Lăm tơdrong arih, đei lơ wơ̆t lu bơ̆n đei jet kơdih: yua kơ kiơ lu bơngai arih pơm tơdrong kơnê̆ mă lei nhen thoi đei tơdrong arih hiôk jơnap hloh kơ bơ̆n, jơ̆ lu bơngai lui păng ‘mêm kơ Kră Yang? Hăm đei layơ buăl đei mơn ‘bôh arih ‘lơ̆ng tơpăt mă ưh kơ đei yua ưh? Dah buăl đêl đei chĕp răk tơ lăm jơhngơ̆m tơdrong tơchĕng thoi noh, buăl huay kơ minh drô̆ ôh. Hơdrol sơ̆, ‘bok Asap kư̆m đei apinh Kră Yang gah tơdrong ‘nâu. Mă lei đơ̆ng tơdrong tơpăt chơchă, Kră Yang kư̆m đei tơ’bôh ăn nơ̆r tơl tơwih trŏ tơpă ăn kơ jơhngơ̆m sư.

Năr ‘nâu, ‘năr 17/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Mark Burnett kơ̆l ‘bai YUA KƠ KIƠ BƠNGAI PƠM KƠNÊ̆ MĂ ĐEI HIÔK JƠNAP.

Sơ̆p Hla Bơar ‘Bok Kei-Dei: “Dĭng truh tơ inh mơ̆t lăm anih rơgoh Kră Yang ‘Bok Kei-Dei, Lei inh băt gah năr tôch lu sư.” (Hơriso 73:17)

“Lu bơngai kơnê̆ thoi noh, Lu sư oei hiôk-hian rai mơdrŏng dêh. Tơdrong kơ đei inh kư̆ hrăn wei jơhngơ̆m rơgoh, ôp ti huay kơ pơm yoch.” (Hơriso 73:12-13)

Minh lăm dôm nơ̆r jet mă lơ bơngai kiơ̆ Kră Yang ngăl đei tơtăm noh jơ̆: Yua kơ kiơ bơngai pơm ‘lơ̆ng mă lei pŭ iŏk pơmat tat, mă bơngai pơm kơnê̆ đei hiôk jơnap? ‘Nâu ưh kơ nơ̆r jet ‘nao. Dôm kơ nơ̆r ‘Bok Kei-Dei lăm năr ‘nâu đei iŏk đơ̆ng Hơriso đơ̆ng bơngai chih noh jơ̆ Asap. Sư jơ̆ minh ‘nu bơngai reh brŏ ăn kơ Đawit, păng sư đei chih ‘bai Hơriso ‘nâu đơ̆ng rŏng kơ đei tơchĕng pơwao kơ nơ̆r jet noh!

Kơplah đŏk lu nơ̆r hơdrol kơ noh lăm ‘bai Hơriso ‘nâu, lu bơ̆n ‘bôh Asap pơma thoi âu, sư ‘bôh đei klai gar hăm tơdrong hiôk jơnap kơ dôm lu bơngai mă sư đei khan “pơm kơnê̆.” Kơplah ‘bôh tơdrong pă đei dang ăi thoi noh, sư jing bơ̆l hăl lăm tơdrong arih minh chăl arih ‘lơ̆ng tơpăt:

“Yua kơ inh ‘bôh lu bơngai kơnê̆ đei tơdrong hiôk chơt. Inh đei jơhngơ̆m gar lu bơngai pơang. Lu sư ưh kơ đei jĭ pơmat. Akâu jăn lu sư oei pran hiôk, Lu sư ưh kơ đei pơmat thoi đe nai. Kŭm huay kơ răm thoi gơ̆p buăl. Lei na lu sư iŏk tơdrong pơang pơm thoi rơbưn maih ‘băk tơ hơko. Lu sư iŏk tơdrong kơnê̆ pơm thoi ao pĕng akâu.” (Hơriso 73:3-6)

Sư đei pơma pơtôch thoi âu, dôm kơ lu bơngai pơm kơnê̆ ‘bơ̆t anăp ‘Bok Kei-Dei noh jơ̆ lu bơngai đei “ jơhngơ̆m ‘bĕnh kơ kơtul kơwao” ( trong 7). Mă ưh kơ thoi noh đĕch, lu sư ling lang đei hiôk hian tôm tơdrong, mơdrŏng đei mŭk tơmam rai lơ (trong 12). Kơlih kơ thoi noh, sư đei tơchĕng pơwao thoi âu: pă đei yua kiơ kơplah arih kiơ̆ tơdrong ‘lơ̆ng păt.

