Hăm đei layơ buăl mơn ‘bôh ưh kơ hiôk kơplah ‘bôh bơngai bu nai kĕ jei hloh kơ bơ̆n? Dah hăm đei kơplah ayơ buăl gar ‘bơ̆t anăp mĭnh tơdrong chơt hiôk đơ̆ng anhŏng oh bơ̆n? Đei dôm jơ kơplah buăl tơblah hăm kơdih kâu, ‘bôh akâu jăn kơdih gơh “nhơ̆m hmoi hơdai hăm bơngai nai nhơ̆m” mă lei anat dêh kơ wă “chơt hiôk hăm bơngai chơt hiôk”. Năr ‘nâu, athei dơ̆ng wă lăng hơmet jơhngơ̆m bơ̆n kơdih, khan buăl oei đei sơng iŏk kơ tơdrong ‘nhĕng băl păng tơgar băl wă tơgar iŏk anih lăm jơhngơ̆m kơdih ưh.

Năr ‘nâu, ‘năr 16/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Ken Barnes kơ̆l ‘bai TƠM RƠH KƠ TÔM TƠDRONG KƠNÊ̆.

Sơ̆p Hla Bơar ‘Bok Kei-Dei: “Anih ayơ đe ‘nhĕng băl păng tơgar băl, anih noh đe pơjah pơjăng băl dêh păng pơm tôm tơdrong kơnê̆.” (Yakơ 3:16)

“Lu bơngai mă tơchĕng kiơ̆ kơ jơhngơ̆m đon sư kơdih, lu sư pơm tôm tơdrong thoi lu tơ ala âu: Sư ngôi pơyô kư̆ kă, sư ưh kơ gơh wei jơ̆ng ti kơdih; sư oei kơkuh kơ yang so, sư pơm pơjâu chă sol đe; sư kơnam băl tơdrong, sư tôn teh băl, sư tơgar băl, sư hil kơ đe, sư kret, sư kuă kơ jang hơdai đe, sư wă tơklah kiơ̆ tơdrong sư kơdih, sư ‘nhĕng kơ đe, sư suai sik pơm kư̆ kă, sư pơm lơ tơdrong kơnê̆, lơ tơdrong noh nai dơ̆ng. Inh wă pơma dơ̆ng kơ iĕm thoi inh roi boih kơ iĕm sơ̆: Dôm lu bơngai pơm thoi noh ưh kơ gơh oei hơdai tơ dêh char ‘Bok Kei-Dei ôh ning-mônh.” (Galati 5:19-21)

Kơplah inh chih dôm lu nơ̆r ‘nâu, na bơyan puih đei truh bơih, dôm lu pơkao lăm pơgar đei pơtơm tơlang. Mă lei, anih ayơ đei pơkao ‘lơ̆ng, anih ‘noh kŭm đei pơkao ‘nhĕt. Tơdah ưh tam choh bơwei, dôm lu tơ‘bôt ‘nhĕt lăng nhen ưh kơ đei tơdrong pơrăm kiơ ‘noh gô ‘bônh kơ lanh să, pơm pơrăm đĭ kơ pơgar. Lăm tơdrong đei kăl tơm gah pơhngol, lu bơ̆n gơh hlôh kơ ‘nhĕt nhen kơ thoi tơdrong yoch, tơdah ưh “ rô̆ đơ̆ng rơh”, lu sư gô đei wơ̆ tih, păng pơgăn tơdrong wơ̆ pran gah pơhngol lu bơ̆n.

‘Nhĕng băl, kơnam băl păng tơgar băl jơ̆ tơdrong Sơ̆p Hla Bơar ‘Bok Kei-Dei pơma đei lĕch đơ̆ng sĕch akâu akar lu bơ̆n. Wă kơ bơwei jơhngơ̆m gah pơhngol kơ lu bơ̆n, lu bơ̆n athei weh ataih đơ̆ng dôm lu tơdrong yoch ‘nâu.

Lăm dôm sơnăm ‘nâu, yua kơ tơdrong jĭ păng yua bơyan ‘mi kial, tŏ, tơngiĕt ưh kơ ‘lơ̆ng, lu nhôn ưh pă bơwei hơmet lu tơnơm pơkao lăm pơgar trŏ kơ kăl kơ jang đunh bơih. Akăn inh hơ iă kơ tơdrong jang lăm pơgar, na inh lei ưh kơ gan bơngơ̆t. Mă lei yua kơ ‘mêm kơ akăn, na inh gô tơgŭm sư bơ̆jang tơdrong ‘nâu.
Na thoi noh lăm gyĕng adrol, lu nhôn pơtơm lăm tơdrong jang gĭt kăl ‘nâu, mă khan kŭm oei đei tơdrong pơgŏ. Kơplah choh hơmet ‘nhĕt, lu nhôn ‘blŏk đêl kơ tơdrong mă kơdih đei pơhrăm iŏk lăm dôm lu sơnăm adrol, ‘noh hăm lu ‘nhĕt, tơdah ưh kơ rô̆ đơ̆ng rơh, đơ̆ng rŏng kơ dôm khei lu sư gô chăt dơ̆ng.

