“Mhar híu” gơlơh bè dồ nơm bơta gơlik gơs tòm oă cau. Bol he he gam kis tòm dunnia bềng bơta ngồr ngàc, lơh bồ tơngoh he in mhar híu kung ờ di la dồ broă ai lơh krơi. Ală tú tìp mat, ală broă pal lơh, hala ală broă dờng màng – dilah he ờ cih gen oă dớ bol he kung híu mơ sang lòi gơ sơl. Tòm rài kis đah hwềng kung bè hớ sơl, oă dớ ngan Yàng tơngkah, pơndờm pơniang, bơto sồr bol he, mơya mìng dồ ết tơngai lơyiah, bol he lơh híu jơnau mơ Kơnràn neh đơs. Digơlan tài bơh hớ mơ Yàng pà ai Sră Goh – nàng bol he rgơi đòk, kơlôi sơnơng mơ kis bơh Jơnau Yàng kòp ngai.

Ngai do, ngai 13/08/2025, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bal mơ ồng John P. King bơh tơnggume GAI KƠRYONG NEH SIAR.

“Mê cih wơl tĕ bơta gơtơnggŏ, mơ cih loh làng gơ hơđang ală mpàn cih, tồ dô nă cau ntoat rgơi sền gơ.”Habakuk 2:2

“Dồ nơm gai kơryong siar …kung niam rlau dồ bồ tơngoh niam”

Do la jơnau ờs mờng gơlik bơh dê bơr cau bơyô lơh broă an dê. Iat gơlơh bè jơnau kơnhơl, mơya jơnau di ngan. Oă dớ bol he jòng să lah he rgơi kah prap jơh ală bơta, ờ càng pal cih lòi wơl. Mơya dilah dờn dờp ngan, gen cau lơi tòm bol he kung git lah: bồ tơngoh ờ di pal nàng he dờn bè ờs mờng he kơlôi.

Tơnớ mơ oă dớ an lòt tòm hìu drặ, an bơtê is să tờm an lah: dilah kờn roat tơl phan, gen niam rlau jơh la an pal cil lài tòm dồ pang sră ală phan pal roat. Kơnòm mơ hớ, an ờ càng hòi lùp bau ùr an dê nàng sền gơs phan lơi ờ hềt roat hala ờ. Gơwèt mơ an, cih wơl là dồ broă nàng să tờm an ờ rê wơl tòm hìu drặ dớ bar tai. Gen bè hớ an sùm cil wơl, tài bơh an ờs híu rlau mơ kah phan pal roat.

Oă cau gơs bồ tơngoh kah prap niam rlau mơ an. Gen bè hớ, an sơlơ git ừn ngài Yàng, tài bơh Kơnràn ngan git an loh làng. Yàng git bồ tơngoh an dê ờ wil tơl, gen tàng Yàng neh pà an in Sră Goh, gơlơh bè mìng cih lời wơl să tờm an dê lơm! Yàng git an ờ rgơi kah jơh ală bơta mơ Kơnràn kờn an bơtê, gen Kơnràn cih wơl nàng an rgơi sền mơ đòm jat. Ờ di mìng bè hớ lơm, tú an tom pà Jơnau Yàng tus dê cau ndai in, Yàng neh ai an in gơs tiah nàng sền swì nền cê, nàng lơh nền cê lah an gam đơs đi ală jơnau mơ Yàng neh bơtê. Tài bơh ngan la să tờm an ờ kờn ràng tơlik bơta bơto bơh bơta kờn gơboh Yàng Tòm Trồ dê jat bè cau dunnia dê.
Gen tàng Yàng neh ngui 40 nă cau krơi is, tòm rlau mơ 1600 nam, nàng cih wơl jơh Sră Goh. tơnớ tòm mờr 1900 nam, Yàng pơnjat ngui oă cau nàng prap gàr, cil wơl, cil oă jơnau ndai mơ tom pà Jơnau Yàng dê – jơl tus dê tú an rgơi at jơnau Yàng dê tòm tê, mơ đòk mơ jơnau đơs mè deh an dê. An ừn ngài Yàng oă ngan!
Gen bè hớ, an ai lơh krơi ngan tài bơh tus dê tú do kung gam ơs oă cau pin wil wơl ờ git la Sră Goh ngan gơs kwơ màng hala ờ, hala dipal dờn dờp hala ờ. Ală cau do ờs mờng đơs gơlơh bè: “Dilah Yàng kờn đơs mơ an gen nchi bơtài ờ đơs tòm toh mat mơ an taih?” hala “Sră Goh la pang sră neh yau rau, ờ gơs jơnau lơi dipal tai tòm rài do ờ.” hala “Dilah Yàng la Yàng Tòm Trồ gen nchi bơtài Yàng ờ ngui dồ pơnah lơi niam rlau mơ cih wơl tòm sră taih?”

Bol he git sơl ờ, Yàng ờ di ming git loh làng să tờm an, Kơnràn kung git loh làng jơh tơl nă bol he sơl. Bèp Hơđang trồ gơs oă bơta niam kờn ràng tơlik mơ bol he. Mơ Yàng kung git loh làng pơnah nàng kon mơnuss rgơi dờp rò jơnau bơto Yàng dê – hớ la cih wơl jơnau tòm pang sră!

Ngan bè hớ, sătờm Sră Goh kung đơs loh làng bơta do. Gơlơh bè tơnớ mơ tú ồng Môise lơh bơcah bar nơm mpàng lú bơta boh lam sơnrờp, Yàng Tòm Trồ la Bơtau neh cih wơl 10 bơta boh lam bơh ràstê Kơnràn dê (Lik Ediptơ 34:1). Tơnớ mơ hớ, Yàng sồr ồng Môise pal cih wơl jơnau hơbal mơ Yàng neh hơbal mơ làng bol Israel (Lik Ediptơ 34:27).