Lei Asap pơm kiơ wă kơ klaih đơ̆ng jơhngơ̆m sư thoi noh? Sư đei kơdŭn tơrŏng păng dơ̆ng ‘bơ̆t rŭp chhơ̆ tih hloh. Sư đei năm truh tơ anih akŭm kơkuh, jơ̆ anih ‘lơ̆ng rơgoh ‘Bok Kei-Dei. ‘bok Asap đei chih thoi âu: “Dĭng truh tơ kon mơ̆t tơ lăm anih ‘lơ̆ng rơgoh ‘Bok Kei-Dei, na đei hlôh kơ tơdrong hơtuch lu sư.” (trong 17)
Tơ anih noh đei tơ’blŏk kơ sư tơdrong tơpă kư̆m đei kon bơngai ‘bônh kơ hiơt hiong , noh jơ̆: ‘Bok Kei-Dei ling lang oei hơdai lu bơ̆n. Sư bơtho tơ’bôh păng ăn jơhngơ̆m pran kơ lu bơ̆n. Kơplah chăl arih lu bơ̆n tôch bơih, ‘Bok Kei-Dei iŏk lu bơ̆n oei hơdai păng Sư. Yua kơ đơ̆ng tơplih tơdrong lăng sư, Asap đei pơma hăm Kră Yang: “Tơ kơpal plĕnh inh ưh kơ đei bu, ‘nguaih Kơ Kră Yang? Lăm teh đak, inh ưh kơ đei hơpơi chă bu nai ‘nguaih Kơ Ih.” ( trong 25)

Adrin arih pơm ‘lơ̆ng kiơ̆ kơ thoi ‘Bok Kei-Dei lăp đon ưh kơ đei layơ khan ưh kơ đei yua. Tơdah lu bơ̆n ‘bôh bơngai pơm kơnê̆ đei tơdrong arih ling lang hiôk jơnap, na athei ‘blŏk tơdrong lăng lu bơ̆n oei lăng jê̆ đĕch. Thoi kơ Asap, lu bơ̆n kăl kơ dan bơ̆n tơ lăm anih rŏ lăng tơgŭm bơ̆n đei lăng trŏ ‘blep hloh. Yua kơ tơ anih noh đĕch, jơhngơ̆m klai gar gô tơplih jing chơt hiôk păng lu bơ̆n gô đei kĕ jei kơplah băt kơ bơ̆n bơngai gah Kră Yang.

Apĭnh đĭ đăng krao khan hơdai:
Kră Yang ơi, đei lơ wơ̆t lăm tơdrong arih, kon đei mơn kơdih đei kơ che bơle yua kơ rơih iŏk tơdrong arih ‘lơ̆ng tơpăt păng chu yom Ih. Mă lei bơnê kơ Kră Yang, yua kơ đơ̆ng Nơ̆r Ih, kon đei tơ’blŏk tơdrong noh ưh kơ sĭ yua kơ Ih ưh kơ ăn dang ăi, mă noh Ih oei pơjuăt kon nhen thoi rup Ih hloh. Hơpơi kơ Kră Yang tơgŭm măt kon lăng tơ tơdrong tih hloh păng ‘lơ̆ng rơgoh Ih, wă kơ kon huay kơ kiơ̆ dôm tơdrong ‘biơ̆ đĕch lăm teh đak, lui kơjăp lăm tơ hơtuch kơnh gô đei pŭn hiôk mă Ih đei ‘măn bơih kơ kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, lu bơ̆n ưh kơ đei weh wer đơ̆ng tơdrong ôr khan “Yua kơ kiơ?”, mă loi kơplah ‘bôh dôm tơdrong ưh kơ đei dang ăi lăm tơdrong arih: bơngai arih pơm tơdrong ‘lơ̆ng na đei tơ‘bơ̆p tơdrong pơmat tat, păng bơngai pơm kơnê̆ đei tơdrong arih hiôk păng mơdrŏng.

Buăl mă ‘mêm, năr ‘nâu Kră Yang krao wơ̆n buăl athei dan măt lăng tơ minh Kră Yang đĕch, păng ling lang lui kơjăp kơ Sư jơ̆ Tơ’ngla ‘lơ̆ng tơpăt, kư̆m jơ̆ ‘Bă ‘bĕnh kơ jơhngơ̆m ‘mêm mơnat. Păng kơplah măt đon lui buăl kơnhăm lăng tơ Kră Yang, buăl gô đei tơ’bôh jơhngơ̆m đon lui gơnang thoi kơ Asap thoi âu: “Tơ kơpal plĕnh inh ưh kơ đei bu, ‘nguaih Kơ Kră Yang? Lăm teh đak, inh ưh kơ đei hơpơi chă bu nai ‘nguaih Kơ Ih.” Athei dan jơhngơ̆m kơdih akâu kơjăp tơ lăm chang hơmĕng ưh pă đei tơplih: tơmam apah kơ bơngai ‘lơ̆ng tơpăt ưh kơ tơ kơpal teh âu mă tơ lăm anih Kră Yang. Yua kơ thoi noh, ‘nĕ ăn kơ pơmat tat ‘biơ̆ đĕch dah tơdrong ưh kơ dang ăi tơplih jơhngơ̆m đon lui buăl, athei ling lang ‘blŏk răk Kră Yang jơ̆ mŭk măk khŏm khŏm kơ lu bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.