Dilah oh mi la cau lơh mè lơh bàp, oh mi rơp wơng bơta gơlơh jong să mơ chò hòp tom tŭ sền lăng kòn he dê têh dơng dô ết dô ết. Nùs ông mò oh mi bềng liu dô bơta chò hop ò rgơi rang tơlik tòm tŭ sền bơta têh dơng kòn dê kơp ngai. Ò di bơh kòn geh công nha lơi, mơ ming la tai bơh hơ̆ la kòn kòñ gơboh oh mi dê! Kung be hơ̆ sơl. Yàng Tòm Trồ bol he dê cho hop tom tŭ sền lăng kòn sau Kơnràñ dê.

Ngai do, ngai 08/08/2025, Bơta Hòi Dan Kòp Ngai dan jà ală ồng mò oh mi bơtê bal Jơnau Yàng kơnòm dê bơta dong kơl Dr. Paul J. Palma bơh tơnggumê SÈNG ĐƠS CHỜ CHO HÒP.

“Jehôwa Yàng Tom Trồ ai dê ơm digùl ai; Kơnràñ la cau ling jak ai bơta pha lin. Kơnràñ rơp hòn chò bơh ai mơ bơta chò hòp, Kơnràñ rơp lơh pa wơl ai in, tòm bơta kòñ gơboh Kơnràñ dê; Mơ Kơnràñ rơp bơh ai, mơ hòn chò driau dờng.” (Sôphôni 3:17)

Ur klau bol he sùm gơboh gơbai kơp dơ̆ lòt sền ală kòn lơh tơmya tờm klờng. Tơnơ̆ mơ ală bơta tơmya, bol he sùm ntao mơ tap tê dơng, jong. Gơs dơ̆ jơh tơl nă mê bèp dô nùs bal tap tê jong ngăn, tian gơs ală kơnòm bơtê gơboh ngăn mơ ñă ntao lòt tơmya dô dơ̆ tai! Bol he ai lơh chờ hòp ngăn tòm tŭ hơ wơl mơ dô sèng chò bềng bơta hòn chò pơnrơ làm klơng. Bèp Hơđăng Jong bol he dê kung kòñ lăng ală kòn sau Kơnràñ dê behơ̆. Tòm tŭ bơtau ùr Seba tus cop Jerusalem nàng sền ală broă mơ Yàng Tòm Trồ neh lơh mơ bơtau Salomôn, mò ai lơh krơi ngăn. Tòm sră I Ală Bơtau dap 10, bol he geh sền gŏ lah bơta gơklŏ Israel dê tiă rlau mơ ală bơta mò neh kơlôi. Mò đơs lah nền cê ngăn lang bol git ưnngai ngăn, rlau mơ hơ̆ tai Yàng Tòm Trồ Israel dê ngăn lah chò hòp ngăn. Mò neh đơs mơ bơtau Salômôn:

“Lơngai ngan ală bau ùr bơtau dê! Lơngai ngan ală dĭ gơna bơtau dê, la ală cau gơs mat sùm di đap bơtau, mơ iat bơta jak chài bơtau dê! Pal jòng ro Jehôwa Yàng Tom Trồ bơtau dê, bơh Kơnràñ niam nùs bơtào bơtau hơđang sơbàn Israel dê! Tài bơh Yàng Jehôwa kòñ gơboh Israel sùm sùm, gen Kơnràñ neh bơtào bơtau lơh gơs bơtau at bồ jat bơta song ngan mơ song ring.” (I ală Bơtau 10:8-9).