Tơdrong ‘nâu tơ’blŏk kơ inh khan dôm lu tơdrong jang đơ̆ng sĕk akâu jăn nhen kơ thoi kơnam băl, tôn teh băl, ‘nhĕng băl, tă kơ đei mĭnh tu rơh, ‘noh jơ̆ jơhngơ̆m pơ-ang. Thomas Aquinas đei khan tơdrong pơ-ang jơ̆ tơm pơm kơ đĭ đăng tơdrong yoch nai. Sư ôn gơ’nơp ala kơ thoi rơh đơ̆ng ‘nhĕt. Tơdah tơdrong pơ-ang trŏ kơ sư thoi noh ưh kơ gơh hơmet pơ’lơ̆ng, lei gô ưh kơ đunh, “anih pơgar” pơhngol gô đei pơrăm.

Wă choh hŭt lê̆ ‘nhĕt păng tơ’bôt ‘bruih ‘brăm lăm pơgar, lu nhôn kăl kơ pơ’lơ̆ng pĕng gom akâu mă hơlen, wă kơ huei kơ đei đơ đik pơkoih dah tơ‘bơ̆p tơdrong kơnê̆ đơ̆ng lu sư. Kŭm lơ lăi thoi noh, lăm tơdrong arih, tơdah ‘maih wă weh wer đơ̆ng dôm lu “ ‘nhĕt” ‘nhĕng băl păng tơgar băl đei răk mong lăm jơhngơ̆m, lu bơ̆n kŭm kăl kơ athei “bơwei” đon tơchĕng bơ̆n păng pơ ‘lơ̆ng hăm dôm tơdrong tơchĕng dah nơ̆r pơma đei tơdrong pơting akâu jăn bơ̆n hăm bơngai nai.

C.S Lewis đei pơma: “Tơdrong pơ-ang ưh kơ sĭ hmă đĕch khan truh đơ̆ng tơdrong buăl đei tơdrong kiơ ‘noh, mă truh đơ̆ng tơdrong buăl đei lơ hloh kơ bơngai jum dăr bơ̆n. Kơlih kơ đơ̆ng tơdrong pơting ‘noh pơm kơ jơhngơ̆m buăl jing pơ-ang, kơplah tơdrong buăl hrăp bơih đei đơ̆ng tơdrong buăl ‘bôh kơdih hloh kơ bơngai nai.” Tơdrong pơting bơih jơ̆ tơdrong hơtŭt ‘bơm kơ jơhngơ̆m lu bơ̆n đei mong răk tơdrong ‘nhĕng băl păng tơgar băl.

Inh kŭm đei mơn ‘bôh khan dôm lu ‘long kơnê̆ pơrăm ‘noh lăp jơ̆ lu ‘long đei chăt hro tơter teh. Lu sư ngăl đei klơ̆p hlơp kơ măt yua kơ hla ‘long dah pơkao đơ̆ng lu ‘long nai. Tơdrong ‘nâu kŭm lơ lăi thoi tơdrong ‘nhĕng kơ đe păng klai băl. Lu sư ngăl ôn hlơp đơ̆ng rŏng kơ dôm lu nơ̆r pơma mơ̆ng rŏ kơ rơngơp hiôk nhen thoi nơ̆r pơ-ư dah hơtŏk. Yua kơ dôm lu nơ̆r ‘noh pơm kơ lu bơ̆n mơn ‘bôh đei hiôk, na lu bơ̆n ưh băt kơ tơdrong kơnhăm mă đơ̆ng rŏng kơ dôm nơ̆r pơma ‘noh. Dôm lu tơdrong ‘nâu wei rong tơdrong pơ-ang lăm lu bơ̆n, jơ̆ tu tơm đơ̆ng tôm tơdrong.