Tòm sră Yal Wơl Bơta Boh Lam, tú Yàng git lài làng bol rơp kờn geh dồ nă cau bơtau bè ală làng bol ndai, Yàng kung neh ai jơnau tề lăm dồ bă loh làng bol khai in tus dê cau bơtau tòm ngai tơnớ:

“Tòm tŭ khai nggui hơđang sơbàn lơgar khai dê, khai pal cih wơl tòm dô nơm sră pồt să tòm khai in bơta boh lam do bơh di ală cau gơnoar ơn phan duh khoai la ală cau Lebi. Pồt sră hơ̆ pal ơm mơ khai, mơ khai pal sền sră pồt hơ̆ tòm jơh ală ngai rài kis khai dê nàng khai rgơi bơtê duh rngòt di Jehôwa Yàng Tom Trồ bol khai dê mơ kơrhia lơh jat jơh ală jơnau bơta boh lam do mơ ală bơta lơh nền gơ dê” (Yal Wơl 17:18-19)

Cau bơtau do pal cih wơl bơta boh lam. Cau bơtau pal đòk kòp ngai, nàng ờ híu he la ncau dê đap mat Yàng Tòm Trồ, mơ kis bơh nùs duh rngòt bal nùs dờn bơr Yàng. tài bơh dilah ờ kơlôi sơnơng jơnau Yàng kòp ngai, bol he mhar ngan lòt tìs gùng mơ Yàng neh rcang sir rài kis mơ gơnoar broă he dê.

Cau gơnoar hwuơr Habakuk kung geh Yàng jao gơnoar sồr la cih wơl jơnau đơs Yàng dê. Tòm tú moat jrùng mơ rơmsă, ồng ờ khin lùp bơta song ring mơ bơta cahrna Yàng Tòm Trồ dê. Tú ồng ơt ơl kơp gơn sèng hơ wơl, Yàng sơntờm đơs bè do:

“Mê cih wơl tĕ bơta gơtơnggŏ, mơ cih loh làng gơ hơđang ală mpàn cih, tồ dô nă cau ntoat rgơi sền gơ.”(Habakuk 2:2)

Yàng kờn jơnau hơ mơ Kơnràn neh pà ai ồng Habakuk in rơp geh oă cau ndai git tus. Gen mbè lơi nàng oă cau rơp git jơnau bơto sồr do dồ bă loh làng taih? Hớ la pal cih wơl! Cih dồ bă loh làng, buơn git, tồ cau lơi đòk kung kah prap mơ rgơi cềng tus làm bă tiah nàng tompà.

Do mìng la dồ ết jơnau pơnyơu, bơh Yàng neh sồr làng bol Yàng dê cih oă dớ rau. Jơh Sră Goh la jơnau kis, bềng gơnap gơnoar, mơ sătờm Yàng Tòm Trồ khồm nhơm. Bè ală cau bơtau rài yau òr, bol he kung pal gơs Sră Goh is he dê nàng đòk kòp ngai, nàng bol he rgơi git nùs kờn Yàng de, mơ cơnđoà lòt tòm rơndap niam mơ Yàng neh rcang sir rài kis he in.

Bol he pal git loh làng mơ kah prap jơnau kờn gơboh Yàng Tòm Trồ dê, nàng rgơi kis di mơ jơnau song hớ. Pal đòk Sră Goh. pal đòk oă dớ. Sền dờng màng kờp jơnau neh geh cih tòm pang sră hớ. Mơ kờp tú lơi Jơnau Sră Goh tup bư nùs nhơm he dê, pal cih tòm sră mơ sùm cèng gơ bal mơ he.

Tài bơh “dồ nơm gai kơryong neh siar … kung niam rlau dồ bồ tơngoh niam”

Dan jà bol he dô nùs bal tòm bơta hòi dan: Khoai Yàng, kon ừn ngài Yàng tài bơh Yàng git loh làng kon la dồ nă cau lơbơn lơnio, mhar híu mơ ờbat kah. Kon ừn ngài Yàng tài bơh Kơnràn neh prap lòi Jơnau Yàng dê bềng tơl tòm Sră Goh, nàng kon rgơi đòk, kơlôi sơnơng mơ kah prap kòp ngai. Dan dong kon kờn gơboh Sră Goh, tài bơh do la jơnau đơs mơ să tờm Yàng đơs tus mơ kon. Dan Jơnau Yàng dê srò jrô ryas tòm nùs kon dê, gơlik gơs bơta àng sòl pơnđàng gùng lòt mơ la mồng bơta pràn yò đơ kon tòm ală tú tơngai. Kon jơh nùs hòi dăn, ai sơnđan Yàng Jesus Krist, Amen.

Ơ ală ồng mọ oh mi kờn gơboh, he gam prap Jơnau Yàng dồ bă wil tơl tòm rài kis he dê sơl ơ? Ban mìng iat lơm mơ híu gơ. Pal đòk, pal kơlôi sơnơng, mơ cih wơl tòm pang sră is he dê, nàng Jơnau Yàng gơlik gơs dồ pơnah tòm rài kis he dê mơ ờ rgơi cah is. Bơh oă dớ, dồ sèng Sră Goh geh cih wơl tòm pang sră rgơi gơlik gơs bơta pơndờm pơniang he in tòm tú he kờn. Kơp kờn ngan kòp nă bol he rơp “prap jơnau Yàng tòm nùs”, nàng Jơnau Yàng gơlik gơs bơta pràn mơ lòt bal mơ bol he tòm kòp gùng he lòt.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.