“Pheej hnov qab” cuag li dhau los ua ib qhov teeb meem rau tiam no. Peb tab tom ua neej nyob rau lub ntuj maj nroos, yog li qhov uas peb lub hlwb “nco tsis zoo” kuj tsis muaj dabtsi yuav ceeb. Tej lub sijhawm tau sib teem, tej haujlwm yuav tau ua, ntau zaug tej xwm txheej tseem ceeb – yog tsis muab sau cia ces kuj muaj qee zaum peb yuav hnov qab. Nyob hauv lub neej sab ntsujplig los kuj ib yam li ntawd, muaj ntau zaug Vajtswv ntuas peb, txhawb peb, qhia peb, tiamsis tomqab ib lub sijhawm luv, peb hnov qab yam uas Vajtswv hais lawm. Tej zaum yog vim li no Vajtswv thiaj muab Vajluskub pub rau peb – kom peb tau nyeem, muab los xav thiab ua lub neej raws li Vajtswv tej lus txhua hnub.

Hnub no, yog hnub 13/08/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia John P. King dhau ntawm Zaj kawm TUS MEM QHUAV NPUB LAWM

“Tus Tswv teb li no rau kuv: Koj cia li muab zaj uas kuv qhia rau koj hauv nruab npau suav, sau kom meej rau ntawm tej txiag zeb kom tus neeg uas khiav ceev los thiaj nyeem tau” (Hanpakus 2:2).

“Ib tus mem qhuav npub,… zoo dua ib tus neeg muaj lub hlwb nco zoo.”

Ntawm no yog kuv tus phooj ywg lo lus uas nws pheej hais. Mloog cuag li kuj zoo, tiamsis qhov tseeb tiag. Ntau zaug peb cim civ ntseeg tias yus nco tau txhua yam, tsis tas yuav muab sau cia ua dabtsi. Tiamsis hais tseeb tiag lees tias, peb txhua tus kuj puav leej paub: peb lub hlwb nco yeej tsis txaus ntseeg npaum li qhov uas peb xav.

Tomqab ntau zaug mus khw, kuv rho tau ib zaj kawm tias: Yog xav yuav kom tau khoom txaus, khoom zoo yog yuav tau muab tag nrho tej uas yus yuav yuav sau cia. Thaum zoo li no, kuv thiaj tsis raug sawv ntawm lub chaw them nyiaj hu xov tooj rau pojniam nug saib puas hnov qab yam dabtsi. Ntawm kuv, muab sau cia yog tib txoj kev ua rau kom kuv tsis raug rov qab mus yuav zaum ob. Yog li thaum twg kuv twb muab sau cia, vim kuv pheej “hnov qab” ntau dua li uas kuv “nco”.
Muaj ntau tus lub hlwb nco zoo dua kuv. Vim li ntawd, kuv yuav tau nco Vajtswv tshav ntuj, vim Vajtswv nkag siab kuv. Vajtswv paub kuv lub hlwb muaj nrim, yog li nws thiaj pub Vajluskub rau kuv, ib yam li sau tshwj xeeb rau kuv! Vajtswv paub tias kuv yeej nco tsis tas tej uas Vajtswv xav kom kuv kawm, yog li Vajtswv thiaj muab sau tag nrho kom kuv yooj yim kawm. Tsis tas li xwb, thaum kuv qhia Vajtswv txojlus rau lwm tus, Vajtswv tseem pub rau kuv muaj qhov chaw tshuaj, kom paub tias kuv hais yog tej uas Vajtswv qhia. Rau qhov kuv yeej tsis xav qhia Vajtswv txoj kev hlub loj raws li qhov uas “qhia yuam kev”!

Yog li Vajtswv thiaj siv tshaj li 40 tus tib neeg sib txawv, nyob rau hauv 1600 xyoo, los sau tag nrho phau Vajluskub. Tas nyob hauv 1900 tomqab no, Vajtswv siv ntau tus tib neeg los muab khaws cia, theej tawm, txhais thiab cev Vajtswv tej lus- txog rau thaum uas kuv muaj phau tuav rawv ntawm tes, thiab nyeem yog kuv cov lus. Kuv ua Vajtswv tsaug kawg nkaus!

Vim li no, kuv thiaj xav tsis thoob vim txog tav no yeej tseem muaj ntau tus ua xyem xyav tsis paub Vajluskub cheem tsum tiag, lossis puas txaus ntseeg. Lawv pheej hais xws li: “Yog Vajtswv xav hais dabtsi rau kuv ces vim li cas Vajtswv ho tsis hais tim ntsej tim muag?” lossis “Vajluskub qub lawm, yeej tsis muaj dabtsi tshiab rau tiam no”. Lossis “Yog Vajtswv yog Vajtswv vim li cas Vajtswv ho tsis siv txoj kev twg kom zoo dua li uas muab sau ua ntawv?”

Koj puas paub, Vajtswv tsis yog tsuas nkag siab kuv xwb, Nws tseem nkag siab tag nrho peb. Leej Txiv saum ntuj muaj ntau yam zoo xav nthuav tawm rau peb. thiab Vajtswv paub txoj kev zoo tshaj kom tib neeg txais tau tej uas Vajtswv qhia- ntawd yog muab sau ua ntawv!

Tseeb tiag, Vajluskub kuj qhia pom qhov no meej heev. Pivtxwv thaum Mauxes ua tawg ob daim txiag zeb thawj, Vajtswv yog tus uas rov qab saum Kaum Nqe Kevcai ntawm Vajluskub txhais tes (Khiavdim 34:1). Tomqab ntawd, Vajtswv hais rau Mauxes kom muab tejlus cog tseg ntawm Vajtswv thiab cov neeg Yixalayees sau tseg (Khiavdim 34:27).