Kơplah buăl pel ‘bơm kơ lu ‘long kơnê̆, kŭm đei pơm kơ akar gô lĕch ‘brê bra hloi. Mă lei kŭm phŏ, kăl kơ đei đunh đơ̆ng rŏng rơka pơ’ngeh ‘nao wă ‘bôh. Tơdrong ‘nhĕng băl păng klai băl kŭm thoi noh. Đei kơplah lu bơ̆n mơn ‘bôh băt hloi, mă lei kŭm đei kơplah lu sư wơ̆ tih lăm jơhngơ̆m na bơ̆n ưh kơ băt. Tơdah dôm lu tơdrong tơchĕng kơnê̆ ‘noh ưh kơ đei bơwei hơmet đơ̆ng hrôih, lei na mưh truh tơ ‘bôh băt, lu sư gô chăt rơh jrŭ lăm tơdrong mơn đei păng đon tơchĕng, pơm ưh kơ hiôk kơ kơdih kâu păng hăm dôm lu bơngai jum dăr.

‘Bok Pôl pơma khan, lu bơ̆n tơblah hăm tơdrong yoch jơ̆ gơnang kơ tơdrong mơsêh mơyang đơ̆ng ‘Bok Kei-Dei, gơnang kơ tơdrong mơsêh mơyang ‘noh, lu bơ̆n gơh “athei lu sư chu yom kơ Yêsu Krist lăm tôm tơdrong.” (II Kôrintô 10:5). Tơdah lu bơ̆n ưh kơ pơgơ̆r dôm lu tơdrong pơwao păng tơchĕng đơ̆ng kơdih, lu lu sư gô pơgơ̆r lu bơ̆n.

“Anih ayơ đe ‘nhĕng băl păng tơgar băl, anih noh đe pơjah pơjăng băl dêh păng pơm tôm tơdrong kơnê̆.” (Yakơ 3:16)

Apĭnh đĭ đăng krao khan hơdai:
Kră Yang ơi, lăm năr ‘nâu hloi kon năm tơ Ih, sơng iŏk khan jơhngơ̆m kon phŏ đei jơ mong răk tơdrong ‘nhĕng băl păng tơgar băl. Hơpơi kơ Kră Yang tơgŭm kon băt lăng bơngai nai hăm măt đơ̆ng kơdih Ih, jơ̆ Tơ’ngla ‘mêm mơnat păng ‘bĕnh tơdrong ăn đĕch. Hơpơi apĭnh plei tơdrong ‘mêm mơnat ling lang ro ‘bĕnh lăm jơhngơ̆m kon, wă kơ kon ling lang ‘mêm mơnat kơ bơngai jum dăr kon, păng rai đei lơ tơdrong pơm ‘lơ̆ng. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, tơdrong yoch lăm jơhngơ̆m lu bơ̆n ưh kơ phara kiơ kơ dôm lu jơ la păng ‘nhĕt chăt lăm pơgar pơhngol. Tơdah tơdrong yoch ưh kơ đei hơnơ̆ng bơwei păng choh hŭt, sư gô ‘bônh kơ chăt rơh, lanh să, păng ‘net ‘net pơm pơrăm jơhngơ̆m lu bơ̆n. Đei hơdôm wơ̆t, buăl đei ăn tơdrong ‘nhĕng kơ đe, pơting, tơgar,… đei wơ̆ tih lăm jơhngơ̆m kơdih, pơm kơ kơdih buăl păng bơngai nai đei ưh kơ hiôk? Dang ei hloi, athei ‘blŏk đơ̆ng bu jơ̆ bơngai mă buăl đei ‘nhĕng băl păng bơwei jơhngơ̆m tơgar? Athei chĕp ba tơdrong ‘noh năm tơ Kră Yang lăm tơdrong tơbral đĭ jơhngơ̆m, păng pơkă hăm Sư khan buăl gô ưh kơ ăn dôm lu tơdrong pơting pơm pơchah tơdrong pơgơ̆p ‘mêm mơnat hăm dôm lu bơngai jum dăr bơ̆n. Athei ‘blŏk khan rim ‘nu lu bơ̆n đơ̆ng Kră Yang pơjing ngăl hăm mĭnh tơdrong ‘măn phara, đei tơdrong gĭt kăl lơ lăi băl, păng tơdrong đei Sư ‘mêm mơnat. Yua kơ thoi noh, tôm tơdrong pơting jơ̆ ưh kơ yua, lăp pơm kơ lu bơ̆n ataih đơ̆ng tơdrong hiôk chơt, tơdrong hơđơ̆ng, păng mĭnh jơhngơ̆m hơdai. Hơpơi kơ jơhngơ̆m lu bơ̆n gơh pơklaih, gơh tơplih, wă kơ ‘mêm mơnat kơ bơngai nai hăm măt ‘bĕnh tơdrong ăn đĕch păng mơnat ăn đơ̆ng Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.