơhngol phang ang đơ̆ng lu bơ̆n. Athei pơih jơhngơ̆m bĕ, athei ăn tu đak arih đơ̆ng Kră Yang pơm kơ pơhngol bơ̆n tôm mah, chông buăl mơ̆t lăm mĭnh chăl arih ‘nao plơ̆ng- rơngơp, mah mai păng ‘bĕnh blai Yang Bơhngol ‘Lơ̆ng Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.