Ồng mò oh mi sên gó ò lah ngai do jơnau song kol cau lơh rơkwet rơkwe mơ cau ai jơnau ò song pơrdòn, “iat bơkah tôr” ơla ơ? Bơta do gơlik gơs tòm rai kis kòp ngai, đah dơlam mơ bơdìh Hiu Jum Goh gơs sơl. La kon sau Yàng, bol he pal kis dô rai kis sang goh mơ song ring jat jơnau song. Ală bơta hớ ming geh jòi bàn tòm Jơnau Kis mơ kớ cê Yàng Tòm Trồ dê lơm.

Ngai do, ngai 10/08/2025, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bal mơ Paula L. Stansbury bơh tơnggume PƠNĐƠL PRÀN KIS TÒM JƠNAU SONG.

“Kơrmap gàr tĕ să tòm mê mơ bơta bơto sồr mê dê; pal kơ̆ wền tĕ tòm ală bơta hơ̆, tài bơh lơh behơ̆ gen rơp dong klàs să tòm mê bal mơ ală cau iat mê sơl.” (I Timôthe 4:16)

Ẵn gam kah tú ẵn pa rwat rơndeh pah bơh tiah cau lơh rơndeh. Tú hớ, ẵn ho is lah rơp sền jơh sră tề lam bơtê ngui rơndeh, gơ gơs 636 khà geh cau pơyoa bal mơ rơndeh. Mơya hớ ming la bơta kơp kỡn lơm, bơta nên nề gen pha is.

Jơk tus dê tòm dô ết jó, tú đeng tơngkah rơndeh pal ceng tus nàng cau in sền wơl, ẵn mơp dơl pò sră hớ nàng jòi git nchi gơlơh mơ rơndeh ẵn jê. Bơh hớ gen ẵn ò hề sên wơl sră hớ.

Tòm rai kis đah hwềng he dê, gơs tua kung behớ sơl. Tư he tìp bơta rung rài, bol he sền Sră Goh nàng jòi bàn seng hơ. Kung bè dô nơm rơndeh pal ceng cau in sền nàng git, rai kis đah hwềng bol he dê kung pal geh rong siam mơ Jơnau Yàng dê kòp ngai. Jơh ală bơta tề lam dô rai kis đah hwềng pràn kơldang gen geh jòi bàn tòm bơta bơtọ sôr song ring bơh Jơnau Yàng dê.

“Mơnàng bơta dòn” la jơnau geh đơs oă tòm ală sră pơyoa ồng Pol dê pơyoa Timôthe in. Jơnau do sơntòm bơh jơnau Latinh, gơtha la “bơta bơto sôr”. Hớ la ală bơta tề lam cau in dòn Yàng.

Bulah mơnàng bơta dòn ò di la tơnggume oă cau gơboh iat, kung bè sră dềt tềlam ngui rơndeh gơs 636 blah. Mơya tòm I Timôthe 6:3-4 neh ai ẵn in dô bơta sên gó pa. Ồng Pol tơng kah lah: “Dilah gơs cau lơi bơto gùng duh khoai ndai, ò jat gùng duh khoai song Yàng Jesu Krist bol he dê, mơ jơnau bơto sồr jat bơta duh rngòt, gen cau hơ̆ la jòng is să he, ò git wă dô êt lơi; mơya khai gơs nùs òs pơndang mơ tòm pơndang bal bơh ală jơnau đơs, tài bơh hơ̆ gơlik gơs bơta ƀoah tòmlah, tòmpìt tòmhà, bơrsèl tơnhial, pin iơh,” Bơta do lơh he in dòp git lah mơnang bơta don ò ro rãn hala kal ke nàng wơng, mơ la Lă bơta nàng dong kòp nă cau mơ Hiu Jum Goh in kớ bơta dòn.

Ngan behớ, ală bơta tề lam tòm sră Timôthe rềp ngan mởai kis kòp ngai. Gơ gơs ală pơnah mơ broă he pal lơh ală cau klau, cau ur dê, hala ală bơta pal gơs cau gơnoar bơto mơ cau dong gar tòm Hiu Jum Goh dê. Mơya ală hơta ndai đơ tus phan sa, bơta ntoat pơrlòng đah poac să, ală bơta he pal lơh gơwèt mơ cau kra, cau pơnu, dong kơl cau pơnrau, ală cau tòm hiu nhă, bơto tơngkah rai kis cau pas dê nàng cau lơi kung sên gó “gen mê kung git lơh mbe lơi tòm hìu Yàng Tom Trồ, hơ̆ la Hìu Jum Goh Yàng Tom Trồ gam kis sùm dê, la jrong mơ mơnàng jơnau song dê.” (‭‭I Timôthe‬ ‭3‬:‭15‬)

Nàng kớ cê tòm ală jơnau bơto song ngan, ẵn pal tòm gơs să tòm ẵn mơ bơta lơh lòt ẵn jê, la bơta mơ poac să ẵn jê tòm dră wơl mơ ẵn. I Timôthe 4:16 tơngkah ẵn lah: “Kơrmap gàr tĕ să tòm mê mơ bơta bơto sồr mê dê; pal kơ̆ wền tĕ tòm ală bơta hơ̆, tài bơh lơh behơ̆ gen rơp dong klàs să tòm mê bal mơ ală cau iat mê sơl.”. Tòm tú bol he kớ nùs kis tòm jơnau song, gen bơta hớ bơtào tơngguh rai kis bol he dê, mơ kung ceng bơta gơrêng niam cau ndai in. Bơta do gơlik gơs kwơ mang rlau tai tú bol he sền di rai kis đah hwềng bol he dê, tòm toh mơ bơta mơ ồng Pol neh tơngkah tòm II Timôthe 4:2-4: “Bơh tŭ tơngai rơp tus mơ cau ò bài iat bơta bơto sồr jơnau song; mơya bơh bol khai kòñ iat jơnau bơkah tồr, gen rơp jat nùs hàm kòñ is he dê mơ pơjum ală cau bơto ơm gùt dar he, 4sềt tồr ò bài iat jơnau song, mơ wèt tồr hơ đah jơnau gơlềng gơlàng.”. Tòm pah rài mơ konmơnùs sac ală bơta iat bơkah tôr rlau mơ sac jơnau song, gen bơta bơtê mơ kis jat jơnau song la ală bơta pal cang ngan.

Rai kis jat poac să bol he dê ò di tú lơi kung kỡn dòp rò jơnau song, mơya dilah kỡn kis jong rơ Yàng Tòm Trồ, kỡn Hiu Jum Goh bơtào tơngguh mơ gơs dô rai kis niam mơ oh me he dê, bol he pal kớ nùs lơh jat ală bơta bơo di pal mơ Sră Goh.

Tòm ală ngai neh rlau, ẵn kơrhia tòm rai kis kòp ngai, hớ la lòi rai kis ẵn jê geh “geh ròng bơh ală jơnau bơta dòn dê mơ bơh bơta bơto sồr niam mơ mê neh jat.” (I Timôthe 4:6). Bơta kis jat jơnau song kung bè la tú jơ “sền mơ lơh pa wơl” rai kis đah hwềng he dê mơ rai kis gơwèt mơ oh mi ơm gut dar, ceng wơl bơta bơtào tơngguh Hiu Jum Goh in.

Mơ ẵn kung sền wơl nền nề tus di ală bơta tề lam: tòm Jơnau Yàng, tòm rai kis, mơ… tòm sră tề lam ngui rơndeh! Ồng mò oh mi gen mbe lơi taih? Ồng mò oh mi rcang sir cơnđoà lòt tòm gung ntoat tus bơta têh dơng mơ wil tơl mơ Yàng Tòm Trồ pà ai bol he dê, mơ kis kớ cê jat Jơnau Kơnràn ò?

Dan jà bol he dô nùs bal tòm bơta hòi dan: Ơ Yàng gơboh. Gơs tú rai kis poac să kon dê ò kỡn dòp rò jơnau song mơ buôn nàng kol pơrwài bơh ală bơta bơkah tôr. Digul dunnia gơs ngan mơ ò ngan tòm pơrlú bal, dan Yàng Hwềng Goh sol pơnđang nùs nhơm kon nàng kon in git jơnau song mơ kung kớ nùs kis tòm bơta hớ. Dan Yàng sên gar kon tòm Jơnau Yàng, tòm bơta đềt mêr mơ Hiu Jum Goh mơ oh mi tòm bơta dòn he dê, nàng rai kis kon geh cơnđoà lòt mơ Kơnràn dô bă kớ nền. Kon hòi dan, ai sơnđan Yàng Jesus Krist, Amen.

Ơ ală ồng mò oh mi kỡn gơboh, nchi bơh tài rai kis oă cau dòn dê gam ò geh têh dơng tòm bơta dòn mơ dòp git jơnau song taih? Hớ la tài bơh bol he ò lơh nền tòm bơta sền mơ bơtê Sră Goh, hala jòi tus Jơnau Yàng tòm tú kal ke. Siớu Jơnau Yàng lơh rai kis đah hwềng he dê ro rãn, mơ bơta sơbơng roh rlau tai hớ la bol he buôn ngan dùh tòm bơta bơto tis.

Behớ gen, nàng kis tòm jơnau song gen ồng mò oh mi pal pơnđơl pràn sên mơ bơtê jơnau Yàng dô bă tơriang tơryông, nàng Jơnau Yàng ò di ming la dô pang sră nàng bol he jòi tus tú kal ke, mơ Jơnau hớ pal kis mơ bêng gơnap gơnoar tòm rai kis bol he dê. Bẵn lòi Sră Goh ồng mò oh mi dê gơlik gơs dô nơm sră lòi gòi mơ bêng kơmbuh bơh jó ngai sơnam, mơya sơntòm té ngai do. Dan Yàng dong ồng mò oh mi ji gloh tơhir tòm jơnau song mơ bơtê git jơnau song mơ kis jat jơnau song. Jơnau Yàng la Jơnau Song.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.