Yàng Tòm Trồ neh sac rwah Salômôn lơh bơtau at bồ làng bol sac rwah Israel mơ Kơnrañ găm kòñ gơboh. Mơ Kơnràñ ngăn chò hop bơh ồng. Yàng ò di la Bơtau ơm ngai hala ò wet tus. Kơnràñ kung ràng tơlik bơta chò hòp , bơta hòn chò, ndrơm be gùng bol he chò hòp tòm tŭ sền gŏ kon sau he têh dơng. La kon sau Yàng bol he la bơta chò hop, bơta jong să Bèp Hơđăng Jong dê. Cau gơnoăr hwơr Sôphôni neh tơlik bơh bơta chò hòp bềng liu Yàng dê ai kòn làng Kơnràñ dê dô bă bềng rngoh rngac:

“Jehôwa Yàng Tom Trồ ai dê ơm digùl ai; Kơnràñ la cau ling jak ai bơta pha lin. Kơnràñ rơp hòn chò bơh ai mơ bơta chò hòp, Kơnràñ rơp lơh pa wơl ai in, tòm bơta kòñ gơboh Kơnràñ dê; Mơ Kơnràñ rơp bơh ai, mơ hòn chò driau dờng.”
Bơta chò hòp Yàng dê ai bol he in kung ndrơm be bơta chò hòp dô nă cau bèp dê, cau mê dê tòm tŭ sền gŏ ală kòn he dê tơmya, tap tê ò dơh, kơp kờñ kòn đơs chò tai dô dơ̆ tai. Mơ kung be ală oh kơnòm bơtê wơl têl nàng tơmya nàng hơ wơl bơta tap tê ală mê bàp dê, Yàng Tòm Trồ kung chò hòp bơh bol he behơ̆, mơ Kơnràñ rơp ò dơh ràng tơlik bơta chò hòp hơ̆. Kơnràñ chờ hòp bơh bol he, ndrơm be Kơnràñ chờ hòp bơh ală bơtau dơng Israel dê. Mơ tòm Bơtau Krist, Bơtau ală bơtau dê, bol he geh kơp la cau pơrdơn bal bơta gơklŏ Yàng Tòm Trồ dê (Rôma 8:17). Kơnràñ git loh kơp nă cau tòm bol he, mơ bơh bơta kòñ gơboh, bơta chò hòp bal mơ gơnăp gơnoăr ò lôi, Kơnràñ rơp dong klas bol he lik bơh ală bơta sơbơng roh mơ rngòt rngơt.

Hòn chò tĕ ò git nđờ, bơh să tòm Yàng Tòm Trồ gam chò hò[ bơh bol he!

Dan jà bol he dô nùs bal tòm bơta hòi dan: Khoai Bèp kòñ gơboh, kòn jong rơ Yàng mơ duh khoai Kơnràñ bơh ală broă dơng mơ crih crai mơ tê Kơnràñ neh lơh. Kơnràñ git loh ală bơta tòm kòn, bulah behơ̆ Kơnràñ găm chò nùs ơm bal mơ kòñ gơboh kòn. Bulah kòn lơbơn mơ bềng kơlôi rcăng, Kơnràñ găm đơs chò chò hop bơh să tòm kòn gơri mơ Kơnràñ. Ơ Yàng, dan wet nùs kòn hơ Yàng Dong Klas Jêsus la Bơtau Dong Klas gơnăp gơnoăr, dan dong kòn iat kơnọ jơnau đơs chò chò hòp Kơnràñ dê ai ală kòn kòñ gơboh Kơnràñ dê mơ ơn Kơnràñ in dô nơm rai kis lơh niam nùs Yàng. Kòn jơh nùs hôi dan ai sơnđăn Yàng Jêsus Krist, Amen.

Ơ ală ồng mò oh mi kòñ gơboh, Bèp Hơđăng Jong ò càng sôr bol he pal jak chai hala pal geh ală công nha dơng. Kơnràñ kòñ bol he kòñ gơboh Kơnràñ, đềt mêr mơ kis tòm bơta gơtơmklac dềt mêr mơ Kơnràñ. Mơ tòm tŭ bol he jơh nùs ơn să duh broă Kơnràñ, bulah ming găn dê ală broă dềt lúi, kư kơ̆ nùs wìn dơngoh tĕ – bơh git lah tiah lơgar trồ gơklŏ, gơs dô Bơtau gam ñŏ mơ ai jơnau đơs chò chò hòp bơh bol he, bơh kòn sau Kơnràñ dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.