Niam să ală ồng mò oh mi kòñ gơboh. Ală ồng mò oh mi gam ơm iat Bơta Hòi Dan Kòp Ngai hơđang gùng Oneway Radio gan dê oă cau git làm bơh Jơnau Yàng dê mơ neh cih lòi wơl ală bơta bơtê niam geh sơnđan la CBN Devotional Daily. Kơp kòñ ală ồng mò oh mi rơp dòp geh pràn pa tòm gùng lòt jat Yàng kòp ngai.

Kọn mơnùs ò tŭ lơi nàng pơndơh tòmlơh bơta khat gơboh ĭn tòm jơh ală kòp pah rài kis. Kọn mơnùs koñ geh kis, geh sac rwah, geh lơh să tom he mơ ò tŭ lơi kòl cau at bồ hala kòl rồn bơklơn. Mơya, digul dunnia ngai do, bơta khat gơboh gơlơh tơlik mat kòp bă tiah, gơs tŭ lơi he lùp is să tom he lah neh geh ngăn “bơta khat gơboh” sơl ơ? Hala găm kòl jàm tòm bồ dơngoh bơh ală bơta tềl sồt mơ basil baso? Tiah lơi lah bơta gơn kơnòm nàng bŏl he dòp geh bơta khat gơboh ngăn?

Ngai do, ngai 05/08/2025 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Gail Casteen dê bơh Tơnggume KHAT GƠBOH NGĂN TÒM BƠTAU KRIST

“Behơ̆, dilah Kòn hồ toh bol mê, gen bol mê rơp geh khat gơboh ngan.” (Jang 8:36)

Bơta lơi gơlik gơs dilah bŏl he rơp kis dô rài kis ò gơs cau kòl kơt? Ò di là dô rài kis ò gơs rnoas ò, mơya la ò kòl kơt dô bơta lơi!

Dilah rài kis he di găm bềng ală bơklơn mơ kòl kơt, gơs tŭ lơi he sền lùp is “ñchi bơh tai “sơl ơ? Digơlan la he găm añ ală bơta ơnòng kơnjơ̆ ir, hala găm păl tìp ală bơta gơlòng bŏl glăr dờng gơlơh be ò tŭ lơi nàng lòt găn. Mơya kŭng la tài bơh he wờng tìs bơh Yang Tom Trồ, mơ cap rài kis he tòm ală bơta kơlôi sơnơng tìs hơ̆? Gen behơ̆ bŏl he rơp găm rnoas rài kis he, la dô rài kis gen Yang Jesu neh chơt mơ kis wơl tồ ai pà bŏl he in hala ò?

Kọn klau ăñ pa lik bơh kơndul gen neh kòl kòp hở plai nùs mơ hở kơndul bẩm sinh. Tŭ pe sơnăm, kọn ăñ găm dềt ir nàng wờng ñchi bơh tai să jan he gơs ală tềl sồt dŏ jòng bơh ngkô tus di klŏ. Gơwèt mơ kọn, tềl sồt là bơta òs mòng. Bulah deh bơh ală bơta òhềt wil tơl mơ bềng ală tềl sồt, kọn găm kơñhơl jơh nùs tài bơh hơ̆ la bơta chò hòp kọn di. Kọn đal git rnoas he di la păl kơñhơl tòm blàng jơng gùng mo, mơya bơta hơ̆ ò kơryan kọn ntoat kơñhơl hòn chò jơh pràn tòm blàng jơng gùng dềt hơđap hiu.

Ñcau lơi tom bŏl he kŭng gơs “tềl sồt”. Ală tềl sồt hơđăng să jan kung be tòm dơlăm hwing nùs la dô pơnah rài kis di. Mơya rài kis bŏl he di ò di ir la kòl kơryan bơh ală tềl sồt hơ̆. Ală bơta ji sồt mơ rngòt rngơt rơp lơh bŏl he ĭn ruc wơl dilah bŏl he lòi gơ ắt bồ rài kis he.

Cau gơri hơ Bơtau Krist păl dòp git lah, tŭ ală bơta ji sồt mơ rngòt rngơt gơlik tus, kŭng la tŭ bŏl he đal git gơnoăr pràn mơ bơta nđàc Yang di sơlơ rlau tai. Cau Gơnoăr Bơtô Pol la cau wờng lọh bơta do. Bơh sơnđăn Yang, ồng neh lòt găn git nđợ bŏl glăr mơ kalke: kòl jàm, kòl pờng pù, kòl pơrdô hơđăng dà lềng,… mơya ồng ò lòi ală bơta kal ke hơ̆ gơlik gơs bơta kơryan rài kis he. Ồng đal git ală ji sồt mơ rngòt rngơt gơlik tus la tŭ ồng geh đal git gơnoăr pràn mơ bơta nđàc Yang di rlau tai. Ồng Pol neh đơs:

“Gen tàng tài bơh Bơtau Krist añ niam nùs kong bơta lơbơn lơño, òsơp òso, siơ̆u siar, kup kơryan, bòl glar; bơh tòm tŭ añ lơbơn lơño, hơ̆ la tŭ añ pràn kơldang.” (II Kôrintô 12:10)

Dô mho ngai ne, ăñ gơs tŭ lơmpah tombơhbơr mơ dô nă cau ling mpồl ling neh rlô kra oă năm do. Bulah neh jọng sơnăm rau, mơya ồng găm lọh lang mơ jak chài ngăn. Ăñ găm kơlôi sơnơng digul bar bơta sac rwah mơ đơs mơ ồng la ăñ òhềt git Yang koñ ăñ lòt gùng dà lơi, tài bơh bar nơm niam lơm. Tơnơ̆ dô ơthoa ơm mọ mŏ, ồng nhờm dờng mơ đơs : “ Digơlan Yang rơp pò bar nơm gùng dà kọn ĭn. Bơh or tus jơ do, Kơnrẵn neh ơn rnoas lơi kọn in sơl?”

