Lub neej ntau zaug pheej cab peb mus rau hauv ib txoj kev kiv tsis so. Haujlwm, tsev neeg, lub nra, nrog rau tej homphiaj tseem tsis tau ua, tej sijhawm teem sib ntsib ntau txuas ntxiv… ib hnub dhau ib hnub, peb khiav tsis so. Tiamsis nyob hauv tej suab nrov nroo ntws hauv ntiajteb, muaj ib tug tab tom hu peb los ntawm Nws lub suab mos muag. Tsis paub peb puas muaj txaus lub siab ntsiag to los mloog lub suab ntawd?

Hnub no, yog hnub 14/08/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Carolyn Fraiser dhau ntawm Zaj kawm UA ZOO MLOOG.

“Chiên Ta nghe tiếng Ta, Ta biết chúng và chúng theo Ta.” (Giăng 10:27)Vajluskub: “Kuv pab yaj hnov kuv lub suab thiab lawv paub Kuv thiab lawv nrog Kuv mus” (Yauhas 10:27).

Lub sijhawm dhau los, kuv lub siab pheej hnov Vajtswv tej lus maj mam tshoov kuv: “Ua tib zoo mloog”. Thaum pib, kuv xav tias ntshai Vajtswv tab tom ceeb toom kuv. Xyoo tas los yog ib xyoo uas tsis muaj sijhawm khoom, rawm heev tsis khoom. Kuv ke ua haujlwm tom chaw ua haujlwm, ke koom tes rau Pawg Ntseeg tej haujlwm, tas txog kuv tus txiv tseem tsis muaj zog, thiab tseem tshuav ntau lub nra yuav tau ua… kuv zoo cuag li tsis muaj sijhawm nrog Vajtswv ua ke. Tej zaug kuv tau tsis mloog Vajtswv ntau npaum li kuv yuav tau ua.

Tiamsis xyoo no, lo lus “mloog” pheej tshwm hauv kuv lub neej – maj mam. Kuv pom tias qhov no tsis yog ib lo lus ceeb toom, tiamsis yog ib lo lus ntuas puv npo kev hlub: tig lub siab mus rau ntawm Vajtswv thiab hnov Vajtswv lub suab tab tom hais lub sijhawm no.

Vajtswv txojlus ntuas peb txhua tus nyob hauv Yauhas 5:25:

“Kuv qhia tseeb rau nej hais tias lub sijhawm tabtom los thiab twb los txog lawm; thaum ntawd yog thaum uas cov neeg tuag lawm yuav hnov Vajtswv tus Tub lub suab hu, thiab txhua tus uas hnov yuav ciaj rov qab los”

Tsis yog tsuas ntseeg Vajtswv tas xwb ces tau lawm, tiamsis txhua hnub peb yuav tau mloog Vajtswv lub suab. Mloog yog ib feem uas yuav tsum muaj nyob rau hauv tus neeg muaj lub neej nplua mias hauv Nws – txhua hnub, txhua kaujruam. Yog Vajtswv ib tug menyuam, peb yuav tau kawm kom paub lub suab hais mos muag ntawd, thaum Vajtswv maj mam hu peb kom mus ze Vajtswv dua. Kuv hnov Daviv lub suab dhau ntawm tej lus yawg sau nyob hauv Ntawv Nkauj 95:7: “Nws yog peb tus Vajtswv; peb yog cov neeg uas nws tsomkwm, peb yog pab yaj uas nws pub zaub rau noj. Hnub no cia li mloog tej lus uas nws hais”

Koj puas tab tom cheem tsum kev txhawb zog? Ua tib zoo mloog. “Nws nyob ze txhua tus uas thov nws, thiab txhua tus uas muab siab npuab nws” (Ntawv Nkauj 145:18).

Koj puas tab tom tos Vajtswv tej lus coj kev? Cia li mloog. “Thaum nej taug kev mus sabxis lossis sablaug, nej yuav hnov nws lub suab hu tom qab tuaj hais tias, “Txojkev tseeb yog txoj no. Cia li taug txoj no ntag.” (Yaxayas 30:21).

Koj tsis paub yuav hais li cas thiaj yog? Cia li mloog. “Rau qhov thaum ntawd Vaj Ntsujplig tus Dawbhuv yuav qhia rau nej paub hais tias, nej yuav hais li cas thiaj zoo” (Lukas 12:12).

Tsis paub peb puas tu peb lub siab los txais yuav Vajtswv lub suab? Peb puas tseg sijhawm los mloog Vajtswv? Kom ua tau qhov no, peb yuav tau xub npaj yus lub caijnyoog, tig lub siab mus rau ntawm Vajtswv, nyob ze, kom thiaj yuav hnov Vajtswv lub suab mos muag (1 Vajntxwv 19:12).

Vajtswv tab tom tos peb mus nyob ze Vajtswv rau lub sijhawm ntsiag to hauv lub neej. Thaum ntawd, peb yuav txais tau kev kaj siab, tau taw kev, muaj kev txawj ntse thiab paub ntau yam yuav tau npaj rau txoj kev tom ntej. Thaum no, kuv tab tom kawm saib taus lub sijhawm nyob ntsiag to ntawd, ib yam li lub sijhawm muaj nqis ntawm Vajtswv. Kuv tos ntsoov Vajtswv yuav los thiab maj mam hais rau kuv lub siab, ib yam li Vajtswv tej lus tau cog tseg.

Cia siab tias peb sawv daws yuav tawm suab hais ib yam li tus sau Ntawv Nkauj: “Kuv tab tom mloog tus Tswv uas yog Vajtswv tej lus hais rau kuv; nws coglus hais tias yog peb tsis tig rov mus ua txhaum li tej neeg ruam, ces nws yuav pub peb cov uas yog nws haivneeg tau nyob kaj siab lug” (Ntawv Nkauj 85:8).

Thov caw nrog kuv peb thov Vajtswv ua ke: Tus Tswv nyob rau hauv lub ntiajteb maj nroos thiab nrov nroo ntws li no, thov ntuas kom kuv paub nres thiab ntsiag to mloog Koj lub suab. Thov pab kom kuv paub koj lub suab, txhua zaug uas kuv cheem tsum kev txhawb zog, thaum kuv tsis paub ua li cas, thaum kuv tsis paub yuav mus li cas ntxiv. Thov qhia rau kuv paub mloog Koj los ntawm kuv lub suab mos muag thiab muaj lub hlwb nthuav dav. Txhua hnub, kuv thov tig los cuag Koj, kom kuv hnov koj lub suab thiab mus raws li koj lub siab nyiam tseg rau kuv. Kuv thov hauv Tswv Yexus Khetos lub npe. Amees.

Cov kwv tij txhua tus, ntau zaug peb siv zog ua Vajtswv haujlwm, ua kom tau ntau txoj haujlwm rau Vajtswv, siv zog ua lub neej ncaj ncees- tiamsis peb ho hnov qab tseg peb lub siab los mloog Vajtswv lub suab. Zoo li no yuav ua li cas kom peb thiaj paub thiab ua raws li Vajtswv lub siab nyiam? Tseeb tiag, mloog yog ib feem tseem ceeb uas peb yuav tau xyaum hauv lub neej. Tsuas yog thaum hnov Vajtswv lub suab xwb, peb thiaj yuav xaiv yog txoj kev uas Vajtswv tau hu kom peb mus.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.