Tas nyob hauv 2 Kevcai, thaum Vajtswv paub ua ntej tias cov pejxeem lawv xav kom muaj vajntxwv li lwm lub tebchaws, Vajtswv kuj taw kev meej meej rau tus vajntxwv tom ntej:

“Thaum nws ua vajntxwv kav lub tebchaws, nws kom neeg mus muab phau ntawv uas sau Vajtswv tej lus thiab tej kevcai ntawm cov Levis uas ua povthawj los theej dua ib phau raws nraim li thawj phau rau nws. Nws yuav tsum khaws phau ntawv no thiab niaj hnub nyeem mus tas nws simneej, nws thiaj li paub hwm tus Tswv thiab ua raws li txhua yam uas qhia tseg rau hauv phau ntawv ntawd.” (2 Kevcai 17:18-19).

Tus vajntxwv no yuav tau cim civ sau tej kev cai cia. Vajntxwv yuav tau nyeem txhua hnub, kom thiaj tsis hnov qab tias yus yog leej twg ntawm Vajtswv xub ntiag thiab ua lub neej hwm Vajtswv nrog rau mloog Vajtswv lus. Yog tsis muab Vajtswv tej lus los xav txhua hnub, peb yooj yim mus txhaum Vajtswv txoj kev uas npaj tseg rau yus tes haujlwm.

Tus cev lus Hanpakus kuj tau Vajtswv samhwm kom muab Vajtswv tejlus uas Vajtswv hais lawm sau cia.

Nyob rau lub sijhawm muaj kev nyuaj siab, yawg kam nug tej lo lus txog Vajtswv txoj kev ncaj ncees thiab txoj kev txiav txim. Thaum yawg ua siab ntev tos Vajtswv lo lus teb, Vajtswv pib hais li no:

“Tus Tswv teb li no rau kuv: Koj cia li muab zaj uas kuv qhia rau koj hauv nruab npau suav, sau kom meej rau ntawm tej txiag zeb kom tus neeg uas khiav ceev los thiaj nyeem tau” (Hanpakus 2:2).

Vajtswv xav kom lo lus teb uas Vajtswv teb Hanpakus tau qhia mus rau coob tug. Yog li yuav ua li cas kom sawv daws thiaj yuav txais tau yog lub ntsiab lus? Yuav tau muab sau cia! Sau kom meej, yooj yim nkag siab, kom tus twg nyeem los kuj nkag siab thiab coj mus qhia tau rau txhua qhov.

Ntawd tsuas yog ib qhov piv txwv xwb, Vajtswv tau samhwm rau Vajtswv haiv neeg “sau” ntau zaug. Tag nrho Vajluskub yog tej lus ciaj sia, muaj hwjchim, tau Vajtswv tshoov. Zoo li cov vajntxwv thaum ub, peb yuav tau muab peb phau Vajluskub los nyeem txhua hnub, kom peb nkag siab zoo Vajtswv lub siab nyiam, thiab txhais ruam hauv Vajtswv txoj kev zoo tseg rau yus lub neej.

Peb yuav tau paub kom zoo thiab nco ntsoov Vajtswv tej lus uas muaj kev hlub, kom peb ua lub neej kom yog rau qhov tseeb no. Cia li nyeem Vajluskub. Nyeem tas rov qab nyeem dua. Nyeem dua ib zaug ntxiv. Ua zoo saib txhua nqe lus dawbhuv hauv tej nplooj ntawv ntawd. Thiab txhua zaug uas ib nqe Vajluskub twg chwv txog koj lub siab, cia li muab sau rau hauv ntawv thiab nqa nrog nraim yus.
Vim… “ib tug menyuam qhuav npub… tseem zoo dua lub hlwb zoo”.

Thov caw nrog kuv peb thov Vajtswv ua ke: Kuv tus Vajtswv, kuv ua Koj tsaug vim Koj paub zoo kuv yog ib tug neeg qaug zog, pheej hnov qab thiab yooj yim tsis nco qab. Ua Vajtswv tsaug vim Vajtswv tau sau Vajtswv tej lus cia txhij txhua nyob hauv Vajluskub, kom kuv tau nyeem, xav thiab cim nco txhua hnub. Thov pab kom kuv hlub Vajluskub, vim Nws yog Vajtswv lub suab hais tuaj rau kuv. Thov kom Vajtswv tej lus rhau cag kom tob hauv kuv lub siab, dhau los ua qhov kaj coj kev thiab yog lub hauv paus zog rub kuv tes txhua lub caijnyoog. Kuv thov hauv Tswv Yexus Khetos lub npe. Amees.

Cov kwv tij txhua tus, koj puas tab tom tuav Vajtswv tej lus cia zoo zoo nyob hauv yus lub neej? Txhob ua tus hnov tas cia li tsis nco qab. Yuav tau nyeem, xav, thiab muab sau tseg, kom tej lus ntawd dhau los ua ib feem yuav cais tsis tau tawm ntawm koj lub neej. Rau qhov muaj ntau zaug, ib nqe Vajluskub tau muab sau rau hauv ntawv yuav dhau los ua lub zog loj pab koj lub sijhawm uas koj cheem tsum tshaj. Cia siab tias peb txhua tus yuav “zais Vajtswv tej lus hauv siab”, kom tej lus ntawd dhau los ua lub zog nrog peb txhua txoj kev.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.