Ăñ sơntom kơlôi sơnơng bơh sèng lùp do, sền sơwì hwing nùs mơ jòi jơnau Yang. Ăñ dòp git lah: Yang Tom Trồ ơn ală rnoas ñhàl nàng sền gar bŏl he, mơya Kơnrẵn kŭng tă ală bơta lơh bŏl he ĭn kòl kơt, hơ̆ la ală tềl sồt hala ji sồt bŏl he di. Kơnrẵn ai pà gơnoăr pràn nàng bŏl he geh dờng tòm ală bơta gơtòmklac niam ngăn.

Kơnrẵn dŏng bŏl he pha lin bơta rngòt rngơt. Kơnrẵn chồl bơtrut bŏl he pơndòm pơniang ală cau găm kŏng bŏl glăr ji sồt. Kơnrẵn ràng tơlik bơta jak chài hơđăng trồ, bơtọ bŏl he iat kơno bơta tề lăm Kơnrẵn di. Kơnrẵn ai pà bŏl he gơnoăr pràn nàng họi dăn ala cau ndai ĭn, tờ’ai lah tŭ bŏl he gơlơh he ò tơl bơta dòn. Bơta nđàc Kơnrẵn di òhềt kòl kơryan.

Yang Tom Trồ neh ai pà bŏl he ĭn dô rài kis khat gơboh tòm Kơnrẵn. Gen behơ̆, bŏl he kŭng păl kis dô rài kis pò ơnang mơ gơs kwơ rlau tai sơl? Tài bơh să tom bŏl he găm dòp leng phăn bàn bơta kis tơngkah tơngkăñ Kơnrẵn ai pà kòp ngai. Mơ tŭ bŏl he kis tòm bơta khat gơboh hơ̆, ală cau gut dăr kŭng rơp sền gŏ mơ geh tòmgơl bơh bơta kis Kơnrẵn di.

Yang Jesu Yang Jesu neh đơs lah: “Hwềng Yàng dê rơp hơđang Añ, Bơh Kơnràñ neh bong mơñà Añ in nàng bơto yal Jơnau Niam ală cau rƀah lơòi in, Sồr Añ lòt yal ală cau gơkòl kup in geh hồ toh, Cau jơngo geh àng, Cau gơkòl rồn bơklơn geh khat gơboh, Mơ bơto yal nam ai bơta nđàc Yàng dê.” (Luka 4:18-19)

Kọn klau ăñ ji tŭ do neh tih dờng mơ kọn la dô jơnau tơngkah ăñ ĭn lah: Bŏl he găm duh khoai dô Yang Tom Trồ ò tŭ lơi kòl kơryan.

“Behơ̆, dilah Kòn hồ toh bol mê, gen bol mê rơp geh khat gơboh ngan.” (Jang 8:36)

Dan jà bol he dô nùs bal tòm bơta hòi dan: Khoai Yang koñ gơboh kọn di, Kơnrẵn la Bơtau neh dŏng tơwài kọn lik bơh ală bơta kơryan tồi glài di mơ ai pà kọn ĭn gơnoăr pràn nàng kis dô rài kis khat gơboh tòm Kơnrẵn. Tŭ ală kalke gơlik tus tòm rài kis kon, dăn Yang ai kọn ĭn git hơ̆ la broă gen Kơnrẵn koñ ngùi nàng kọn đal git geh bơta nđàc mơ gơnoăr pràn Kơnrẵn di rlau tai. Dăn Yang ai kọn ĭn ò di bơh ală bơta kal ke gen rúc wơl hala rngòt rngơt, mơya dăn bơtơl pràn kọn ĭn cơnđòa lòt tòm bơta khat gơboh Kơnrẵn ai pà. Kọn jơh nùs họi dăn, kọn ai sơnđăn Yang Jesu Krist, Amen.

Ơ ală ồng mọ ọh mi koñ gơboh, Yang Dŏng Klàs Jesu neh chơt mơ kis wơl nàng bŏl he ĭn geh khat gơboh, ò di mìng khat gơboh lik bơh tồi glài mơya gen găm khat gơboh bơh ală bơta rngòt rngơt kòl jàm bŏl he. Yăl tĕ băl mơ Yang ală bơta tềl sồt, basil baso, rngòt rngơt lơi tom ală ngai yau or găm kòl kơt he, lơh he ò tŭ lơi kŏng jai pơrdô lik mơ kis gơs kwơ Kơnrẵn ĭn. Họi dăn Kơnrẵn ai pà he ĭn bơta khat gơboh ngăn tom đah hwing, băl mơ bơta pràn kơldăng nàng kis dô rài kis cau di geh Yang hồ tọh, ò di bơh pràn is ò, mơya bơh gơnap gơnoăr Yang Hwing Gọh ơm tòm ală cau gơri hơ Yang.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi