Bŏl he git lọh bơh bơta gơs kwơ broă bơtê thể dục mơ phăn ngùi sa niăm ngăn sơl? Jơh tơl nă bŏl he git jơh, mơya ò di cau lơi kŭng lơh jat. Bơta pha is digul broă git bơta hơ̆ la di băl mơ broă lơh jat di, mơ kis gơwèt bơta di, mơya do là dô nơm broă ò tŭ lơi pơndròm ò.

Kŭng behơ̆, digơlan bŏl he git ală bơta Sră Goh bơtọ bơh bơta koñ gơboh, bơta tọh glài, mơ bơta dòn duh. Bŏl he kung rơp hơ wơl tòm tọh ală sèng lùp bơh ală jơnau lùp bơh jơnau sŏng. Mơya gen, bơta wă wờng hơ̆ rơp tòmgơl rài kis bŏl he di ngăn sơl? Mơ bơta kwơ màng rlau tai la, bơta hơ̆ rơp tơl tồ cèng bŏl he tus bơta dŏng klàs găm sum sum sơl?

Ngai do, ngai 12/08/2025 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Tori Troncone dê bơh Tơnggume GIT SÈNG HO LƠM GEN ÒHỀT TƠL!

“Mơya Etien gơs bềng lìu Yàng Hwềng Goh, tơnggòr sền hơđang trồ, gŏ bơta gơklŏ Yàng Tom Trồ dê, mơ Yàng Jesu ntào đah ma Yàng Tom Trồ;” (Broă 7:55)

Ăñ neh bơsram băl dô ơdŭ bơtê tòm klờng đại học gơs pơnrơ la buơn – ò di bơh bơta bơtê buơn hala ò gơs oă bài tập, mơya bơh broă cau bơtọ rcang bŏl he ĭn lài mơ tŭ lòng wơl. Lài mơ tŭ lòng jơh tap sră, cau bơtọ rơp phàt jơnau hơ wơl lài. Ò di là bơta bơtọ nàng crap wơl, kŭng ò di là pet sră cih nàng kah hala rơndăp sră bơtọ ò, mơya là sèng hơ wơl ngăn bơta lòng sră di. Lài mơ tŭ kòp bơta lòng, ală cau bơtê rơp geh rcang ală sèng lùp mơ sèng hơ tòmtọh gơwèt mơ sèng hơ hơ̆ di.

Bulah ală cau bơtê rơp geh dòp ală sèng ho ndrom băl, mơya ò di ñcau lơi kŭng gơs khà điểm A tom ơdŭ. Tơ’ai lah, gơs ală cau bơtê găm ò lòt găn ală bơta lòng! Geh rcang sèng ho rau kŭng ò tơl tồ gơlik cồng nha niăm.

Tom Broă ală cau Gơnoăr Bơtô dờng tap 7, Etien geh cèng lòt didap Mpồl Kwăng Tơrña. Gơs dô êt nă cau yăl cơng blac, lơh glài ồng đơs tràl sơrbil mơ đơs tòm pơndăng wơl Jơnau Yang (Broă 6: 9 -15)

Cau gơnoar dờng lam bồ ơn phan duh khoai lùp Etien lah: “Ală bơta hơ̆ gơs ngan behơ̆ sơl?”

Do la sèng ho wơl Etien di: “Ơ ală bèp, ală bi, iat tĕ añ! Yàng Tom Trồ gơklŏ neh tơlik să mơ ồng pàng bol he la Abraham tòm tŭ khai gam ơm tòm Mesôpôtami, lài mơ tŭ tus ơm tòm Caran” (Broă 7:1-2)

Ala wơl ală jơnau lơh glài ma blac, Etien neh crap wơl Ho Bal Yau diđap Mpồl Kwăng Tơrña. Bơh Abraham tus Dabit. Etien neh yăl wơl dô bă lọh lang bềng lìu Yang Hwing Gọh bơh Jơnau Yang, sơñio Yang Jesu la Bơtau Mesia (sèng1-50)!
Krơi is ngăn, tài bơh Etien găm ràng tơlik jơnau yăl tơnggit do ală cau bơtọ jak chài Ho băl Yau ĭn. Mpồl jơnŭm dờng do, la Mpồl Kwăng Tơrña, tơrgòm ală cau bơtê jak rlau jơh gùng duh khoai Juda di. Bŏl khai òs mòng bơh ală cau mơ ală bơta gơlik gơs gen Etien neh yăl tơnggit. Tơ’ai lah Etien mơ mpồl jơnŭm dờng gơs dô “jơnau ho” dô bă băl!

Mơya, ndrom be broă gơs jơnau ho wơl ò lơh nền ci bơta cồng nha tòm ơdŭ bơtê klờng đại học ăñ ji, broă ăñ gơs sèng ho wơl kŭng ò tơl nàng Mpồl Kwăng Tơrña lơh jat lah Yang Jesu la Bơtau Mesia. Òs ngăn lah, bŏl khai neh pơndăng săng Etien bơh broă do. Bơh jơnau yăl tơnggit diđap Mpồl Kwăng Tơrña do neh gơlik gơs Etien là cau chơt sơnrờp bơh Jơnau Yang Niăm tòm pah rài Hiu Jum Goh (sèng 57-60)

Bơta pha is Etien băl mơ ală cau jak chài tòm mpồl jơnŭm dờng do ò di la bơta jak chài, bồ dơngoh, hala tơ’ai lah Sră Goh bŏl khai găm sền. Bơta pha is là Etien neh geh tòmgơl bơh bơta gơtòmklac băl mơ Jesu Krist mơ geh bềng lìu Yang Hwing Gọh (Broă 6:5). Ồng dòn nền cê lah Yang Jesu la Bơtau Mesia tian gơs ồng kŏng phi să bơta kis he di tồ bơtọ yăl Jơnau Niăm.

Be Pol neh chồl bơtrut Hiu Jum Goh Philip: “Ngan behơ̆, añ sền jơh ală bơta kung be bơta roh lơm, bơh bơta dòp git Yàng Jesu Krist, Yàng añ jê, la dờng màng rlau jơh;” (Philip 3:8)

Bŏl he sền tĕ Sră Goh bơh nùs hur hir koñ geh git Bơtau Krist dô bă jrô ndơp rlau. Băñ lòi broă sền Sră Goh mìng be broă geh git jơnau ho lài tòm rài kis, gen la “jơnau ho wơl” hơ̆ ò di ngăn kis wăñ lơnggơr, ò tòmgơl bŏl he gơlik gơs be Yang Jesu rlau tai. Họi dăn tĕ băl mơ Yang Hwing Gọh ò di mìng ai gơnoăr bồ dơngoh bŏl he wă lọh ală jơnau bŏl he sền, gen họi dăn Kơnrẵn tòmgơl hwing nùs bŏl he. Bŏl he gơlik gơs tĕ ală cau gơri ho Yang bềng tơl Hwing Jơnau sŏng tian gơs Jơnau sŏng hơ̆ lik bơh rài kis bŏl he.

Sơlo dờng tĕ tòm bơta dòp git Bơtau Krist, lơh bơta niăm hàng mơnĕ Bơtau Krist bềng tơl tòm rài kis bŏl he.“Ai tĕ jơh ală bơta jak chài nàng jơnau Bơtau Krist dê ơm bềng lìu tòm oh mi; ngui bơta đơs crih, bơta đơs chò, mơ sèng đơs chò đah hwềng mơ bơto tơngkah bal mơ gơp, mơ tòm nùs đơs chò Yàng Tom Trồ in dô bă gơs bơta nđàc.” (Kôlôse 3:16)

Dan jà bol he dô nùs bal tòm bơta hòi dan: Khoai Bèp Hơđăng Trồ, kọn Ưnngai Kơnrẵn tài bơh neh ai pà Jơnau Kơnrẵn di kọn ĭn mơ Jơnau Kơnrẵn la wil tơl, ò tŭ lơi tòmgơl. Kọn họi dăn lah, bơh bơta gơtòmklac dềt mềr kọn di gơwèt mơ Yang Jesu, Yang Hwing Gọh Kơnrẵn di rơp bềng lìu tòm kọn, ai kọn ĭn gơnap gơnoăr nàng git mơ wă lọh Jơnau Kơnrẵn mơ jơnau lọh lang pa mo. Dăn tòmgơl tĕ bơta koñ gơboh kọn di gơwèt Jơnau Sŏng ĭn Kơnrẵn di. Dăn ai hwing nùs kọn tơhir broă bơtê git Jơnau Yang, lơh jơnau hơ̆ ĭn gơlik gơs wăñ lơnggơr, mơ tòmgơl rài kis bŏl kọn gơlik be Kơnrẵn. Kọn jơh nùs họi dăn, Kon ai sơnđăn Yang Jesu Krist, Amen.

Ơ ală ồng mọ ọh mi koñ gơboh, bŏl he găm jòi ală sèng ho wơl rài kis he di bơh Sră Goh tòm hwing nùs mbe lơi? Jơnau Yang gơs lơh rngoh rngac, gơs lơh broă, gơs tòmgơl bŏl he hala mìng là ală jơnau sră pơ’ar lơm?

Sơlo dờng tĕ tòm bơta dòp git Yàng tòm bơta gơtòmklac dềt mềr gơwèt mơ Kơnrẵn mơya ò di dơh wơl tòm broă mìng git bơh ală bơta jak chài. Lòi tĕ Kơnrẵn ơm tòm bŏl he, at bồ rài kis bŏl he bơh Jơnau Yang, mơ lơh bơta niăm hàng mơnĕ Bơtau Krist di bềng tơl tòm rài kis să tom he di. “Ai tĕ jơh ală bơta jak chài nàng jơnau Bơtau Krist dê ơm bềng lìu tòm oh mi; ngui bơta đơs crih, bơta đơs chò, mơ sèng đơs chò đah hwềng mơ bơto tơngkah bal mơ gơp, mơ tòm nùs đơs chò Yàng Tom Trồ in dô bă gơs bơta nđàc.” (Kôlôse 3:16)

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.